Holy Spirit Strongim Iumi Taem Iumi Kasem Test and Taem Iumi Wikdaon
“Taem iufala kasem holy spirit datwan bae strongim iufala.”—ACTS 1:8.
1, 2. Wanem nao Jesus promisim long olketa disaepol for helpem olketa, and why nao olketa needim datwan?
JESUS savve olketa disaepol bae no fit for duim evri samting wea hem talem long strong bilong olketa seleva nomoa. Olketa needim God for helpem olketa bikos olketa mas preach long evri farawe ples long earth, pipol bae againstim olketa, and olketa no perfect. Dastawe bifor Jesus go bak long heven, hem promisim olketa disaepol: “Taem iufala kasem holy spirit datwan bae strongim iufala, and iufala bae talem pipol abaotem mi long Jerusalem and long evri ples long Judea and long Samaria and long evri farawe ples long earth.”—Acts 1:8.
2 Datfala promis kamap tru long Pentecost 33 C.E. taem holy spirit strongim olketa disaepol for preach long evriwan long Jerusalem. No eniwan fit for stopem datfala waka. (Acts 4:20) “Go kasem taem wea world hem gogo for finis,” olketa wea followim Jesus and iumi tu bae barava needim holy spirit for strongim iumi.—Matt. 28:20.
3. Holy spirit wea Jehovah givim helpem iumi for duim wanem?
3 Jesus promisim olketa disaepol ‘taem olketa kasem holy spirit datwan bae strongim olketa.’ Diswan showimaot holy spirit savve strongim iumi tu. So God givim holy spirit, wea hem nao paoa bilong hem, long pipol or nara samting for mekem plan bilong hem kamap tru. Holy spirit strongim iumi and mekem iumi fit for duim wanem iumi promisim taem iumi dedicate long Jehovah, and for winim eni hard taem wea iumi kasem.—Readim Micah 3:8; Colossians 1:29.
4. Wanem nao bae iumi storyim long disfala study, and why nao olsem?
4 Paoa wea iumi kasem from holy spirit savve mekem iumi for duim wanem? Long wanem wei nao holy spirit savve helpem iumi? Taem iumi trae hard for faithful long God, iumi savve kasem plande hard taem from Satan, disfala world, and from wei wea iumi no perfect. Hem important for winim olketa hard taem hia mekem iumi savve gohed faithful, duim ministry, and fren gud witim Jehovah. Bae iumi storyim wei wea holy spirit savve helpem iumi for winim olketa test and taem iumi taed and wikdaon.
Winim Olketa Test
5. Hao nao prea savve strongim iumi?
5 Jesus teachim olketa wea followim hem for prea olsem: “Helpem mifala for no foldaon long eni samting wea switim mifala for duim wanem hem no stret, and sevem mifala from Satan.” (Matt. 6:13) Jehovah bae helpem iumi taem iumi askem datwan long hem. Long narataem, Jesus sei: “Dadi bilong iufala long heven bae barava givim holy spirit long olketa wea askem hem.” (Luke 11:13) Iumi hapi from Jehovah promis for givim holy spirit for helpem iumi duim stret samting! Bat diswan no minim Jehovah bae stopem olketa samting wea testim iumi. (1 Cor. 10:13) Taem iumi kasem test, iumi barava need for prea strong long Jehovah.—Matt. 26:42.
6. Taem Satan traem Jesus, wanem nao Jesus iusim for ansarem hem?
6 Taem Satan traem Jesus, Jesus iusim olketa scripture for ansarem hem. First samting wea hem tingim hem wanem God talem. Hem sei: “Olketa Holy Raeting talem finis . . . Olketa Holy Raeting talem finis . . . Iu go nao Satan! Olketa Holy Raeting talem finis, ‘Iu mas baodaon long God bilong iu Jehovah, and iu mas worshipim hem nomoa.’ ” From Jesus lovem Jehovah and olketa Holy Raeting, datwan mekem hem for winim olketa samting wea Satan traem long hem. (Matt. 4:1-10) From Jesus againstim olketa samting hia, Satan lusim hem.
7. Long wanem wei nao Bible savve helpem iumi for winim olketa test?
7 Jesus iusim olketa scripture taem Satan traem hem, so iumi tu shud duim sem samting! Tru tumas, first samting wea iumi need for duim for againstim Satan, hem for savve long olketa standard bilong God and barava followim. Staka pipol laek followim olketa standard bilong God bikos taem olketa studyim Bible, olketa tinghae long wisdom bilong God and samting wea God sei hem stret. Tru tumas, “toktok bilong God” garem paoa and hem luksavve long ‘tingting bilong man and samting wea heart hem laekem.’ (Heb. 4:12) Taem iumi readim and ting raonem Bible evriday, bae iumi minim gud olketa ‘tru samting wea Jehovah talem.’ (Dan. 9:13) Dastawe hem gud for iumi ting raonem olketa scripture wea savve helpem iumi long olketa wik point wea iumi garem.
8. Long wanem wei nao iumi savve kasem holy spirit?
8 Nara samting wea helpem Jesus for winim olketa test hem bikos “God givim holy spirit long hem.” (Luke 4:1) For winim olketa test, iumi need for fren gud witim Jehovah and mekius long evri samting wea hem givim for helpem iumi kasem holy spirit, olsem for studyim Bible, prea, and kaban witim olketa brata and sista. (Jas. 4:7, 8) Staka tinghae long gud samting wea olketa kasem taem olketa busy for duim olketa Christian waka wea helpem olketa for tingim evritaem olketa spiritual samting.
9, 10. (a) Wanem nao olketa samting wea switim pipol long ples bilong iu? (b) Taem iu feel taed, hao nao wei for ting raonem spiritual samting witim wei for prea, savve strongim iu for no letem eni samting switim iu?
9 Wanem nao samfala samting wea testim iu? Waswe, enitaem iu garem feeling for laek switim samwan wea iu no maritim? Sapos iu no marit, waswe, enitaem iu laek for frenim samwan wea no worshipim Jehovah? Maet wanfala Christian lukluk long television or long Internet and seknomoa nogud samting kamap wea switim hem for laek lukluk long hem. Waswe, enitaem datwan kasem iu? Sapos olsem, wanem nao iu duim? Tingim, wei for duim samting wea no wise savve mekem man for duim nara nogud samting, and bihaen, datwan savve mekem hem for duim bigfala sin. (Jas. 1:14, 15) Tingim tu, sapos iu duim bigfala sin bae iu mekem Jehovah, kongregeson, and famili bilong iu sorre tumas. Bat man wea faithful for followim olketa Bible principle bae garem klin konsens. (Readim Psalm 119:37; Proverbs 22:3.) Taem iu kasem olketa test olsem, prea long Jehovah for helpem iu winim olketa.
10 Tingim nara samting abaotem taem wea Satan traem Jesus. Long 40 day wea Jesus stap long wilderness, hem no kaikai, and hem nao taem wea Satan kam long hem. Luk olsem Satan tingse datwan hem “chance” for mekem Jesus no faithful. (Luke 4:13) Satan weitim eni chance tu for testim iumi. Dastawe hem important tumas for strongim wei wea iumi fren witim Jehovah. Plande taem Satan testim olketa man taem olketa wik. So taem iumi feel taed or wikdaon, iumi shud prea long Jehovah for protectim, helpem, and givim holy spirit long iumi.—2 Cor. 12:8-10.
Taem Iumi Taed and Wikdaon
11, 12. (a) Why nao staka pipol feel wikdaon distaem? (b) Wanem nao savve strongim iumi taem iumi wikdaon?
11 From iumi no perfect, samfala taem iumi feel wikdaon. Datwan savve happen bikos iumi stap long taem wea hard tumas and pipol kasem staka hevi. (2 Tim. 3:1-5) Bifor Armageddon kam, pipol bae kasem bigfala hevi saed long selen, feeling, and olketa nara problem. So iumi shud no sapraes sapos hem no isi long samfala for lukaftarem famili and provaedem wanem olketa needim. Olketa maet feel taed, wikdaon, and feel olsem olketa no fit for duim eni samting nao. Sapos datwan kasem iu, wanem nao iu savve duim?
12 Jesus promisim olketa disaepol hem bae givim holy spirit for helpem olketa. (Readim John 14:16, 17.) Holy spirit savve strongim iumi winim eni samting long universe. Jehovah savve iusim datwan for helpem iumi for no givap taem iumi kasem hard taem. Aposol Paul sei taem iumi askem God for holy spirit, iumi “kasem strong wea winim strong bilong man,” nomata ‘staka hard taem kasem iumi.’ (2 Cor. 4:7, 8) Jehovah no promis for aotem hevi wea kasem iumi, bat hem promis for givim holy spirit for strongim iumi for gohed.—Phil. 4:13.
13. (a) Wanem nao strongim wanfala young wan wea kasem hard taem? (b) Waswe, iu savve long eniwan wea kasem semkaen samting?
13 Tingim example bilong Stephanie, wanfala regular pioneer wea 19 year. Taem hem 12 year, hem kasem stroke and garem brain tumor. Bihaen datwan, hem operate tufala taem, kasem radiation treatment, and kasem stroke tufala taem moa, wea mekem hem no savve muvim gud left saed long body bilong hem and no savve lukluk gud. Stephanie iusim lelebet strong wea hem garem for duim olketa samting wea barava important long hem, olsem for go long olketa meeting and duim preaching waka. Hem savve Jehovah givim holy spirit for helpem hem for no givap. Taem hem feel wikdaon, olketa experience bilong olketa brata and sista long olketa buk bilong iumi strongim hem. Olketa brata and sista sendem olketa leta long hem or story gud witim hem bifor and bihaen long meeting. Pipol wea interest long truth tu tinghae long wanem Stephanie teachim taem olketa go long haos bilong hem for study. Stephanie barava tinghae long Jehovah for olketa samting hia. Scripture wea hem laekem tumas hem Psalm 41:3. Hem luksavve Jehovah barava duim wanem datfala scripture talem for hem.
14. Wanem nao iumi mas no duim taem iumi taed or kasem hevi, and why nao olsem?
14 Taem iumi taed or kasem hevi, iumi mas no tingse wei for no duim samfala spiritual samting nao bae finisim datfala hevi. Datwan hem worse samting for duim. Why nao olsem? Hem bikos olketa samting olsem study seleva, famili Bible study, preaching waka, and wei for go long olketa meeting hem olketa wei for kasem strong from holy spirit. Olketa samting wea iumi duim for worshipim God hem evritaem strongim iumi. (Readim Matthew 11:28, 29.) Staka taem olketa brata wea kam long meeting savve feel taed, bat taem meeting hem finis, olketa savve feel strong moa!
15. (a) Waswe, Jehovah promis for mekem laef isi for wanfala Christian? Iusim Bible for explainim. (b) Wanem nao God promisim, and diswan mekem iumi tingim wanem kwestin?
15 Datwan no minim olketa samting wea iumi mas duim bae isi nomoa. Iumi mas waka hard for faithful. (Matt. 16:24-26; Luke 13:24) Nomata olsem, Jehovah savve givim holy spirit for strongim olketa wea taed. Profet Isaiah sei: “Olketa wea trustim Jehovah bae strong bak moa. Bae olketa strong olsem eagle. Bae olketa ran and no savve wik. Bae olketa wakabaot and no savve taed.” (Isa. 40:29-31) So iumi shud tingim, Wanem nao mekem iumi feel olsem samting wea iumi duim for worshipim God mekem iumi taed?
16. Sapos iumi taed or wikdaon, wanem nao iumi savve duim?
16 Bible talem iumi for “luksavve long olketa samting wea barava important.” (Phil. 1:10) Aposol Paul storyim laef bilong wanfala Christian olsem man wea ran long resis. Hem sei: “Iumi mas no givap for ran long resis wea iumi insaed. Iumi mas aotem evri hevi samting . . . , wea savve isi for spoelem wei wea iumi ran gud.” (Heb. 12:1) Main point wea hem talem hem for aotem evri hevi samting, wea minim for no busy long olketa samting wea no important wea bae mekem iumi taed. Nomata laef bilong iumi busy, maet samfala trae hard for duim staka samting tumas. So sapos iu taed staka taem and kasem olketa hevi, maet hem gud for tingim haomas taem nao iu iusim long waka for selen, for go long nara ples, plei sports, or olketa nara hapitaem. Wei for hambol and no ova tumas shud mekem iumi evriwan luksavve wanem iumi fit for duim and for no iusim staka taem long samting wea no important tumas.
17. Why nao maet samfala feel wikdaon, bat wanem nao Jehovah promis for duim?
17 Maet samfala long iumi feel wikdaon tu bikos iumi tingse end shud kam finis. (Prov. 13:12) Sapos iumi feel olsem, toktok long Habakkuk 2:3 savve encouragem iumi. Hem sei: “Datfala vision wea iu lukim hem garem taem wea set finis for olketa samting hia happen. Hem hariap for kasem end and bae hem kamap tru. Nomata sapos iu tingse olketa samting hia bae no happen kwiktaem, gohed for weitim bikos hem bae kamap tru. Hem bae no leit.” Jehovah promis for finisim disfala world long barava taem wea hem markem!
18. (a) Olketa wanem promis nao strongim iu? (b) Wanem gud samting nao bae iumi lanem long next study?
18 Evriwan wea faithful for worshipim Jehovah luk forward long taem long future wea no eniwan bae taed and wikdaon, bat evriwan bae “strong moa olsem taem [olketa] young.” (Job 33:25) Nomata datwan bae kamap long future, long distaem holy spirit savve strongim iumi taem iumi duim olketa samting for worshipim God. (2 Cor. 4:16; Eph. 3:16) No letem wei for taed stopem iu for no kasem olketa blessing long future. Evri hard taem wea iumi kasem nomata sapos datwan hem samting wea testim iumi, iumi taed, or wikdaon, bae hem finis long niu world sapos hem no finis distaem. Long next study bae iumi storyim wei wea holy spirit strongim olketa Christian taem pipol persecutim olketa, putim hevi long olketa, and taem olketa kasem olketa nara hard taem.
Wanem Nao Ansa Bilong Iu?
• Hao nao wei for readim Bible strongim iumi?
• Hao nao wei for prea and ting raonem samting strongim iumi?
• Wanem nao iu savve duim sapos iu wikdaon?
[Piksa long page 24]
Olketa kongregeson meeting savve strongim iumi