Jesus Showimaot Example Long Wei for Hambol

1, 2. Long lastfala naet bifor Jesus dae, wanem nao hem teachim long olketa aposol?

LONG lastfala naet bifor Jesus dae, hem stap witim olketa aposol long wanfala rum antap wanfala haos long Jerusalem. Taem olketa gohed kaikai, Jesus hem getap and aotem wanfala kaleko bilong hem and tekem wanfala towel. Then hem putim wata insaed long dish and start for wasim leg bilong olketa disaepol and draem witim datfala towel. Bihaen datwan, hem werem bak kaleko bilong hem. Wei wea Jesus wasim leg bilong olketa showimaot hem hambol. Why nao hem duim datwan?—John 13:3-5.

² Jesus sei: “Waswe, iufala minim samting wea mi duim long iufala? . . . Nomata mi Lord and Teacher bat mi wasim leg bilong iufala. So sapos olsem, iufala tu mas wasim leg bilong narawan. Mi showim wei for iufala followim, mekem samting wea mi duim long iufala, iufala mas duim long narawan tu.” (John 13:12-15) Hard for olketa aposol forgetim wei wea Jesus willing for duim datfala waka. Datwan teachim olketa aposol olketa tu mas hambol.

3. (a) Hao nao Jesus showimaot hem important for hambol? Storyim tufala example. (b) Wanem nao bae iumi storyim long disfala study?

³ Taem Jesus wasim leg bilong olketa aposol, datwan no firstaem wea hem teachim olketa hem important for hambol. Wantaem, samfala aposol raoa abaotem hu long olketa nao hem important. Jesus mekem wanfala smol pikinini standap saed long hem, then hem sei long olketa: “Man wea duim gudfala samting long disfala smol pikinini, and wea duim datwan long nem bilong mi, hem duim gudfala samting long mi tu. And man wea duim gudfala samting long mi, hem duim gudfala samting tu long man wea sendem mi kam. Eni man long iufala wea hambol, hem nao man wea important.” (Luke 9:46-48) Long bihaen, taem Jesus story long olketa Pharisee wea tingse olketa important winim nara pipol, hem sei: “Man wea mekhae long hemseleva bae God mekem hem for hambol, bat man wea hambol bae God mekhae long hem.” (Luke 14:11) Hem klia Jesus laekem olketa wea followim hem for hambol and no praod or tingse olketa important winim narawan. Long disfala study bae iumi storyim wei wea Jesus hem hambol, and hao iumi savve followim example bilong hem. Bae iumi storyim tu gud samting wea iumi and olketa narawan savve kasem sapos iumi hambol.

“MI NO LES FOR HEREM HEM”

4. Hao nao Son bilong God showimaot hem hambol bifor hem kam long earth?

⁴ Nomata bifor hem kam long earth, Son bilong God showimaot hem hambol. Jesus stap witim Dadi bilong hem long heven for staka year bifor hem kam long earth. Buk bilong Isaiah storyim wei wea tufala stap gud tugeta. Hem sei: “Jehovah, wea hem Lord bilong evri samting, hem lanem mi hao for story gud, mekem mi savve wanem for talem long man wea taed. Hem wekapem mi evri morning for herem samting wea hem teachim mi olsem man wea savve finis. Jehovah, wea hem Lord bilong evri samting, hem nao lanem mi. Mi no bighed and mi no les for herem hem.” (Isa. 50:4, 5) Son bilong God hem hambol, and hem lisin gud and followim wanem Jehovah teachim long hem. Hem laekem tumas for lane from tru God. And tu, masbi Jesus lukim wei wea Jehovah hem hambol taem hem showimaot mercy long olketa man wea sin.

5. Hao nao Jesus showimaot gudfala example long wei for hambol taem hem raoa witim Devil?

⁵ No evri angel hambol olsem Jesus. Datfala angel wea kamap Satan hem no laek lane from Jehovah. Hem nating hambol, bat hem kamap praod and tingse hem important winim narawan. From datwan, hem againstim Jehovah. Jesus no olsem Satan bat hem hapi long position bilong hem long heven, and no enitaem hem ting for iusim paoa bilong hem long wei wea no stret. Olsem example, Bible story abaotem taem wea Jesus “raoa witim Devil abaotem body bilong Moses.” Taem datwan happen, Jesus no duim eni samting wea hem no garem paoa for duim nomata hem Michael datfala chief angel. Son bilong God hem hambol, and hem hapi for leavim datwan long hand bilong Jehovah wea hem Nambawan Judge long universe.—Readim Jude 9.

6. Hao nao wei wea Jesus acceptim assignment for kamap Messiah showimaot hem hambol?

⁶ Bifor Jesus kam long earth, masbi hem savve long olketa profesi abaotem olketa samting wea bae kasem hem taem hem kamap Messiah. So luk olsem hem savve finis long olketa nogud samting wea bae kasem hem. Nomata olsem, Jesus acceptim assignment for kam long earth and dae olsem datfala Messiah wea God promisim. Wanem nao mekem hem willing for duim datwan? Samting wea aposol Paul talem showimaot Son bilong God hem hambol. Hem sei: “Nomata hem wanfala spirit olsem God, no enitaem hem ting for trae tekem position bilong God for mekem hem semsem witim God. Hem lusim evri samting wea hem garem and hem kamap olsem wanfala slave. Hem kamap wanfala man.”—Phil. 2:6, 7.

TAEM HEM KAMAP MAN, “HEM HAMBOL”

7, 8. Hao nao Jesus showimaot hem hambol taem hem pikinini and taem hem duim ministry long earth?

⁷ Paul sei: “Taem [Jesus] kamap wanfala man, hem hambol and obeyim God nomata gogo hem dae long wanfala post.” (Phil. 2:8) Start taem Jesus hem pikinini, hem showimaot example for iumi long wei for hambol. Jesus obeyim dadi and mami bilong hem, Joseph and Mary, nomata tufala no perfect. (Luke 2:51) Datwan hem nambawan example for olketa young wan. God bae blessim wei wea olketa obeyim dadi and mami bilong olketa.

⁸ Taem Jesus hem big, hem showimaot hem hambol long wei for evritaem duim wanem Jehovah laekem, and no wanem hemseleva laekem. (John 4:34) Jesus iusim nem bilong God long ministry bilong hem, and hem helpem pipol for garem stretfala savve abaotem olketa wei bilong Jehovah and plan bilong Hem for olketa man. And tu, Jesus live followim olketa samting wea hem teachim abaotem Jehovah. Olsem example, tingim first samting wea Jesus talem taem hem teachim olketa disaepol for prea. Hem sei: “Dadi bilong mifala long heven, mifala laekem nem bilong iu for holy.” (Matt. 6:9) Jesus teachim olketa disaepol bilong hem wei for givim glory long nem bilong Jehovah nao hem mas main important samting long laef bilong olketa. Hem nao samting wea important long Jesus. No longtaem bifor Jesus dae, hem prea olsem long Jehovah: “Mi talemaot nem bilong iu long olketa [aposol] and bae mi gohed for duim olsem.” (John 17:26) And tu, plande taem Jesus sei hem no savve duim eni samting sapos Jehovah no helpem hem.—John 5:19.

9. Wanem profesi nao Zechariah talem abaotem Messiah, and hao nao diswan hem kam tru?

⁹ Zechariah talem profesi abaotem Messiah. Hem sei: “Zion, iu mas hapi tumas. Jerusalem, iu mas singaot bigfala. King bilong iu hem kam nao. Hem raeteous, hem hambol, and hem win. Hem sidaon antap long pikinini bilong wanfala donkey.” (Zech. 9:9) Disfala profesi hem kam tru taem Jesus go insaed long Jerusalem bifor Pasova long 33 C.E. Plande pipol putim kaleko and olketa branch from olketa tree long road, and evriwan long datfala taon ran olobaot and mek noise. Nomata taem pipol mekhae long Jesus olsem King bilong olketa, hem hambol nomoa.—Matt. 21:4-11.

10. Wei wea Jesus faithful go kasem taem hem dae showimaot wanem samting?

¹⁰ Taem Jesus Christ long earth hem showimaot nambawan example long wei for hambol and obey go kasem taem hem dae long post. Hem showimaot klia olketa man savve gohed faithful long Jehovah nomata olketa kasem barava bigfala test. And tu, Jesus pruvim Satan hem laea taem hem sei olketa man worshipim Jehovah for kasem gud samting for olketa seleva nomoa. (Job 1:9-11; 2:4) From Christ evritaem obeyim Dadi bilong hem, hem mekhae long raet bilong Jehovah for rul and hem showimaot rul bilong Jehovah nao hem stret. Jehovah hapi tumas for lukim Son bilong hem wea hambol hem barava faithful.—Readim Proverbs 27:11.

11. Sakrifaes bilong Jesus mekem olketa tru Christian garem wanem hope?

¹¹ From Jesus hem dae long post datwan mekem wei for pipol kamap free from sin and dae. (Matt. 20:28) Bikos long sakrifaes bilong Jesus, Jehovah savve forgivim olketa sin bilong iumi. Diswan hem fitim olketa raeteous standard bilong Jehovah, and hem givim chance for olketa man kasem laef olowe. Paul sei: “From stretfala samting wea wanfala man hem duim, long tingting bilong God evri difren kaen man raeteous and olketa savve laef.” (Rom. 5:18) From Jesus dae, olketa anointed Christian garem hope for laef olowe long heven and no savve dae, and “olketa nara sheepsheep” garem hope for laef olowe long earth.—John 10:16; Rom. 8:16, 17.

“MI HAMBOL”

12. Wanem nao showimaot Jesus hem hambol and hem kaen long pipol?

¹² Jesus invaetem evriwan wea taed and wikdaon for kam long hem. Hem sei: “Iufala waka witim mi and lane from mi, bikos mi no savve raf and mi hambol. Wei for duim olsem bae strongim iufala.” (Matt. 11:28, 29) From Jesus hem hambol, hem kaen long olketa man wea no perfect and hem no favorim eniwan. Hem no expectim olketa disaepol for duim samting wea olketa no fit for duim. Jesus praisem and encouragem olketa. Hem no mekem olketa feel iusles or feel olsem olketa no fit for duim eni samting. Jesus hem no raf bat hem sei: “Bae hem no hard for iufala waka witim mi, and iufala savve karem samting wea mi askem iufala for karem.” Diswan minim hem no hard samting for man hem disaepol bilong hem. Sapos olketa disaepol lane from hem and followim wanem hem teachim, bae datwan strongim olketa. Dastawe evriwan, nomata man, woman, young wan, or olketa olo, olketa hapi for stap witim Jesus.—Matt. 11:30.

13. Hao nao Jesus showimaot mercy long pipol wea laef bilong olketa no isi?

¹³ Jesus sorre long pipol long Israel wea laef bilong olketa no isi, and hem duim wanem hem fit for duim for helpem olketa. Klosap long Jericho, Jesus meetim Bartimaeus and fren bilong hem. Tufala man hia blind and savve askem pipol olowe for selen. Tufala askem Jesus for helpem tufala, bat pipol tok strong long tufala. Sapos Jesus no laek helpem tufala hem savve go pas nomoa, bat hem no duim datwan. Hem sorre long tufala, so hem kolem kam tufala and healim tufala. Jesus followim example bilong Dadi bilong hem Jehovah long wei for hambol and showimaot mercy long olketa man wea born sin.—Matt. 20:29-34; Mark 10:46-52.

“MAN WEA HAMBOL BAE GOD MEKHAE LONG HEM”

14. Olketa wanem gud samting nao kamaot from wei wea Jesus hem hambol?

¹⁴ Staka gud samting kamaot from wei wea Jesus hem hambol. Jehovah hem hapi bikos Son bilong hem obey. From Jesus hem hambol and kaen long olketa aposol and disaepol, datwan strongim and encouragem olketa. Wei wea Jesus showimaot gudfala example, teachim olketa, and praisem olketa, hem helpem olketa for kamap strong long spiritual wei. Jesus helpem staka narawan taem hem teachim olketa, encouragem olketa, and provaedem wanem olketa needim. And tu, bikos long sakrifaes bilong Jesus, evri man wea showimaot faith long hem bae kasem gud samting for olowe.

15. Wanem gud samting nao Jesus kasem from hem hambol?

¹⁵ Waswe, Jesus tu kasem gud samting from hem hambol? Yes. Hem sei: “Man wea hambol bae God mekhae long hem.” (Matt. 23:12) Paul storyim gud samting wea Jesus kasem from hem hambol. Paul sei: “God givim hem position wea hae winim position bilong hem bifor. From God hem kaen tumas, hem givim hem nem wea winim evri nara nem, mekem long nem bilong Jesus, evriwan long heven and long earth and andanit long graon mas baodaon long hem, and evriwan mas talemaot Jesus Christ hem Lord, for mekhae long God, wea hem Dadi bilong iumi long heven.” From Jesus hem hambol and faithful taem hem stap long earth, Jehovah God givim Son bilong hem position wea hae winim position bilong hem bifor, mekem hem garem paoa ovarem evriwan long heven and long earth.—Phil. 2:9-11.

JESUS BAE “FAET FOR OLKETA WEA HAMBOL AND FOR SAMTING WEA TRU”

16. Wanem nao Son bilong God bae duim long future wea showimaot hem hambol?

¹⁶ Son bilong God bae hambol long evri samting wea hem duim long future tu. Wanfala psalm storyim wanem Jesus bae duim long olketa enemy bilong God taem hem King long heven. Hem sei: “Iu garem bigfala glory, so go and winim olketa enemy bilong iu. Raedem horse bilong iu, and faet for olketa wea hambol, and for samting wea tru and raeteous.” (Ps. 45:4) Long Armageddon, Jesus Christ bae faet for olketa wea hambol, raeteous, and wea lovem truth. And wanem nao bae happen long end bilong wan thousand year rul bilong Christ, taem “evri gavman and olketa wea garem paoa” no stap nao? Waswe, bae Jesus hem hambol long datfala taem? Yes. Bible sei bae hem givim datfala Kingdom go long God, wea hem nao Dadi bilong hem.—Readim 1 Corinth 15:24-28.

17, 18. (a) Why nao olketa wea worshipim Jehovah mas hambol olsem Jesus? (b) Olketa wanem kwestin nao bae iumi ansarem long next study?

¹⁷ Waswe long iumi? Waswe, bae iumi followim example bilong Jesus for hambol? Long Armageddon, Jesus Christ wea King bae sevem nomoa olketa wea hambol and raeteous. So sapos iumi laek for sev, iumi mas hambol. And tu, sapos iumi hambol, bae iumi and olketa narawan kasem gud samting, olsem Jesus.

¹⁸ Wanem nao savve helpem iumi for hambol olsem Jesus? Wanem nao savve helpem iumi for hambol nomata long taem wea hem no isi? Next study bae ansarem olketa kwestin hia.