Tingim Wanem Jehovah Duim Finis for Iu
NO LONGTAEM bihaen Jesus laef bak, tufala disaepol bilong hem wakabaot from Jerusalem for go long vilij wea olketa kolem Emmaus. Gospel bilong Luke sei: “Taem tufala gohed story, Jesus kam and wakabaot witim tufala bat tufala no luksavve long hem.” Then Jesus sei long tufala: “ ‘Wanem nao iutufala storyim taem iutufala wakabaot kam?’ Tufala standap and luk sorre.” Why nao tufala luk sorre? Olketa disaepol tingse Jesus bae sevem Israel long datfala taem from rul bilong olketa wea no Jew, bat datwan no happen bikos olketa pipol killim dae Jesus. Dastawe tufala disaepol hia luk sorre.—Luke 24:15-21; Acts 1:6.
“Then [Jesus] start for minim long olketa evri samting wea Moses and evri profet raetem abaotem hem insaed long olketa Holy Raeting.” Jesus duim staka big samting taem hem duim ministry and datwan strongim faith bilong pipol! Taem tufala disaepol lisin long wanem Jesus minim long olketa, olketa start for hapi nao. Long datfala evening, tufala sei: “Taem iumi wakabaot kam long road and hem minim kam olketa Holy Raeting long iumi, iumi hapi tumas, iaman?” (Luke 24:27, 32) Wanem nao iumi savve lanem from wei wea tufala disaepol hia hapi moa?
Hao Nao Iumi Feel Taem Samting Iumi Weitim No Kamap Kwiktaem?
Tufala disaepol wea wakabaot for kasem Emmaus luk sorre bikos samting wea olketa laekem hem no kamap kwiktaem. Samting wea kasem olketa hem olsem wanem Proverbs 13:12 sei: “Taem samting wea man expectim hem delay datwan mekem heart sik.” Samfala long iumi wea faithful for worshipim Jehovah for plande year tingse “bigfala trabol” shud kam finis. (Matt. 24:21; Rev. 7:14) Iumi luksavve taem man weitim samting olsem for happen bat hem no kamap kwiktaem, datwan savve mekem man sorre.
Bat tingim, tufala disaepol hia start for hapi taem Jesus helpem tufala for tingim olketa profesi wea happen finis. Iumi tu savve gohed hapi sapos iumi duim sem samting. Wanfala Christian elder wea nem bilong hem Michael sei: “No tingim nomoa olketa samting wea Jehovah no duim yet bat tingim wanem hem duim finis for iumi.” Datwan hem gudfala advaes!
Wanem Jehovah Duim Finis
Tingim samfala nambawan samting wea Jehovah duim finis. Jesus sei: “Man wea showimaot faith long mi bae hem tu duim olketa samting wea mi duim. Olketa samting wea hem duim bae winim olketa samting wea mi duim.” (John 14:12) Pipol bilong God distaem duim waka wea winim wanem olketa Christian bifor duim. Winim 7 million pipol garem hope for stap laef bihaen bigfala trabol. Tingim, pipol long staka kantri gohed faithful long Jehovah and duim preaching waka winim enitaem bifor! Olsem Jesus talem, Jehovah helpem pipol bilong hem for duim olketa samting wea “winim olketa samting wea [Jesus] duim.”
Wanem moa Jehovah duim for iumi? Hem helpem pipol wea hambol for lusim olketa nogud wei and for kam insaed long spiritual paradaes. (2 Cor. 12:1-4) Ting raonem samfala samting long spiritual paradaes wea iumi enjoyim distaem. Tingim olketa buk wea iumi kasem wea stap long library bilong iumi or long Kingdom Hall. Lukluk long Watch Tower Publications Index, or long Watchtower Library long computer. Lisin long eni Bible drama wea olketa recordim. Tingim moa olketa samting wea kamap long convention no longtaem go nomoa. And tingim tu hao iumi enjoyim wei for kaban witim olketa brata and sista long kongregeson. Jehovah kaen tumas for givim staka spiritual kaikai and olketa brata and sista wea lovem iumi. Tru tumas, iumi enjoyim wei for stap long spiritual paradaes distaem!
David sei: “God bilong mi, Jehovah, iu wakem plande nambawan samting for mifala and iu tingim mifala plande taem.” (Ps. 40:5) Tru tumas, taem iumi ting raonem olketa nambawan samting wea Jehovah duim finis for iumi and hao hem tingim iumi, datwan bae strongim iumi for gohed faithful long Dadi bilong iumi long heven, Jehovah.—Matt. 24:13.
[Piksa long page 31]
Jesus helpem olketa disaepol for tingim wanem Jehovah duim finis for olketa
[Piksa long page 32]
Tingim moa olketa samting wea kamap long convention no longtaem go nomoa