Toktok Bilong Jehovah Hem Laef
Olketa Main Point From Buk Bilong Luke
LUK olsem Bible buk bilong Matthew hem for olketa Jew and Bible buk bilong Mark hem for olketa wea no Jew. Bat Bible buk bilong Luke hem for pipol long evri kantri. Luke raetem disfala buk long samting olsem 56-58 C.E. Hem storyim staka samting abaotem Jesus and waka wea hem duim.
Olsem wanfala doctor savve duim, Luke hem “lukluk gud long evri samting from taem wea olketa start.” Hem storyim olketa samting wea happen start long 3 B.C.E. go kasem 33 C.E. wea datwan hem 35 year. (Luke 1:3) Staka long olketa samting wea Luke storyim hem no stap long Bible buk bilong Matthew, Mark, and John.
START BILONG WAKA
Bihaen Luke storyim finis evri samting abaotem taem wea John Baptaesa and Jesus tufala born, hem storyim hao John start for preach long mek-15 year wea Tiberius Caesar hem rul, wea datwan hem long firstfala haf bilong year 29 C.E. (Luke 3:1, 2) John baptaesim Jesus long lastfala haf bilong datfala year. (Luke 3:21, 22) Long 30 C.E., ‘Jesus go bak long Galilee and start for teach long olketa synagogue.’—Luke 4:14, 15.
Jesus start for preach long Galilee. Hem tok olsem long staka pipol: “Long olketa nara taon tu mi mas talemaot gud nius abaotem kingdom bilong God.” (Luke 4:43) Hem tekem Simon wea hem man for fishing and olketa narawan tu witim hem. Hem talem olketa: “Start long distaem [iufala] bae fishing for kasem man.” (Luke 5:1-11; Matt. 4:18, 19) Mek-tu taem wea Jesus go preach long Galilee, 12-fala aposol nao go witim hem. (Luke 8:1) Long mek-thri taem hem sendem 12-fala hia “for preach abaotem kingdom bilong God and for healim pipol.”—Luke 9:1, 2.
Ansa for Olketa Bible Kwestin:
1:35—Waswe, God iusim egg cell bilong Mary for mekem hem babule? For pikinini bilong Mary kam from laen bilong Abraham, Judah, and David olsem God talem finis, God mas iusim egg cell bilong Mary for hem babule. (Gen. 22:15, 18; 49:10; 2 Sam. 7:8, 16) Jehovah iusim holy spirit bilong hem for mekem Mary babule, for hem bornem spesol son bilong hem. (Matt. 1:18) So luk olsem holy spirit aotem eni samting long egg cell bilong Mary wea nogud and start long datfala taem holy spirit protectim datfala baby long bele bilong Mary from eni samting wea maet spoelem datfala baby.
1:62—Zechariah hem no savve toktok, bat waswe hem earpas tu? Nomoa. Hem no earpas. Olketa “mekem saen” long Zechariah no from hem earpas, bat from olketa laek savve wanem nem nao hem laek givim long pikinini. Luk olsem hem herem samting wea waef talem abaotem nem bilong boy bilong tufala. Maet olketa narawan iusim saen for askem diswan long Zechariah. Samting wea showimaot Zechariah hem no earpas hem wei wea toktok bilong hem nomoa gud bak.—Luke 1:13, 18-20, 60-64.
2:1, 2—Hao nao disfala toktok “firstaem wea olketa kaontem pipol,” helpem iumi for savve long taem wea Jesus hem born? Taem Caesar Augustus hem rul, tufala taem nao olketa kaontem pipol. First wan hem long 2 B.C.E. wea mekem toktok long Daniel 11:20 kamap tru and mek-tu taem hem long 6 or 7 C.E. (Acts 5:37) Long tufala taem hia wea olketa kaontem pipol, Quirinius hem governor long Syria. So luk olsem hem governor tufala taem. From Luke storyim datfala firstaem wea olketa kaontem pipol, diswan minim Jesus hem born long 2 B.C.E.
2:35—Wanem nao mining bilong disfala toktok “longfala naef bae katem [Mary]”? Diswan minim Mary bae sorre tumas taem hem lukim staka pipol les for Jesus hem Messiah, and tu, bae hem sorre tumas long nogud wei wea Jesus hem dae.—John 19:25.
9:27, 28—Luke talem hao datfala taem wea lukluk bilong Jesus hem difren hem happen “eitfala day” bihaen hem promisim olketa disaepol hao samfala long olketa bae “no dae” go kasem taem hem kam long Kingdom, bat why nao Matthew and Mark talem hao datwan kamap “long mek-six day bihaen”? (Matt. 17:1; Mark 9:2) Luk olsem tufala nara day wea Luke kaontem, hem day wea Jesus talem datfala promis and day wea datfala promis kamap tru.
9:49, 50—Why nao Jesus no stopem wanfala man wea raosem olketa demon nomata man hia no gogo witim hem? Jesus no stopem man hia bikos Christian kongregeson no start yet. Nomata man hia no gogo witim Jesus hem savve showimaot faith long Jesus and raosem olketa demon.—Mark 9:38-40.
Samting wea Iumi Lanem:
1:32, 33; 2:19, 51. Mary hem tinghae long olketa samting wea happen and olketa toktok wea mekem profesi kamap tru. Waswe, iumi tu tinghae long olketa samting wea Jesus talem long profesi abaotem “world distaem bae finis” and markem witim olketa samting wea happen distaem?—Matt. 24:3.
2:37. Samting wea iumi lanem from wanem Anna duim hem mekem iumi for evritaem worshipim Jehovah, “gohed for prea,” and evritaem “hipap tugeta” long olketa Christian meeting.—Rom. 12:12; Heb. 10:24, 25.
2:41-50. Joseph tinghae long wei for worshipim God and lukaftarem physical and spiritual need bilong famili bilong hem. Samting wea hem duim showimaot gudfala wei for olketa dadi followim.
4:4. Iumi mas ting raonem Word bilong God evriday.
6:40. Man wea lanem olketa Bible study abaotem Word bilong God mas showimaot gudfala wei. Hem mas duim olketa samting wea hem talem olketa narawan for duim.
8:15. For iumi “no forget and showimaot wei for gohed strong” iumi mas minim, tinghae, and obeyim Word bilong God. Iumi mas prea and ting raonem samting wea iumi readim long Bible and olketa Bible pablikeson.
WAKA BILONG JESUS BIHAEN
Jesus sendem 70-fala for go firstaem long hem long olketa taon and ples long Judea. (Luke 10:1) Hem go “long olketa taon and olketa vilij for teach.”—Luke 13:22.
Faevfala day bifor Passover long 33 C.E., Jesus raedem donkey go long Jerusalem. Hem taem nao for disfala toktok wea hem talem long olketa disaepol for kamap tru: “Son bilong man mas kasem staka wei for safa and olketa olo man and olketa chief priest and olketa scribe bae les long hem, and bae hem dae, bat long mek-thri day hem bae laef bak.”—Luke 9:22, 44.
Ansa for Olketa Bible Kwestin:
10:18—Wanem nao Jesus minim taem hem tok olsem long 70-fala disaepol: “Mi lukim Satan hem foldaon finis olsem laetning from heven”? Jesus no minim olketa aotem finis Satan from heven. Jesus duim datwan bihaen hem kamap King long heven long 1914. (Rev. 12:1-10) Luk olsem Jesus storyim samting wea bae happen long future olsem hem happen finis for showimaot hao disfala samting bae barava happen.
14:26—Wanem nao hem minim for olketa follower bilong Jesus “heitim” relative bilong olketa? Long Bible disfala toktok “heitim” savve minim for lovem lelebet nomoa wanfala man or wanfala samting. (Gen. 29:30, 31) Olketa Christian “heitim” relative bilong olketa long wei wea olketa lovem Jesus winim relative bilong olketa.—Matt. 10:37.
17:34-37—Hu nao “olketa eagle” and wanem “body” nao olketa hipap raonem? Olketa wea olketa “tekem,” wea minim olketa wea sev, olketa nao olsem olketa eagle wea savve luk farawe. Taem wea Jesus hem stap wea man no lukim and spiritual kaikai wea Jehovah givim nao hem “body” wea olketa eagle hipap raonem.—Matt. 24:28.
22:44—Why nao Jesus barava safa tumas? Diswan hem from samfala samting. Jesus hem warim hao dae bilong hem olsem wanfala nogud man bae spoelem Jehovah God and nem bilong Hem. And Jesus savve tu hao hem mas gohed for duim stret samting for hem laef olowe and for olketa man kasem laef olowe.
23:44—Waswe, hem dark for thrifala hour from moon nao haedem sun? Nomoa. Moon savve haedem sun long taem wea hem niu moon nomoa, and no long taem wea hem full moon olsem long taem bilong Passover. Long datfala day wea Jesus dae, God nao mekem datfala day for hem dark.
Samting wea Iumi Lanem:
11:1-4. Taem iumi markem disfala prea witim datwan wea Jesus talem long Sermon Long Maunten wea tufala difren lelebet, diswan hem showimaot hao hem no stret for talem sem toktok evritaem long prea bilong iumi.—Matt. 6:9-13.
11:5, 13. Hem tru Jehovah laek for herem olketa prea bilong iumi, nomata olsem iumi mas gohed for prea and no givap.—1 John 5:14.
11:27, 28. Man savve kasem trufala hapi sapos hem gohed for duim samting wea God laekem and no from hem fren witim olketa long famili or from hem kasem staka material samting.
11:41. Wei for givim samting long narawan hem mas from iumi barava laek for duim datwan and iumi lovem olketa.
12:47, 48. Man wea garem bigfala waka for duim bat hem no duim datwan hem nogud winim man wea no savve or no minim gud waka bilong hem.
14:28, 29. Sapos iumi garem gudfala savve, iumi bae markem gud selen and no spendem olobaot.
22:36-38. Jesus no talem olketa disaepol for tekem eni samting for faet for protectim olketa. Bat from olketa disaepol holem naef long naet wea olketa arrestim Jesus, diswan minim Jesus fit for lanem olketa wanfala nambawan samting: “Olketa wea iusim naef for faet bae dae long naef for faet.”—Matt. 26:52.
[Piksa long page 31]
Joseph showimaot nambawan wei for olketa dadi followim
[Piksa long page 32]
Luke storyim staka samting abaotem Jesus and waka wea hem duim