Barava Interest for Talemaot Gud Nius
“Shaen witim spirit. Waka hard for Jehovah.”—ROMANS 12:11.
1, 2. Wanem tingting nao olketa Christian trae hard for keepim olsem olketa wea preachim gud nius?
WANFALA young man hem tinghae long niu waka bilong hem. Long first day bilong hem long waka, hem stanbae for instruction bilong boss bilong hem. Hem luk forward for first waka bilong hem and hem serious witim. Hem trae hard for duim best bilong hem.
2 Long sem wei, iumi olsem olketa Christian savve ting long seleva olsem niufala wakman. From hope bilong iumi hem for laef olowe, hem olsem iumi just start waka for Jehovah nomoa. Iumi sure Creator hem tingim planti waka for mekem iumi busy for olowe. Bat barava firstfala waka wea iumi garem hem for talemaot gud nius abaotem Kingdom bilong hem. (1 Thessalonians 2:4) Hao nao iumi feel abaotem disfala waka from God? Olsem datfala young man, iumi want for duim best bilong iumi, witim strong, witim hapi—yes, witim bigfala interest!
3. Wanem nao man needim for hem win olsem minister bilong gud nius?
3 Hem tru, hem no isi for evritaem keepim positive tingting. Witim ministry bilong iumi, iumi garem planti nara responsibility, wea samfala savve barava iusim strong and feeling bilong iumi. Planti taem, iumi fit for lukaftarem olketa samting hia and givim inaf tingting and taem long ministry. Nomata olsem, hem savve kamap wanfala stragol. (Mark 8:34) Jesus strongim hao win bilong iumi olsem olketa Christian needim strongfala waka bilong iumi.—Luke 13:24.
4. Wanem nao olketa evriday wari savve duim long spiritual tingting and laef bilong iumi?
4 From iumi garem planti samting for duim, hem isi for feel hevi or wikdaon samtaem. “Wari bilong living” savve stopem wei wea iumi strong and tinghae for duim theocratic samting. (Luke 21:34, 35; Mark 4:18, 19) Bikos long wei wea man no perfect, iumi maet lusim ‘datfala love wea iumi garem firstaem.’ (Revelation 2:1-4) Samfala part long service bilong iumi long Jehovah maet kamap olsem samting wea no spesol. Hao nao Bible givim encouragement wea iumi needim for keepim strong bilong iumi long ministry?
Olsem “Wanfala Fire wea Burn” Insaed Heart Bilong Iumi
5, 6. Hao nao aposol Paul ting long privilege bilong hem for preach?
5 From ministry wea Jehovah givim long iumi hem spesol tumas iumi mas no ting nating long hem. Aposol Paul ting long disfala waka for preachim gud nius olsem wanfala bigfala privilege, and hem lukim hemseleva olsem hem no fit for kasem diswan. Hem sei: “Long mi, wanfala man wea smol winim evri holy wan, hem givim disfala kaeness wea man no fit for kasem, mekem mi talemaot long olketa nation disfala gud nius abaotem olketa barava nambawan richfala samting bilong Christ and mas mekem olketa man luksavve hao nao disfala holy secret hem showaot wea from longfala taem bifor hem haed insaed long God, wea creatim evri samting.”—Ephesians 3:8, 9.
6 Positive tingting bilong Paul abaotem ministry hem nambawan example for iumi. Long leta bilong hem for olketa Roman, hem sei: “Mi barava interest for talemaot gud nius.” Hem nating shame long gud nius. (Romans 1:15, 16) Hem garem stretfala tingting and hem redy for duim ministry bilong hem.
7. Long leta bilong hem for olketa bilong Rome, wanem nao Paul givim warning abaotem?
7 Aposol Paul luksavve long need for keepim strongfala tingting, so hem encouragem olketa Christian long Rome: “No lesy long waka bilong iufala. Shaen witim spirit. Waka hard for Jehovah.” (Romans 12:11) Greek word wea olketa transleitim “lesy” minim wei for “slow, isisi.” Nomata maet iumi no lesy long ministry bilong iumi, iumi evriwan need for luksavve long eni firstfala saen bilong slowdaon long spiritual wei and mekem olketa change wea fitim long tingting bilong iumi sapos iumi lukim olketa saen hia long seleva.—Proverbs 22:3.
8. (a) Wanem nao kamap olsem “fire wea burn” insaed heart bilong Jeremiah, and why? (b) Wanem leson nao iumi savve lanem from samting wea kasem Jeremiah?
8 Spirit bilong God savve helpem iumi tu taem iumi feel wikdaon. Olsem example, wantaem profet Jeremiah hem feel wikdaon, and hem tingting for stopem waka bilong hem olsem profet. Hem sei tu abaotem Jehovah: “Mi bae no storyim hem, and mi bae no talem eni samting long nem bilong hem.” Waswe, diswan barava showimaot Jeremiah hem barava wikdaon long spiritual wei? Nomoa. For tok stret, strong spiritual fasin bilong Jeremiah, love bilong hem for Jehovah, and strong bilong hem for truth hem strongim hem for go ahed for talemaot profesi. Hem minim olsem: “Insaed heart bilong mi [word bilong Jehovah] olsem wanfala fire wea burn insaed olketa bone bilong mi; and mi taed for holem bak, and mi no savve go ahed strong for duim datwan.” (Jeremiah 20:9) Hem normal nomoa for olketa faithful servant bilong God for feel wikdaon samfala taem. Bat taem olketa prea long Jehovah for help, hem bae readim heart bilong olketa and willing for givim long olketa holy spirit bilong hem sapos, olsem Jeremiah, olketa garem word bilong hem long heart bilong olketa.—Luke 11:9-13; Acts 15:8.
“No Killim Dae Fire Bilong Spirit”
9. Wanem nao savve stopem waka bilong holy spirit for iumi ?
9 Aposol Paul encouragem olketa long Thessalonica: “No killim dae fire bilong spirit.” (1 Thessalonians 5:19) Tru nao, olketa akson and tingting wea no followim olketa principle bilong God savve stopem waka bilong holy spirit for iumi. (Ephesians 4:30) Olketa Christian tuday garem assignment for preachim gud nius. Iumi barava respectim disfala privilege. Iumi no sapraes hao olketa wea no savve long God lukdaon long preaching waka bilong iumi. Bat taem wanfala Christian min for ting nating long ministry bilong hem, diswan maet savve killim dae datfala fire bilong spirit bilong God wea muvim man.
10. (a) Hao nao tingting bilong olketa narawan savve affectim iumi? (b) Wanem nambawan tingting abaotem ministry bilong iumi nao stap long 2 Corinthians 2:17?
10 Samfala aotsaed long Christian kongregeson maet lukim ministry bilong iumi olsem wei for givimaot buk nomoa. Samfala narawan maet garem rong tingting and sei iumi go from haos tu haos for kasem donation nomoa. Sapos iumi letem olketa rong tingting hia for affectim tingting bilong iumi, diswan savve daonem gud samting wea kamaot from ministry bilong iumi. Winim wei for letem tingting olsem affectim iumi, letem iumi keepim tingting wea Jehovah and Jesus garem for ministry bilong iumi. Aposol Paul talemaot datfala nambawan tingting taem hem sei: “Iumi no man for sellim word bilong God olsem planti man duim, bat from trufala feeling, yes, olsem God nao sendem iumi, front long eye bilong God, tugeta witim Christ, iumi go ahed for tok aot.”—2 Corinthians 2:17.
11. Wanem nao mekem olketa firstfala Christian for stap strong nomata long persecution, and hao nao example bilong olketa shud affectim iumi?
11 Bihaen nomoa long dae bilong Jesus, olketa disaepol bilong hem long Jerusalem feisim taem bilong persecution. Pipol warnim and orderim olketa for no preach. Nomata olsem, Bible talem hao olketa “fulap witim holy spirit and no fraet for talemaot word bilong God.” (Acts 4:17, 21, 31) Toktok bilong Paul long Timothy samfala year bihaen showimaot positive tingting wea olketa Christian shud keepim. Paul hem sei: “God no givim iumi spirit for fraet, bat spirit bilong paoa and love and gudfala tingting. Dastawe, iu no shame for witness abaotem Lord bilong iumi, and no shame long mi olsem wanfala prisoner for saed bilong hem, bat acceptim part bilong iu for feisim nogud samting from iu talemaot gud nius witim paoa bilong God.”—2 Timothy 1:7, 8.
Wanem Nao Iumi Owim Long Neiba Bilong Iumi?
12. Wanem nao main reason iumi preachim gud nius?
12 For iumi garem stretfala tingting long ministry, samting wea muvim iumi mas stret. Why nao iumi preach? Iumi lukim main reason insaed long Psalm: “Olketa loyal wan bilong iu bae blessim iu [Jehovah]. Olketa bae tok abaotem glory bilong rul bilong iu, and olketa bae story abaotem bigfala strong bilong iu, for mekem olketa son bilong man savve long olketa strongfala akson wea hem duim and glory bilong rul bilong hem wea luk gud tumas.” (Psalm 145:10-12) Tru nao, iumi preach mekem iumi praisem Jehovah long pablik and for mekhae long nem bilong hem front long evri man. Nomata taem tu-thri nomoa lisin long iumi, wei wea iumi faithful for talemaot datfala message bilong salvation hem givim praise long Jehovah.
13. Wanem nao savve muvim iumi for mas talem nara pipol abaotem hope bilong salvation?
13 Iumi preach tu from iumi garem love for pipol and for mekem iumi no guilty long blood. (Ezekiel 33:8; Mark 6:34) Join witim diswan hem olketa toktok bilong Paul abaotem olketa aotsaed long Christian kongregeson: “Long olketa Greek and long olketa Heathen, long olketa wise man and long olketa man wea no tingting gud mi garem kaon.” (Romans 1:14) Paul feel olsem hem owim long olketa pipol for talemaot gud nius long olketa, from hem will bilong God for “evri difren kaen man mas sev.” (1 Timothy 2:4) Tuday, iumi feelim sem love and responsibility for neiba bilong iumi. Love bilong Jehovah for man muvim hem for sendem Son bilong hem long earth for dae for olketa. (John 3:16) Datwan barava bigfala sakrifaes. Iumi showim semkaen love bilong Jehovah taem iumi iusim taem and hard waka for talem olketa narawan datfala gud nius bilong salvation thru long sakrifaes bilong Jesus.
14. Hao nao Bible storyim world aotsaed long Christian kongregeson?
14 Olketa Jehovah’s Witness ting long narawan olsem olketa wea fit for kamap member bilong Christian famili. Iumi mas no fraet for preach, bat diswan no minim wei for forcem or argue. Hem tru, Bible hem iusim olketa strongfala toktok taem hem tok abaotem world. Paul hem iusim disfala toktok “world” for minim nogud samting taem hem tok abaotem “wisdom bilong disfala world” and “olketa samting wea world wantem.” (1 Corinthians 3:19; Titus 2:12) Paul remindim tu olketa Christian long Ephesus hao taem olketa wakabaot “followim system bilong disfala world,” olketa “dae” long spiritual wei. (Ephesians 2:1-3) Olketa toktok hia and olketa nara toktok olsem fitim toktok bilong aposol John: “Full world hem stap long paoa bilong wicked wan.”—1 John 5:19.
15. Wanem nao iumi no duim long man wanwan wea aotsaed long Christian kongregeson, and why nao olsem?
15 Bat tingim, olketa toktok olsem minim datfala world wea stap farawe from God, no man wanwan. Olketa Christian no trae for judgem firstaem hao eni man wanwan bae ting long preaching waka. Olketa no garem reason for sei man wanwan olsem olketa goat. Hem no bilong iumi for talemse wanem nao bae kamaot taem Jesus kam for separatem “sheep” from “olketa goat.” (Matthew 25:31-46) Jesus nao judge wea God appointim; no iumi. And tu, experience hem showim hao samfala wea bifor duim olketa barava nogud samting acceptim finis Bible message, change finis, and stap klin olsem Christian. Dastawe, nomata iumi no trae for kaban witim samfala wanwan, iumi no hol bak for story long olketa abaotem Kingdom hope sapos chance hem kamap. Bible storyim samfala wea, taem olketa no biliv yet, olketa “garem fasin fitim laef olowe.” Gogo olketa biliv. (Acts 13:48) Iumi hard for savve hu nao garem fasin wea fit bifor iumi givim witness—maet planti taem. Taem iumi tingim diswan, iumi treatim olketa wea no acceptim yet message bilong salvation witim “kwaet fasin” and “bigfala respect,” and iumi hope hao samfala long olketa maet acceptim datfala message for laef.—2 Timothy 2:25; 1 Peter 3:15.
16. Wanem nao wanfala reason iumi want for mekem grow “gudfala wei for teach”?
16 Wei for mekem grow savve for teach olsem bae helpem wei for interest bilong iumi for talemaot gud nius. Olsem example: Wanfala nambawan plei or sport maet hem no interesting long man wea no savve hao for pleim. Bat long man wea savve plei gud, hem barava hapi witim. Olsem tu, olketa Christian wea mekem grow “gudfala wei for teach” garem moa hapi insaed long ministry. (2 Timothy 4:2; Titus 1:9) Paul advaesem Timothy: “Duim best bilong iu for mekem God acceptim iu, wanfala wakman wea no shame long eni samting, wea iusim word bilong truth long stretfala wei.” (2 Timothy 2:15) Hao nao iumi savve mekem grow wei wea iumi teach?
17. Hao nao iumi savve “mekem grow feeling for barava hangre” for savve long Bible, and hao nao disfala savve bae helpem ministry bilong iumi?
17 Wanfala wei hem for kasem samfala moa stretfala savve. Aposol Peter encouragem iumi: “Olsem baby wea just born, mekem grow feeling for barava wantem klinfala milk bilong datfala word, mekem iufala savve grow for kasem salvation thru long datwan.” (1 Peter 2:2) Wanfala baby hem born witim hangre for milk. Bat, wanfala Christian maet need for “mekem grow feeling for barava hangre” for savve long Bible. Man savve duim diswan taem hem garem gudfala fasin for study and read. (Proverbs 2:1-6) Hard waka and wei for disciplinem seleva hem important sapos iumi bae kamap gudfala teacher long Word bilong God, bat hard waka olsem givim iumi gudfala samting. Hapi wea kamaot taem iumi lukluk gud long Word bilong God savve mekem iumi shaen witim spirit bilong God, redy for sharem witim narawan olketa samting wea iumi lanem.
18. Hao nao Christian meeting savve helpem iumi for iusim word bilong truth long stretfala wei?
18 Olketa Christian meeting tu duim important waka for helpem iumi iusim gud Word bilong God. Taem olketa readim Bible long olketa pablik tok and nara story long Bible, hem gud for iumi followim witim own Bible bilong iumi. Hem wise for iumi lisin gud long olketa meeting part, witim olketa part wea tok abaotem preaching waka tu. Iumi shud no ting smol long olketa demonstration, maet long wei for tanem tingting long nara samting. Iumi needim wei for disciplinem seleva and lisin gud moa. (1 Timothy 4:16) Olketa Christian meeting buildimap faith bilong iumi, helpem iumi for mekem grow feeling for barava hangre for Word bilong God, and trainim iumi for really interest for talemaot gud nius.
Iumi Savve Depend Long Saport From Jehovah
19. Why nao wei for olowe tekpart long preaching waka hem important?
19 Olketa Christian wea “shaen witim spirit” and wea interest for talemaot gud nius trae for share olowe long ministry. (Ephesians 5:15, 16) Tru tumas, living hem difren, and no evriwan savve iusim sem taem for duim disfala waka for sevem laef. (Galatians 6:4, 5) Nomata olsem, maet samting wea important winim total hour wea iumi iusim nao hem haomas difren taem iumi story abaotem hope bilong iumi long nara pipol. (2 Timothy 4:1, 2) Sapos iumi preach moa long planti difren taem, tingting bilong iumi hao disfala waka hem important bae go hae moa. (Romans 10:14, 15) Iumi bae grow long fasin for kea and feeling for narawan taem iumi olowe meetim honest pipol wea sorre and krae and wea no garem hope.—Ezekiel 9:4; Romans 8:22.
20, 21. (a) Wanem waka nao stap front long iumi yet? (b) Hao nao Jehovah hem saportim hard waka bilong iumi?
20 Jehovah hem givim iumi for lukaftarem gud nius. Diswan hem firstfala waka wea iumi kasem from hem olsem “pipol wea waka witim God.” (1 Corinthians 3:6-9) Iumi barava interest for fulfillim disfala responsibility wea God givim kam witim full-soul, kasem best bilong iumi. (Mark 12:30; Romans 12:1) Planti pipol stap yet insaed long world wea hangre for truth and garem fasin wea fit. Planti waka stap for duim, bat iumi savve trust long saport from Jehovah taem iumi barava duim ministry bilong iumi.—2 Timothy 4:5.
21 Jehovah givim iumi spirit bilong hem and redyim iumi witim “sword bilong spirit,” Word bilong God. Witim disfala help iumi savve openem mouth bilong iumi “witim wei for toktok free for talemaot holy secret bilong gud nius.” (Ephesians 6:17-20) Letem toktok wea aposol Paul raetem long olketa Christian long Thessalonica kamap tru for iumi: “Gud nius wea mifala preachim hem no kam long iufala thru long toktok nomoa bat witim paoa and witim holy spirit and wei for biliv strong.” (1 Thessalonians 1:5) Letem iumi barava interest for talemaot disfala gud nius!
Shortfala Review
• From olketa wari bilong laef, wanem nao savve affectim strong bilong iumi long ministry?
• Hao nao wei wea iumi want for talemaot gud nius shud olsem “fire wea burn” insaed heart bilong iumi?
• Wanem kaen nogud feeling abaotem ministry nao iumi shud stap klia long hem?
• Hao nao iumi shud ting long olketa wea no garem sem biliv olsem iumi?
• Hao nao Jehovah helpem iumi for keepim strong bilong iumi long preaching waka?
[Piksa long page 9]
Olketa Christian followim strong bilong Paul and Jeremiah
[Piksa long page 10]
Love for God and neiba nao muvim iumi for barava interest long ministry