Wanfala Nomoa Talem Thankiu Long Jesus

Jesus go stap witim olketa disaepol long Ephraim long northeast long Jerusalem, mekem olketa enemy no lukim hem. Datwan spoelem plan bilong Hae Kot bilong olketa Jew for killim hem dae. (John 11:54) Bat taem for Pasova long 33 C.E. hem klosap, so Jesus mas gogo moa. Hem go pas long Samaria and go ap long Galilee. Diswan hem lastaem for hem go long there bifor hem dae.

Taem Jesus gogo long olketa vilij, hem meetim tenfala man wea garem leprosy. Samfala taem disfala sik savve isisi kaikaim samfala part long body bilong man olsem finger, toe, or ear. (Numbers 12:10-12) Law bilong God sei man wea garem leprosy mas singaot and sei: “Mi no klin, mi no klin!” and hem mas stap difren.—Leviticus 13:45, 46.

So tenfala man hia wea garem leprosy olketa no kam klosap long Jesus. Nomata olsem, olketa singaot and sei: “Jesus, Teacher, plis iu showimaot mercy long mifala!” Taem Jesus lukim olketa, hem sei: “Iufala go long olketa priest mekem olketa savve lukim iufala.” (Luke 17:13, 14) Datwan showimaot Jesus respectim Law bilong God wea sei olketa priest nao mas chekim man wea garem leprosy and talem sapos hem gud bak. Sapos olsem, hem savve stap moa witim nara pipol.—Leviticus 13:9-17.

Tenfala man hia barava bilivim Jesus garem paoa for duim mirakol. Olketa go lukim olketa priest nomata Jesus no healim olketa yet. From olketa garem faith long Jesus, body bilong olketa start for gud bak taem olketa gogo followim road!

Naenfala long olketa go for lukim olketa priest. Bat wanfala long olketa wea hem man bilong Samaria, hem go bak for lukaotem Jesus. Why nao olsem? Hem barava tinghae long wanem Jesus duim for hem. Hem “singaot big and praisem God,” bikos hem luksavve God nao mekem hem gud bak. (Luke 17:15) Taem hem faendem Jesus, hem nildaon front long hem and thankiu long hem.

Jesus sei long olketa wea stap witim hem: “Tenfala man nao olketa gud bak moa, so wea nao nara naenfala? Hao, disfala man wea hem no Jew, hem nomoa kam bak for praisem God?” Then hem sei long datfala man bilong Samaria: “Iu getap and iu go bikos faith bilong iu mekem iu gud bak nao ia.”—Luke 17:17-19.

Taem Jesus healim tenfala man wea garem leprosy, datwan showimaot hem kasem paoa from Jehovah God. Luk olsem wanfala long olketa wea Jesus healim maet garem hope tu for kasem laef. Distaem God no iusim Jesus for duim olketa mirakol for healim pipol. Bat sapos iumi biliv long Jesus, iumi savve garem hope for laef olowe. Waswe, iumi showimaot iumi tinghae olsem datfala man bilong Samaria?