Showimaot Wei for Tingting wea Christ Garem

“Letem God wea givim fasin for go ahed strong and comfort givim iufala sem wei for tingting olsem Christ Jesus hem garem bifor.”—ROMANS 15:5.

1. Hao nao wei for tingting bilong man savve affectim living bilong hem?

WEI FOR TINGTING hem wanfala big samting long laef. Tingting for no kea or tingting for kea, tingting long gud saed or tingting long nogud saed, tingting for raoa or waka tugeta, tingting for komplen or tinghae savve barava affectim wei wea man deal witim samting and hao pipol deal witim hem. Sapos man garem gud wei for tingting, hem savve hapi nomata long taem wea no isi tumas. For man wea garem nogud wei for tingting, no eni samting hem luk gud long hem, nomata sapos—long really wei—living bilong hem gud.

2. Hao nao man lanem wei for tingting?

² Olketa wei for tingting—gud or nogud—hem samting man savve lanem. Tru nao, olketa hia samting wea evri man mas lanem. Taem hem story abaotem baby wea just born, Collier’s Encyclopedia sei olsem: “Olketa wei for tingting wea hem bae garem hem samting wea hem mas kasem or lanem, klosap olsem wei wea hem mas lanem wanfala languis or eni nara samting.” Hao nao iumi lanem wei for tingting? Nomata planti samting nao insaed diswan, living and pipol wea man kaban witim savve affectim hem long bigfala wei. Sem encyclopedia sei: “Iumi lanem or tekem olketa wei for tingting bilong pipol wea iumi kaban witim.” Samfala thousand year go finis, Bible talem samting wea klosap semsem: “Man wea wakabaot witim wise pipol bae kamap wise, bat man wea kaban witim stupid pipol bae kasem trabol.”—Proverbs 13:20; 1 Corinthians 15:33.

Wanfala Example Bilong Stretfala Wei for Tingting

3. Hu nao showimaot gud example long saed bilong wei for tingting, and hao nao iumi savve followim hem?

³ Olsem long evri samting, Jesus Christ showimaot best example long wei for tingting. Hem sei: “Mi showimaot example for iufala, so, olsem mi duim long iufala, iufala mas duim tu.” (John 13:15) For kamap olsem Jesus, iumi mas lane abaotem hem firstaem.a Iumi studyim laef bilong Jesus witim goal for followim disfala kaonsel bilong aposol Peter: “Hem kolem iufala for followim disfala wei, from Christ hem safa for iufala, and leavim wanfala example for iufala for followim gud olketa step bilong hem.” (1 Peter 2:21) Goal bilong iumi hem for followim Jesus long best wei wea iumi fit for duim. Insaed diswan hem for mekem grow wei for tingting bilong hem.

4, 5. Wanem part long wei for tingting bilong Jesus nao Romans 15:1-3 mekhae long hem, and hao nao olketa Christian savve followim hem?

⁴ Wanem nao insaed long wei for garem wei for tingting bilong Christ Jesus? Chapter 15 long leta bilong Paul for olketa long Rome helpem iumi for ansarem datfala kwestin. Long olketa first verse bilong disfala chapter, Paul story abaotem wanfala nambawan fasin bilong Jesus taem hem sei: “Bat, iumi, wea strong mas karem wik point bilong olketa wea no strong, and no mekem iumiseleva nomoa hapi. Letem evriwan long iumi mekem neiba bilong hem hapi long wei for duim samting wea gud for buildim hem ap. From Christ tu no mekem hemseleva hapi; bat olsem olketa raetem finis: ‘Nogud toktok bilong olketa wea tokspoelem iu hem foldaon antap long mi.’”—Romans 15:1-3.

⁵ Taem olketa followim fasin bilong Jesus, olketa Christian kasem encouragement for redy for kea for need bilong nara pipol witim hambol fasin winim wei for mekem olketa seleva nomoa hapi. Tru nao, hambol wei for willing for servem nara pipol hem fasin bilong olketa wea “strong.” Jesus, wea strong long spiritual wei winim eni nara man, sei olsem abaotem hemseleva: “Son bilong man hem kam, no for olketa servem hem, bat for serve and for givim soul bilong hem olsem ransom for baem bak planti pipol.” (Matthew 20:28) Olsem olketa Christian, iumi tu laek for reach aot for servem nara pipol, and tu “olketa wea no strong.”

6. Long wanem wei nao iumi savve followim samting wea Jesus duim taem pipol againstim and tokspoelem hem?

⁶ Nara gudfala mark wea Jesus showimaot hem wei for tingting and duim samting wea evritaem hem gud. Hem nating letem nogud tingting bilong pipol for affectim gud tingting bilong hem long wei for servem God; and iumi tu mas olsem. Taem pipol tokspoelem and persecutim hem bikos hem faithful for worshipim God, Jesus patient for go ahed strong and hem no komplen. Hem savve pipol wea trae for mekem neiba bilong olketa hapi “long wei for duim samting wea gud for buildim hem ap” bae expectim world wea no biliv and no minim for againstim olketa.

7. Hao nao Jesus showimaot patient fasin, and why nao iumi shud duim sem samting?

⁷ Jesus showimaot stretfala wei for tingting long olketa nara wei. Hem nating showimaot hem no patient long Jehovah bat hem patient for weitim Hem for duim olketa purpose bilong Hem. (Psalm 110:1; Matthew 24:36; Acts 2:32-36; Hebrews 10:12, 13) And tu, Jesus hem patient long olketa follower bilong hem. Hem talem olketa: “Lanem samting from mi”; from hem garem “kwaet fasin,” instruction bilong hem buildimap and strongim man. And from hem “hambol long heart,” hem no show-off or praod. (Matthew 11:29) Paul encouragem iumi for followim olketa difren part hia bilong wei for tingting bilong Jesus taem hem sei: “Garem diskaen wei for tingting long iufala wea Christ Jesus garem tu, wea, nomata hem wankaen witim God, hem nating ting for trae for kasholem, minim, for hem kamap semsem witim God. Nomoa, bat hem mekem hemseleva kamap smol and kamap olsem wanfala slave and hem kamap olsem wanfala man.”—Philippians 2:5-7.

8, 9. (a) Why nao iumi mas mekem grow tingting wea no selfish? (b) Why nao iumi shud no feel wikdaon taem iumi no followim example bilong Jesus long perfect wei, and hao nao Paul hem gudfala example long diswan?

⁸ Hem isi for sei iumi want for servem nara pipol and for tingim need bilong olketa firstaem long need bilong iumiseleva. Bat honest wei for lukluk long wei for tingting bilong iumiseleva maet showimaot full heart bilong iumi no garem feeling olsem. Why nao olsem? First samting, bikos iumi born witim selfish fasin from Adam and Eve; mek-tu, bikos iumi stap insaed world wea apim selfish fasin. (Ephesians 4:17, 18) For mekem grow wei for tingting wea no selfish hem planti taem minim for mekem grow wei for tingting wea difren tumas from fasin wea iumi born witim wea no perfect. For duim olsem iumi mas disaed strong and waka hard.

⁹ From wei wea iumi no perfect hem showaot olsem difren tumas from perfect example wea Jesus showim for iumi, maet samfala taem diswan mekem iumi feel wikdaon. Maet iumi daotem sapos iumi savve garem sem wei for tingting olsem Jesus. Bat lukim toktok bilong Paul wea encouragem man: “Mi savve insaed long mi, hem nao, insaed long body bilong mi, no eni gud samting hem stap; from wei for wantem hem stap insaed long mi, bat wei for duim gudfala samting hem no stap. From gud samting wea mi wantem mi no duim, bat nogud samting wea mi no wantem hem nao wanem mi go ahed for duim. Man wea insaed long mi barava hapi tumas long law bilong God, bat mi lukim long nara part bilong mi difren law wea faet againstim law bilong mind bilong mi and wea leadim mi for kamap prisoner long law bilong sin wea insaed long olketa member bilong mi.” (Romans 7:18, 19, 22, 23) Hem tru, wei wea Paul no perfect hem planti taem pullim Paul for no duim will bilong God long wei wea hem laek for duim, bat wei for tingting bilong hem—wei wea hem ting and feel abaotem Jehovah and law bilong Hem—hem gud tumas. Iumi tu savve olsem.

Stretem Wei for Tingting wea No Mas Gud

10. Wanem wei for tingting nao Paul encouragem olketa long Philippi for mekem grow?

¹⁰ Waswe, maet samfala need for stretem wei for tingting wea no mas gud? Yes. Diswan nao need bilong samfala Christian long first century. Insaed leta bilong hem for olketa long Philippi, Paul story abaotem wei for garem stretfala wei for tingting. Hem raet olsem: “No from mi kasem diswan finis [laef long heven thru long datfala first resurrection] or mi perfect finis, bat mi aftarem diswan for lukim sapos mi savve hol strong long datfala samting wea Christ Jesus tu hol strong finis long mi for kasem. Olketa brata, mi no tingse mi kasem diswan finis; bat wanfala samting abaotem diswan: Forgetim evri samting long bihaen and barava trae for kasholem olketa samting long front, mi aftarem datfala goal wea prize bilong hope for go ap, wea God givim thru long Jesus Christ. So, letem olketa long iumi wea mature, garem disfala wei for tingting.”—Philippians 3:12-15.

11, 12. Wanem nao olketa wei wea Jehovah showimaot stretfala wei for tingting long iumi?

¹¹ Toktok bilong Paul showimaot hao eniwan wea, taem hem kamap Christian, no feelim need for muv ahed hem garem rong wei for tingting. Hem fail for followim wei for tingting bilong Christ. (Hebrews 4:11; 2 Peter 1:10; 3:14) Waswe, man olsem no garem hope nao? Nomoa. God savve helpem iumi for changem wei for tingting bilong iumi sapos iumi barava want for duim datwan. Paul sei moa: “Sapos iufala garem difren tingting long samfala wei, bae God showimaot datfala wei for tingting antap long iufala.”—Philippians 3:15.

¹² Bat, sapos iumi laekem Jehovah for showimaot stretfala wei for tingting, iumi mas duim part bilong iumi. Witim prea, wei for studyim Word bilong God and olketa Christian buk wea “faithful and wise slave” redyim bae helpem olketa wea “garem difren tingting” for mekem grow stretfala wei for tingting. (Matthew 24:45) Olketa Christian elder, wea holy spirit appointim olketa “for shepherdim kongregeson bilong God,” bae hapi for givim saport. (Acts 20:28) Iumi hapi tumas from Jehovah hem tingim wei wea iumi no perfect and long loving wei hem offer for helpem iumi! Letem iumi acceptim.

Lane From Nara Pipol

13. Wanem nao iumi lanem abaotem stretfala wei for tingting from story long Bible abaotem Job?

¹³ Long Romans chapter 15, Paul showimaot hao wei for ting raonem olketa example from bifor savve helpem iumi for stretem wei for tingting bilong iumi. Hem raet olsem: “Olketa raetem evri samting bifor for teachim iumi, mekem thru long wei wea iumi go ahed strong and thru long comfort from olketa Scripture iumi savve garem hope.” (Romans 15:4) Samfala faithful servant bilong Jehovah long bifor need for stretem samfala part long wei for tingting bilong olketa. Olsem example, long planti wei Job hem garem gudfala wei for tingting. Hem nating sei nogud samting kam from Jehovah and no enitaem hem letem wei for safa for mekem trust bilong hem long God wikdaon. (Job 1:8, 21, 22) Nomata olsem, hem garem wei for givim excuse for hemseleva. Jehovah leadim Elihu for helpem Job for stretem datfala feeling. Job no feel nogud bat hem hambol for acceptim datfala need for changem wei for tingting bilong hem and hem kwiktaem for stretem datwan.—Job 42:1-6.

14. Hao nao iumi savve olsem Job sapos iumi kasem kaonsel abaotem wei for tingting bilong iumi?

¹⁴ Waswe, bae iumi duim samting olsem Job sapos long kaenfala wei wanfala Christian brata sei iumi showimaot wei for tingting wea no mas gud? Olsem Job, letem iumi nating “sei eni nogud samting kam from God.” (Job 1:22) Sapos iumi safa long wei wea no stret, iumi mas no komplen or sei Jehovah nao kosim olketa hard samting wea iumi kasem. Iumi mas stap klia long wei for trae for givim excuse for iumiseleva, remember nomata wanem privilege iumi garem insaed service bilong Jehovah, iumi “iusles slave nomoa.”—Luke 17:10.

15. (a) Wanem rong kaen wei for tingting nao samfala follower bilong Jesus showimaot? (b) Hao nao Peter showimaot gudfala wei for tingting?

¹⁵ Long first century, samfala wea lisin long Jesus showimaot wankaen wei for tingting wea no stret. Long wantaem, Jesus talem samting wea hard for minim. From diswan “planti disaepol bilong hem, taem olketa herem diswan, sei: ‘Disfala toktok hem nogud tumas; hu nao bae lisin long hem?’” Olketa wea tok olsem garem rong kaen wei for tingting. And rong kaen wei for tingting bilong olketa leadim olketa for stop for lisin long Jesus. Story hem sei: “So from diswan planti long olketa disaepol bilong hem go bak long samting bilong bifor and no followim hem moa.” Waswe, evriwan nao garem rong kaen wei for tingting? Nomoa. Story go ahed for sei: “Then Jesus sei long olketa twelvfala: ‘Waswe, iufala tu laek for go?’ Simon Peter ansarem hem olsem: ‘Lord, hu nao bae mifala go long hem?’” Then Peter ansarem kwestin bilong hemseleva: “Iu nao garem olketa toktok bilong laef olowe.” (John 6:60, 66-68) Datwan hem gudfala wei for tingting! Taem samfala mining or change long savve bilong olketa Scripture kamap wea maet firstaem iumi faendem hard for acceptim, waswe, hem gud for showimaot wei for tingting olsem Peter? Hem krangge samting for stop servem Jehovah or story long wei wea difren tumas from “datfala plan bilong healthy toktok” bikos samfala samting hem hard for minim!—2 Timothy 1:13.

16. Wanem barava nogud wei for tingting nao olketa leader bilong Jew religion long taem bilong Jesus olketa showimaot?

¹⁶ Olketa leader bilong Jew religion long first century fail for showimaot wei for tingting wea Jesus garem. Wei wea olketa strong for no lisin long Jesus hem showaot taem hem resurrectim Lazarus from dae. For eniwan wea garem stretfala wei for tingting, datfala mirakol hem pruvim evribit hao God nao sendem Jesus. Bat, iumi read: “Gogo olketa chief priest and olketa Pharisee hipimap Sanhedrin tugeta and start for sei: ‘Wanem nao iumi bae duim, from disfala man hem duim planti saen? Sapos iumi letem hem for go ahed olsem, olketa bae putim faith long hem, and olketa bilong Rome bae kam and tekem ples bilong iumi and nation bilong iumi tu.’” Wanem nao ansa bilong olketa? “Start long datfala day olketa mekem plan for killim hem dae.” For join witim plan for killim dae Jesus, olketa plan for killim dae pruv bilong mirakol wea hem duim. “Olketa chief priest mekem plan for killim dae Lazarus tu.” (John 11:47, 48, 53; 12:9-11) Hem nogud tumas sapos iumi start for garem semkaen wei for tingting and feel kros or feel nogud long olketa samting wea iumi shud hapi long hem! Tru nao, and datwan barava danger!

Followim Gudfala Wei for Tingting Bilong Christ

17. (a) Long wanem samting nao Daniel showimaot wei for no fraet? (b) Hao nao Jesus showimaot wei wea hem nating fraet?

¹⁷ Olketa servant bilong Jehovah evritaem garem gudfala wei for tingting. Taem olketa enemy bilong Daniel plan for mekem law wea tambuim wei for prea long eni god or man bat king nomoa for 30 day, Daniel savve diswan bae affectim wei wea hem fren witim Jehovah God. Waswe, bae hem stap klia from wei for prea long God for 30 day? Nomoa, hem no fraet and go ahed for prea long Jehovah thrifala taem evriday, olsem hem savve duim evritaem. (Daniel 6:6-17) Long sem wei Jesus tu no letem olketa enemy bilong hem for mekem hem fraet. Long wanfala Sabbath day, hem meetim wanfala man wea hand bilong hem dae. Jesus savve planti Jew long there bae no hapi sapos hem healim wanfala man long Sabbath. Hem askem olketa stret for talemaot tingting bilong olketa long diswan. Taem olketa les, Jesus go ahed and healim datfala man. (Mark 3:1-6) Jesus nating hol bak for fulfillim waka bilong hem long wei wea hem ting hem stret.

18. Why nao samfala againstim iumi, bat wanem nao iumi shud duim taem olketa garem nogud wei for tingting olsem?

¹⁸ Olketa Jehovah’s Witness distaem luksavve olketa mas nating fraet long nogud samting wea pipol wea againstim olketa savve duim. Sapos olketa fraet, olketa no showimaot wei for tingting bilong Jesus. Planti pipol nao againstim Olketa Jehovah’s Witness, samfala bikos olketa no savve long really story and olketa narawan bikos olketa heitim olketa Witness or message bilong olketa. Bat iumi mas no letem wei wea olketa no fren for affectim gud tingting bilong iumi. Iumi mas no letem nara pipol affectim wei wea iumi worship.

19. Hao nao iumi savve showimaot wei for tingting olsem Jesus Christ?

¹⁹ Jesus evritaem showimaot gudfala wei for tingting long olketa follower bilong hem and olketa arrangement bilong God, nomata hem hard hao. (Matthew 23:2, 3) Iumi shud followim example bilong hem. Tru, olketa brata bilong iumi no perfect, bat iumi tu no perfect. And wea nao iumi savve faendem olketa beta and loyal fren bat only insaed long bigfala famili bilong iumi evriwea long world? Jehovah no givim iumi full mining long Word bilong hem yet, bat wanem religion nao garem moa savve? Iumi mas evritaem garem stretfala wei for tingting, kaen tingting wea Jesus Christ garem. Wanfala samting wea insaed diswan, Jesus savve hao for weitim Jehovah, olsem next article bae storyim.

[Footnote]

Waswe, Iu Savve Minim?

• Hao nao wei for tingting bilong iumi affectim living bilong iumi?

• Storyim wei for tingting bilong Jesus Christ.

• Wanem nao iumi savve lanem from wei for tingting bilong Job?

• Wanem nao stretfala wei for tingting wea iumi shud garem taem pipol againstim iumi?

[Piksa long page 7]

Christian wea garem stretfala wei for tingting hem reach aot for helpem nara pipol

[Piksa long page 9]

Wei for studyim Word bilong God witim prea helpem iumi for followim wei for tingting bilong Christ