Waswe, Iu Savve Finis?
Wanem taem nao olketa man wea studyim olketa star kam for lukim Jesus?
Long Gospel bilong Matthew, hem sei hao “olketa man from east wea studyim olketa star” olketa kam for lukim Jesus and tekem kam olketa present for hem. (Matthew 2:1-12; footnote) Bible no talem haomas man hia, wea Bible kolem “magi,” kam lukim Jesus taem hem pikinini, and no eni pruv stap for showimaot thrifala nao kam olsem staka pipol bilivim. Nem bilong olketa tu no stap insaed Bible.
Datfala New International Version Study Bible hem sei olsem abaotem Matthew 2:11: “Nomata plande pipol sei olketa Magi kam for lukim Jesus long naet wea hem born, datwan hem no tru bikos olketa shepherd nomoa lukim hem long datfala naet. Olketa Magi hia kam for lukim Jesus samfala month bihaen hem born, long ‘haos’ bilong hem taem hem ‘pikinini’ nao.” Diswan hem tru taem iumi tingim hao Herod hem laek killim dae datfala smol pikinini and hem givim komand for killim dae evri boy long full Bethlehem and olketa ples wea stap klosap wea age bilong olketa no winim tu year. Hem markem datfala age “from samting wea hem faendemaot from olketa man wea studyim olketa star.”—Matthew 2:16.
Sapos olketa man wea studyim olketa star kam lukim Jesus long naet wea hem born and givim hem gold and olketa nara present wea kostim staka selen, bae hem hard for Mary offerim tufala bird nomoa olsem sakrifaes taem hem tekem Jesus long temple long Jerusalem 40 day bihaen hem born. (Luke 2:22-24) Wei for givim tufala bird olsem sakrifaes hem arrangement insaed long Law for olketa poor pipol nomoa wea no garem selen for peim wanfala pikinini sheepsheep. (Leviticus 12:6-8) Bat maet famili bilong Jesus iusim olketa present hia for helpem olketa peim olketa samting wea olketa needim taem olketa stap long Egypt.—Matthew 2:13-15.
Why nao Jesus kasem grev bilong Lazarus fofala day bihaen hem dae?
Tru nao, luk olsem Jesus hem min for duim datwan. Why nao iumi fit for sei olsem? Tingim story wea stap long Bible buk bilong John chapter 11.
Lazarus hem stap long Bethany and hem wanfala fren bilong Jesus. Taem Lazarus kasem bigfala sik, olketa sista bilong hem sendem toktok go long Jesus. (Verse 1-3) Long datfala taem, Jesus hem stap long ples wea hem mas wakabaot samting olsem tufala day bifor hem kasem Bethany. (John 10:40) Luk olsem Lazarus hem dae nao taem Jesus herem datfala nius. Wanem nao Jesus duim? Jesus “stap for tufala day long datfala ples” bifor hem go for Bethany. (Verse 6, 7) Dastawe hem kasem grev fofala day bihaen Lazarus hem dae bikos hem stap tufala day long datfala ples and hem wakabaot for tufala day.—Verse 17.
Bifor datwan, Jesus hem duim finis tufala resurrection. Hem resurrectim wanfala man stretawe bihaen hem dae and narawan long datfala sem day wea man hem dae. (Luke 7:11-17; 8:49-55) Waswe, fitim Jesus for resurrectim samwan wea dae finis for fofala day and wea body bilong hem start for rotten? (Verse 39) Interesting samting nao, wanfala research buk abaotem Bible hem talem hao olketa Jew bilivim “man wea dae finis for fofala day” no garem hope nao, “bikos body bilong hem start for rotten and soul bilong hem wea olketa tingse hem float antap long body for thrifala day, hem go nao.”
Sapos olketa wea hipap long grev bilong Lazarus daotem resurrection, olketa klosap for lukim nao paoa wea Jesus garem for winim dae. Taem Jesus standap front long grev hia, hem singaot olsem: “Lazarus, kamaot!” Then, “disfala man wea dae finis hem kamaot nao.” (Verse 43, 44) Resurrection hem trufala hope for olketa man wea dae finis and hem no datfala laea teaching wea plande pipol sei soul hem gohed for laef bihaen man hem dae.—Ezekiel 18:4; John 11:25.