Jesus Christ Hem Nambawan Missionary Winim Evri Narawan
“Mi wanfala wea kam for hem, Hem nao sendem mi kam.”—JOHN 7:29.
1, 2. Wanem nao mining bilong disfala toktok “missionary”? Hu nao nambawan Missionary?
TAEM iu herem datfala word “missionary,” wanem nao iu tingim? Samfala maet tingim olketa missionary bilong olketa religion wea staka taem olketa join insaed long politik and bisnis long kantri wea olketa stap long hem. Bat from iu wanfala Jehovah’s Witness, luk olsem bae iu tingim olketa missionary wea Governing Body sendem for preachim gud nius long olketa difren kantri long earth. (Matt. 24:14) Olketa missionary hia iusim taem and strong bilong olketa for duim nambawan waka for helpem pipol fren gud witim Jehovah God.—Jas. 4:8.
2 Disfala word “missionary” no stap long main reading bilong New World Translation of the Holy Scriptures. Bat long Ephesians 4:11 hem garem wanfala footnote wea talem hao datfala Greek word for “evangelizer [wea minim, man for talemaot gud nius],” olketa savve transleitim tu olsem “missionary.” Jehovah hem nambawan Evangelizer, bat no fitim for hem garem nem nambawan Missionary, bikos no eniwan sendem hem. Nomata olsem, Jesus Christ sei olsem abaotem Dadi bilong hem: “Mi wanfala wea kam for hem, Hem nao sendem mi kam.” (John 7:29) Jehovah showimaot barava bigfala love for olketa man taem hem sendem kam spesol Son bilong hem long earth. (John 3:16) Jesus nao fit for garem nem nambawan Missionary bikos wanfala reason hem kam long earth hem for “witness abaotem truth.” (John 18:37) Hem win long wei for preachim gud nius abaotem Kingdom and iumi distaem kasem yet gud samting from waka wea hem duim. Olsem example, iumi savve followim wei bilong hem for teach long ministry wea iumi duim nomata iumi missionary or nomoa.
3. Wanem nao olketa kwestin wea iumi bae story raonem?
3 Waka wea Jesus duim for preach abaotem Kingdom savve mekem iumi garem olketa kwestin olsem: Wanem nao kasem Jesus taem hem stap long earth? Why nao wei bilong hem for teach hem barava gud? And wanem nao mekem ministry bilong hem win?
Man Mas Willing Taem Hem Preach Long Niu Ples
4-6. Wanem nao samfala difren samting wea Jesus mas deal witim taem hem kam long earth?
4 Plande taem olketa missionary and samfala Christian brata and sista wea muv go long ples wea needim moa pipol for preach, olketa mas change for fitim laef long niu ples wea hem difren from laef long hom bilong olketa. Bat trae for tingim hao laef bilong Jesus long earth hem difren tumas from laef bilong hem long heven witim Dadi bilong hem and olketa gudfala angel wea worshipim Jehovah. (Job 38:7) Laef bilong hem difren tumas taem hem stap witim olketa man wea sin long disfala world wea barava nogud! (Mark 7:20-23) Olketa disaepol wea gogo witim hem bat raoa tu. (Luke 20:46; 22:24) Nomata wanem samting kasem Jesus taem hem stap long earth, hem deal witim datwan long stretfala wei evritaem.
5 Taem Jesus stap long earth hem no seknomoa savve long wanfala languis. Hem mas lanem datfala languis from taem hem smol yet. Datwan hem difren tumas from taem wea hem stap long heven and savve talem olketa angel wanem for duim! Taem Jesus stap long earth, hem tok long “languis bilong olketa man.” Hem barava difren from ‘languis bilong olketa angel.’ (1 Cor. 13:1) Bat no eniwan winim Jesus saed long wei for talem olketa naesfala toktok.—Luke 4:22.
6 Tingim samfala nara samting wea difren tumas for Son bilong God taem hem kam daon long earth. Jesus hem no born kam witim sin bilong Adam, bat hem growap olsem wanfala man long earth olsem olketa wea bae kamap “brata” bilong hem, olketa anointed wan. (Readim Hebrews 2:17, 18.) Long naet bifor hem dae, Jesus nating askem Dadi bilong hem long heven for sendem kam “winim twelvfala bigfala sekson bilong angel.” Bat tingim paoa wea Jesus garem ovarem olketa angel taem hem Michael datfala Chief Angel. (Matt. 26:53; Jude 9) Hem tru, Jesus duim olketa mirakol bat samting wea hem duim long earth hem barava no kasem samting wea hem fit for duim taem hem stap long heven.
7. Wanem nao tingting bilong olketa Jew saed long Law?
7 Bifor Jesus kam long earth hem nao datfala “Word,” and maet hem nao angel wea toktok for God wea leadim olketa Israelite insaed long wilderness. (John 1:1; Ex. 23:20-23) Nomata olsem, olketa Israelite kasem “datfala Law wea olketa angel talem bat [olketa Israelite] nating obeyim.” (Acts 7:53; Heb. 2:2, 3) Tru nao, olketa bigman bilong Jew religion long first century no luksavve long trufala mining bilong datfala Law. Olsem example, tingim datfala Sabbath law. (Readim Mark 3:4-6.) Olketa scribe and Pharisee “nating tingim olketa main samting bilong Law olsem justice and mercy and wei for faithful.” (Matt. 23:23) Nomata olsem, datwan nating stopem Jesus for talemaot truth.
8. Why nao Jesus fit for helpem iumi?
8 Jesus hem man wea willing tumas. Hem lovem pipol and barava laek for helpem olketa. Hem strong for talemaot gud nius evritaem. From Jesus faithful long Jehovah taem hem stap long earth “hem mekem wei for olketa pipol wea obeyim hem for laef olowe.” Nara samting tu, “from hem tu safa taem hem kasem test, hem fit for duim samting for helpem [iumi] wea kasem test.”—Heb. 2:18; 5:8, 9.
Teacher wea Olketa Barava Lanem Gud
9, 10. Wanem kaen training nao Jesus kasem bifor hem kam long earth?
9 Long distaem, Governing Body hem mekem wanfala skul for lanem olketa brata and sista bifor hem sendem olketa go olsem missionary. Waswe, Jesus Christ kasem training tu? Ia. Bat hem no go long olketa rabbi skul or kasem training from samfala bigman bilong religion bifor hem kamap Messiah. (John 7:15; markem witim Acts 22:3.) Sapos olsem, hao nao Jesus hem barava fit for teach?
10 Jesus hem kasem samfala training from mami bilong hem Mary and dadi bilong hem Joseph wea adoptim hem. Bat main training wea hem kasem for ministry nao hem from Jehovah, wea hem barava fit for trainim hem. Jesus hem tok olsem: “Mi no talemaot samting wea miseleva tingim, bat Dadi wea sendem mi kam nao talem mi wanem for talemaot.” (John 12:49) Disfala scripture showimaot hao Jehovah barava talem klia long Son bilong hem samting wea hem bae teachim. Bifor hem kam long earth Jesus kasem staka help from Dadi bilong hem for staka year. Hem kasem barava nambawan training!
11. Hao nao Jesus showimaot hem garem sem tingting olsem Dadi bilong hem abaotem olketa man?
11 Datfala Son hem barava fren gud witim Dadi bilong hem start from taem wea hem wakem hem. Bifor Jesus kam long earth, hem lukim hao Jehovah deal witim olketa man, and hem luksavve long tingting bilong God abaotem olketa. Datfala Son hem garem love for olketa man olsem God tu, dastawe hem sei: “Olketa samting wea mi laekem tumas nao olketa son bilong man.”—Prov. 8:22, 31.
12, 13. (a) Wanem nao Jesus lanem taem hem lukim wei wea Dadi bilong hem deal witim olketa Israelite? (b) Wanem nao showimaot Jesus followim samting wea hem lanem?
12 Taem Son hem lukim hao Dadi bilong hem deal witim olketa hard samting, datwan hem olsem training for hem tu. Olsem example, tingim hao Jehovah deal witim olketa bighed Israelite. Nehemiah 9:28 hem sei olsem: “Taem olketa stap gud, olketa duim nogud samting moa, and iu [Jehovah] letem olketa enemy bilong olketa for spoelem olketa. Then olketa askem iu for helpem olketa moa, and iu herem olketa from heven and sevem olketa bikos iu garem bigfala mercy. Plande taem nao iu duim diswan.” From Jesus waka witim Jehovah, hem showimaot semkaen wei olsem Dadi bilong hem for tingim pipol wea hem preach long olketa.—John 5:19.
13 Wei wea Jesus kea for olketa disaepol bilong hem, hem showimaot hem followim samting wea hem lanem. Long naet bifor hem dae, evri disaepol wea hem barava lovem olketa “lusim hem and ranawe.” (Matt. 26:56; John 13:1) Thrifala taem nao aposol Peter sei hem no savve long Jesus! Nomata olsem, Jesus openem wei for olketa aposol bilong hem for fren bak moa witim hem. Hem sei olsem long Peter: “Mi barava prea strong finis for iu mekem faith bilong iu no wikdaon; and iu, taem iu kam bak, strongim olketa brata bilong iu.” (Luke 22:32) “Olketa aposol” nao first wan wea insaed long datfala spiritual Israel. Nem bilong 12-fala aposol bilong datfala Lamb, Jesus Christ, hem stap long faondeson ston long wall bilong Niu Jerusalem. Kam kasem distaem, olketa anointed Christian and “nara sheep” gohed strong long waka bilong olketa for preach from God and Son bilong hem nao leadim olketa.—Eph. 2:20; John 10:16; Rev. 21:14.
Wei Bilong Jesus for Teach
14, 15. Wanem nao samfala wei bilong Jesus for teach wea difren from olketa scribe and Pharisee?
14 Taem Jesus teachim olketa follower bilong hem, hao nao hem followim samting wea hem lanem? Taem iumi markem wei bilong Jesus for teach witim wei bilong olketa bigman bilong Jew religion for teach, iumi lukim hae standard bilong Jesus for teach. Olketa scribe and Pharisee “mekem word bilong God olsem samting nating from kastom bilong [olketa].” Bat Jesus hem no talem toktok bilong hemseleva. Hem talem samting wea Dadi bilong hem talem. (Matt. 15:6; John 14:10) Iumi tu mas olsem.
15 Nara samting tu mekem Jesus barava difren from olketa bigman bilong religion. Hem sei olsem abaotem olketa scribe and Pharisee: “Evri samting wea olketa talem long iufala, iufala duim and followim, bat no duim samting wea olketa duim, from olketa talem samting bat olketa nating savve duim.” (Matt. 23:3) Jesus hem duim samting wea hem talem. Bae iumi storyim wanfala example wea showimaot diswan.
16. Wanem nao showimaot Jesus followim toktok bilong hem long Matthew 6:19-21?
16 Jesus hem talem olketa disaepol bilong hem for “hipimap olketa riches long heven.” (Readim Matthew 6:19-21.) Waswe, Jesus hem followim samting wea hem talem long olketa disaepol bilong hem? Ia. Dastawe hem fit for sei olsem: “Olketa fox garem ples for sleep and olketa bird garem ples for sleep tu, bat Son bilong man no garem eni ples for putim hed bilong hem for sleep.” (Luke 9:58) Jesus no garem staka material samting. Main samting hem duim nao hem for preachim gud nius abaotem Kingdom. And tu, hem showimaot example long wei for no hipimap riches long earth wea savve mekem man wari tumas. Jesus showimaot hao hem gud for hipimap olketa riches long heven, “wea no eni moth or rasta savve kaikaim, and wea olketa man for steal no savve kam insaed and stealim.” Waswe, iu followim samting wea Jesus talem for hipimap riches long heven?
Olketa Wei Bilong Jesus wea Mekem Pipol Lovem Hem
17. Wanem nao olketa wei bilong Jesus wea mekem hem savve tumas for talemaot gud nius?
17 Wanem nao olketa wei bilong Jesus wea mekem hem savve tumas for talemaot gud nius? Wanfala nao hem wei bilong hem for tingim pipol wea hem helpem. Jesus showimaot olketa nambawan wei bilong Jehovah olsem wei for hambol, love, and kea long pipol. Bae iumi storyim hao olketa wei hia mekem staka pipol willing for lisin long Jesus.
18. Hao nao iumi savve Jesus hem hambol?
18 From Jesus acceptim datfala waka wea God givim long hem for kam long earth, hem “lusim hae position and kamap olsem wanfala slave and hem kamap olsem olketa man.” (Phil. 2:7) Datwan showimaot hem barava hambol. Nara samting tu, Jesus no ting daonem pipol. Hem no garem tingting olsem: ‘Mi kam from heven ia, so fitim iu for mas lisin long mi.’ Jesus no olsem olketa man wea laea for sei olketa nao messiah. Hem no tokplas abaotem position bilong hem olsem trufala Messiah. Samfala taem hem talem pipol for no talem olketa narawan hu nao hem and wanem hem duim. (Matt. 12:15-21) Jesus laekem pipol for disaed seleva for followim hem from samting wea hem duim. Olketa disaepol bilong hem barava hapi from Lord bilong olketa no talem olketa for perfect olsem olketa angel wea hem stap witim long heven!
19, 20. Hao nao love and wei for kea muvim Jesus for helpem pipol?
19 Jesus Christ showimaot love tu, olsem Dadi bilong hem long heven. (1 John 4:8) Love nao muvim Jesus for teachim pipol. Olsem example, tingim feeling bilong hem for wanfala young man wea hem ruler. (Readim Mark 10:17-22.) Jesus “lovem hem” and laek for helpem hem, bat datfala young man no laek for lusim evri riches bilong hem and followim Jesus.
20 Narafala wei bilong Jesus wea mekem pipol lovem hem tu hem wei wea hem kea long pipol. Olketa wea lisin long teaching bilong hem garem olketa problem olsem evri nara man. From Jesus savve long diswan, wei bilong hem for teachim olketa showimaot hem kea and garem feeling. Olsem example, wantaem Jesus and olketa aposol bilong hem busy fogud gogo olketa no garem taem for kaikai tu. Bat wanem nao Jesus duim taem hem lukim wanfala bigfala sekson hipap kam? “Hem barava feel sorre long olketa, from olketa olsem sheepsheep wea no garem shepherd. And hem start for teachim plande samting long olketa.” (Mark 6:34) Jesus hem luksavve long barava nogud samting wea kasem pipol and hem iusim strong bilong hem for teachim olketa and duim mirakol for helpem olketa. Samfala wea laekem tumas olketa nambawan wei bilong hem and naesfala toktok bilong hem kamap olketa disaepol bilong hem.
21. Wanem nao bae iumi storyim long next article?
21 Next article bae showimaot staka nara samting wea iumi savve lanem abaotem ministry bilong Jesus long earth. Wanem nao samfala wei moa bilong Jesus Christ, datfala nambawan Missionary, wea iumi savve followim?
Wanem Nao Ansa Bilong Iu?
• Wanem kaen training nao Jesus kasem bifor hem kam long earth?
• Hao nao wei bilong Jesus for teach hem winim wei bilong olketa scribe and Pharisee?
• Wanem nao olketa wei bilong Jesus wea mekem pipol lovem hem?
[Piksa long page 15]
Hao nao Jesus teachim pipol?