‘Olketa Pikinini, Obeyim Parents Bilong Iufala’
“Olketa pikinini, iufala wan mind witim Lord long wei for obeyim parents bilong iufala, from diswan hem stret samting for duim.”—EPHESIANS 6:1.
1. Hao nao wei for obey savve protectim iu?
MAET iumi laef distaem from iumi obey, bat olketa narawan wea no obey olketa no laef distaem. Obeyim wanem? Example long diswan, hem olketa warning from body bilong iumi wea God ‘wakem long nambawan wei.’ (Psalm 139:14) Iumi lukim olketa dark cloud, and herem thunder. Then, wind hem start for big tumas. Olketa wea savve long olketa danger samting abaotem diswan luksavve hao olketa saen hia hem warning for ranawe and haed from datfala big wind and thunder wea savve killim man dae.
2. Why nao olketa pikinini needim olketa warning, and why nao olketa shud obeyim parents?
2 Iufala wea young needim warning abaotem olketa danger samting, and parents bilong iufala garem responsibility for warnim iufala. Maet iu rememberim olketa bigman sei olsem long iu: “No tasim fire. Hem hot.” “No go swim long big river nogud iu draon.” “No sidaon andanit kokonat tree.” Bat sorre tumas staka pikinini garekil or dae tu from olketa no obey. Wei for obeyim parents “hem stret samting for duim.” Iu wise tu sapos iu duim datwan. (Proverbs 8:33) Nara scripture long Bible talem hao diswan mekem Lord Jesus Christ hem “hapi.” Tru nao, God hem komandim iu for obeyim parents.—Colossians 3:20; 1 Corinthians 8:6.
Wei for Obey Mekem Man Kasem Gud Samting for Olowe
3. For plande long iumi, wanem nao “datfala really laef,” and for olketa pikinini kasem datwan, wanem nao olketa mas duim?
3 Wei for obeyim parents protectim ‘laef bilong iu distaem,’ and tu, bae iu savve enjoyim datfala laef “wea bae kam,” wea hem nao “datfala really laef.” (1 Timothy 4:8; 6:19) For plande long iumi, datfala really laef hem for laef olowe long earth insaed long niu world bilong God, wea hem promisim for olketa wea faithful for obeyim olketa komandment bilong hem. Wanfala barava important komandment hia hem: “‘Honorim dadi and mami bilong iu’; wea hem nao firstfala komand wea garem promis wea sei: ‘For mekem evri samting gohed gud for iu and for mekem iu savve stap longfala taem long disfala earth.’” So sapos iu obeyim parents, bae iu hapi. Bae iu garem gudfala future, and bae iu garem chance tu for enjoyim laef olowe long paradaes earth!—Ephesians 6:2, 3.
4. Hao nao olketa pikinini savve honorim God and kasem gud samting from datwan?
4 Taem iu honorim parents long wei for obeyim olketa, iu honorim God tu from hem nao komandim iu for obeyim olketa. And tu, iu kasem gud samting from wei for duim olsem. Bible hem sei: “Mi, Jehovah, mi nao God bilong iufala, Datwan wea teachim iufala for kasem gud samting for iufala seleva.” (Isaiah 48:17; 1 John 5:3) Wanem gud samting nao iu kasem from wei wea iu obey? Diswan mekem mami and dadi hapi, and tu, olketa bae showimaot hapi bilong olketa long wei for duim olketa samting wea mekem iu hapi. (Proverbs 23:22-25) Bat barava important samting nao, wei wea iu obey hem mekem Dadi bilong iu long heven hapi, and bae iu kasem olketa nambawan samting from hem! Iumi bae lukim wei wea Jehovah blessim and protectim Jesus, wea sei olsem abaotem hemseleva: “Mi evritaem duim olketa samting wea mekem hem hapi.”—John 8:29.
Jesus—Man for Waka Hard
5. Why nao iumi fit for sei Jesus hem gudfala wakman?
5 Jesus hem firstborn pikinini bilong Mary. Joseph, dadi wea adoptim hem, hem wanfala carpenter. Jesus tu hem kamap wanfala carpenter, wea luk olsem hem lanem diswan from Joseph. (Matthew 13:55; Mark 6:3; Luke 1:26-31) Long tingting bilong iu, waswe, Jesus hem gudfala carpenter or nomoa? Taem hem stap long heven, bifor mami bilong hem wea hem young gele babule long mirakol wei, Jesus sei olsem: “Mi stap witim [God] and mi wanfala nambawan wakman, and mi nao kamap datwan wea hem laekem tumas evriday.” Taem Jesus stap long heven hem barava waka gud and God hem hapi long hem. Long tingting bilong iu, waswe, Jesus hem trae hard for waka gud long earth, and savve gud hao for duim waka bilong carpenter taem hem young yet?—Proverbs 8:30; Colossians 1:15, 16.
6. (a) Long tingting bilong iu, why nao maet taem Jesus hem pikinini hem garem olketa waka for duim long haos? (b) Long olketa wanem wei nao olketa pikinini savve followim example bilong Jesus?
6 For sure, taem Jesus hem smol pikinini samfala taem hem pleim olketa game, wea hem nao Bible sei olketa pikinini duim long taem bifor. (Zechariah 8:5; Matthew 11:16, 17) So Joseph teachim Jesus for kamap carpenter, nomata olsem, from hem firstborn long bigfala famili wea no garem plande samting, masbi hem garem olketa waka for duim long haos tu. Gogo, Jesus kamap man for preach and from hem barava busy for duim ministry hem no savve garem olketa samting wea nara pipol fit for garem. (Luke 9:58; John 5:17) Waswe, iu lanem eni samting from example bilong Jesus wea iu savve followim? Waswe, parents askem iu for wasim pleit, swipim haos, or duim olketa nara waka? Waswe, olketa encouragem iu for worshipim God long wei for go long olketa Christian meeting, and storyim wanem iu bilivim long nara pipol? Long tingting bilong iu, sapos parents bilong Jesus askem hem for duim olketa samting hia, wanem nao bae hem duim?
Man wea Studyim Gud Bible and Waka Hard for Teach
7. (a) Olketa hu nao maet Jesus gogo witim olketa long Passover? (b) Jesus stap long wea taem olketa narawan lusim Jerusalem for go bak long hom, and why nao hem stap long there?
7 Jehovah talem for evri boy and man long Israel for go long temple for worshipim Hem long taem bilong thrifala festival bilong olketa Jew. (Deuteronomy 16:16) Taem Jesus hem 12 year, maet evriwan long famili bilong hem go long Jerusalem for celebratem Passover. Maet olketa nara pikinini bilong Joseph and Mary tu go. Bat maet olketa wea go witim famili bilong Jesus tu hem sista bilong Mary, Salome, witim hasband bilong hem Zebedee and tufala son bilong tufala, James and John, wea bihaen tufala kamap olketa aposol.a (Matthew 4:20, 21; 13:54-56; 27:56; Mark 15:40; John 19:25) Taem olketa gogo bak long hom, maet Joseph and Mary tingse Jesus go witim olketa relative, so firstaem olketa no luksavve hem no stap. Bihaen thrifala day, taem Mary and Joseph faendem Jesus long temple, hem “sidaon midolwan olketa teacher and hem lisin long olketa and kwestinim olketa.”—Luke 2:44-46.
8. Wanem nao Jesus duim long temple, and why nao pipol sapraes?
8 Long wanem wei nao Jesus “kwestinim” olketa teacher? Olketa kwestin wea hem askem hem no for kasem ansa for samting hem laek for savve or for kasem samfala information. Greek word wea olketa iusim for diswan hem savve minim wei for kwestinim wanem narawan talem for pruvim samting. Tru nao, nomata long taem wea Jesus hem young, hem kamap wanfala man for studyim Bible wea mekem olketa teacher bilong olketa Jew for barava sapraes! Bible hem sei: “Olketa wea lisin long hem barava sapraes long savve bilong hem and olketa ansa wea hem givim.”—Luke 2:47.
9. Hao nao iu savve followim example bilong Jesus long wei for studyim Bible?
9 Long tingting bilong iu, hao nao wanfala boy olsem Jesus fit for mekem olketa teacher hia wea savve tumas for sapraes long savve wea hem garem abaotem Bible? Why hem garem savve olsem, hem bikos parents bilong hem fraet long God, and trainim hem gud long instruction from God taem hem baby yet. (Exodus 12:24-27; Deuteronomy 6:6-9; Matthew 1:18-20) Iumi savve sure hao taem Jesus hem young, Joseph tekem hem go long synagogue for herem olketa readim olketa scripture and explainim datwan. Waswe, iu tu garem parents wea studyim Bible witim iu and tekem iu go long olketa Christian meeting? Waswe, iu tinghae long wei wea olketa waka hard for duim datwan, olsem hao Jesus tu hem tinghae long hard waka bilong parents bilong hem? Waswe, iu sharem samting wea iu lanem witim olketa narawan, olsem hao Jesus duim tu?
Jesus Hem Obey
10. (a) Why nao parents bilong Jesus shud savve wea hem stap? (b) Wanem nambawan example nao Jesus showimaot for olketa pikinini?
10 Long tingting bilong iu, Mary and Joseph feel hao taem tufala faendem Jesus long temple bihaen thrifala day? Iumi sure, tufala hapi tumas. Bat Jesus sapraes hao parents bilong hem no savve wea nao hem stap. Tufala savve abaotem mirakol wei wea Jesus hem born. And tu, nomata tufala no savve long evri samting abaotem Jesus, masbi tufala savve long samfala samting abaotem waka hem bae duim long future for sevem pipol and kamap Ruler long Kingdom bilong God. (Matthew 1:21; Luke 1:32-35; 2:11) Dastawe Jesus askem tufala: “Iufala lukaotem mi for wanem ia? Iufala shud savve finis mi bae stap long haos bilong Dadi bilong mi.” Nomata olsem, Jesus obey and go bak witim parents bilong hem long hom bilong olketa long Nazareth. Bible hem sei: “Hem gohed for stap anda long tufala.” And tu, “mami bilong hem keepim gud evri toktok hia insaed long heart bilong hem.”—Luke 2:48-51.
11. Wanem samting nao iu savve lanem abaotem fasin for obey from example bilong Jesus?
11 Waswe, hem isi nomoa for iu followim example bilong Jesus, long wei for evritaem obeyim parents bilong iu? Or waswe, iu tingse plande taem olketa no minim olketa niu samting and niu wei wea kamap insaed long world distaem, and savve bilong iu winim bilong olketa? Hem tru, maet iu savve hao for iusim computer and savve long nara niu samting. Bat tingim Jesus wea mekem olketa teacher wea garem bigfala savve sapraes long “savve bilong hem and olketa ansa wea hem givim.” Maet iu agree hao hem garem bigfala savve winim iu. Nomata olsem, Jesus obeyim parents bilong hem. Diswan no minim hem evritaem agree witim samting tufala disaedem. Nomata olsem, “hem gohed for stap anda long tufala” long full taem wea hem teenager. Long tingting bilong iu, wanem nao iu savve lanem from example bilong hem?—Deuteronomy 5:16, 29.
Hem No Isi for Obey
12. Hao nao wei for obey savve sevem laef bilong iu?
12 Hem no evritaem isi for obey. Olsem example, tu-thri year go finis tufala smol gele akrosim wanfala busy road, winim wei for iusim bridge wea go ovarem road. Tufala sei olsem long wanfala fren bilong tufala wea gogo for iusim datfala bridge: “John, iu kam nomoa. Bae iu no kam witim mitufala?” Taem hem no laek followim tufala, wanfala mekfani olsem long hem: “Iu man for fraet nomoa ia!” Nomata John no fraet, hem sei: “Mi mas obeyim mami bilong mi.” Bihaen tu-thri minute nomoa, hem herem saond bilong tyre bilong trak wea trae for stop kwiktaem. Hem luk go daon and lukim wanfala car hem bangam tufala gele hia. Wanfala hem dae, and narawan barava garekil nogud so olketa mas katem leg bilong hem. Mami bilong tufala gele hia talem tufala for no akrosim datfala road bat for iusim bridge ovarem road. Hem sei olsem long mami bilong John: “Sapos tufala gele bilong mi obey olsem boy bilong iu, bae diswan no kasem tufala.”—Ephesians 6:1.
13. (a) Why nao iu shud obeyim parents? (b) Wanem taem nao maet hem no fitim for pikinini duim samting wea parents talem hem for duim?
13 Why nao God hem sei: ‘Olketa pikinini obeyim parents bilong iufala’? Taem iu obeyim parents, iu obeyim God. And tu, parents garem bigfala savve abaotem laef winim iu. Olsem example, faevfala year bifor datfala accident hem happen, pikinini bilong wanfala fren bilong mami bilong John, hem dae tu taem hem akrosim datfala sem road! Hem tru hao hem no evritaem isi for obeyim parents, bat God sei iu shud duim datwan. Bat sapos parents or olketa narawan talem iu for laea, steal, or duim samting wea God no laekem, iu mas “obeyim God olsem ruler winim olketa man.” Dastawe Bible hem sei: “Iufala wan mind witim Lord long wei for obeyim parents bilong iufala.” Diswan minim for obeyim parents long evri samting wea followim olketa law bilong God.—Acts 5:29.
14. Why nao hem moa isi for man wea perfect for obey, nomata olsem, why nao hem need for lanem wei for obey?
14 Waswe, iu tingse hem bae moa isi for obeyim parents sapos iu perfect olsem Jesus, wea hem “klin and separate from olketa sinner”? (Hebrews 7:26) Sapos iu perfect, bae iu no garem tingting for duim nogud samting olsem iu duim distaem. (Genesis 8:21; Psalm 51:5) Nomata Jesus tu bat mas lanem wei for obey. Bible hem sei: “Nomata [Jesus] hem wanfala Son, hem lanem fasin for obey from olketa samting wea mekem hem safa.” (Hebrews 5:8) Hao nao wei for safa helpem Jesus for lanem wei for obey, wea diswan hem no need for lanem taem hem stap long heven?
15, 16. Long wanem wei nao Jesus lanem wei for obey?
15 Joseph and Mary followim wanem Jehovah talem for protectim Jesus from eni nogud samting wea bae spoelem hem taem hem smol pikinini. (Matthew 2:7-23) Bat gogo, God no protectim Jesus. From Jesus barava kasem bigfala pain and wari tumas, Bible talem hao hem “barava prea strong from heart and askem samting . . . witim strongfala singaot and krae.” (Hebrews 5:7) Wanem taem nao datwan hem happen?
16 Datwan hem happen insaed last tu-thri hour wea Jesus laef long earth taem Satan trae hard for mekem hem no faithful. From olketa accusim Jesus and sei hem wanfala criminal Jesus barava wari nogud wei wea olketa ting olsem hem spoelem nem bilong Dadi bilong hem. From datwan, taem “hem gohed for prea [long garden bilong Gethsemane] swet bilong hem kamap olsem blood and foldaon long graon.” Tu-thri hour bihaen, Jesus ‘singaot strong witim krae’ from hem kasem bigfala pain and safa long datfala post wea hem hange long hem. (Luke 22:42-44; Mark 15:34) So long wei olsem, hem “lanem fasin for obey from olketa samting wea mekem hem safa,” and datwan hem mekem heart bilong Dadi bilong hem hapi. Distaem Jesus stap long heven, and hem minim gud hao plande taem iumi barava stragol for obey wea datwan savve mekem iumi for safa long samfala wei.—Proverbs 27:11; Hebrews 2:18; 4:15.
Lanem Wei for Obey
17. Hao nao iumi shud ting long wei for kasem discipline?
17 Taem dadi and mami disciplinem iu, diswan showimaot olketa lovem iu and laekem iu for kasem gudfala samting. Bible hem sei: “Evri dadi stretem boy bilong olketa.” Bae hem sorre samting sapos parents no garem bigfala love for iu, and from datwan olketa no interest for stretem iu. Long sem wei tu, Jehovah hem stretem iu from hem lovem iu. “Hem tru, taem iumi kasem discipline iumi no hapi and iumi feel sorre; bat bihaen, olketa wea kasem training from diswan bae garem frut bilong peace, wea hem nao raeteous fasin.”—Hebrews 12:7-11.
18. (a) Discipline wea man givim wea showimaot love hem showimaot wanem? (b) From samting wea iu lukim, wanem nao samfala wei wea discipline hem helpem pipol?
18 Wanfala king long Israel bifor, wea Jesus sei hem garem bigfala wisdom, storyim need for parents stretem pikinini long wei wea showimaot love. Solomon sei: “Man wea no iusim stik hem heitim son bilong hem, bat datwan wea lovem hem bae givim hem discipline.” Solomon sei tu hao wei wea man kasem datkaen discipline savve sevem soul bilong hem from dae. (Proverbs 13:24; 23:13, 14; Matthew 12:42) Wanfala Christian woman wea marit tingim hao taem hem pikinini, sapos hem noti long olketa Christian meeting, dadi bilong hem talem hao hem bae kasem discipline long haos. Taem hem tingim datwan distaem, hem garem bigfala love for dadi bilong hem bikos long discipline wea hem kasem long wei wea showimaot love wea mekem hem garem gudfala fasin.
19. Wanem nao main reason why iu shud obeyim parents bilong iu?
19 Iu mas tinghae long parents bilong iu sapos love muvim olketa for iusim taem and waka hard for disciplinem iu long wei wea showimaot love. Obeyim olketa, olsem Lord Jesus Christ tu obeyim mami and dadi bilong hem, Joseph and Mary. Bat obeyim olketa from Dadi bilong iu long heven, Jehovah God nao talem iu for duim datwan. Sapos iu duim datwan, bae iu kasem gudfala samting, and ‘evri samting bae gohed gud for iu and iu savve stap longfala taem long disfala earth.’—Ephesians 6:2, 3.
[Footnotes]
a Lukim Insight on the Scriptures, Volume 2, page 841, wea Olketa Jehovah’s Witness pablisim.
Hao Nao Bae Iu Ansa?
• Olketa wanem gud samting nao olketa pikinini savve kasem from wei for obeyim parents?
• Taem Jesus hem pikinini, hao nao hem showimaot example long wei for obeyim parents?
• Long wanem wei nao Jesus lanem wei for obey?
[Piksa long page 14]
Jesus wea twelv year savve gud long olketa scripture
[Piksa long page 16]
Hao nao Jesus lanem wei for obey from wei wea hem safa?