Tinghae Long Wei Bilong Jehovah wea Faithful and Willing for Forgive

1, 2. (a) Why nao iumi tinghae long olketa fren wea faithful and willing for forgive? (b) Olketa wanem kwestin nao bae iumi ansarem long disfala study?

LONG tingting bilong iu, wanem kaen man nao hem gudfala fren? Wanfala sista wea nem bilong hem Ashley sei wanfala gud fren hem evritaem willing for helpem iu and hem forgivim iu taem iu duim mistek. Iumi evriwan tinghae long fren olsem. Olketa fren olsem mekem iumi hapi and iumi feel olsem samwan hem lovem iumi.—Prov. 17:17.

² No eni fren hem winim Jehovah long wei for faithful and willing for forgive. Man wea raetem psalm hem sei: “Jehovah, iu gud and willing for forgive, and iu barava faithful long olketa wea trustim iu.” (Ps. 86:5) Hao nao man savve showimaot hem faithful and willing for forgive? Hao nao Jehovah showimaot olketa nambawan wei hia? And hao nao iumi savve followim example bilong hem? Ansa for olketa kwestin hia bae strongim love bilong iumi for best fren bilong iumi, Jehovah, and bae helpem iumi for fren gud tu witim olketa brata and sista bilong iumi.—1 John 4:7, 8.

JEHOVAH HEM FAITHFUL

3. Wanem nao showimaot man hem faithful?

³ Man wea faithful showimaot hem lovem narawan taem hem gohed helpem and sapotim hem. Hem faithful, no long gudfala taem nomoa, bat long hard taem tu. Bible sei Jehovah hem “faithful.” No eniwan hem faithful winim hem.—Rev. 16:5.

4, 5. (a) Hao nao Jehovah showimaot hem faithful? (b) Taem iumi ting raonem wei wea Jehovah hem faithful, hao nao datwan encouragem iumi?

⁴ Hao nao Jehovah showimaot hem faithful? Hem evritaem sapotim olketa wea faithful for worshipim hem. King David praisem wei wea Jehovah faithful long hem. (Readim 2 Samuel 22:26.) Taem David kasem hard taem, Jehovah faithful for leadim, protectim, and sevem hem. (2 Sam. 22:1) Staka taem, David lukim Jehovah hem faithful, no just long samting hem talem nomoa, bat long wei for helpem man tu. Why nao Jehovah faithful long David? Datwan hem bikos David faithful long hem. Jehovah lovem olketa wea faithful for worshipim hem, and hem faithful long olketa wea faithful long hem.—Prov. 2:6-8.

⁵ Taem iumi ting raonem wei wea Jehovah faithful long olketa wea worshipim hem, datwan savve encouragem iumi. Reed, wanfala faithful brata, sei hem laekem tumas for read abaotem wanem Jehovah duim for helpem David long olketa hard taem wea kasem hem. Hem sei: “Taem David ranawe from Saul and stap long olketa cave, Jehovah evritaem strongim hem. Datwan barava encouragem mi! From diswan mi luksavve nomata wanem nao kasem mi, or nomata hem luk olsem mi no wei nao, Jehovah bae helpem and sapotim mi sapos mi gohed faithful long hem.” Iumi tu garem semkaen tingting.—Rome 8:38, 39.

6. Wanem nao olketa narafala wei wea Jehovah showimaot hem faithful, and hao nao diswan helpem olketa wea worshipim hem?

⁶ Wanem nao olketa narafala wei wea Jehovah showimaot hem faithful? Jehovah evritaem followim olketa standard bilong hem. (Isa. 46:4) Hem followim olketa standard bilong hem long evri samting wea hem disaedem, and olketa standard bilong hem no savve change. (Mal. 3:6) And tu, Jehovah hem evritaem duim wanem hem promisim. (Isa. 55:11) From Jehovah hem faithful, evriwan wea worshipim hem kasem gud samting. Long wanem wei? Taem iumi traem best for obeyim olketa law bilong Jehovah, iumi barava sure Jehovah bae keepim promis bilong hem for blessim iumi.—Isa. 48:17, 18.

FAITHFUL OLSEM JEHOVAH

7. Wanem nao wanfala wei wea iu savve followim example bilong Jehovah for faithful?

⁷ Hao nao iumi savve faithful olsem Jehovah? Wanfala wei hem for helpem olketa wea kasem hard taem. (Prov. 3:27) Olsem example, waswe, iu savve long eni brata or sista wea feel wikdaon, maet bikos hem garem sik, famili againstim hem, or from wik point bilong hemseleva? Iu savve encouragem hem long wei for talem “gudfala toktok wea savve comfortim man.” (Zech. 1:13)a Taem iu duim olsem, iu showimaot iu “gudfala fren [wea] faithful winim wanfala really brata.”—Prov. 18:24.

8. Hao nao iumi savve showimaot iumi faithful long marit partner bilong iumi?

⁸ Iumi savve faithful long olketa wea iumi lovem long olketa nara wei tu. Olsem example, sapos iumi marit, iumi savve iumi mas faithful long hasband or waef bilong iumi. (Prov. 5:15-18) So iumi no duim adultery, and iumi no duim eni samting wea bae lead go long wei for duim adultery. (Matt. 5:28) And tu, iumi showimaot iumi faithful long olketa brata and sista long wei for no talem nogud story abaotem olketa, or talem laea story abaotem olketa tu. And iumi no laek for lisin taem eniwan talem kaen story olsem.—Prov. 12:18.

9, 10. (a) Iumi barava laek for faithful long hu? (b) Waswe, bae hem isi evritaem for obeyim Jehovah? Storyim example.

⁹ Iumi barava laek faithful long Jehovah. Hao nao iumi savve duim datwan? Iumi mas lovem samting wea Jehovah lovem and heitim samting wea hem heitim, and laef bilong iumi mas showimaot datwan. (Readim Psalm 97:10.) Taem iumi lane for garem sem tingting olsem Jehovah, bae hem no hard tumas for iumi obeyim hem.—Ps. 119:104.

¹⁰ Hem tru, hem bae no isi evritaem for obeyim Jehovah. Samfala taem iumi mas waka hard for gohed faithful long hem. Olsem example, maet wanfala singol sista hem laek for marit, bat hem no meetim yet eni brata wea fitim tingting bilong hem. (1 Cor. 7:39) Maet pipol long ples wea hem waka wea olketa no Witness trae stretem eniwan for tufala fren. Long datfala taem tu, maet datfala sista hem feel lonely. Nomata olsem, hem disaed finis for no frenim or maritim eniwan wea no worshipim God bikos hem laek for faithful long Jehovah. Olketa Christian wea olsem disfala sista showimaot nambawan example long wei for faithful. Jehovah bae blessim evriwan wea gohed faithful for worshipim hem nomata olketa kasem hard taem.—Heb. 11:6.

JEHOVAH HEM WILLING FOR FORGIVE

11. Wanem nao hem minim for forgivim narawan?

¹¹ Wanem nao hem minim for forgivim narawan? Man olsem hem disaed for no gohed kros long narawan wea duim nogud samting long hem. Diswan no minim hem tingse samting wea narawan duim hem gud nomoa, or hem act olsem no eni samting happen, bat hem disaed for no gohed for kros. Wanfala nambawan wei bilong Jehovah nao hem wei wea hem willing for forgive. Bible sei Jehovah hem ‘willing for forgivim’ olketa wea showimaot olketa barava repent.—Ps. 86:5.

12. (a) Hao nao Jehovah showimaot hem willing for forgive? (b) Taem Peter sei Jehovah forgivim man, wanem nao datwan hem minim?

¹² Hao nao Jehovah showimaot hem willing for forgive? Bible sei Jehovah hem barava forgive and hem forgive for olowe. (Isa. 55:7) Hao nao iumi savve Jehovah hem barava forgivim man? Tingim datfala promis long Acts 3:19. (Readim.) Aposol Peter sei sapos man wea duim sin hem barava repent, datwan minim hem barava sorre long nogud samting wea hem duim. Wanem nao man mas duim mekem Jehovah forgivim hem? Peter sei man wea duim sin mas “repent” and “changem wei bilong [hem].” Man wea barava repent hem disaed hem bae no duim moa datfala sin. (2 Cor. 7:10, 11) Disfala man hem changem wei bilong hem, wea minim hem stop for duim rong samting and hem traem best for duim samting wea mekem God hapi. Then Jehovah savve “forgivim olketa sin” bilong hem. Long Greek languis diswan hem sei “aotem sin bilong hem,” wea mekem iumi tingim taem samwan iusim rubber for rabemaot raeting long pepa. So taem Jehovah forgivim man, hem olsem datfala sin hem nomoa nao. Hem barava forgivim hem.—Heb. 10:22; 1 John 1:7.

13. Wanem nao iumi lanem from disfala toktok: “Bae mi no tingim moa sin bilong olketa”?

¹³ Hao nao iumi savve Jehovah hem forgive for olowe? Samting wea Jehovah talem long Jeremiah abaotem olketa anointed Christian hem helpem iumi for savve Jehovah hem barava forgivim man. (Readim Jeremiah 31:34.) Jehovah sei: “Bae mi forgivim olketa long nogud samting wea olketa duim and bae mi no tingim moa sin bilong olketa.” So taem Jehovah forgivim iumi, hem no gohed for tingim olketa sin bilong iumi mekem hem savve accusim or panisim iumi moa. Hem forgive for olowe.—Rome 4:7, 8.

14. Taem iumi ting raonem hao Jehovah barava forgivim man, hao nao datwan savve comfortim iumi? Storyim example.

¹⁴ Taem iumi ting raonem hao Jehovah barava forgivim man, datwan savve comfortim iumi. Tingim example bilong Elaine.b Longfala taem bifor, hem disfellowship. Then bihaen samfala year, hem kam bak long kongregeson. Nomata olsem, long tingting bilong Elaine Jehovah no barava forgivim hem. Hem tingse Jehovah lovem olketa narawan winim hem. Bat taem hem ting raonem wanem Bible talem abaotem wei wea Jehovah willing for forgivim man, datwan comfortim hem. Olsem example, hem readim hao taem Jehovah forgivim iumi, hem olsem Jehovah iusim wata for mekem iumi klin from evri sin bilong iumi. Jehovah no laekem iumi for feel guilty long full laef bilong iumi.c Elaine sei tu: “Mi luksavve tingting bilong mi no stret from mi tingse Jehovah no savve barava forgivim mi, and mi tingse bae mi feel olsem for full laef bilong mi.” Hem sei moa: “Distaem mi start for feel olsem mi fren gud witim Jehovah, and mi no feel guilty tumas.” Jehovah hem God wea barava lovem and forgivim iumi!—Ps. 103:9.

FORGIVIM NARAWAN OLSEM JEHOVAH

15. Hao nao iumi savve followim example bilong Jehovah for forgivim narawan?

¹⁵ Iumi savve followim example bilong Jehovah taem iumi disaed for forgivim narawan. (Readim Luke 17:3, 4.) No forget, taem Jehovah forgivim iumi, hem no gohed tingim moa samting wea iumi duim. So taem iumi forgivim narawan, hem gud for no tingim moa samting wea hem duim long iumi, and no storyim moa datwan tu.

16. (a) Wanem nao hem minim for forgivim narawan? (b) Wanem nao iumi mas duim sapos iumi laekem Jehovah for forgivim iumi?

¹⁶ Wei for forgivim narawan hem no minim iumi tingse samting wea hem duim hem gud nomoa, or iumi acceptim nogud samting wea hem duim long iumi. Wei for forgive hem minim iumi disaed for no gohed kros long hem. And hem important for no forget, sapos iumi laekem Jehovah for forgivim iumi, iumi tu mas forgivim olketa narawan. (Matt. 6:14, 15) Jehovah savve “iumi dust nomoa,” and hem savve iumi no perfect. (Ps. 103:14) So taem narawan talem or duim eni nogud samting long iumi, iumi mas no forget hem tu no perfect olsem iumi, and iumi shud forgivim hem from heart bilong iumi.—Eph. 4:32; Col. 3:13.

17. Wanem nao savve helpem iu for forgivim samwan wea mekem iu feel nogud?

¹⁷ Hem tru, samfala taem hem no isi for forgivim narawan. Long first century, samfala anointed Christian tu needim help for stretem problem wea olketa garem witim narawan. (Phil. 4:2) Sapos wanfala brata or sista duim samting wea mekem iu feel nogud, wanem nao savve helpem iu for forgivim hem? Tingim samting wea happen long Job. Eliphaz, Bildad, and Zophar sei olketa fren bilong Job. Bat olketa tok spoelem hem and sei hem duim olketa nogud samting. Diswan mekem Job feel nogud tumas. (Job 10:1; 19:2) Gogo, Jehovah talem thrifala man hia samting wea olketa duim hem no stret, and hem talem olketa for go long Job and givim sakrifaes for sin bilong olketa. (Job 42:7-9) Bat Jehovah talem Job tu for duim samting. Wanem nao hem mas duim? Jehovah sei Job mas prea for thrifala man hia. Job duim datwan, and Jehovah blessim hem from hem forgivim olketa. (Readim Job 42:10, 12, 16, 17.) Wanem nao iu lanem from diswan? Taem iu prea from heart bilong iu for samwan wea mekem iu feel nogud, diswan savve helpem iu for no gohed kros long hem.

GOHED FOR TINGHAE LONG OLKETA WEI BILONG JEHOVAH

18, 19. Iumi laek for gohed duim wanem samting?

¹⁸ Iumi hapi from iumi lanem staka samting abaotem olketa wei bilong Jehovah. Iumi lanem hao Jehovah hem God wea isi for iumi story witim, hem no favorim eniwan, hem kaen, no ova tumas, hem faithful, and willing for forgive. Iumi savve lanem staka nara samting tu abaotem Jehovah. Iumi bae hapi for lane abaotem hem for olowe. (Eccl. 3:11) Iumi agree witim disfala toktok bilong aposol Paul: “Olketa blessing, wisdom, and savve bilong God barava big tumas!” Iumi garem datfala sem tingting abaotem love bilong God and sixfala wei bilong hem wea iumi storyim long thrifala study hia.—Rome 11:33.

¹⁹ So iumi laek gohed lanem and ting raonem moa samting abaotem olketa wei bilong Jehovah, and then showimaot olketa wei hia long laef bilong iumi. (Eph. 5:1) Datwan bae strongim love bilong iumi for Jehovah, and bae iumi fren gud witim hem. Bae iumi agree witim man wea raetem psalm, wea sei: “Taem mi fren gud witim God, mi kasem gud samting.”—Ps. 73:28.