Bible Buk Namba 29​—Joel

Man wea Raetem: Joel

Ples Hem Raetem: Judah

Taem Hem Finis Raetem: c. 820 B.C.E. (?)

STAKA maka staka, wanfala big sekson bilong olketa insect spoelem land. Fire long front and bihaen long olketa finisim evribit evri nara samting. Evriwea short long kaikai. Sun hem kamap dark and moon kamap blood, bikos bigfala day bilong Jehovah wea mekem man fraet hem klosap tumas. Hem givim komand for pushim go huknaef and for hipimap olketa nation go long wei for distroe. Nomata olsem, samfala “bae stap sef.” (Joel 2:32) Olketa spesol samting wea happen hia mekem profesi bilong Joel barava interesting and helpem iumi long bigfala wei.

² Buk hia start witim, “toktok bilong Jehovah wea Joel son bilong Pethuel hem kasem.” Bible no talem eniting moa abaotem Joel. Hem mekhae long profesi message and no man wea raetem. Mining bilong nem “Joel” (Hebrew, Yoh·’elʹ) hem “Jehovah Hem God.” Wei wea Joel savve gud long Jerusalem, temple bilong hem, and evriting olketa duim insaed temple maet minim hem raetem disfala buk long Jerusalem or Judah.—Joel 1:1, 9, 13, 14; 2:1, 15, 16, 32.

³ Wanem taem nao Joel raetem disfala buk? Iumi hard for sure long diswan. Olketa savveman talem enikaen date from bifor 800 B.C.E. go kasem 400 B.C.E. Wei wea hem storyim judgment bilong Jehovah long olketa nation long flat land bilong Jehoshaphat showimaot Joel raetem datfala profesi bihaen Jehovah givim wei for win long King Jehoshaphat bilong Judah, wea minim bihaen Jehoshaphat kamap king long 936 B.C.E. (Joel 3:2, 12; 2 Chron. 20:22-26) Profet Amos maet talem toktok from profesi bilong Joel. So, diswan minim Joel raetem profesi bilong hem firstaem bifor Amos, wea profesi midolwan 829 and 804 B.C.E. (Joel 3:16; Amos 1:2) Diswan maet agree tu witim wei wea disfala buk stap midolwan Hosea and Amos long Hebrew Bible. So olketa markem 820 B.C.E. nao olsem date bilong profesi bilong Joel.

⁴ Pruv hao disfala profesi hem tru hem wei wea olketa Christian Greek Scripture talem toktok bilong hem and point go long hem. Long day bilong Pentecost, Peter storyim “profet Joel” and minim wanfala profesi bilong hem. Paul talem moa sem profesi hia and showimaot wei wea hem fulfill long olketa Jew and olketa wea no Jew. (Joel 2:28-32; Acts 2:16-21; Rom. 10:13) Evri profesi bilong Joel againstim olketa nation raonem hem olketa fulfill. Nebuchadnezzar faet againstim datfala big taon Tyre, and bihaen Alexander the Great distroem island taon hia. Philistia tu finis evribit long sem wei. Edom kamap wilderness. (Joel 3:4, 19) Olketa Jew nating daotem wei wea Joel hem part bilong Bible, and olketa putim disfala buk olsem mek-tu long olketa smol profet.

⁵ Joel hem raet long wei wea barava klia. Hem talem moa samfala samting for strongim point and hem iusim olketa kliafala tokpiksa. Hem kolem olketa grashopa wanfala nation, pipol, and army. Teeth bilong olketa olsem teeth bilong lion, lukluk bilong olketa olsem horse, and saond bilong olketa olsem olketa chariot bilong wanfala army wea gogo for faet. Toktok bilong wanfala savveman bilong wei for kontrolem grashopa sei olsem insaed The Interpreter’s Bible: “Hao Joel storyim tekova bilong olketa grashopa hem winim evri nara raeting long barava stretfala wei wea evri smol samting hem happen.”a Distaem lisin taem Joel profesi abaotem bigfala day bilong Jehovah wea fit for mekem man fraet.

WEI WEA HEM HELPEM IUMI

¹² Samfala man for raet storyim Joel olsem profet bilong trabol. Bat, for pipol bilong God, hem man for talem gud nius bilong wei for sev. Aposol Paul strongim disfala tingting long Romans 10:13 taem hem sei: “From ‘evriwan wea singaot long nem bilong Jehovah bae sev.’” (Joel 2:32) Profesi bilong Joel fulfill long spesol wei long Pentecost 33 C.E. Long datfala taem God muvim Peter for explainim hao wei wea God pourimaot spirit bilong hem long olketa disaepol bilong Christ hem wanfala wei wea profesi bilong Joel hem fulfill. (Acts 2:1-21; Joel 2:28, 29, 32) Peter barava mekhae long mining bilong profesi toktok bilong Joel: “And evriwan wea singaot long nem bilong Jehovah bae sev.”—Acts 2:21, 39, 40.

¹³ Iumi savve lukim wei wea trabol bilong olketa grashopa long Joel and trabol wea Revelation chapter 9 profesi abaotem hem barava semsem. Tufala storyim sun wea kamap dark. Olketa grashopa luk olsem horse wea redy for war, mek-noise olsem olketa chariot, and olketa garem teeth olsem lion. (Joel 2:4, 5, 10; 1:6; Rev. 9:2, 7-9) Profesi bilong Joel long Joel 2:31, wea storyim wei wea sun kamap dark, hem sem samting wea happen long Isaiah 13:9, 10 and Revelation 6:12-17, and tu long Matthew 24:29, 30, wea Jesus talem hao hem bae fulfill long taem wea hem kam olsem Son bilong man witim paoa and bigfala glory. Malachi 4:5 talem tu toktok bilong Joel 2:11, “day bilong Jehovah hem big tumas and mekem man fraet.” Semkaen wei for storyim disfala “day bilong dark and nogud samting” stap tu long Joel 2:2 and Zephaniah 1:14, 15.

¹⁴ Datfala profesi bilong Revelation luk forward long “bigfala day” bilong kros bilong God. (Rev. 6:17) Joel profesi tu abaotem datfala taem, wea showaot hao taem datfala bigfala “day bilong Jehovah” hem kasem olketa nation, olketa wea kolem nem bilong hem for protection and salvation, “bae stap sef.” “Jehovah bae sef ples for pipol bilong hem.” Living olsem long Eden bae kamap moa: “And hem mas happen long datfala day hao swit wine bae ran daon long olketa maunten, and milk bae ran daon long olketa hill, and wata bae ran daon long olketa river bilong Judah. And from haos bilong Jehovah wanfala river bae kamaot.” Taem hem storyim olketa nambawan promis olsem bilong wei for kamap gud moa, Joel mekhae long sovereign rul bilong Jehovah God and mekem pipol wea garem honest heart for kam klos long hem from bigfala mercy bilong Hem: “Kam bak long Jehovah God bilong iufala, from hem garem kaenfala fasin and mercy, no savve kros kwiktaem and garem bigfala loving-kaeness.” Evriwan wea acceptim disfala invitation bae kasem gud samting for olowe.—Joel 2:1, 32; 3:16, 18; 2:13.

[Footnote]