“Wanem Taem Nao Olketa Samting Hia Bae Happen?”

1. Olsem olketa aposol, wanem nao iumi laek for savve?

JESUS klosap finisim ministry bilong hem long earth, and olketa disaepol bilong hem barava laek for savve wanem nao bae happen long future. So tu-thri day bifor hem dae, fofala aposol askem hem olsem: “Wanem taem nao olketa samting hia bae happen and wanem nao saen wea bae showimaot iu stap and world hem gogo for finis?” (Matt. 24:3; Mark 13:3) Taem Jesus ansarem olketa, hem talem wanfala profesi wea storyim staka important samting. Diswan hem stap long Matthew chapter 24 and 25. Iumi barava interest long toktok bilong Jesus bikos iumi tu laek for savve wanem nao bae happen long future.

2. (a) Long olketa year wea go pas, iumi traem best for savve gud long wanem samting? (b) Wanem nao thrifala kwestin wea bae iumi ansarem?

² Long olketa year wea go pas, pipol bilong Jehovah studyim gud profesi bilong Jesus abaotem olketa last day, and askem God for helpem olketa minim datwan. Olketa traem best for savve gud long wanem taem nao profesi bilong Jesus bae kamap tru. Wei wea iumi minim disfala profesi hem kamap moa klia insaed olketa year wea go pas. Bae iumi ansarem thrifala kwestin hia wea showimaot diswan: Wanem taem nao datfala “big trabol” bae start? Wanem taem nao Jesus bae judgem “olketa sheepsheep” and “olketa goat”? Wanem taem nao Jesus bae kam?—Matt. 24:21; 25:31-33.

WANEM TAEM NAO DATFALA BIG TRABOL BAE START?

3. Long bifor, wanem nao tingting bilong iumi abaotem datfala big trabol?

³ Long bifor, iumi tingse datfala big trabol hem start long 1914, taem World War I hem start. Iumi tingse Jehovah “no letem datfala trabol gohed” taem datfala war hem finis long 1918, mekem olketa anointed Christian long earth savve preachim gud nius long pipol bilong evri kantri. (Matt. 24:21, 22) Then bihaen preaching waka hem finis, world bilong Satan bae finis. So iumi tingse datfala big trabol garem thrifala part. Hem start long 1914, then hem stop long 1918, and bae hem finis long Armageddon.

4. Wanem nao iumi luksavve long hem abaotem profesi bilong Jesus?

⁴ Then iumi luksavve wanfala part long profesi bilong Jesus abaotem olketa last day hem kamap tru tufala taem. (Matt. 24:4-22) Firstaem hem long first century C.E. long Judea. And mek-tu taem hem long taem bilong iumi, and hem bae affectim full world. Diswan helpem iumi for luksavve iumi mas changem wei wea iumi minim samfala nara part bilong disfala profesi.a

5. (a) Wanem hard taem nao start long 1914? (b) Datfala “hard taem” hem semsem witim wanem taem long first century C.E.?

⁵ Olsem example, datfala big trabol hem no start long 1914. Hao nao iumi savve long datwan? Olketa profesi long Bible showimaot datfala big trabol bae start taem olketa gavman attakim false religion. Hem no start witim wanfala war wea staka kantri faet insaed. So datfala war wea start long 1914 hem no start bilong datfala big trabol, bat hem “start bilong olketa hard taem wea mekem pipol wari tumas.” (Matt. 24:8) “Olketa hard taem” hia hem semsem witim hard taem wea kasem pipol long Jerusalem and Judea start long 33 C.E. go kasem 66 C.E.

6. Wanem nao bae showimaot datfala big trabol hem start?

⁶ Wanem nao bae showimaot datfala big trabol hem start? Jesus sei: “Bae iufala lukim datfala rabis samting wea kam for finisim Jerusalem hem standap long ples wea holy, olsem profet Daniel hem storyim. (For minim diswan, man wea read mas luksavve.) Long datfala taem nao, olketa wea stap long Judea mas ranawe go long olketa maunten.” (Matt. 24:15, 16) Long first century, datfala profesi kamap tru long 66 C.E. taem army bilong Rome attakim Jerusalem and temple bilong hem. Army bilong Rome nao “datfala rabis samting” wea “standap long ples wea holy,” wea minim ples wea olketa Jew sei hem holy. Disfala profesi bae kamap tru long mek-tu taem and hem bae affectim full world. United Nations nao “datfala rabis samting,” and olketa religion wea sei olketa Christian ting long olketa seleva olsem “ples wea holy.” United Nations bae attakim olketa religion hia and olketa nara part bilong Bigfala Babylon, wea Revelation 17:16-18 profesi abaotem. Taem olketa attakim Bigfala Babylon, datfala big trabol hem start nao.

7. (a) Hao nao olketa Christian long first century olketa sev? (b) Wanem nao bae happen long datfala big trabol wea bae kam?

⁷ Jesus sei tu: “[God] bae no letem datfala trabol gohed for longfala taem.” Long first century, diswan happen long 66 C.E. taem army bilong Rome stop for attakim Jerusalem and go bak. Then, olketa anointed Christian long Jerusalem and Judea ranawe mekem olketa “sev.” (Readim Matthew 24:22; Mal. 3:17) So hao nao bae datfala toktok bilong Jesus kamap tru long big trabol wea bae kam? Jehovah bae no letem attak bilong United Nations long false religion “gohed for longfala taem” mekem olketa bae no finisim tru religion tu. Diswan hem for sevem pipol bilong God.

8. (a) Wanem nao bae happen bihaen firstfala part bilong datfala big trabol? (b) Long wanem taem nao luk olsem last wan bilong 144,000 bae go long heven? (Lukim endnote.)

⁸ Bihaen United Nations attakim false religion, wea hem first part bilong datfala big trabol, wanem nao bae happen? Jesus sei samfala samting bae happen firstaem bifor Armageddon hem start. Bible storyim olketa samting hia long Ezekiel 38:14-16 and Matthew 24:29-31. (Readim.)b Bihaen evri samting hia happen, then Armageddon bae start. Armageddon hem last part bilong datfala big trabol, olsem taem Jerusalem distroe hem last samting wea happen for mekem datfala profesi kamap tru long first century. (Mal. 4:1) Datfala big trabol wea end bilong hem Armageddon bae winim eni trabol wea happen “start kam long taem world hem start, kam kasem distaem.” (Matt. 24:21) Bihaen hem finis, Christ bae rul olsem King for 1,000 year.

9. Hao nao profesi bilong Jesus abaotem datfala big trabol hem encouragem iumi?

⁹ Profesi abaotem datfala big trabol hem encouragem iumi. Hem mekem iumi sure nomata wanem hard samting kasem iumi long future, pipol bilong Jehovah, olsem wanfala grup, bae no dae long datfala big trabol. (Rev. 7:9, 14) And tu, iumi barava hapi bikos long Armageddon Jehovah bae pruvim hem nomoa fit for rul and bae Hem mekhae long holy nem bilong hem.—Ps. 83:18; Ezek. 38:23.

WANEM TAEM NAO JESUS BAE JUDGEM OLKETA SHEEPSHEEP AND OLKETA GOAT?

10. Long bifor, iumi tingse Jesus judgem olketa sheepsheep and olketa goat long wanem taem?

¹⁰ Distaem bae iumi storyim wanem taem nao Jesus bae judgem olketa sheepsheep and olketa goat. (Matt. 25:31-46) Long bifor, iumi tingse Jesus start judgem pipol olsem sheepsheep or goat long 1914 and hem gohed duim datwan insaed olketa last day. Iumi tingse Jesus judgem pipol wea no acceptim message abaotem Kingdom olsem olketa goat, and sapos olketa dae bifor datfala big trabol hem start, bae olketa no laef bak moa.

11. Why nao hem no stret for sei Jesus start for judgem pipol olsem sheepsheep or goat long 1914?

¹¹ Long 1995, Wastaoa magasin storyim wanfala change long wei wea iumi minim Matthew 25:31. Hem sei: “Taem Son bilong man hem kam witim olketa angel, hem bae garem bigfala paoa and hem bae sidaon long nambawan throne bilong hem.” Datfala Wastaoa sei Jesus kamap King long Kingdom bilong God long 1914, bat long datfala taem hem no kamap Judge for judgem “evriwan long full world.” (Matt. 25:32; comparem witim Daniel 7:13.) Tokpiksa abaotem olketa sheepsheep and goat hem storyim waka wea Jesus bae duim olsem Judge. (Readim Matthew 25:31-34, 41, 46.) From Jesus no startim yet waka bilong hem for judgem evriwan long full world long 1914, hem no stret for sei hem start for judgem pipol olsem sheepsheep or goat long 1914.c So wanem taem nao Jesus bae start for judge?

12. (a) Wanem taem nao Jesus bae start for duim waka for judgem evriwan long full world? (b) Olketa wanem samting nao Matthew 24:30, 31 and Matthew 25:31-33, 46 storyim wea klosap semsem?

¹² Profesi bilong Jesus abaotem olketa last day showimaot hem bae duim waka for judgem evriwan long full world stretawe bihaen God distroem false religion. Olsem iumi storyim long paragraf 8, Matthew 24:30, 31 storyim samfala samting wea bae happen long datfala taem. Datfala scripture storyim samfala samting wea klosap semsem witim samting wea Jesus storyim long tokpiksa abaotem olketa sheepsheep and olketa goat. Samfala samting wea klosap semsem nao: Son bilong man hem kam witim paoa and glory and witim olketa angel, evri tribe long earth and evriwan long full world stap front long Jesus, and olketa wea Jesus judgem olsem sheepsheep “apim hed bilong [olketa]” bikos olketa bae kasem “laef olowe.”d Olketa wea Jesus judgem olketa olsem goat “hitim chest bilong olketa seleva from olketa sorre tumas” bikos olketa savve olketa bae “dae and no laef moa.”—Matt. 25:31-33, 46.

13. (a) Wanem taem nao Jesus bae judgem pipol olsem sheepsheep or goat? (b) Datwan shud mekem iumi garem wanem tingting abaotem ministry?

¹³ Jesus bae kam for judgem evriwan long full world olsem sheepsheep or goat long taem bilong datfala big trabol. Then long Armageddon, wea hem last part bilong datfala big trabol, olketa wea olsem goat bae “dae and no laef moa.” Datwan shud mekem iumi garem wanem tingting abaotem ministry bilong iumi? Iumi luksavve preaching waka wea iumi duim hem barava important. Go kasem taem datfala big trabol hem start, pipol garem taem yet for change and start wakabaot long road for “kasem laef olowe.” (Matt. 7:13, 14) Hem tru, distaem samfala pipol garem wei olsem sheepsheep and samfala garem wei olsem goat. Nomata olsem, iumi mas no forget, taem wea Jesus bae judgem pipol olsem sheepsheep or goat hem long taem bilong datfala big trabol. So iumi mas gohed for storyim message abaotem Kingdom long staka pipol and givim chance long olketa for followim wanem olketa herem.

WANEM TAEM NAO JESUS BAE KAM?

14, 15. Wanem fofala scripture nao storyim taem wea Christ bae kam for judgem pipol?

¹⁴ Bae iumi gohed storyim profesi bilong Jesus abaotem olketa last day. Waswe, bae iumi mas changem hao iumi minim taem wea samfala nara part bilong disfala profesi bae kamap tru? Datfala profesi nao bae helpem iumi for ansarem datfala kwestin.

¹⁵ Long Matthew 24:29–25:46, main samting wea Jesus storyim hem olketa samting wea happen long olketa last day and long datfala big trabol. Long olketa verse hia, eitfala taem nao Jesus story abaotem taem wea hem bae “kam.” Jesus sei olsem abaotem taem bilong datfala big trabol: “Olketa bae lukim Son bilong man hem kam long olketa cloud.” “Iufala no savve long wanem taem nao Lord bilong iufala bae kam.” “Son bilong man bae kam long taem wea iufala nating tingim.” And long tokpiksa abaotem olketa sheepsheep and olketa goat, Jesus hem sei: “Son bilong man hem kam witim olketa angel.” (Matt. 24:30, 42, 44; 25:31) Fofala scripture hia storyim taem wea Christ bae kam for judgem pipol. Wanem nara fofala scripture nao story abaotem taem wea Jesus bae kam?

16. Wanem nao olketa nara scripture wea story abaotem taem wea Jesus bae kam?

¹⁶ Taem Jesus story abaotem datfala wakaman wea faithful and wise, hem sei: “Datfala wakaman bae hem barava hapi sapos Boss lukim hem duim olketa samting hia taem hem kam!” Long tokpiksa abaotem tenfala gele, Jesus sei: “Taem olketa go nomoa, man wea bae marit hem kam.” Long tokpiksa abaotem olketa silver selen, Jesus sei: “Bihaen longfala taem lelebet, boss hem kam bak.” Long datfala sem tokpiksa, boss hem sei: “Taem mi kam, bae mi kasem bak selen bilong mi.” (Matt. 24:46; 25:10, 19, 27) So wanem taem nao Jesus bae kam, wea fofala scripture hia storyim?

17. Long bifor, wanem nao iumi talem abaotem disfala toktok “taem hem kam” long Matthew 24:46?

¹⁷ Long bifor, olketa pablikeson bilong iumi sei fofala scripture long paragraf 16 story abaotem taem wea Jesus kam long 1918. Wanfala example, tingim toktok bilong Jesus abaotem “datfala wakaman wea faithful and wise.” (Readim Matthew 24:45-47.) Iumi tingse disfala toktok “taem hem kam” long verse 46 story abaotem taem wea Jesus kam for lukluk long spiritual saed bilong olketa anointed Christian long 1918. And tu, iumi tingse Jesus markem datfala wakaman for lukaftarem evri samting bilong hem long 1919. (Mal. 3:1) Bat iumi need for changem wei wea iumi minim wanem taem nao samfala part long disfala profesi bilong Jesus bae kamap tru. Why nao olsem?

18. Olketa scripture wea iumi storyim long profesi bilong Jesus showimaot hem bae kam long wanem taem?

¹⁸ Long olketa verse bifor Matthew 24:46, disfala toktok “kam” hem minim taem wea Jesus kam for judgem pipol long datfala big trabol. (Matt. 24:30, 42, 44) And olsem iumi storyim long paragraf 12, toktok long Matthew 25:31 abaotem taem wea Jesus hem “kam” hem minim sem samting tu. So hem fitim for sei Matthew 24:46, 47 wea storyim taem wea Jesus kam for markem datfala wakaman wea faithful and wise for lukaftarem evri samting bilong hem, bae hem kamap tru long taem wea Jesus kam long future long datfala big trabol. Profesi bilong Jesus showimaot eitfala scripture hia wea storyim taem wea Jesus kam olketa story abaotem taem bilong datfala big trabol wea hem bae kam for judge.

19. Wanem thrifala samting nao iumi storyim long disfala study, and olketa wanem kwestin nao bae iumi ansarem long olketa study bihaen?

¹⁹ So wanem nao iumi lanem? Wanem nao ansa bilong thrifala kwestin long paragraf 2? First samting, iumi storyim datfala big trabol hem no start long 1914, bat bae hem start taem United Nations attakim Bigfala Babylon. Then iumi storyim Jesus no start for judgem pipol olsem sheepsheep or goat long 1914, bat hem bae duim diswan long datfala big trabol. Last samting, iumi lanem taem wea Jesus markem datfala wakaman wea faithful and wise for lukaftarem evri samting bilong hem, hem no happen long 1919 bat bae hem happen long datfala big trabol. So taem wea thrifala samting hia bae happen, hem long taem bilong datfala big trabol. Waswe, wei wea iumi minim samfala nara part bilong tokpiksa abaotem wakaman wea faithful and wise hem change tu? Waswe, wei wea iumi minim samfala nara tokpiksa bilong Jesus wea kamap tru long olketa last day hem change tu? Bae iumi storyim ansa bilong olketa kwestin hia long olketa study bihaen.