“Iu Kam Followim Mi”

“Sapos eniwan laek followim mi, hem mas givim laef bilong hem for God and hem mas karem post wea mi karem, and gohed followim mi.”​—LUKE 9:​23.

1, 2. (a) Wanem nao Jesus askem pipol for duim? (b) Wanem nao iu disaed for duim?

TAEM Jesus klosap finisim ministry bilong hem, hem preach long Perea, wanfala ples wea stap klosap long Jordan River, long northeast long Judea. Long there, wanfala young man kam askem Jesus wanem nao hem mas duim mekem hem savve laef olowe. From Jesus luksavve man hia duim evri samting wea Law bilong Moses talem, hem askem datfala man for duim wanfala spesol samting. Jesus sei long hem: “Go salem olketa samting bilong iu and givim selen hia long pipol wea poor, mekem iu garem riches long heven, and iu kam followim mi.” (Mark 10:21) Tingim datwan! Jesus askem man hia for followim hem, from Jesus nao spesol Son bilong Barava Haefala God!

² Nomata datfala young man no laek followim Jesus, olketa nara man hapi for duim datwan. Long narataem bifor, Jesus sei long Philip: “Iu kam followim mi.” (John 1:​43) Philip herem toktok bilong Jesus and bihaen hem kamap wanfala aposol. Jesus askem Matthew tu for kam followim hem, and Matthew duim datwan. (Matt. 9:9; 10:​2-4) Tru tumas, Jesus talem sem samting tu long evriwan wea laek duim stret samting. Hem sei: “Sapos eniwan laek followim mi, hem mas givim laef bilong hem for God and hem mas karem post wea mi karem, and gohed followim mi olowe.” (Luke 9:​23) So eniwan wea laek followim Jesus savve followim hem. Waswe, iu laek followim hem? Staka long iumi followim Jesus distaem, and taem iumi go preaching, iumi askem pipol for kam followim hem tu.

3. Wanem nao bae helpem iumi for gohed followim Jesus?

³ Bat sorre tumas, samfala wea firstaem laek lanem truth long Bible, olketa stop for study nao. Olketa isisi “go difren” and olketa no followim Jesus nao. (Heb. 2:1) Wanem nao bae helpem iumi for no olsem? Hem gud for iumi tingim olketa kwestin hia: ‘Wanem nao mekem mi laek followim Jesus? Wanem nao mi mas duim for showimaot mi followim hem?’ Taem iumi tingim ansa long tufala kwestin hia, datwan bae helpem iumi for gohed followim Jesus. Iumi bae laek helpem tu olketa narawan for followim Jesus.

Why Nao Iumi Followim Jesus?

4, 5. Why nao Jesus fit for leadim iumi?

⁴ Profet Jeremiah talem olsem: “Jehovah, mi barava luksavve man no fit for leadim laef bilong hemseleva. Hem no fitim man for leadim gogo bilong hemseleva.” (Jer. 10:23) Olketa samting wea happen bifor, kam kasem distaem hem showimaot toktok bilong Jeremiah hem barava tru. Samting wea happen long world distaem barava showimaot olketa man no fit for rulim olketa seleva. Iumi disaed for followim Jesus bikos iumi luksavve hem barava fit for leadim iumi winim eni nara man long earth. Tingim samfala samting wea showimaot why nao Jesus fit for leadim iumi.

⁵ First wan, Jehovah nao chusim Jesus for kamap Messiah for leadim iumi. Jehovah nomoa savve hu nao barava fit for leadim iumi olketa man! Mek-tu samting, Jesus garem olketa wei wea iumi tinghae long hem and laek followim. (Readim Isaiah 11:​2, 3.) Hem showimaot perfect example for iumi followim. (1 Pet. 2:​21) Mek-thri samting, Jesus barava tingim pipol wea followim hem. Hem showimaot diswan taem hem dae for olketa. (Readim John 10:14, 15.) And Jesus hem lukaftarem olketa sheepsheep long kaenfala wei. Hem helpem iumi for hapi distaem and for kasem nambawan laef long future. (John 10:10, 11; Rev. 7:​16, 17) Olketa samting hia and samfala nara samting tu hem mekem iumi laek for followim Jesus. Bat wanem nao iumi mas duim for showimaot iumi followim Jesus?

6. Wanem nao iumi mas duim for showimaot iumi followim Jesus?

⁶ Taem iumi followim Christ, iumi no laek kamap Christian long nem nomoa. Samting olsem 2 billion pipol distaem sei olketa Christian, bat olketa “duim olketa nogud samting.” (Readim Matthew 7:​21-​23.) Taem pipol showimaot olketa laek followim Jesus, iumi minim long olketa hao olketa tru Christian followim olketa teaching and wei bilong Jesus long evri samting wea olketa duim long laef bilong olketa. So for followim Jesus evriday, bae iumi storyim samfala samting abaotem Jesus wea iumi savve long hem finis.

Followim Gudfala Tingting Bilong Jesus

7, 8. (a) Wanem nao hem minim for garem gudfala tingting, and why nao Jesus barava showimaot datwan? (b) Wanem nao Jesus duim wea showimaot hem garem gudfala tingting, and wanem nao iumi savve duim for followim hem?

⁷ Staka wei bilong Jesus hem nambawan, bat iumi bae storyim fofala nomoa: Gudfala tingting bilong hem, wei wea hem hambol, hem strong for duim ministry, and hem lovem pipol. Firstaem, tingim gudfala tingting wea Jesus garem, wea hem nao wei wea hem iusim savve bilong hem long gudfala wei. Aposol Paul talem olsem: “Evri nambawan samting bilong gudfala tingting and savve hem barava haed gud long [Jesus].” (Col. 2:3) Wanem nao mekem Jesus garem gudfala tingting olsem? Hemseleva talem olsem: “Wanem Dadi hem lanem mi, hem nao mi lanem long iufala.” (John 8:​28) Jehovah nao givim gudfala tingting long Jesus, dastawe Jesus savve disaedem samting long gudfala wei.

⁸ Tingim diswan. Jesus iusim gudfala tingting taem hem disaedem wanem nao hem bae duim long laef bilong hem. Hem no laek kasem staka material samting bat hem tingim wanfala samting nomoa, wea hem nao for duim wanem God hem laekem. Hem iusim gud taem and strong bilong hem for Kingdom. Iumi savve followim wei bilong Jesus taem iumi “lukluk long wanfala samting nomoa,” and no weistim taem and strong bilong iumi for kasem olketa samting wea iumi no needim. (Matt. 6:​22) Staka brata and sista changem samfala samting long laef bilong olketa mekem olketa savve duim staka samting moa long ministry. Samfala pioneer. Sapos iu duim kaen samting olsem, datwan hem gud tumas. Iu bae hapi tumas sapos ‘kingdom nao hem important long iu winim eni nara samting.’​—Matt. 6:​33.

Hambol Olsem Jesus

9, 10. Wanem nao Jesus duim wea showimaot hem hambol?

⁹ Mek-tu samting abaotem Jesus wea iumi laek storyim, hem wei wea hem hambol. Taem olketa man kasem paoa, plande taem olketa tingse olketa hae nao winim olketa narawan. Jesus nating olsem! Nomata Jesus duim bigfala waka for mekem plan bilong Jehovah kamap tru, hem nating praod. Iumi laek followim wei bilong hem for hambol. Aposol Paul tok olsem: “Garem sem tingting wea Christ Jesus garem. Nomata hem spirit olsem God, hem nating ting for aftarem wei for semsem witim God. Bat hem lusim hae position bilong hem and hem kamap wanfala wakaman and olsem olketa man.” (Phil. 2:​5-7) Wanem nao Jesus duim?

¹⁰ Jesus stap long nambawan ples long heven witim Dadi bilong hem, nomata olsem, hem willing for “lusim hae position bilong hem” and kam daon long earth. Jehovah putim laef bilong hem long bele bilong wanfala Jew gele. Then hem gohed grow for naenfala month go kasem taem hem born long famili bilong wanfala carpenter wea poor. Firstaem hem baby nomoa, then hem smol boy, gogo hem teenager nao long haos bilong Joseph. No enitaem Jesus hem sin. Bat hem gohed obeyim dadi and mami bilong hem nomata tufala sin. (Luke 2:​51, 52) Datwan showimaot hem barava hambol!

11. Wanem nao iumi savve duim for showimaot iumi followim wei bilong Jesus for hambol?

¹¹ Iumi followim wei bilong Jesus for hambol taem iumi hapi for duim olketa waka wea maet pipol no tinghae long hem. Tingim waka for preachim gud nius. Taem pipol no interest, tok spoelem iumi, or raf long iumi, maet iumi start for no tinghae long disfala waka. Bat taem iumi gohed for preach, iumi helpem pipol for followim Jesus nao. Taem iumi duim olsem, iumi helpem pipol for kasem laef olowe. (Readim 2 Timothy 4:​1-5.) Nara samting wea iumi savve tingim, hem waka for lukaftarem Kingdom Hall. Maet man savve ting long waka olsem for bonem rabis, wasim floor, and for klinim olketa toi-let, hem no important tumas! Bat iumi luksavve hao waka for lukaftarem Kingdom Hall, wea hem nao ples for tru worship, hem nara samting wea iumi duim wea holy. Taem iumi willing for duim waka olsem, datwan showimaot iumi hambol and iumi followim Christ.

Strong for Duim Ministry Olsem Jesus

12, 13. (a) Wanem nao Jesus duim wea showimaot hem strong for duim ministry? Wanem nao mekem hem laek duim datwan? (b) Wanem nao bae mekem iumi strong for duim ministry?

¹² Tingim wei wea Jesus hem strong for duim ministry. Jesus duim staka samting taem hem stap long earth. Taem hem young, maet hem waka olsem carpenter witim Joseph, dadi bilong hem long earth. Taem Jesus duim ministry, hem duim staka mirakol. Hem mekem pipol wea sik for gud moa and pipol wea dae for laef bak. Bat main waka bilong hem nao, hem preachim gud nius and teachim pipol wea laek lisin long hem. (Matt. 4:​23) Iumi tu mas duim disfala waka. Hao nao iumi savve followim wei bilong Jesus? Olketa sem samting wea mekem Jesus laek duim waka hia savve mekem iumi tu laek duim disfala waka.

¹³ Main samting wea mekem Jesus laek preach long pipol and teachim olketa, hem bikos hem lovem God. Bat Jesus tinghae tumas tu long olketa tru samting wea hem teachim long pipol. Hem ting long olketa tru samting hia olsem olketa barava richfala samting, and hem laek tumas for storyim olketa samting hia long pipol. From iumi tu teachim pipol, iumi garem sem tingting olsem Jesus. Tingim samfala nambawan tru samting wea iumi lanem long Bible! Iumi savve hao Satan kwestinim wei wea Jehovah fit for rul and wanem Jehovah bae duim for stretem datwan. Iumi savve gud long samting wea Bible talem abaotem wanem hem happen long man taem hem dae, and olketa gud samting wea man bae kasem long niu world bilong God. Nomata sapos iumi lanem olketa tru samting hia longtaem go finis or no longtaem go nomoa, olketa olsem yet olketa barava richfala samting. (Readim Matthew 13:52.) Taem iumi gohed strong for preach, diswan showimaot long pipol iumi tinghae long wanem Jehovah teachim iumi.

14. Hao nao iumi savve followim wei bilong Jesus for teachim pipol?

¹⁴ Tingim tu wei bilong Jesus for teachim pipol. Hem evritaem storyim olketa scripture. Plande taem bifor hem storyim wanfala important point, hem tok olsem: “Olketa Holy Raeting talem finis.” (Matt. 4:4; 21:13) Hem talem toktok or storyim samfala point wea stap long 19-fala buk long Hebrew Scripture. Iumi laek followim Jesus tu taem iumi duim ministry bilong iumi. Iumi evritaem teachim pipol wanem nao Bible talem and readim olketa scripture. Taem iumi duim olsem, iumi helpem pipol for savve long tingting bilong Jehovah and no tingting bilong iumiseleva. Iumi hapi tumas taem man willing for readim scripture long Bible and laek storyim gud samting wea iumi savve kasem from Bible! And iumi hapi fogud taem pipol olsem laek followim Jesus.

Man wea Followim Jesus Mas Lovem Pipol

15. Wanem nao nambawan wei bilong Jesus? Wanem nao iumi bae duim sapos iumi ting raonem datwan?

¹⁵ Lastfala wei bilong Jesus wea iumi bae storyim hem wei wea hem lovem pipol. Aposol Paul tok olsem: “Love wea Christ garem hem mekem mifala for gohed.” (2 Cor. 5:​14) Taem iumi ting raonem hao Jesus lovem evri man and iumi wanwan, diswan mekem iumi laek followim wei bilong hem.

16, 17. Wanem nao Jesus duim wea showimaot hem lovem pipol?

¹⁶ Wanem nao Jesus duim wea showimaot hem lovem pipol? From hem willing for dae for olketa man, datwan nao showimaot hem barava lovem pipol. (John 15:13) Bat taem Jesus duim ministry bilong hem, hem showimaot love long pipol long olketa nara wei tu. Tingim diswan. Hem sorre long pipol wea safa. Taem hem lukim Mary and olketa narawan krae from Lazarus hem dae, hem sorre tu. Nomata Jesus klosap for mekem Lazarus laef bak, hem sorre tumas gogo hem “krae nao.”​—John 11:32-35.

¹⁷ Long start long ministry bilong Jesus, wanfala man wea garem leprosy kam long Jesus and sei: “Sapos iu willing, iu savve mekem mi gud bak moa.” Wanem nao Jesus duim? Bible hem sei: “Hem barava sorre long man hia.” Then hem duim wanfala spesol samting. “Hem tasim hem and sei: ‘Mi barava laek for duim datwan. Iu gud bak nao.’ Semtaem nomoa, leprosy bilong hem finis, and hem gud nao.” Law bilong Moses talem hao pipol wea garem leprosy olketa no klin. Jesus savve mekem man hia gud bak and no tasim hem nomoa. Bat taem Jesus mekem hem gud moa, hem laekem man hia for feelim nara man tasim hem, wea maet diswan hem firstaem eni man duim olsem long man hia bihaen staka year. Jesus barava tingim disfala man!​—Mark 1:​40-​42.

18. Wanem nao iumi savve duim for showimaot iumi “tingim feeling” bilong narawan?

¹⁸ From iumi followim Christ, iumi mas lovem pipol and “tingim feeling” bilong olketa. (1 Pet. 3:8) Sapos brata or sista kasem bigfala sik or barava feel wikdaon, maet iumi no minim gud tingting bilong hem bikos maet iumi no kasem kaen sik olsem. Nomata olsem, Jesus tingim feeling bilong pipol wea sik nomata no enitaem hem sik. Hao nao iumi savve followim wei bilong Jesus? Iumi lisin gud long olketa hia wea storyim sik bilong olketa long iumi. And hem gud tu for iumi tingim diswan: ‘Sapos mi nao sik olsem, hao nao tingting bilong mi?’ Sapos iumi trae for luksavve long tingting bilong narawan, iumi bae savve gud hao for “tok kaen long olketa wea sorre.” (1 Thess. 5:​14) Taem iumi duim olsem, iumi followim Jesus nao.

19. Example wea Jesus showimaot mekem iumi laek duim wanem?

¹⁹ Iumi lanem staka gud samting abaotem wanem Jesus Christ talem and duim! Taem iumi gohed for lane abaotem hem, bae iumi barava laek followim wei bilong hem. And diswan bae mekem iumi laek helpem nara pipol tu for followim Jesus. So gohed hapi for followim Messiah King distaem and for olowe!

Waswe, Iu Savve Minim Kam?

• Jesus showimaot gudfala tingting. Hao nao iumi savve showimaot datwan?

• Wanem nao iumi savve duim wea showimaot iumi hambol?

• Wanem nao iumi savve duim mekem iumi gohed strong for duim ministry?

• Wanem nao iumi savve duim for showimaot iumi followim wei bilong Jesus for lovem pipol?

[Box/Piksa long page 5]

WANFALA BUK FOR HELPEM IUMI FOLLOWIM CHRIST

Long 2007 distrik convention, iumi kasem disfala buk “Come Be My Follower.” Disfala buk hem for helpem olketa Christian for tingim olketa wei bilong Jesus and olketa samting wea hem duim. Bihaen chapter 1 and 2, buk hia garem thrifala sekson long hem. Firstfala sekson storyim lelebet samting abaotem olketa nambawan wei bilong Jesus, olsem wei bilong Jesus for hambol, no fraet, gudfala tingting bilong hem, wei wea hem obey, and hao hem gohed strong and no givap.

Nara tufala sekson storyim waka wea Jesus duim for teachim pipol, hao hem preachim gud nius, and samfala wei wea hem showimaot hem barava lovem pipol. Disfala buk storyim tu olketa nara samting wea savve helpem olketa Christian for followim wei bilong Jesus.

Mifala savve disfala buk bae helpem iumi evriwan for lukluk gud long iumiseleva. Hem bae helpem iumi for tingim olketa samting hia: ‘Waswe, mi barava followim wei bilong Jesus? Wanem nao mi savve duim for barava followim wei bilong hem?’ Hem bae helpem “pipol wea laekem laef olowe” for followim wei bilong Jesus tu.​—Acts 13:48.

[Piksa long page 4]

Jesus willing for kam long earth for born olsem wanfala baby. Taem hem duim olsem, datwan showimaot hem hao?

[Piksa long page 6]

Wanem nao bae mekem iumi strong for duim ministry?