Kwestin From Reader
Waswe, wei wea young girl Mary hem no perfect affectim Jesus long nogud wei taem hem grow insaed bele?
Bible sei olsem abaotem “wei wea Jesus hem born”: “Long taem wea olketa promisim mami bilong hem Mary for maritim Joseph, olketa luksavve hem babule thru long holy spirit bifor tufala marit.” (Matthew 1:18) Tru nao, holy spirit bilong God hem duim important part long wei wea Mary hem babule.
Bat, waswe long Mary? Waswe, egg cell bilong hem join witim wei wea hem babule? Taem iumi tingim promis wea God hem talem long Abraham, Isaac, Jacob, Judah, and King David—olketa laen dadi bilong Mary—datfala pikinini wea born mas barava kam from laen bilong olketa. (Genesis 22:18; 26:24; 28:10-14; 49:10; 2 Samuel 7:16) Sapos nomoa hao nao bae pikinini bilong Mary fit for kasem samting wea God promisim? Hem mas really son bilong hem.—Luke 3:23-34.
Angel bilong Jehovah hem kam long datfala young girl Mary and sei: “Iu no fraet, Mary, from God hem hapi long iu; and lukim! iu bae garem pikinini insaed long bele bilong iu and bornem wanfala son, and iu mas kolem nem bilong hem Jesus.” (Luke 1:30, 31) For pikinini start insaed bele hem needim egg for grow. Luk olsem Jehovah God kosim wanfala egg insaed bele bilong Mary for grow taem hem sendem kam laef bilong only-born Son bilong hem from heven kam long earth.—Galatians 4:4.
Waswe, pikinini wea grow long bele bilong wanfala woman wea no perfect savve perfect and no garem sin insaed body bilong hem? Hao nao wei for no perfect and perfect join tugeta affectim wei wea parents pasim samting go long pikinini? Remember hao God iusim holy spirit taem hem sendem kam laef force bilong son bilong hem and kosim pikinini for grow. Samting hia hem aotem eni wei for no perfect wea stap insaed cell bilong Mary, and long datfala wei mekem grow genetic design wea perfect from taem hem start.
Nomata wanem, iumi sure hao wei wea holy spirit bilong God waka long datfala taem mekem olketa purpose bilong God for win. Angel Gabriel explainim long Mary: “Holy spirit bae kam long iu, and paoa bilong Most Hae bae stap long iu. Dastawe, olketa bae kolem diswan wea bae hem born holy, Son bilong God.” (Luke 1:35) Tru nao, holy spirit bilong God hem olsem wanfala wall wea protectim datfala baby wea just start for grow mekem no eni wei for no perfect or nogud samting savve spoelem hem.
So, Jesus hem kasem perfect human laef bilong hem from Father bilong hem long heven, no long eni man. Jehovah “preparem wanfala body” for hem, and Jesus—from taem wea hem insaed bele and bihaen—hem barava “klin, separate from olketa sinner.”—Hebrews 7:26; 10:5.
[Piksa long page 19]
“Iu bae garem pikinini insaed long bele bilong iu and bornem wanfala son”