KAVA SUBJECT
Waswe, Hem Gud for Iu Prea?
Maet iu laek for savve, ‘Sapos God savve long tingting bilong mi, wanem mi needim, and evri nara samting, why nao mi shud prea long hem?’ Datwan hem gudfala kwestin. Jesus sei God ‘savve finis long wanem iumi needim bifor iumi askem hem.’ (Matthew 6:8) King David bilong Israel luksavve long datwan tu. Hem sei: “Jehovah, mi no talem yet toktok mi laek talem bat iu savve finis wanem bae mi talem.” (Psalm 139:4) Sapos olsem, why nao iumi shud prea long God? For ansarem datfala kwestin, iumi bae storyim wanem Bible talem abaotem prea bilong olketa wea worshipim God.a
“Fren gud witim God and bae hem fren gud witim iufala.”—James 4:8
PREA HELPEM IUMI FOR FREN WITIM GOD
Bible sei Jehovahb God savve long evri samting, bat Bible showimaot hem no interest nomoa for garem information abaotem pipol wea worshipim hem. (Psalm 139:6; Rome 11:33) Nomata hem savve rememberim evri samting abaotem pipol, memory bilong hem no olsem memory bilong computer wea savve keepim information nomoa. God hem interest for savve long tingting bilong iumi bikos hem laekem iumi for fren witim hem. (Psalm 139:23, 24; James 4:8) Dastawe Jesus talem olketa disaepol bilong hem for prea nomata Dadi bilong hem savve finis long wanem olketa needim. (Matthew 6:6-8) Taem iumi evritaem storyim tingting bilong iumi long Creator, iumi savve fren gud witim hem.
Samfala taem, maet iumi no savve wanem for askem. Long taem olsem, God savve long wanem iumi needim nomata iumi no savve talemaot datwan and hem savve givim datwan long iumi. (Rome 8:26, 27; Ephesus 3:20) Taem iumi luksavve God helpem iumi, bae iumi laek for fren witim hem.
WASWE, GOD ANSAREM EVRI PREA?
Bible sei Olmaeti God ansarem prea bilong olketa wea faithful long hem, bat Bible talem tu why God no herem prea bilong samfala narawan. Olsem example, long taem wea plande pipol long Israel duim olketa raf samting, God talem Isaiah for talem olketa: “Nomata iufala talem plande prea, mi no herem iufala, bikos iufala killim dae staka pipol.” (Isaiah 1:15) So God bae no herem prea bilong olketa wea no followim olketa law bilong hem or wea ask for samting wea no stret.—Proverbs 28:9; James 4:3.
Bible sei tu: “Eni samting wea iumi askem wea followim tingting bilong God, God hem herem iumi.” (1 John 5:14) Waswe, datwan minim God bae givim evri samting wea olketa wea worshipim hem askem? Maet nomoa. Tingim Paul, hem askem God thrifala taem for finisim sik bilong hem. (2 Corinth 12:7, 8) Maet Paul garem eye problem and masbi hem wiki long datwan! Nomata Paul savve healim olketa narawan and hem resurrectim wanfala young man, hem mas gohed for deal witim sik bilong hem. (Acts 19:11, 12; 20:9, 10) God no ansarem prea bilong Paul long wei wea hem laekem, bat hem hapi for acceptim datwan.—2 Corinth 12:9, 10.
“Samting wea iumi barava sure long hem, hem olsem: Eni samting wea iumi askem wea followim tingting bilong God, God hem herem iumi.”—1 John 5:14
Hem tru, Bible storyim wei wea God ansarem prea bilong samfala long mirakol wei. (2 Kings 20:1-7) Bat hem no duim datwan staka taem. Samfala wea biliv long God feel nogud taem hem luk olsem God no ansarem prea bilong olketa. King David prea olsem: “Jehovah, iu forgetim mi nao?” (Psalm 13:1) Taem datfala faithful man David luksavve Jehovah lukaftarem hem staka taem, datwan helpem hem for trustim God. Long datfala prea bilong David, hem sei tu: “Mi trustim iu bikos iu faithful long mi.” (Psalm 13:5) Olketa wea worshipim God distaem tu savve olsem David and prea go kasem taem olketa luksavve God ansarem prea bilong olketa.—Rome 12:12.
WANEM GOD DUIM FOR ANSAREM PREA
God givim iumi wanem iumi needim.
Hem fitim for parents no evritaem givim wanem olketa pikinini askem long taem wea olketa askem datwan. God tu no evritaem ansarem prea bilong iumi long wei wea iumi laekem or long taem wea iumi laekem. Bat iumi savve sure Creator bilong iumi hem olsem dadi wea lovem iumi, and hem bae givim iumi wanem iumi needim long taem and wei wea fitim.—Luke 11:11-13.
Iumi savve kasem ansa for prea bilong iumi taem iumi lukluk long Bible
Maet God ansarem prea long wei iumi no tingim.
Waswe sapos iumi prea long God for finisim wanfala problem bilong iumi? From Jehovah no ansarem datfala prea long wei wea iumi laekem, waswe, bae iumi tingse hem no herem prea bilong iumi? Iumi shud no ting olsem, bat iumi shud trae for luksavve sapos God ansarem prea bilong iumi long wei wea iumi no tingim. Olsem example, maet wanfala fren bilong iumi duim samting for helpem iumi long taem wea iumi needim datwan. (Proverbs 17:17) Waswe, Jehovah nao iusim datfala fren for kam helpem iumi? Iumi savve kasem ansa for prea bilong iumi tu taem iumi lukluk long Bible. Maet iumi readim long Bible wanem iumi savve duim for deal witim problem bilong iumi.—2 Timothy 3:16, 17.
God savve iusim olketa fren for encouragem iumi taem iumi barava needim datwan
Samfala taem God no finisim problem bilong iumi, bat staka taem hem strongim pipol bilong hem for deal witim datwan. (2 Corinth 4:7) Olsem example, taem Jesus askem Dadi bilong hem for no letem hem kasem samting wea bae mekem pipol tok spoelem nem bilong Hem, Jehovah no duim datwan bat hem sendem wanfala angel for strongim Son bilong hem. (Luke 22:42, 43) Olsem tu, maet God iusim wanfala fren for encouragem iumi taem iumi barava needim datwan. (Proverbs 12:25) Hem gud for iumi luksavve long olketa nara wei wea God ansarem prea bilong iumi bikos hem savve duim olsem long wei wea iumi no tingim.
God ansarem samfala prea long taem wea fitim.
Bible sei “gogo” God bae duim samting for helpem olketa wea hambol. (1 Peter 5:6) So nomata maet hem luk olsem Jehovah no ansarem prea bilong iumi, datwan no minim hem no tingim iumi. From Creator bilong iumi savve long staka samting winim iumi, hem bae savve long best wei for helpem iumi.
“Iufala mas hambol for stap anda long God wea hem nambawan and garem bigfala paoa, mekem gogo, bae hem mekhae long iufala.”—1 Peter 5:6
Tingim disfala example: Smol boy bilong iu askem iu for wanfala baesikol. Waswe, bae iu stretawe peim baesikol for hem? Sapos iu luksavve hem smol yet for garem baesikol, maet iu no givim long hem long datfala taem. Bat gogo taem iu lukim hem fitim for hem garem baesikol, maet iu peim datwan for hem. Olsem tu, gogo, maet God givim iumi ‘olketa samting wea heart bilong iumi laekem’ sapos iumi gohed for prea abaotem datwan.—Psalm 37:4.
TRUSTIM HAO JEHOVAH HEREM OLKETA PREA
Bible encouragem olketa tru Christian for trustim hao God bae ansarem prea bilong olketa. Samfala sei hem no isi for duim datwan. Maet hem hard for iumi weit for God ansarem prea bilong iumi sapos iumi garem wanfala problem wea gohed for longtaem or wanfala samting wea no stret hem happen long iumi. Hem gud for iumi tingim wanem Jesus storyim abaotem wei for prea evritaem and no givap.
Jesus talem tokpiksa abaotem widow woman wea go olowe long nogud judge for helpem hem long wanfala problem. (Luke 18:1-3) Firstaem datfala judge les for helpem woman hia, bat gogo hem sei long hemseleva: “Mi mas stretem disfala problem for hem. Sapos nomoa, bae hem kam long mi olowe and gogo bae mi krangge nao.” (Luke 18:4, 5) Datfala judge duim nao wanem datfala widow laekem, bikos long Greek languis hem olsem datfala widow savve “punchim eye [bilong hem],” wea datwan minim woman hia savve “spoelem nem bilong hem.”c Sapos nogud judge wea no laekem eniwan for spoelem nem bilong hem helpem datfala poor widow, God wea tingim iumi bae barava laek for duim samting for olketa wea “singaot long hem evritaem for helpem olketa”! Jesus hem sei, God “bae kwiktaem duim stret samting for olketa.”—Luke 18:6-8.
“Gohed for ask and iufala bae kasem samting wea iufala ask for hem.”—Luke 11:9
Nomata samfala taem maet iumi taed for askem God for helpem iumi, iumi mas no givap. Taem iumi gohed for prea, datwan showimaot long God iumi barava laekem hem for helpem iumi. And tu, bae iumi lane for luksavve long ansa bilong God for olketa prea bilong iumi, and datwan bae helpem iumi for fren gud witim hem. Sapos iumi askem samting wea followim tingting bilong Jehovah and showimaot faith long hem, iumi savve trustim hao hem bae ansarem prea bilong iumi.—Luke 11:9.
a Sapos iumi laekem God for herem prea bilong iumi, iumi mas traem best for duim wanem hem laekem. Sapos iumi duim olsem, maet iumi lukim wei wea prea savve helpem iumi, olsem disfala article storyim. For savve moa, lukim chapter 17 long buk Wanem Nao Really Samting wea Bible Teachim? wea Olketa Jehovah’s Witness pablisim, or go long www.jw.org.
b Jehovah hem nem bilong God wea stap long Bible.
c Long taem bilong Bible, God sei olketa judge bilong Israel mas lukaftarem gud olketa widow and olketa pikinini wea no garem dadi and mami.—Deuteronomy 1:16, 17; 24:17; Psalm 68:5.