Why Iumi Mas Preach Long Haos Tu Haos Distaem

“Evriday olketa teachim pipol long temple and long haos tu haos. Olketa talemaot gud nius abaotem Jesus, wea hem nao Christ.”​—ACTS 5​:​42.

1, 2. (a) Pipol savve Olketa Jehovah’s Witness duim wanem kaen waka? (b) Wanem nao bae iumi storyim long disfala study?

LONG staka ples pipol savve lukim disfala samting. Tufala wea werem gudfala kaleko olketa go long wanfala haos and storyim Kingdom bilong God. Sapos man long datfala haos hem laek savve long samfala samting moa, bae olketa showim hem olketa buk and askem sapos hem laek studyim Bible. Then bihaen bae olketa go long nara haos. Sapos iu wanfala wea duim disfala waka, nomata iu no talem eni samting pipol bae luksavve iu wanfala Jehovah’s Witness. Tru tumas, pipol savve Olketa Jehovah’s Witness nao duim disfala waka for preach long haos tu haos.

² Disfala waka for preach and mekem pipol kamap disaepol wea Jesus talem iumi for duim, iumi savve duim long staka difren wei. (Matt. 28:19, 20) Iumi savve preach long market, long saed road, and long olketa nara ples. (Acts 17:17) Iumi savve raetem leta long pipol and ringim olketa long telephone. And iumi savve storyim olketa tru teaching long pipol wea iumi meetim evriday. Iumi garem wanfala Web site tu long Internet wea man savve readim olketa buk bilong iumi long winim 300 languis.a Evri difren wei hia for preach hem mekem iumi kasem plande pipol. Bat long staka ples, for preach long haos tu haos nao hem main wei wea iumi talemaot gud nius. Why nao iumi preach long haos tu haos? Hao nao gogo pipol bilong God distaem duim disfala waka for preach long haos tu haos long staka ples? And why nao hem important for duim datfala waka distaem?

Wei Bilong Olketa Aposol for Preach

3. Wanem nao Jesus talem olketa aposol for duim taem olketa go preach? Wanem nao diswan showimaot?

³ Pipol bilong Jehovah preach long haos tu haos bikos olketa followim samting wea Bible talem. Taem Jesus talem olketa aposol bilong hem for go preach long pipol, hem sei: “Long olketa taon or vilij wea iufala go long hem, lukaotem man wea fit for iufala visitim hem witim message bilong iufala.” Wanem nao olketa mas duim for lukaotem pipol wea fit for herem message bilong olketa? Jesus talem olketa for go long haos bilong pipol. Hem sei: “Taem iufala go insaed wanfala haos, talem olketa iu kam for helpem olketa garem peace witim God. Sapos olketa acceptim iufala for kam, bae olketa kasem datfala peace.” Waswe, olketa savve go nomoa long haos bilong man nomata hem no askem olketa for kam? Jesus talem olketa: “Sapos eniwan no welkamim iufala or no laek for herem toktok bilong iufala, lusim olketa. Taem iufala lusim datfala taon or datfala haos, aotem dust from leg bilong iufala.” (Matt. 10:11-​14) Samting wea Jesus talem hia showimaot olketa aposol nao mas go long pipol long haos bilong olketa taem olketa “gogo long olketa vilij for talemaot gud nius.”​—Luke 9:6.

4. Wanem scripture nao storyim haos-tu-haos waka?

⁴ Bible hem storyim olketa aposol olketa preach long haos tu haos. Long Acts 5:​42 hem talem olsem: “Evriday olketa teachim pipol long temple and long haos tu haos. Olketa talemaot gud nius abaotem Jesus, wea hem nao Christ.” Samting olsem 20 year bihaen firstfala Christian kongregeson hem start, aposol Paul talem olsem long olketa elder long Ephesus: “Iufala savve finis mi nating hol bak for talem olketa samting wea helpem iufala and for teachim iufala long pablik ples and long haos tu haos.” Waswe, Paul go lukim olketa elder hia taem olketa no Christian yet? Ia, from hem nao lanem olketa “hao olketa mas repent and kam bak long God and for biliv long Lord Jesus.” (Acts 20:20, 21) Datfala buk Robertson’s Word Pictures in the New Testament hem storyim Acts 20:20 olsem: “Disfala man wea savve tumas for preach, hem preach long haos tu haos.”

Olketa Grashopa Distaem

5. Profesi wea Joel talem hem showimaot preaching waka hem olsem wanem samting?

⁵ Preaching waka wea olketa duim long first century hem piksarem bigfala waka wea gohed distaem. Profesi wea Joel talem hem showimaot hao preaching waka wea olketa anointed Christian duim hem olsem staka grashopa wea kaikaim evri samting. (Joel 1:4) No eni samting savve stopem olketa grashopa hia. Olketa go insaed long olketa haos and kaikaim evri samting. (Readim Joel 2:​2, 7-9.) Diswan barava piksarem hao pipol bilong God distaem no savve givap bat olketa barava duim gud preaching waka bilong olketa! Main wei wea olketa anointed Christian witim olketa “nara sheepsheep” duim diswan nao hem for preach long haos tu haos. (John 10:16) Wanem taem nao iumi Olketa Jehovah’s Witness start for preach long haos tu haos olsem olketa aposol?

6. Long 1922, olketa Christian herem wanem kaen waka nao olketa mas duim? Bat wanem nao tingting bilong samfala long diswan?

⁶ Start kam long 1919, olketa Christian herem hao olketa mas preach. Long Watch Tower bilong August 15, 1922, hem garem disfala article “Service Essential.” Hem talem olketa anointed Christian hao olketa mas “tekem olketa buk and storyim long pipol long haos bilong olketa and talem olketa hao Kingdom bilong heven hem klosap kam.” Datfala pepa Bulletin (wea hem nao Kingdom Ministry Bilong Iumi distaem) talem wanem nao olketa savve storyim long pipol. Nomata olsem, samfala nomoa preach long haos tu haos, bat samfala hol bak for duim diswan. Olketa talem samfala excuse why olketa no duim diswan, bat main samting nao samfala long olketa no laek daon from olketa tingse hem no fitim for olketa preach long haos tu haos. Taem olketa herem olowe hao olketa mas preach olsem, gogo plande long olketa hia lusim organization bilong Jehovah nao.

7. Samting olsem 50 year go finis, wanem nao olketa pablisa mas lane gud for duim?

⁷ Long olketa year bihaen datwan, staka moa start for duim preaching waka. Bat olketa wea duim disfala waka mas lane gud for preach long haos tu haos. Tingim wanem hem happen long America. Samting olsem 50 year go finis, olketa garem 150,000 pablisa, bat klosap 42,000 pablisa hia givimaot nomoa olketa smol pepa or standap long saed road nomoa for givimaot olketa magasin. Winim 60,000 pablisa no savve preach evri month, and samfala no preach for staka month. Wanem nao bae helpem evriwan wea dedicate finis for preach long haos tu haos?

8, 9. Long 1953, wanem program nao start? Wanem nao kamaot from diswan?

⁸ Long 1953, wanfala international convention kamap long New York. Olketa storyim staka samting abaotem wei for preach long haos tu haos. Brata Nathan H. Knorr wea leadim waka long full world long datfala taem hem talem for evri Christian overseer mas helpem evri Witness for preach long haos tu haos evri month. Hem sei: “Evriwan mas savve hao for preachim gud nius long haos tu haos.” So olketa startim wanfala program for helpem olketa brata and sista. Olketa wea no savve preach long haos tu haos lanem hao for story witim pipol long haos bilong olketa, for iusim Bible, and for ansarem kwestin bilong pipol.

⁹ Disfala program barava helpem staka nao for duim preaching waka. Insaed tenfala year nomoa, namba bilong olketa pablisa and Bible study hem dabol. Distaem klosap seven million brata and sista nao preachim gud nius long full world. Diswan showimaot Jehovah barava helpem pipol bilong hem taem olketa preach long haos tu haos.​—Isa. 60:22.

Putim Mark for Sevem Pipol

10, 11. (a) Wanem nao Ezekiel lukim long wanfala vision? (b) Wanem nao gohed distaem wea Ezekiel lukim long datfala vision?

¹⁰ Wanfala vision wea profet Ezekiel lukim hem showimaot why iumi mas preach long haos tu haos. Ezekiel lukim sevenfala man. Sixfala long olketa karem samting for faet and mek-seven man hem werem linen kaleko and karem inkhorn bilong secretary. Jehovah talem datfala mek-seven man for “go long evri ples long Jerusalem” and “putim mark long forhed bilong olketa man wea feel nogud long olketa rabis samting wea pipol duim long there.” Bihaen hem duim datwan, sixfala man wea karem olketa samting for faet bae killim dae evriwan wea no garem datfala mark.​—Readim Ezekiel 9:​1-6.

¹¹ Iumi savve datfala man wea “werem linen kaleko” hem piksarem olketa anointed Christian wea stap distaem. Taem olketa anointed Christian hia duim preaching waka and mekem pipol kamap disaepol, olketa putim tokpiksa mark long pipol wea kamap olketa “nara sheepsheep” bilong Christ. (John 10:16) Wanem nao disfala mark? Olketa sheepsheep hia showimaot olketa garem disfala mark long forhed bilong olketa taem olketa dedicate, baptaes, and followim olketa wei bilong Christ. (Eph. 4:​20-​24) Olketa sheepsheep hia witim olketa anointed Christian olketa kamap wanfala sekson. Olketa helpem tu olketa anointed Christian long disfala important waka for putim mark long pipol.​—Rev. 22:17.

12. Why nao iumi mas gohed for lukaotem olketa sheepsheep?

¹² Samting wea Ezekiel lukim long datfala vision hem showimaot why iumi mas kwiktaem lukaotem pipol wea “feel nogud.” Waka wea iumi duim hem savve sevem laef bilong pipol. Sixfala man wea karem olketa samting for faet olketa piksarem army bilong Jehovah long heven. Klosap nao disfala army bae killim dae olketa wea no garem datfala mark. Aposol Paul hem talem hao Jesus witim “olketa strongfala angel bilong hem,” olketa nao bae “killim dae olketa wea no savve long God and olketa wea no obeyim gud nius abaotem Lord bilong iumi, Jesus.” (2 Thess. 1:​7, 8) Scripture hia showimaot hao pipol wea no obeyim gud nius nao bae dae. Dastawe iumi mas gohed talemaot disfala message bilong God go kasem end. (Rev. 14:​6, 7) Tru tumas, iumi evriwan wea dedicate finis long Jehovah garem bigfala waka wea iumi mas duim.​—Readim Ezekiel 3:​17-​19.

13. (a) Wanem samting nao aposol Paul luksavve hem mas duim, and why nao olsem? (b) Wanem samting nao iumi mas duim for pipol?

¹³ Aposol Paul luksavve hem mas preachim gud nius long pipol. Hem sei: “Hem olsem mi garem kaon long olketa wea Greek and olketa wea no Greek, olketa wea garem savve and olketa wea no garem savve. Dastawe mi laekem tumas for talemaot gud nius long iufala tu long Rome.” (Rom. 1:​14, 15) From God hem kaen tumas long Paul, Paul tinghae long datwan and hem barava laek helpem nara pipol tu for kasem gud samting olsem hem kasem. (1 Tim. 1:​12-​16) Hem olsem hem garem kaon long evri man wea hem meetim, and for peim bak datfala kaon hem mas storyim gud nius long olketa hia. Waswe, iu luksavve iu garem kaon olsem tu long pipol?​—Readim Acts 20:26, 27.

14. Why nao iumi preach long eni ples and long haos tu haos?

¹⁴ Hem tru, iumi preach long haos tu haos mekem pipol savve kasem laef. Bat wanfala samting nao winim diswan. Long Malachi 1:​11, Jehovah tok olsem: “Start long ples wea sun kamap go kasem ples wea sun go daon, pipol bae barava mekhae long nem bilong mi, and . . . olketa bae givim olketa gudfala present for nem bilong mi bikos evriwan tinghae long nem bilong mi.” Olsem Jehovah talem finis, pipol wea dedicate long hem mekhae long nem bilong hem evriwea long world taem olketa duim disfala preaching waka. (Ps. 109:30; Matt. 24:14) Main reason iumi preach long eni ples and long haos tu haos nao hem for “praisem” Jehovah.​—Heb. 13:15.

Olketa Bigfala Samting Bae Happen

15. (a) Taem olketa Israelite raonem Jericho long mek-seven day, wanem bigfala samting moa olketa duim? (b) Wanem nao diswan hem showimaot abaotem preaching waka?

¹⁵ Waswe, bae eni samting moa happen long preaching waka wea iumi duim? Tingim samting wea happen long Jericho taem olketa Israelite raonem datfala taon. Bifor God finisim Jericho, olketa Israelite mas march raonem datfala taon wanfala taem evriday for sixfala day. Bat long mek-seven day olketa mas duim bigfala samting moa. Jehovah talem Joshua: “Iufala mas march raonem datfala taon sevenfala taem and olketa priest mas blowim olketa horn. And taem iufala herem horn hem krae bigfala, . . . evriwan mas barava singaot big. Then nomoa wall bilong datfala taon bae foldaon nao.” (Josh. 6:​2-5) Olsem tu, maet iumi bae duim bigfala samting moa long preaching waka bilong iumi. Bifor disfala world hem finis, preaching waka bilong iumi abaotem nem bilong God and Kingdom bilong hem bae kamap big winim enitaem bifor.

16, 17. (a) Bifor “datfala big trabol” hem finis, wanem nao mas happen? (b) Wanem nao bae iumi storyim long study bihaen?

¹⁶ Maet datfala message wea iumi talemaot bae gogo hem olsem ‘barava bigfala singaot.’ Buk bilong Revelation hem sei olketa message abaotem judgment olketa olsem “olketa bigfala pis ice wea foldaon kam from skae antap long pipol. Hevi bilong wanfala pis ice hia hem samting olsem wanfala talent.”b And Revelation 16:21 hem sei: “Disfala panis hem barava narawe nao.” Maet lastfala taem for pipol herem olketa judgment message hia hem long haos-tu-haos waka wea iumi duim. Bat samting iumi savve nao, taem “datfala big trabol” hem finis, evriwan bae savve hu nao Jehovah.​—Rev. 7:​14; Ezek. 38:23.

¹⁷ Taem iumi weitim olketa bigfala samting for happen, iumi mas gohed strong for talemaot gud nius abaotem Kingdom. Taem iumi duim disfala haos-tu-haos waka, wanem nao olketa hard samting wea iumi kasem, and wanem nao bae helpem iumi winim olketa? Bae iumi storyim olketa kwestin hia long study bihaen.

[Olketa Footnote]

Wanem Nao Ansa Bilong Iu?

• Wanem scripture nao storyim disfala wei for preach long haos tu haos?

• Long olketa year wea go finis, wanem nao helpem olketa Christian preach long haos tu haos?

• Why nao pipol bilong Jehovah wea dedicate finis mas preach?

• Wanem nao olketa bigfala samting wea bae happen?

[Piksa long page 4]

Aposol Paul luksavve hem mas preach long pipol. Waswe, iu olsem tu?

[Piksa long page 5]

Brata Knorr long 1953