Kasem Savve Distaem and for Olowe

WANFALA doctor from Germany, Ulrich Strunz hem raetem samfala buk wea garem sem title, Forever Young. Insaed olketa buk hia hem sei wei for duim exercise and for garem healthy kaikai and living savve mekem man garem gudfala health and savve mekem hem laef longtaem tu. Nomata olsem, hem no sei sapos man followim advaes bilong hem, bae hem savve laef for olowe.

Bat, wankaen savve nao hem mekem man fit for kasem laef olowe. And tu, sapos iu laef olowe, iu bae fit for kasem savve wea helpem iu for olowe. Jesus prea olsem long God: “Diswan nao minim laef olowe, for olketa kasem savve abaotem iu, datfala only tru God, and abaotem datwan wea iu sendem kam, Jesus Christ.” (John 17:3) Fastaem iumi laek savve long mining bilong “laef olowe,” and tu, wanem nao disfala spesol kaen savve and hao nao iu savve kasem.

Bible sei klosap nao Creator bae mekem earth for kamap wanfala paradaes wea man fit for laef longtaem insaed long hem. For mekem datfala Paradaes kamap, hem mas duim big samting, olsem Flood long taem bilong Noah. Matthew chapter 24, verse 37 go kasem 39 showimaot hao Jesus markem taem bilong iumi witim “taem bilong Noah,” wea pipol “nating lisin” long warning abaotem nogud taem wea olketa stap insaed. Olketa no lisin long message wea Noah talem long olketa. Then “taem wea Noah hem go insaed long ark,” Flood hem kam and finisim evriwan wea rejectim savve hia. Noah and olketa wea insaed long ark witim hem nomoa stap laef.

Jesus showimaot hao semkaen “taem” bae kam long taem bilong iumi. Olketa wea kasem and followim savve abaotem diswan bae stap laef long taem hia and garem tu hope for laef olowe. Nara samting tu, olketa wea dae finis and God rememberim olketa, bae olketa laef bak and garem hope for no dae moa. (John 5:28, 29) Lukim hao Jesus storyim tufala samting hia. Taem hem story long Martha abaotem resurrection bilong olketa wea dae finis, hem sei olsem: “Man wea showimaot faith long mi, nomata hem dae, bae hem laef bak moa; and evriwan wea laef and showimaot faith long mi bae nating dae.” Evri samting pruvim hao disfala “taem” hem klosap tumas, wea minim maet iu “nating dae.”—John 11:25-27.

Then Jesus askem Martha: “Waswe, iu bilivim diswan?” Hem ansa: “Ia, Lord.” Sapos Jesus askem iu sem kwestin distaem, hao nao bae iu ansa? Maet iu faendem hard for bilivim hao maet iu no dae. Nomata sapos iu feel olsem, for sure iu laek for bilivim datwan. Tingim go barava staka samting wea iu savve lanem sapos iu “nating dae”! Piksarem long mind bilong iu wei for enjoyim evri samting wea iu laek for lane abaotem and duim, bat no garem taem for duim distaem. And tingim go wei for lukim moa olketa wea iu lovem wea dae finis! Wanem nao datfala savve wea sapos iu followim, iu bae kasem olketa samting hia? And, hao nao iu savve kasem diswan?

Iumi Fit for Kasem Savve wea Givim Laef

Waswe, hem hard tumas for iumi kasem savve abaotem God and Christ? Nomoa. Hem tru, iumi kanduit savve long evri samting wea Creator wakem. Bat taem Jesus joinim “savve” witim “laef olowe,” hem no story abaotem wei for studyim universe or olketa nara science subject. Proverbs chapter 2, verse 1 and 5 showimaot hao olketa “toktok” and “komandment” wea stap insaed Bible nao main part long “barava savve bilong God.” And saed long Jesus, John 20:30, 31 showimaot hao evri information wea iumi needim hem stap insaed Bible, mekem iumi “savve kasem laef.”

So, savve abaotem Jehovah and Jesus Christ wea stap insaed Bible hem inaf for showim iu hao for kasem laef olowe. Bible hem wanfala spesol buk. Creator hem muvim olketa man for raetem long wei wea nomata olketa man nating wea no garem chance for skul gud, olketa fit for kasem savve wea lead go long laef olowe. Long semtaem, man wea savve lanem samting kwiktaem, and garem staka taem and chance bae fit for evritaem lanem niu samting from Bible. From iu readim disfala article, datwan showaot iu fit for lane, bat hao nao bae iu duim datwan?

Evriwea long world, pipol faendem hao best wei for kasem disfala savve hem thru long wei for samwan studyim Bible witim iu, samwan wea garem savve abaotem diswan. Long sem wei wea Noah waka hard for givim savve long pipol wea stap long taem bilong hem, Olketa Jehovah’s Witness willing for kam long haos bilong iu for storyim Bible witim iu. Maet olketa iusim brochure, Wanem Nao God Mas Kasem From Iumi? or buk wea garem title Savvy wea Lead Go Long Laef Olawe.a Nomata sapos iu faendem hem hard for bilivim idea hao insaed long Paradaes earth, olketa wea faithful bae “nating dae,” wei for studyim Bible olsem bae helpem iu for lane for trustim disfala promis. So sapos iu laek laef olowe or laek savve sapos hem mek-sense for garem datfala hope, wanem nao iu shud duim? Iu shud acceptim disfala chance for studyim Bible.

Study olsem bae gohed for hao long? Datfala brochure wea garem 32-page hem stap long staka languis, and hem garem 16-fala short leson nomoa. Or sapos iu savve markem wanfala hour each week, insaed tu-thri month nomoa, iu savve studyim olketa important Bible subject insaed buk Savvy wea Lead Go Long Laef Olawe. Olketa pablikeson hia helpem plande pipol for kasem staka savve and mekem grow strongfala love for God. Creator bae givim reward long olketa wea really lovem hem, mekem wei for olketa kasem laef olowe.

Iumi fit for kasem savve wea givim laef, and tu, hem isi for iumi kasem. Full Bible and samfala part bilong hem stap long winim 2,000 languis. Olketa Jehovah’s Witness long 235 kantri hapi for helpem and givim iu olketa Bible pablikeson mekem savve bilong iu kamap moa big.

Study Seleva

Wei wea iu fren witim God hem samting midolwan iu and Creator. Iu nomoa savve keepim gud datwan and mekem kamap strong, and God nomoa savve givim iu laef olowe. So iu shud gohed studyim Word bilong hem. Sapos samwan kam evritaem long haos bilong iu, maet hem moa isi for iu markem taem for study.

Bikos Bible and olketa Bible pablikeson garem “barava savve bilong God,” fitim for iumi keepim olketa gud. (Proverbs 2:5) Sapos olsem bae olketa stap for plande year. Sapos iu stap long wanfala poor kantri, maet iu no garem staka textbuk long skul, main wei wea iu lane hem nao for lisin gud and lukluk. Olsem example, long Benin, pipol story long winim 50 languis. Hem normal samting for man savve tumas for tok long foa or faevfala languis, nomata man hia nating garem languis buk bilong olketa languis hia. Sapos wei wea iu lane hem from iu lisin gud and lukluk, datwan hem wanfala spesol samting. Nomata olsem, bae iu lukim hao olketa buk savve barava helpem iu taem iu study.

Nomata sapos staka pipol stap long haos bilong iu, trae for garem wanfala gudfala ples for putim Bible and olketa Bible pablikeson bilong iu. Putim olketa long ples wea isi for iu lukim, and tu, long ples wea no eni samting savve spoelem.

Famili Study

Sapos iu wanfala dadi or mami, iu shud interest for helpem pikinini bilong iu for kasem sem savve wea iu kasem. Long olketa poor kantri, staka taem hem wei bilong parents for teachim pikinini bilong olketa wanem olketa needim for stap laef. Olketa samting olsem wei for kuki, katem firewood, karem wata, waka long garden, fishing, and duim market. Olketa samting hia helpem pikinini long laef bilong hem. Nomata olsem, staka parents no teachim long olketa pikinini savve wea lead go long laef olowe.

Nomata wanem living nao iu garem, maet iu no garem staka taem. Creator hem luksavve long datwan tu. Lukim samting hem talem longtaem go finis saed long wei for teachim olketa pikinini: “Iu mas putim olketa deep insaed long son [or dota] bilong iu and storyim olketa taem iu sidaon long haos bilong iu and taem iu wakabaot long road and taem iu leidaon and taem iu getap.” (Deuteronomy 6:7) Hem gud for trae mekem program bilong iuseleva for teach, olsem diswan long daon:

1. “Taem iu sidaon long haos bilong iu”: Traem best for storyim Bible evritaem witim olketa pikinini bilong iu long haos, maet evri week, long sem wei wea samwan study witim iu. Olketa Jehovah’s Witness garem olketa Bible pablikeson wea gud for teachim pikinini nomata wanem nao age bilong olketa.

2. “Taem iu wakabaot long road”: Story abaotem Jehovah long olketa pikinini, long sem wei wea iu teachim olketa important samting saed long evriday living or givim olketa instruction for followim.

3. “Taem iu leidaon”: Prea witim olketa pikinini bilong iu evri evening.

4. “Taem iu getap”: Staka famili kasem gud samting from olketa lukluk long wanfala scripture from Bible evri morning. Olketa Jehovah’s Witness iusim datfala buklet Lukluk Long Olketa Scripture Evridayb for duim diswan.

Long olketa poor kantri, staka parents duim big samting for mek sure wanfala pikinini bilong olketa kasem gudfala education. Olketa duim datwan mekem taem parents kamap olo, datfala pikinini nao bae keepim tufala. Bat, sapos iu studyim Bible and helpem evri pikinini bilong iu for duim datwan tu, iu bae kasem savve wea mekem iu and full famili bilong iu fit for kasem laef olowe.

Waswe, wanday long future bae iumi savve long evri samting? Nomoa. Taem earth bilong iumi gohed for travel thru long universe, bae iumi gohed for kasem savve. Tru tumas, Ecclesiastes 3:11 hem sei: “Evri samting [God] mekem luk naes long taem bilong hem. Hem putim feeling for laekem laef olowe insaed long heart bilong olketa, mekem olketa man bae nating savve long waka wea trufala God hem duim from start go kasem finis.” Wei for kasem savve hem wanfala hapi samting wea bae nating finis.

[Footnote]

[Blurb on page 5]

“Diswan nao minim laef olowe, for olketa kasem savve . . .”

[Olketa Piksa long page 7]

Helpem famili bilong iu for kasem savve distaem and for olowe