Hao Important Nao Nem blo Jehovah lo Jesus?

1-2. (a) Wat nao Jesus duim lo datfala naet bifor olketa killim hem dae? (b) Olketa wanem kwestin nao bae iumi storyim lo disfala article?

LO THURSDAY evening, lo Nisan 14, 33 C.E., olketa klosap for betrayim Jesus, judgem hem, accusim hem, killim hem nogud, and then killim hem dae. Hem and olketa faithful aposol kaikai lo datfala rum antap. Bihaen olketa kaikai finis, Jesus talem samfala last toktok for encouragem olketa aposol. And just bifor olketa evriwan lusim datfala rum, Jesus talem wanfala barava important prea. Aposol John hem raetem datfala prea and iumi savve readim datwan lo John chapter 17.

² Wat nao iumi savve lanem from wat Jesus talem lo datfala prea? Hao nao datfala prea hem showimaot samting wea barava important lo Jesus during lo ministry blo hem lo earth? Bae iumi storyim ansa lo olketa kwestin hia.

“MI TALEMAOT NEM BLO IU LO OLKETA”

3. Wat nao Jesus talem abaotem nem blo Jehovah, and wat nao hem minim? (John 17:​6, 26)

³ Lo datfala prea, Jesus sei: “Mi talemaot nem blo iu lo olketa.” Tufala taem nao Jesus talem lo Jehovah dat hem talemaot nem blo Hem lo olketa disaepol. (Readim John 17:​6, 26.) Wat nao Jesus minim? Hao, olketa disaepol blo Jesus no savve yet lo datfala nem? Nomoa, olketa disaepol blo hem olketa Jew, olketa savve finis dat nem blo God hem Jehovah. Datfala nem hem kamap samting olsem 7,000 taems lo Hebrew Scripture. So really Jesus hem story abaotem wat kaen God nao Jehovah. Hem helpem olketa disaepol for savve gud go moa lo Jehovah, includim olketa purpose blo Hem, wat hem duim, and olketa quality wea hem garem. No eniwan savve gud lo Jehovah olsem Jesus.

4-5. (a) Wat nao savve mekem nem blo samwan kamap important lo iumi? Storyim wanfala example. (b) Hao nao nem blo Jehovah kamap important lo olketa disaepol blo Jesus?

⁴ Tingim disfala example, maet wanfala elder lo kongregeson blo iu nem blo hem David, and hem wanfala doctor tu. For staka year finis iu savve lo datfala brata. Bat then wanday iu kasem wanfala medical emergency. Olketa rashim iu go lo hospital wea datfala brata waka, and hem iusim savve blo hem olsem doctor for sevem laef blo iu. From datwan, nem blo datfala brata hem kamap important lo iu, bikos bae iu evritaem tingim wat hem duim for iu! Bae iu no just ting lo David olsem elder wea iu savve lo hem nomoa, bat bae iu tingim tu dat hem nao doctor wea sevem laef blo iu.

⁵ Lo sem wei tu, olketa disaepol blo Jesus savve finis lo nem blo Jehovah. Bat ministry blo Jesus nao mekem nem blo Jehovah kamap moa important lo olketa disaepol. Why nao olsem? Bikos Jesus showimaot olketa wei blo Dadi blo hem lo evri samting wea hem talem and duim. So olketa aposol “savve” gud go moa lo Jehovah taem olketa lisin lo hao Jesus teach and lukim hao hem deal witim pipol.—John 14:9; 17:3.

“NEM BLO IU WEA IU GIVIM MI”

6. Wat nao Jesus minim taem hem sei Jehovah givim nem blo Hem lo Jesus? (John 17:​11, 12)

⁶ Lo datfala prea, Jesus prea for olketa disaepol, and sei: “Plis lukaftarem olketa hia bikos lo nem blo iu wea iu givim mi.” (Readim John 17:​11, 12.) Hao, datwan minim Jesus tekem datfala nem Jehovah nao? Nomoa. Lo datfala prea, Jesus story abaotem Jehovah and sei, “nem blo iu.” So nem blo Jehovah hem no kamap nem blo Jesus. So, wat nao Jesus minim taem hem sei God givim nem blo Hem lo Jesus? First samting, Jesus hem Spokesman and man wea representim Jehovah. Hem kam lo nem blo Dadi blo hem and duim staka mirakol lo datfala nem. (John 5:43; 10:25) And nara samting tu, datfala nem Jesus hem minim “Jehovah Hem Man for Sevem Olketa Man.” So, nem blo Jesus hem barava join witim nem blo Jehovah.

7. Storyim example lo hao Jesus fit for story on behalf lo nem blo Jehovah.

⁷ Tingim disfala example, taem wanfala ambassador representim wanfala ruler, hem savve story on behalf lo nem blo datfala ruler. So toktok blo datfala ambassador bae hem garem sem paoa olsem datfala ruler. Lo sem wei tu, Jesus representim Jehovah and story lo pipol lo nem blo Jehovah.—Matt. 21:9; Luke 13:35.

8. Hao nao nem blo Jehovah “stap lo” Jesus bifor hem kam lo earth? (Exodus 23:​20, 21, ftn.)

⁸ Bible kolem Jesus “datfala Word,” bikos hem waka olsem Spokesman blo Jehovah for talem information and instruction for olketa angel and pipol tu. (John 1:​1-3) Luk olsem, Jesus nao datfala angel wea Jehovah sendem for lukaftarem olketa Israelite taem olketa lusim Egypt. Taem Jehovah talem olketa Israelite for obeyim datfala angel, Jehovah sei: “Bikos nem blo mi stap lo hem.”a (Readim Exodus 23:​20, 21 and footnote.) Nem blo Jehovah “stap lo” Jesus bikos hem representim Jehovah and hem nao main wan wea mekhae lo datfala nem and mekem nem blo Dadi blo hem for holy.

“DADI, MEKHAE LO NEM BLO IU”

9. Hao important nao nem blo Jehovah lo Jesus? Explainim.

⁹ Olsem iumi storyim finis, nomata bifor Jesus kam lo earth, nem blo Jehovah hem barava important lo hem. Dastawe iumi no sapraes dat evri samting wea Jesus duim taem hem lo earth hem join witim datfala nem! Gogo for end lo ministry blo Jesus, hem sei olsem lo Jehovah: “Dadi, mekhae lo nem blo iu.” Semtaem nomoa, Dadi blo hem tok kam witim wanfala laod voice from skae and sei: “Mi mekhae lo nem blo mi finis, and bae mi mekhae lo hem moa.”—John 12:28.

10-11. (a) Hao nao Jesus mekhae lo nem blo Jehovah? (Lukim tu piksa.) (b) Why nao nem blo Jehovah need for kamap holy and free from blame?

¹⁰ Jesus tu mekhae lo nem blo Dadi blo hem. Hao nao hem duim datwan? Hem duim datwan taem hem helpem pipol for savve lo olketa nambawan wei blo Dadi blo hem and wat Dadi blo hem duim. Bat, samfala samting moa hem insaed lo wei wea hem mekhae lo datfala nem. Nem blo Jehovah need for kamap holy and free from blame.b Jesus showim diswan hem barava important taem hem teachim olketa follower blo hem datfala Lord’s prea. Hem sei: “Dadi blo mifala lo heven, mifala laekem nem blo iu for holy.”—Matt. 6:9.

¹¹ Why nao nem blo Jehovah need for kamap holy and free from blame? Bikos lo garden blo Eden, Satan datfala Devil hem no respectim and tok spoelem nem blo Jehovah God. Satan sei Jehovah hem laea and hem holem bak gud samting from Adam and Eve. (Gen. 3:​1-5) And tu, hem olsem Satan hem sei dat wei blo Jehovah for duim samting hem no stret. Olketa laea toktok blo Satan hem barava spoelem reputation or nem blo Jehovah. Bihaen, lo taem blo Job, Satan sei tu dat olketa wea worshipim Jehovah only duim datwan bikos olketa laek for kasem gud samting from Jehovah. Datfala man for laea hem sei tu no eni man bae gohed lovem Jehovah and worshipim hem taem hem kasem hard taem. (Job 1:​9-11; 2:4) Hem needim taem for pruvim hu nao laea, Jehovah or Satan.

“MI WILLING FOR GIVIM LAEF BLO MI”

12. Wat nao Jesus willing for duim bikos hem lovem nem blo Jehovah?

¹² Bikos Jesus lovem Jehovah, hem laek for duim best blo hem for mekem nem blo Jehovah kamap holy and for kliarem datfala nem from eni blame. Jesus sei: “Mi willing for givim laef blo mi.” (John 10:​17, 18) Yes, hem even willing for dae for nem blo Jehovah.c First perfect man and woman, Adam and Eve, rejectim Jehovah and sapotim Satan. Bat Jesus no olsem, hem willing for kam lo earth and pruvim love blo hem for Jehovah. Jesus duim datwan taem hem barava faithful lo full laef blo hem. (Heb. 4:15; 5:​7-10) Hem gohed faithful go kasem taem hem safa and dae lo post. (Heb. 12:2) Taem Jesus duim datwan, hem pruvim hem lovem Jehovah and nem blo Hem.

13. Why nao Jesus hem best person for pruvim Satan hem laea? (Lukim tu piksa.)

¹³ Lo full laef blo Jesus, hem barava pruvim dat Satan nao man for laea, no Jehovah! (John 8:44) Jesus savve gud lo Jehovah winim eni nara person. If eni samting wea Satan talem againstim Jehovah hem tru, Jesus bae fit for savve lo datwan. Bikos Jesus savve datwan hem no tru, hem gohed strong for defendim reputation or nem blo Jehovah. Nomata lo taem wea luk olsem Jehovah lusim hem, Jesus no rejectim Dadi blo hem wea lovem hem, bat hem willing for dae.—Matt. 27:46.d

“MI FINISIM NAO WAKA WEA IU MARKEM MI FOR DUIM”

14. Hao nao Jehovah rewardim Jesus from hem faithful?

¹⁴ Lo prea wea Jesus talem lo naet bifor hem dae, Jesus fit for sei: “Mi finisim nao waka wea iu markem mi for duim.” Jesus trustim dat Jehovah bae rewardim hem from hem faithful. (John 17:​4, 5) Jesus hem fit for trustim Dadi blo hem. Jehovah no leavim hem insaed lo grev. (Acts 2:​23, 24) Jehovah resurrectim Jesus and givim hem wanfala barava hae position lo heven. (Phil. 2:​8, 9) Gogo, Jesus start for rul olsem King lo Kingdom blo God. Wat nao Kingdom bae duim? Second part lo datfala Lord’s prea hem sei: “Mifala laekem Kingdom blo iu for kam. Duim will blo iu [Jehovah] lo earth, olsem iu duim lo heven.”—Matt. 6:10.

15. Wat moa Jesus bae duim?

¹⁵ Klosap nao, Jesus bae faet againstim olketa enemy blo God and finisim evri wicked pipol lo Armageddon. (Rev. 16:​14, 16; 19:​11-16) No longtaem bihaen datwan, bae hem torowem Satan insaed datfala “abyss,” wea minim Satan bae hard for duim eni samting. (Rev. 20:​1-3) Jesus bae mekem peace kamap and mekem evriwan kamap perfect during lo Wan Thousand Year Rul blo hem. Hem bae resurrectim olketa wea dae. Hem bae mekem full earth kamap paradaes. Purpose blo Jehovah bae fulfill!—Rev. 21:​1-4.

16. Wat nao bae happen lo end blo Wan Thousand Year Rul?

¹⁶ Wat nao iumi expectim for happen lo end blo datfala Wan Thousand Year Rul? Wei wea olketa man sin and no perfect bae finis. Lo datfala taem, man bae no needim datfala ransom for ask for forgiveness for sin blo hem, and tu, olketa bae no needim eni mediator or olketa priest. And datfala “last enemy dae [wea iumi kasem from Adam] bae hem finis.” Olketa grev bae emti. Olketa wea dae bae laef bak. Evriwan lo earth bae perfect.—1 Cor. 15:​25, 26.

17-18. (a) Wat nao bae happen lo end blo datfala Wan Thousand Year Rul? (b) Wat nao bae Jesus duim taem hem finis for rul? (1 Corinthians 15:​24, 28) (Lukim tu piksa.)

¹⁷ Wat moa bae happen lo end blo datfala Wan Thousand Year Rul? Lo datfala taem wanfala barava spesol samting bae happen. Datfala issue abaotem wei for mekem nem blo Jehovah kamap holy bae finis. Why nao olsem? Lo garden blo Eden, Satan sei Jehovah hem laea and wei blo Jehovah for rul hem no showimaot love. Since datfala taem, staka pipol wea tinghae and respectim Jehovah, gohed for duim samting for mekem datfala nem for holy. So lo end blo datfala Wan Thousand Year Rul, reputation blo Jehovah bae barava free from blame. Jehovah bae barava pruvim dat hem wanfala loving Dadi blo iumi lo heven.

¹⁸ Lo end blo datfala Wan Thousand Year Rul, evriwan bae barava savve nao wat Satan talem abaotem Jehovah hem no tru. Wat nao bae Jesus duim taem hem finis for rul? Hao, bae hem followim example blo Satan and bighed againstim Jehovah? Barava nomoa! (Readim 1 Corinthians 15:​24, 28.) Jesus bae givim bak datfala Kingdom lo Dadi blo hem. Hem bae putim hemseleva anda lo rul blo Jehovah. Yes, Jesus no olsem Satan, Jesus willing for givim evriting lo Jehovah bikos hem lovem Jehovah.

19. Hao important nao nem blo Jehovah lo Jesus?

¹⁹ Jehovah hem barava willing for givim lo Jesus nem blo Hem! Bikos lo full laef blo Jesus, hem showimaot dat hem man wea representim Dadi blo hem lo perfect wei. So, hao important nao nem blo Jehovah lo Jesus? Datfala nem barava important lo Jesus winim eni nara samting. Hem willing for dae for datfala nem, and hem bae willing for givim bak evriting lo Jehovah lo end blo datfala Wan Thousand Year Rul. Wat nao iumi savve duim for followim example blo Jesus? Bae iumi storyim ansa for disfala kwestin lo next article.