Long Wanem Wei Nao Iu Savve Lukim God?

FROM “God hem wanfala Spirit,” iumi olketa man no savve lukim hem. (John 4:24) Nomata olsem, Bible sei samfala pipol lukim God. (Hebrew 11:27) Long wanem wei nao iu savve lukim God?—Colossae 1:15.

From iumi no savve lukim God, iumi olsem man wea blind taem hem born wea no savve lukim eni samting. Waswe, diswan minim hem no savve long eni samting nao? Nomoa, wanfala blind man hem sei: “Nomata mi no savve lukluk, mi savve long olketa samting wea gohed.” So man wea blind savve kasem information long olketa difren wei and datwan helpem hem for savve long pipol, olketa samting wea happen, and olketa samting wea stap raonem hem.

Long sem wei tu, nomata iumi no savve iusim eye bilong iumi for lukim God, iumi savve lukim hem long wei for savve long olketa samting abaotem hem. (Ephesus 1:18) Tingim thrifala wei wea iu savve duim datwan.

“OLKETA WEI BILONG HEM SHOWAOT KLIA START LONG TAEM WEA HEM WAKEM WORLD”

Samfala man wea blind savve herehere gud and feel savve long samting winim man wea no blind. Datwan helpem hem for savve long olketa samting, nomata hem no lukim datwan. Olsem tu, iumi no iusim eye bilong iumi for lukim God, bat iumi ting raonem olketa samting wea God hem wakem for helpem iumi savve long hem. Bible hem sei: “Olketa wei bilong hem showaot klia start long taem wea hem wakem world kam kasem distaem. Olketa fit for luksavve hem God.”—Rome 1:20.

Olsem example, tingim earth, ples wea iumi stap long hem. God no putim iumi long earth for faetem laef nomoa. Bat hem givim iumi olketa samting wea mekem iumi for enjoyim laef. Iumi hapi taem iumi feelim naesfala wind hem blow kam, feelim sun long baksaed, kaikaim frut wea teist naes, or herem olketa bird singsing. Olketa samting hia showimaot God hem tingim iumi, lovem iumi, and hem kaen long iumi.

Taem iu lukim olketa samting long universe, wanem nao datwan teachim iu abaotem God? Universe helpem iumi for luksavve God garem paoa. Olketa scientist faendemaot disfala universe hem gohed for kamap big and hem kwiktaem tumas for duim datwan! Taem iu lukluk long skae long naet, hem gud for tingim: ‘Hu nao garem bigfala paoa olsem for mekem datwan happen?’ Bible sei God nao “garem bigfala paoa.” (Isaiah 40:26) Olketa samting wea God wakem helpem iumi for luksavve hem nao “Olmaeti God” wea “garem bigfala paoa.”—Job 37:23.

“HEM NAO HELPEM IUMI FOR MINIM HEM”

Wanfala mami bilong tufala pikinini wea blind hem sei: “Wanfala important samting for duim for helpem tufala for lanem olketa samting, hem for story witim tufala. Mi mas talem tufala evri samting wea mi lukim and herem, [and] mi mas gohed for duim datwan. Mi nao lukluk for olketa.” Olsem tu, nomata “no eni man hem lukim God long enitaem,” Son bilong God, Jesus, “wea barava stap klosap long Dadi long heven, hem nao helpem iumi for minim hem.” (John 1:18) Jesus nao savve explainim God long iumi bikos hem nao first wan wea God wakem and hem spesol Son bilong Hem. Jesus nao best wan for helpem iumi for minim God.

Jesus stap witim Dadi bilong hem for staka thousand year. Tingim samfala samting wea hem talem abaotem God:

• God gohed for waka. “Dadi bilong mi hem gohed waka kam kasem distaem.”—John 5:17.

• God savve long wanem iumi needim. “Dadi bilong iufala, hem savve finis long wanem iufala needim bifor iufala askem hem.”—Matthew 6:8.

• God hem givim iumi wanem iumi needim. “Dadi bilong iufala long heven . . . hem mekem sun hem shaen long pipol wea gud and pipol wea nogud and hem mekem hem rain long pipol wea raeteous and pipol wea no raeteous.”—Matthew 5:45.

• Iumi wanwan important long God. “Man savve salem tufala smol bird for wanfala selen nomoa, iaman? Nomata olsem, Dadi bilong iufala hem savve taem wanfala smol bird olsem hem dae. Iu savve, hem kaontem finis tu evri hair long hed bilong iufala. So iufala no fraet, bikos iufala barava important winim evri smol bird hia.”—Matthew 10:29-31.

WANFALA MAN WEA SHOWIMAOT OLKETA WEI BILONG GOD

Pipol wea blind no savve lukim olketa shadow and laet from sun, bat olketa feel savve taem olketa stap long shade bikos hem cold and olketa feel savve olketa stap long sun bikos olketa feelim hot bilong sun. Olsem tu, iumi no savve lukim Jehovah bat olketa samting wea Jesus duim taem hem stap long earth helpem iumi for savve long Hem.

Jesus nao showimaot olketa wei bilong Jehovah. (Philippi 2:7) Philip, wanfala disaepol bilong Jesus, sei long Jesus: “Lord, showim Dadi hia long mifala.” Jesus sei long hem: “Man wea lukim mi hem lukim Dadi tu.” (John 14:8, 9) Wanem nao iumi savve lanem abaotem Dadi bilong Jesus from wanem Jesus duim?

Jesus hem kaen and hambol. (Matthew 11:28-30) Datwan mekem pipol no fraet long hem. Jesus minim feeling bilong olketa wea sorre, and taem olketa narawan hapi hem tu hapi. (Luke 10:17, 21; John 11:32-35) Taem iu readim or herem olketa story abaotem Jesus, tingim olketa wei bilong hem. Datwan bae helpem iu for savve long olketa wei bilong God and iu bae laek for savve moa abaotem hem.

TING RAONEM EVRI SAMTING

Wanfala woman for raet hem explainim wei wea man wea blind hem savve long olketa samting wea happen raonem hem. Hem sei: “Man wea blind savve kasem information taem hem tasim, smelem, herem, or teistim samting. Hem iusim disfala information for minim olketa samting wea happen raonem hem.” Long sem wei tu, taem iu lukluk long olketa samting wea God wakem, readim wanem Jesus talem abaotem Dadi bilong hem, and tingim olketa samting wea Jesus duim wea showimaot olketa wei bilong God, datwan bae helpem iu for lukim Jehovah, and iu bae start for savve gud long hem.

Job, wanfala man wea laef bifor, hem lukluk long olketa samting wea God wakem for helpem hem for savve long God. Firstaem Job “no minim” staka samting abaotem God. (Job 42:3) Bat bihaen hem ting raonem olketa samting wea God wakem, hem sei: “Bifor, mi herem samting wea olketa talem abaotem iu, bat distaem mi barava lukim iu nao long eye bilong mi.”—Job 42:5.

Iu tu savve olsem Job. Bible hem sei: “Sapos iu lukaotem [Jehovah], bae iu faendem hem.” (1 Chronicles 28:9) Olketa Jehovah’s Witness bae hapi for helpem iu for duim datwan.