Duim Samting wea Jesus Storyim Long Prea Bilong Hem

1, 2. Bihaen Jesus celebratem Pasova witim olketa aposol bilong hem long 33 C.E., wanem nao hem duim?

LONG evening bilong Nisan 14 long year 33 C.E., Jesus and olketa aposol bilong hem celebratem Pasova. Disfala celebration mekem olketa tingim moa samting wea God duim for sevem olketa Israelite from Egypt. Bat olketa faithful disaepol bilong Jesus bae sev for olowe. Long day bihaen, olketa enemy bilong Jesus killim hem dae. Sakrifaes bilong Jesus bae mekem evri man garem chance for kamap free from sin and dae.—Heb. 9:12-14.

² For iumi no forgetim disfala present from God wea showimaot hem lovem iumi, Jesus startim wanfala niu celebration wea changem datfala Pasova wea kamap evri year. Hem tekem bred wea no garem yeast, brekem datwan, and givim long 11-fala faithful aposol bilong hem. Hem sei: “Diswan hem piksarem body bilong mi wea mi bae givim for iufala. Gohed for duim diswan for showimaot iufala rememberim mi.” Hem givim wanfala kap red wine long olketa tu and sei: “Diswan hem piksarem datfala niu agreement wea bae hem start taem mi pourimaot blood bilong mi for iufala.”—Luke 22:19, 20.

3. (a) Bihaen Jesus dae, wanem nao hem finis and wanem nao hem start? (b) Olketa wanem kwestin nao iumi shud tingim taem iumi story raonem prea bilong Jesus?

³ Long datfala taem Law agreement midolwan long God and olketa Israelite hem klosap for finis. Wanfala niu agreement midolwan long Jehovah and olketa anointed disaepol bilong Jesus bae hem start. Jesus no laekem olketa disaepol for kamap olsem nation bilong Israel. Olketa Israelite no wan mind for worshipim God, and datwan spoelem nem bilong God. (John 7:45-49; Acts 23:6-9) Jesus laekem olketa disaepol bilong hem for waka tugeta long wan mind, mekem olketa savve mekhae long nem bilong God. So wanem nao Jesus duim? Hem talem naesfala prea for askem help bilong Dadi bilong hem, and hem nambawan privilege for iumi olketa man savve readim disfala prea. (Lukim piksa long start bilong study.) Disfala prea hem stap long John 17:1-26. Taem iumi story raonem disfala prea, tingim olketa kwestin hia: “Waswe, God ansarem disfala prea bilong Jesus? Waswe, mi duim samting wea Jesus storyim insaed datfala prea?”

OLKETA SAMTING WEA BARAVA IMPORTANT LONG JESUS

4, 5. (a) Wanem nao iumi lanem from first haf long prea bilong Jesus? (b) Taem Jesus askem samting for hemseleva, wanem nao Jehovah givim long hem?

⁴ Jesus teachim olketa nambawan samting long olketa disaepol bilong hem gogo hem midolnaet nao. Then hem luk go ap long skae and sei: “Dadi, hem taem nao for iu mekhae long son bilong iu, mekem son bilong iu savve mekhae long iu tu, from iu nao givim hem paoa ovarem evri man, mekem hem savve givim laef olowe long evriwan wea iu givim long hem.” Hem sei tu: “Long earth, mi givim glory long iu bikos mi finisim nao waka wea iu markem mi for duim. So, Dadi, tekem mi go bak for stap witim iu long heven wea hem nao ples mi stap witim iu long bifor kam yet.”—John 17:1-5.

⁵ Long start long prea bilong Jesus, hem storyim olketa samting wea barava important long hem. First samting, hem prea for Dadi bilong hem kasem glory, wea datwan hem olsem first samting wea hem askem tu long Lord’s Prea. (Luke 11:2) Mek-tu samting, hem prea for olketa disaepol bilong hem. Hem ask for hem savve “givim laef olowe” long olketa. Bihaen nao hem ask for samting for hemseleva. Hem sei: “Dadi, tekem mi go bak for stap witim iu long heven wea hem nao ples mi stap witim iu long bifor kam yet.” Jehovah ansarem prea bilong Son bilong hem and givim hem samting wea winim wanem hem askem. God givim hem “wanfala nem wea winim” nem bilong olketa angel.—Heb. 1:4.

“LANE” ABAOTEM TRUFALA GOD

6. (a) For olketa aposol kasem laef olowe, wanem nao olketa mas duim? (b) Hao nao iumi savve olketa aposol duim datwan?

⁶ Long prea bilong Jesus hem storyim tu wanem iumi mas duim for kasem laef olowe, wea hem wanfala present from Jehovah. (Readim John 17:3.) Hem sei iumi mas gohed “lane” abaotem God and Christ. Hao nao iumi savve duim diswan? First samting, iumi mas traem best for lanem moa samting abaotem Jehovah and Son bilong hem. Mek-tu samting, iumi mas followim wanem iumi lanem long laef bilong iumi. Olketa aposol duim finis tufala samting hia, olsem Jesus talem long prea bilong hem taem hem sei: “Mi talem long olketa evri toktok wea iu talem kam long mi. Olketa hapi long toktok hia.” (John 17:8) Bat for kasem laef olowe, olketa mas gohed ting raonem toktok bilong God and followim wanem olketa lanem. Waswe, olketa aposol duim diswan go kasem taem olketa dae? Yes. Iumi savve long diswan bikos nem bilong olketa hem stap for olowe long 12-fala faondeson ston bilong Niu Jerusalem.—Rev. 21:14.

7. Wanem nao hem minim for “lane” abaotem God, and why nao datwan hem important?

⁷ Sapos iumi laek for kasem laef olowe, iumi mas gohed “lane” abaotem God. Datwan minim iumi mas duim wanem? Greek word wea Bible iusim long hia savve minim tu “shud gohed for savve.” So for “lane” abaotem God hem minim for gohed lanem moa samting abaotem hem. Diswan no minim iumi savve nomoa long olketa wei bilong hem and plan bilong hem. Iumi mas barava lovem hem and fren gud witim hem. Iumi mas showimaot love for olketa brata and sista tu. Bible sei: “Man wea no showimaot love hem no savve long God bikos God hem love.” (1 John 4:8) For savve long God hem minim tu for obeyim hem. (Readim 1 John 2:3-5.) Hem nambawan privilege for savve long Jehovah! Bat iumi mas careful for no spoelem wei wea iumi fren witim hem, olsem Judas Iscariot hem duim. So iumi mas traem best for strongim wei wea iumi fren witim Jehovah. Sapos iumi duim olsem, iumi bae kasem laef olowe wea hem nambawan present from Jehovah.—Matt. 24:13.

“BIKOS LONG NEM BILONG IU”

8, 9. (a) Wanem nao main important samting long Jesus taem hem stap long earth? (b) Masbi Jesus barava heitim wanem teaching?

⁸ Taem iumi readim prea bilong Jesus long John chapter 17, iumi luksavve Jesus barava lovem olketa aposol bilong hem and iumi tu. (John 17:20) Jesus laekem for iumi sev, bat datwan hem no main important samting long hem. Taem hem stap long earth, main important samting wea hem tingim nao hem for mekhae long nem bilong Dadi bilong hem. Olsem example, taem Jesus explainim why hem kam long earth, hem readim toktok from Isaiah wea sei: “Jehovah givim mi spirit bilong hem bikos hem chusim mi for talemaot gud nius long pipol wea poor.” Masbi taem Jesus readim diswan, hem barava talemaot klia nem bilong God.—Luke 4:16-21.

⁹ Longfala taem bifor Jesus kam long earth, olketa bigman bilong olketa Jew teachim pipol for no iusim nem bilong God. Masbi Jesus barava heitim datfala teaching. Hem sei long olketa bigman hia: “Mi kam long nem bilong Dadi bilong mi, bat iufala no biliv long mi. Sapos eniwan kam long nem bilong hemseleva, bae iufala biliv long hem.” (John 5:43) Then tu-thri day bifor Jesus dae, hem talem moa main important samting long hem taem hem prea and sei: “Dadi, mekhae long nem bilong iu.” (John 12:28) Prea bilong Jesus long John chapter 17 showimaot klia tu, main important samting long laef bilong Jesus hem for mekhae long nem bilong dadi bilong hem.

10, 11. (a) Taem Jesus talemaot nem bilong Dadi bilong hem, wanem nao datwan minim? (b) Why nao olketa disaepol bilong Jesus talemaot nem bilong Jehovah?

¹⁰ Jesus prea olsem: “Mi talemaot nem bilong iu long olketa pipol long world wea iu givim long mi. Olketa hia olketa bilong iu, and iu givim olketa long mi and olketa obeyim toktok bilong iu. . . . Mi bae lusim disfala world and kam long iu, bat olketa hia bae gohed stap long world. Dadi long heven wea iu holy, plis lukaftarem olketa hia bikos long nem bilong iu wea iu givim mi, mekem olketa savve wan mind olsem iumi tufala wan mind.”—John 17:6, 11.

¹¹ Taem Jesus “talemaot” nem bilong Dadi bilong hem long olketa disaepol, hem no just talem datfala nem Jehovah long story bilong hem. Jesus helpem olketa for savve long Jehovah. Hem teachim olketa abaotem olketa nambawan wei bilong God and kaenfala wei wea Hem deal witim iumi. (Ex. 34:5-7) Distaem Jesus hem King long heven, and hem gohed for helpem olketa disaepol for talemaot nem bilong Jehovah long pipol evriwea long earth. Olketa duim diswan for helpem moa pipol lane abaotem Jehovah bifor disfala nogud world hem finis. Long datfala taem, hem bae sevem olketa faithful witness bilong hem and evriwan bae savve long nambawan nem bilong Jehovah!—Ezek. 36:23.

‘MEKEM PIPOL LONG WORLD BILIV’

12. Wanem nao thrifala samting wea iumi mas duim for finisim waka wea Jesus startim?

¹² Jesus talem olketa disaepol bilong hem for finisim waka wea hem startim. Hem prea olsem: “Mi sendem olketa go long world olsem iu sendem mi kam long disfala world finis.” Bat Jesus savve olketa needim help for duim datfala waka. Taem Jesus stap witim olketa disaepol bilong hem, hem traem best for helpem olketa for winim wik point bilong olketa. And long prea bilong hem, hem askem Jehovah for helpem olketa disaepol for duim thrifala important samting. First samting, hem prea for olketa disaepol no olsem pipol long world bilong Satan. Mek-tu samting, hem prea for olketa disaepol obeyim toktok bilong God mekem olketa holy. Mek-thri samting, Jesus prea for olketa disaepol savve wan mind, olsem hem and Dadi bilong hem tufala wan mind. Man seleva mas ting raonem disfala kwestin: ‘Waswe, mi duim thrifala samting hia wea Jesus prea abaotem?’ Jesus barava sure sapos olketa disaepol duim olketa samting hia, staka pipol bae acceptim message bilong olketa.—Readim John 17:15-21.

13. Wanem nao showimaot Jehovah ansarem prea bilong Jesus long first century?

¹³ Taem iumi studyim Bible buk Acts, iumi luksavve Jehovah ansarem prea bilong Jesus. Olketa Christian long first century hem pipol wea Jew and wea no Jew, olketa wea rich and wea poor, olketa wea slave and wea ownim slave. Tingim hao hem bae isi for olketa difren kaen pipol hia divaed! Bat olketa barava wan mind dastawe aposol Paul comparem olketa witim olketa difren part long body bilong man and sei Jesus nao hem hed bilong olketa. (Eph. 4:15, 16) Long world bilong Satan wea divaed olsem, holy spirit nomoa savve helpem olketa Christian hia for garem wan mind olsem.—1 Cor. 3:5-7.

14. Long wanem wei nao Jehovah ansarem prea bilong Jesus long taem bilong iumi?

¹⁴ Bat bihaen olketa aposol dae, olketa disaepol no wan mind nao. Olsem Bible talem, datfala wei for apostate hem start. Olketa false teaching kam insaed kongregeson wea diswan mekem olketa divaed. (Acts 20:29, 30) Bat long year 1919, Jesus mekem olketa anointed Christian kamap free from paoa bilong false religion and mekem olketa for garem “wan mind.” (Col. 3:14) Wanem nao kamaot from preaching waka bilong olketa? Distaem, winim seven million pipol from “evri kantri and tribe and pipol and languis” wan mind for worshipim Jehovah witim olketa anointed Christian. (John 10:16; Rev. 7:9) Diswan showimaot Jehovah barava ansarem prea bilong Jesus wea sei: “Mekem pipol long world savve iu nao sendem mi kam and iu lovem olketa and iu lovem mi tu”!—John 17:23.

LASTFALA TOKTOK WEA HERE NAES TUMAS

15. Wanem spesol samting nao Jesus askem for olketa anointed disaepol bilong hem?

¹⁵ Long datfala evening bilong Nisan 14, Jesus givim glory long olketa aposol bilong hem, wea minim hem “showimaot respect” long olketa. Hem duim diswan long wei for mekem wanfala agreement witim olketa for rul witim hem insaed Kingdom bilong hem. (Luke 22:28-30; John 17:22) Then Jesus prea for evriwan wea bae kamap olketa anointed disaepol bilong hem. Hem sei: “Dadi, mi laekem olketa wea iu givim long mi for stap tu long ples wea mi bae stap mekem olketa savve lukim hae position wea iu givim long mi, bikos iu lovem mi bifor long taem wea olketa man start for born long earth.” (John 17:24) Olketa nara sheepsheep no jealous bat olketa hapi long reward wea olketa anointed disaepol bae kasem. Diswan hem nara samting wea pruvim olketa tru Christian distaem olketa wan mind.

16, 17. (a) Long lastfala toktok long prea bilong Jesus, wanem nao hem sei hem bae gohed for duim? (b) Wanem nao iumi shud gohed for duim?

¹⁶ Staka pipol long world no laek for luksavve Jehovah garem pipol wea barava savve long hem and olketa wan mind. Plande taem diswan happen bikos olketa bigman bilong religion teachim olketa laea samting long olketa. Sem samting happen tu long taem bilong Jesus. So long lastfala toktok long prea bilong hem, Jesus sei: “Dadi long heven wea iu raeteous, pipol long world no savve long iu, bat mi savve long iu and olketa savve iu nao sendem mi kam. Mi talemaot nem bilong iu long olketa and bae mi gohed for duim olsem, mekem olketa savve showimaot love long nara pipol olsem iu tu showimaot love long mi and mekem mi savve wan mind witim olketa.”—John 17:25, 26.

¹⁷ Jesus barava talemaot nem bilong Dadi bilong hem. Distaem hem Hed bilong kongregeson, and hem gohed helpem iumi for talemaot nem bilong Dadi bilong hem and wanem Hem bae duim. Iumi laek for obeyim samting wea Jesus talem and gohed strong for preachim gud nius and teachim pipol for kamap disaepol. (Matt. 28:19, 20; Acts 10:42) Iumi mas traem best tu for gohed garem wan mind. Sapos olsem, iumi duim samting wea Jesus storyim long prea bilong hem. Diswan bae mekhae long nem bilong Jehovah and mekem iumi hapi for olowe.