Olketa Christian Famili, “Gohed Wekap”

“Iumi mas gohed wekap and garem gudfala tingting.”​—1 THESS. 5:6.

1, 2. For famili gohed wekap long spiritual wei, wanem nao olketa mas duim?

TAEM aposol Paul raet long olketa Christian long Thessalonica, hem story abaotem “bigfala day bilong Jehovah.” Hem sei: “Olketa brata, iufala no stap long darkness. Man wea stap long darkness bae seke long datfala day, olsem man for steal bae seke taem daylaet kasem hem. Iufala evriwan olketa son bilong laet and son bilong day. Iumi no pipol bilong naet or pipol bilong darkness. So iumi mas no olsem olketa narawan wea sleep nomoa, bat iumi mas gohed wekap and garem gudfala tingting.”​—Joel 2:31; 1 Thess. 5:4-6.

² Disfala kaonsel barava fitim tu olketa Christian wea stap long taem wea “world hem gogo for finis.” (Dan. 12:4) From world bilong Satan klosap for finis, Satan waka hard for mekem olketa wea worshipim tru God for no gohed faithful long Jehovah. Dastawe hem important for iumi followim kaonsel wea Paul talem for gohed wekap long spiritual wei. For Christian famili gohed wekap, hem important for each wan duim waka wea Jehovah givim long olketa. So wanem waka nao hasband, waef, and olketa young wan mas duim for helpem famili “gohed wekap” long spiritual wei?

Olketa Hasband, Followim ‘Nambawan Man for Lukaftarem Sheepsheep’

3. Olsem 1 Timothy 5:8 talem, wanem nao waka bilong hed bilong famili?

³ Bible sei: “Man hem hed bilong woman.” (1 Cor. 11:3) From man hem hed bilong famili, wanem nao waka bilong hem? Bible sei: “Sapos eniwan hem no provaedem need bilong olketa wea hem lukaftarem, and main wan nao olketa wea stap long haos bilong hem, hem showimaot hem no garem faith and hem worse winim man wea no biliv.” (1 Tim. 5:8) Tru tumas, man shud provaedem wanem famili needim. Bat for helpem famili gohed wekap long spiritual wei, hem mas duim nara samting tu winim wei for waka for selen. Hem mas helpem evriwan long famili for fren gud witim God. (Prov. 24:3, 4) Hao nao hem savve duim datwan?

4. Wanem nao hasband savve duim for helpem evriwan long famili fren gud witim God?

⁴ From “hasband hem hed bilong waef olsem Christ hem hed bilong kongregeson,” hem shud studyim and followim wei wea Jesus lukaftarem kongregeson. (Eph. 5:23) Taem Jesus stap long earth, hem fren gud witim olketa wea followim hem. (Readim John 10:14, 15.) Wanem nao hasband savve duim for helpem evriwan long famili fren gud witim God? Hem nao for studyim wanem Jesus talem and duim olsem “nambawan man for lukaftarem olketa sheepsheep,” and “followim gud” example bilong hem.—1 Pet. 2:21.

5. Nambawan man for lukaftarem sheepsheep hem savve long wanem samting abaotem kongregeson?

⁵ Tingim wanem hasband savve lanem from example bilong Jesus. Man for lukaftarem sheepsheep hem savve gud long olketa sheepsheep and olketa tu savve gud long hem and trustim hem. Olketa heresavve long voice bilong hem and obeyim hem. Jesus sei: “Mi savve long olketa sheepsheep bilong mi and olketa savve long mi tu.” Hem barava savve gud long evriwan long kongregeson. Greek word wea iumi transleitim “savve” hem minim for “savve gud long man wanwan.” Tru tumas, Jesus savve gud long evri sheepsheep. Hem savve wanem olketa needim, wik point bilong olketa, and strong wea olketa garem. Hem savve long evri samting abaotem olketa. Olketa sheepsheep tu savve long hem and trustim wei wea hem leadim olketa.

6. Wanem nao hasband savve duim for followim example bilong Jesus?

⁶ For followim example bilong Christ, hasband mas tingim hemseleva olsem man for lukaftarem sheepsheep and olketa wea hem lukaftarem olsem sheepsheep bilong hem. Hem shud trae hard for savve gud long evriwan long famili. Waswe, hasband fit for duim datwan? Ia, hem savve duim sapos hem story gud witim evriwan long famili, lisin long olketa, and leadim famili. Hem shud tingim olketa tu taem hem disaedem samting saed long Famili Worship, olketa meeting, preaching waka, and hapitaem. Taem hasband lanem wanem Bible talem and savve gud long evriwan long famili, bae hem showimaot gudfala example and disaedem gud samting for olketa. Sapos hem duim olsem, olketa long famili bae trustim hem and hem bae hapi bikos olketa bae gohed for worshipim tru God.

7, 8. Wanem nao hasband savve duim for famili mekem hem followim example bilong Nambawan man for lukaftarem sheepsheep?

⁷ Man wea lukaftarem gud olketa sheepsheep bilong hem, hem lovem olketa tu. Taem iumi studyim olketa Gospel abaotem laef and ministry bilong Jesus, bae iumi tinghae long wei wea Jesus lovem olketa disaepol. Hem “dae for sevem olketa sheepsheep.” Olketa hasband shud followim example bilong Jesus for showimaot love long famili. Hasband wea laek for mekem God hapi bae no bossim waef bat bae gohed for lovem waef “olsem Christ tu hem lovem kongregeson.” (Eph. 5:25) Hem bae talem toktok wea showimaot hem kaen and tingim waef, bikos hem mas respectim waef.—1 Pet. 3:7.

⁸ Taem Christian dadi teachim olketa young wan, hem mas strong for followim olketa Bible principle. Bat hem mas showimaot love long olketa pikinini. Taem hem givim discipline hem shud duim datwan long wei wea showimaot love. Samfala young wan maet no kwiktaem for luksavve long wanem olketa shud duim. Long taem olsem, dadi mas patient witim pikinini. Taem olketa hasband and dadi gohed for followim example bilong Jesus, bae datwan protectim famili and olketa bae stap gud. Famili bae gohed gud long spiritual wei olsem man wea raetem psalm talem.​—Readim Psalm 23:1-6.

9. Olsem Noah, wanem waka nao olketa Christian hasband garem, and wanem nao bae helpem olketa for duim datwan?

⁹ Nara gud example wea olketa Christian famili savve followim hem Noah. Noah tu stap long taem wea Jehovah plan for finisim pipol “wea no followim [Hem].” Taem Jehovah mekem “datfala flood hem kam,” hem sevem Noah and “nara sevenfala pipol tu.” (2 Pet. 2:5) Noah garem waka for helpem famili bilong hem stap laef taem Flood hem kam. Long olketa last day distaem, olketa Christian hasband tu garem sem waka. (Matt. 24:37) Hem important tumas for olketa studyim example bilong ‘Nambawan man for lukaftarem sheepsheep’ and traem best for followim hem!

Olketa Waef, ‘Strongim Famili Bilong Iu’

10. Wanem nao hem minim for waef stap anda long hasband?

¹⁰ Aposol Paul sei: “Olketa waef mas stap anda long hasband bilong olketa olsem olketa stap anda long Lord.” (Eph. 5:22) Samting wea Paul talem no daonem waka bilong olketa woman. Bifor God wakem firstfala woman, Eve, hem sei: “Hem nogud for man gohed for stap seleva. Mi bae wakem samwan for helpem hem wea barava fitim hem.” (Gen. 2:18) Waka wea waef garem for “helpem” and sapotim hasband for lukaftarem famili hem spesol waka wea iumi tinghae long hem.

11. Wanem nao gudfala waef savve duim for “strongim famili”?

¹¹ Gudfala waef duim gud samting for famili bilong hem. (Readim Proverbs 14:1.) Woman wea krangge no respectim wei wea hasband hem hed, bat woman wea wise barava respectim datfala arrangement. Hem stap anda long hasband and hem no olsem pipol long world wea laek followim tingting bilong olketa seleva and no laek for obey. (Eph. 2:2) Waef wea krangge savve tok nogud abaotem hasband bilong hem, bat woman wea wise hem waka hard for mekem olketa pikinini and narawan for respectim hasband. Hem no argue and no gohed askem samting wea hem laekem bikos hem luksavve datwan savve mekem olketa narawan for no respectim hasband. Woman wea krangge savve spoelem selen wea famili waka hard for kasem. Bat gudfala waef no olsem. Hem story gud witim hasband abaotem wei for iusim selen and hem careful for no spoelem datwan. Hem no putim hevi long hasband for waka ovataem.

12. Wanem nao waef savve duim for helpem famili “gohed wekap”?

¹² Gudfala waef helpem famili “gohed wekap” long spiritual wei. Hem helpem hasband for teachim olketa pikinini abaotem Jehovah. (Prov. 1:8) Hem sapotim arrangement bilong famili for duim Famili Worship. Taem hasband givim kaonsel and stretem olketa pikinini, waef sapotim wanem hem talem. Hem barava difren from woman wea krangge wea mekem olketa pikinini safa long physical and spiritual wei!

13. Why nao hem important for waef sapotim wanem hasband duim long kongregeson and organization?

¹³ Wanem nao tingting bilong gudfala waef abaotem waka wea hasband duim long kongregeson? Hem hapi tumas long datwan! Nomata hasband hem ministerial servant, elder, or maet hem member bilong Hospital Liaison Komiti or Kingdom Hall Operating Komiti, hem hapi long privilege wea hasband garem. Hem tru, maet waef need for sakrifaesim samfala samting. Wanem hem talem and duim for sapotim hasband bae showimaot datwan. Bat waef luksavve wei wea hasband busy for duim waka long kongregeson and organization helpem evriwan long famili for gohed wekap long spiritual wei.

14. (a) Wanem samting nao maet no isi long waef, bat wanem nao savve helpem hem? (b) Wanem nao waef savve duim for mekem evriwan long famili hapi and stap gud?

¹⁴ Nomata waef sapotim hasband, maet hem no isi long waef taem hasband disaedem samting wea hem no agree witim. Nomata olsem, waef showimaot “wei for kwaet and hambol” and helpem hasband long wanem hem disaedem. (1 Pet. 3:4) Gudfala waef trae for followim example bilong olketa bifor, olsem Sarah, Ruth, Abigail, and Mary mami bilong Jesus. (1 Pet. 3:5, 6) Waef followim tu example bilong olketa olo woman distaem wea “holy long wei bilong olketa.” (Titus 2:3, 4) Taem waef lovem and respectim hasband, tufala bae stap gud and evriwan long famili bae hapi and stap gud tu. Hasband wea lovem Jehovah and waka hard long kongregeson barava tinghae long waef wea sapotim hem!​—Prov. 18:22.

Olketa Young Wan, ‘Gohed Tingim Samting wea Iu No Savve Lukim’

15. Wanem nao olketa young wan savve duim for mekem famili “gohed wekap”?

¹⁵ Wanem nao iufala young wan savve duim for mekem famili bilong iu “gohed wekap” long spiritual wei? Tingim prize wea Jehovah laek givim long iu. Maet taem iu smol, dadi and mami showim iu olketa piksa abaotem Paradaes. Taem iu start for big, maet olketa iusim Bible and olketa buk bilong iumi for helpem iu tingting abaotem laef olowe long niu world. Taem iu busy for worshipim Jehovah and garem olketa spiritual goal, bae datwan helpem iu for “gohed wekap.”

16, 17. Wanem nao olketa young wan savve duim for winim datfala resis for kasem laef olowe?

¹⁶ Tingim wanem aposol Paul talem long 1 Corinthians 9:24. (Readim.) Hem comparem worship bilong iumi witim wanfala resis, wea prize nao hem laef olowe. Taem iu ran long datfala resis, iu mas garem tingting for winim datwan. Duim olketa samting long laef wea bae mekem iu tekem datfala prize. Staka pipol busy tumas for kasem olketa material samting gogo olketa no tingim nao datfala prize. Datwan hem krangge samting! Wei for kasem olketa material samting bae no mekem iumi for barava hapi. Olketa samting wea iumi peim bae stap for lelebet taem nomoa. Bat iu mas gohed for tingting abaotem “samting wea iu no savve lukim.” Why nao olsem? Bikos “samting wea iumi no lukim hem stap for olowe.”​—2 Cor. 4:18.

¹⁷ “Samting wea iumi no lukim” hem olketa blessing wea iumi bae kasem taem Kingdom rulim iumi. Duim olketa samting wea bae mekem iu kasem olketa blessing hia. Wei for iusim laef bilong iu for worshipim Jehovah nao bae mekem iu barava hapi. Iu savve garem olketa goal wea iu savve kasem distaem and olketa bigfala goal wea iu savve kasem long future.a Wei for garem olketa spiritual goal olsem savve helpem iu gohed worshipim Jehovah and kasem datfala prize, laef olowe.​—1 John 2:17.

18, 19. Wanem nao savve helpem young wan for luksavve sapos hem fren gud witim Jehovah?

¹⁸ Iufala young wan, firstfala samting wea savve helpem iu for kasem laef olowe nao hem for fren gud witim Jehovah. Waswe, iu duim datwan finis? Tingim olketa kwestin hia: ‘Waswe, mi wanfala spiritual man, or mi duim olketa spiritual samting nomoa long taem wea dadi and mami duim datwan? Waswe, mi garem olketa fasin wea God hapi long hem? Waswe, mi trae hard for garem gudfala schedule mekem mi gohed duim olketa spiritual samting olsem wei for prea evritaem, study seleva, go long olketa meeting, and duim preaching waka? Waswe, mi trae hard for fren gud witim God?’​—Jas. 4:8.

¹⁹ Tingim example bilong Moses. Nomata Moses stap long ples wea garem difren kastom, hem laekem pipol for savve long hem olsem man wea worshipim Jehovah winim wei for olketa kolem hem son bilong dota bilong Pharaoh. (Readim Hebrews 11:24-27.) Iufala young wan tu need for disaed strong for worshipim Jehovah and faithful long hem. Taem iu duim olsem, bae iu barava hapi, stap gud, and garem hope for kasem “datfala tru laef.”​—1 Tim. 6:19.

20. Long resis for kasem laef olowe, hu nao bae tekem prize?

²⁰ Long olketa resis bifor, wanfala man nomoa savve win. Bat hem no olsem long resis for kasem laef olowe. God “laekem tumas for evri difren kaen man mas sev and for garem stretfala savve abaotem olketa tru teaching.” (1 Tim. 2:3, 4) Staka long bifor faithful and no givap for ran long datfala resis, and staka distaem ranran witim iumi. (Heb. 12:1, 2) Evriwan wea no givap nao bae tekem prize. So disaed strong for winim datfala resis and tekem prize!

21. Wanem nao bae iumi storyim long next study?

²¹ “Bigfala day bilong Jehovah” bae kam. (Mal. 4:5) Olketa Christian famili shud no seke long datfala day. Hem important for each wan long famili duim waka wea Jehovah givim. Wanem moa iu savve duim for gohed wekap long spiritual wei and fren gud witim God? Next study bae storyim thrifala samting wea bae helpem evriwan long famili gohed fren gud witim God.

[Footnote]

Wanem Nao Iumi Lanem?

• Why nao hem important for olketa Christian famili “gohed wekap”?

• Wanem nao hasband savve duim for followim example bilong Nambawan man for lukaftarem sheepsheep?

• Wanem nao gudfala waef savve duim for sapotim hasband?

• Wanem nao young wan savve duim for mekem famili gohed wekap long spiritual wei?

[Piksa long page 9]

Hasband barava tinghae long waef wea sapotim hem