Long story bilong tufala, Jesus mekhae long wei wea hem important for man mas born moa long niu laef. Hem sei: “Sapos man no born moa, hard for hem lukim kingdom bilong God.” (John 3:⁠3) Tufala toktok hia “sapos” and “hard,” mekhae hao hem barava important for born moa long niu laef. For minim diswan tingim sapos samwan hem sei, “Sapos sun no kamap, hard tumas for hem daylaet.” Datwan showimaot hao sun hem barava important. Dastawe, Jesus talem hao hem barava important for man born moa for kasem Kingdom bilong God.

Sapos iumi readim gud toktok bilong Jesus, hem no teachim hao man seleva savve disaed sapos hem bae born moa long niu laef or nomoa. Why nao iumi sei olsem? Disfala toktok long Greek languis wea olketa transleitim “hem born moa,” samfala transleitim “hem mas born from antap.”a Fitim datfala mek-tu transleison, wei for born moa long niu laef hem kam “from antap,” hem nao, “from heven,” or “from Dadi.” (John 19:11; James 1:17) Tru tumas, God nao mekem datwan happen.​—⁠1 John 3:⁠9.