Sixfala month nomoa bihaen Jesus startim ministry bilong hem long earth, Nicodemus luksavve Jesus hem “wanfala teacher wea kam from God.” From hem tinghae long olketa mirakol wea Jesus duim long Jerusalem long Passover bilong 30 C.E., Nicodemus hem kam taem hem dark, for talem wei wea hem biliv long Jesus and for lanem moa samting abaotem disfala teacher. From diswan, Jesus talem Nicodemus wanfala important truth abaotem need for “born moa” mekem man savve go insaed Kingdom bilong God. Long taem hia, Jesus sei tu: “From God lovem world tumas dastawe hem givim only-born Son bilong hem, mekem evriwan wea showimaot faith long hem no need for dae bat kasem laef olowe.”—John 3:1-16.

Nambawan hope stap front long Nicodemus! Hem savve kamap klos fren bilong Jesus, fit for barava lukim olketa difren saed bilong living bilong Jesus long earth. Olsem wanfala ruler bilong olketa Jew and teacher long Israel, Nicodemus garem savve long Word bilong God. Hem garem bigfala fasin for luksavve, wea showaot from wei wea hem luksavve long Jesus olsem teacher wea God sendem. Nicodemus interest long olketa spiritual samting, and hem barava hambol. Hem masbi hard tumas for wanfala member bilong barava hae kot bilong olketa Jew for sei God nao sendem son bilong carpenter! Evrikaen fasin olsem hem important for man wea kamap disaepol bilong Jesus.

Firstaem, John talem hao disfala Jew ruler hem “kam long [Jesus] long naet.” (John 3:2) Wanfala Bible savveman sei: “Nicodemus go long naet, no from hem fraet, bat for stap klia from pipol wea bae disturbim story bilong hem witim Jesus.” Nomata olsem, John storyim Nicodemus olsem “datfala man wea kam long [Jesus] long naet firstaem” long semtaem wea hem storyim Joseph bilong Arimathea olsem “wanfala disaepol bilong Jesus bat hem secret wan bikos hem fraetem olketa Jew.” (John 19:38, 39) So maet, olsem olketa narawan wea fraet for joinim Jesus long datfala taem, Nicodemus go lukim Jesus taem hem dark from hem tu “fraetem olketa Jew.”—John 7:13.