Waswe, Iu Remember?

Waswe, iu hapi for readim olketa Wastaoa long olketa month wea go pas finis? Sapos olsem, trae for ansarem olketa kwestin long daon:

• Long Romans 5:3-5, why nao aposol Paul putim hope long end bilong list?

Paul listim olketa samting wea olketa Christian savve experiencem—hard taem, fasin for stand strong, wei for God acceptim iumi, and hope. Disfala “hope” hem no datfala firstfala hope wea man kasem from Bible, bat hem hope wea kamap moa strong, deep, and barava affectim laef wea wanfala Christian kasem bihaen staka year.—12/15, page 22-3.

• Why nao maet wanfala Christian distaem hem interest long olketa game wea kamap long Greece bifor?

For minim wei and kastom bilong olketa game hia bae givim moa savve long samfala Bible verse. Samfala long olketa storyim wei for ‘tekpart followim olketa rul,’ ‘aotem evri hevi and lukluk long example bilong Jesus,’ ‘ran go kasem end,’ and kasem crown, or prize. (2 Timothy 2:5; 4:7, 8; Hebrews 12:1, 2; 1 Corinthians 9:24, 25; 1 Peter 5:4)—1/1, page 28-30.

• Wanem niu wei for talemaot gud nius nao kamap long January 1914?

Olketa releasem datfala “Photo-Drama of Creation.” Insaed diswan hem fofala part wea garem movie piksa and staka handred color glass slide, wea olketa pleim semtaem witim recording bilong olketa toktok for explainim piksa. Olketa redyim twenti copy bilong disfala Drama and iusim long bigfala wei for teachim Bible message long pipol.—1/15, page 8-9.

• Hao nao Governing Body hem difren from wanfala legal corporation?

Olketa director bilong wanfala legal corporation kasem datwan from vote bilong olketa member bilong hem, bat no eni man bat Jesus Christ nomoa appointim Governing Body. No eni need stap for olketa director bilong olketa difren corporation bilong Olketa Jehovah’s Witness for kamap member bilong Governing Body. Long annual meeting bilong Watch Tower Bible and Tract Society of Pennsylvania no longtaem go nomoa, olketa member bilong Governing Body wea bin serve olsem olketa director and officer bilong hem volunteer for step daon from position bilong olketa. Olketa mature brata from midolwan olketa “nara sheep” nao changem olketa. (John 10:16) So Governing Body savve spendem moa taem for kea for olketa spiritual need bilong disfala sekson bilong olketa brata evriwea long world.—1/15, page 29, 31.

• Wanem tufala Bible example nao iumi savve lukluk long hem for lane hao for winim feeling for wikdaon?

Wanfala hem Hannah, mami bilong Samuel. Hem fit for wikdaon taem Eli, hae priest bilong Israel, judgem hem rong. Bat nomoa, long wei for tok stret witim respect, hem talem klia tru samting long Eli. Witim diswan, Hannah no go ahed for feel nogud long Eli. Mek-tu hem Mark, wea mas feel wikdaon taem aposol Paul no laek for hem go witim hem long wanfala missionary gogo. Winim wei for lus interest from hem lusim disfala privilege, hem go ahed strong long service and gogo witim Barnabas.—2/1, page 20-2.

• Why nao olketa Christian mas careful long wei for givim or kasem olketa copy bilong computer software program?

Klosap evri computer program (olketa game tu insaed diswan) garem license wea sei man wea ownim/iusim savve putim long wanfala computer nomoa. Klosap evritaem copyright law tambuim wei for givim long nara pipol olketa copy bilong program, nomata sapos iumi givim free. Olketa Christian want for obeyim law, ‘peim bak olketa samting bilong Caesar long Caesar.’ (Mark 12:17)—2/15, page 28-9.

• Hu Nao Cyril and Methodius, and wanem nao tufala givim saed long study bilong Bible?

Tufala brata wea born long Thessalonica, Greece, long mek-naen century. Tufala wakem wanfala alphabet for olketa Slavic languis and transleitim big haf bilong Bible go long Slavonic languis.—3/1, page 28-9.

• Wanem nao mining bilong “wei for obeyim spirit”?—Romans 8:6.

Hem minim paoa bilong Jehovah nao kontrolem, bossim, and muvim iumi. Iumi letem spirit bilong God waka long iumi taem iumi readim and studyim Bible, obeyim law bilong God witim full heart, and prea for spirit bilong God.—3/15, page 15.

• Wanem nao iumi savve duim taem iumi feel olsem samwan minim iumi rong?

Hem important for trae for mekem olketa samting klia long spirit bilong love. Sapos diswan no waka, no givap. Askem fasin for minim samting and help from Jehovah, wan wea “lukluk gud long olketa heart.” (Proverbs 21:2; 1 Samuel 16:7)—4/1, page 21-3.