Jehovah Nao Lord Bilong Evri Samting!
“Jehovah, iu nao Lord bilong evri samting and olsem ples bilong mi for stap sef.”—PS. 73:28.
1. Taem Paul talem toktok long 1 Corinthians 7:31, luk olsem hem tingim wanem?
“WORLD distaem hem gohed for change.” Aposol Paul nao talem datwan. (1 Cor. 7:31) Luk olsem Paul tingim world olsem wanfala stage wea olketa man actim olketa difren scene long drama. Samfala actim olketa gud man and samfala actim olketa nogud man go kasem taem nara scene hem start.
2, 3. (a) Wei wea Satan kwestinim rul bilong God hem olsem wanem? (b) Olketa wanem kwestin nao bae iumi storyim?
2 Samting wea gohed for happen distaem hem olsem wanfala important drama wea iu tu insaed! Samting wea happen long datfala drama hem join witim wei wea Jehovah nomoa fit for rul. Tingim disfala drama olsem samting wea savve happen long wanfala kantri. Long datfala kantri, hem garem stretfala gavman wea garem olketa law for mekem pipol followim and stap gud. Bat wanfala grup stap wea no followim law. Olketa ravem pipol, raf long olketa, and killim man dae. Datfala grup kwestinim rul bilong datfala gavman and testim olketa wea sapotim datfala gavman.
3 Sem samting olsem hem happen long full universe. Wanfala stret gavman hem stap and hem nao gavman bilong “Jehovah, Lord bilong evri samting.” (Ps. 71:5) Bat “Satan” hem leader bilong wanfala grup wea no followim law and hem trae for spoelem olketa man. (1 John 5:19) Disfala grup kwestinim gavman bilong God and testim evriwan wea sapotim rul bilong God. Wanem nao mekem disfala samting for happen? Why nao God letem datwan for gohed? Wanem nao iumi wanwan savve duim abaotem disfala samting wea happen?
Samting wea Drama Hem Abaotem
4. Wanem tufala samting wea join tugeta nao datfala drama hem abaotem?
4 Disfala drama hem abaotem tufala samting wea join tugeta, hem nao rul bilong Jehovah and wei wea olketa man faithful. Staka taem Bible sei Jehovah hem “Lord bilong evri samting.” Olsem example, man wea raetem psalm showimaot hem trustim Jehovah taem hem sei: “Jehovah, iu nao Lord bilong evri samting and olsem ples bilong mi for stap sef.” (Ps. 73:28) Staka gud reason stap for iumi ting long Jehovah olsem Barava Haefala God.—Dan. 7:22.
5. Why nao iumi shud laek stap anda long rul bilong Jehovah?
5 Jehovah God nao Lord bilong evri samting bikos hem wakem earth and evri samting long universe. (Readim Revelation 4:11.) Jehovah hem Judge, hem givim olketa law, and hem King bilong iumi. (Isa. 33:22) From God nao givim laef long iumi and iumi needim hem, iumi shud ting long hem olsem Lord bilong evri samting. Bae iumi laek stap anda long rul bilong Jehovah from iumi luksavve ‘throne bilong Jehovah hem long heven, and hem king ovarem evri samting.’—Ps. 103:19; Acts 4:24.
6. Wanem nao hem minim for faithful?
6 For sapotim rul bilong Jehovah, iumi mas gohed faithful long hem. Datfala word “faithful” hem minim man garem olketa gudfala wei, no garem blame, and evritaem duim stret samting. Job nao man wea faithful.—Job 1:1.
Hao Datfala Drama Hem Start
7, 8. Wanem nao Satan duim wea showimaot hem kwestinim raet bilong Jehovah for rul?
7 Winim 6,000 year go finis, wanfala angel kwestinim raet bilong Jehovah for rul. From hem laekem olketa man for worshipim hem, hem talem and duim samting wea showimaot hem bighed. Hem mekem Adam and Eve for no laek stap anda long rul bilong Jehovah. Hem tok spoelem nem bilong Jehovah taem hem sei Jehovah hem laea. (Readim Genesis 3:1-5.) Datfala bighed angel nao Satan. Hem nao dragon wea tok spoelem and againstim God and hem laea long pipol bilong God and trae for finisim olketa.—Rev. 12:9.
8 Satan againstim God and mekem hemseleva for rul tu. Wanem nao bae Jehovah duim? Waswe, bae hem stretawe finisim Satan, Adam, and Eve? Jehovah garem paoa for duim olsem, and datwan bae pruvim hem nomoa garem bigfala paoa. Hem bae pruvim tu Jehovah talem tru samting abaotem panis wea man bae kasem sapos hem no followim law bilong Jehovah. Bat why nao God no finisim thrifala hia?
9. Wanem nao Satan kwestinim?
9 Taem Satan laea long Adam and Eve and mekem tufala for no worshipim God, Satan kwestinim raet wea Jehovah garem for olketa man obeyim Hem. Taem Satan duim datwan, hem kwestinim tu wei wea olketa man and olketa angel faithful long God. Satan testim Job bikos hem tingse hem savve mekem evri man for no obeyim God, bat Job faithful for stap anda long rul bilong Jehovah.—Job 2:1-5.
10. Why nao God no killim dae Satan stretawe?
10 Sapos Jehovah killim dae Satan stretawe, datwan bae pruvim nomoa Jehovah garem bigfala paoa. Bat Jehovah letem Satan stap laef for pruvim wanem Satan talem hem tru or nomoa. God givim chance tu long olketa man for showimaot sapos olketa bae faithful for stap anda long rul bilong hem or nomoa. Wanem nao happen long staka handred year wea go finis? Satan mekem staka pipol followim rabis grup bilong hem. Gogo Jehovah bae finisim grup hia and Satan and datwan bae barava pruvim God garem raet for rul. Jehovah God savve Satan bae finis dastawe hem talem profesi abaotem diswan taem Satan hem bighed.—Gen. 3:15.
11. Wanem nao staka pipol duim?
11 Staka pipol showimaot faith long God, gohed stap anda long rul bilong hem, and laekem nem bilong God for holy. Samfala nao hem Abel, Enoch, Noah, Abraham, Sarah, Moses, Ruth, David, Jesus, olketa firstfala disaepol bilong Christ, and plande million pipol distaem tu. Olketa hia wea faithful for sapotim rul bilong Jehovah pruvim Satan hem laea and mekem nem bilong Jehovah holy bikos Satan sei no eniwan bae faithful long God.—Prov. 27:11.
Iumi Savve Wanem Bae Happen
12. Why nao iumi savve Jehovah bae no letem nogud samting gohed for olowe?
12 Iumi savve iumi stap long olketa last day and klosap nao Jehovah bae showimaot hem nao fit for rul. Hem bae no letem nogud samting gohed for olowe. Jehovah finisim olketa nogud pipol long Flood. Hem finisim Sodom and Gomorrah and Pharaoh witim army bilong hem. Nomata Sisera witim army bilong hem and Sennacherib witim olketa soldia bilong hem from Assyria no fit for winim Barava Haefala God. (Gen. 7:1, 23; 19:24, 25; Ex. 14:30, 31; Judg. 4:15, 16; 2 Ki. 19:35, 36) Jehovah God bae no letem pipol gohed tok spoelem nem bilong hem and spoelem pipol bilong hem. And iumi lukim tu saen wea showimaot Jesus stap and rabis world hem gogo for finis.—Matt. 24:3.
13. Wanem nao iumi savve duim mekem Jehovah no finisim iumi witim olketa enemy?
13 Sapos iumi no laekem Jehovah for finisim iumi witim olketa enemy, iumi mas faithful for stap anda long rul bilong hem. Wanem nao savve helpem iumi for duim datwan? Iumi mas no sapotim rul bilong Satan and no letem olketa wea hem iusim for mekem iumi lusim Jehovah. (Isa. 52:11; John 17:16; Acts 5:29) Taem iumi duim olsem, iumi showimaot iumi sapotim rul bilong God and iumi bae garem hope for stap laef taem Jehovah showimaot hem nao fit for rul and finisim pipol wea tok spoelem nem bilong hem.
14. Bible story abaotem olketa wanem samting?
14 Olketa nara buk bilong Bible tu story abaotem olketa man and rul bilong Jehovah and no buk bilong Genesis nomoa. Genesis chapter 1 go kasem 3 story abaotem olketa samting wea God wakem and hao sin hem start. Bat Revelation chapter 20 go kasem 22 storyim olketa gud samting wea man bae kasem long future. Olketa nara buk long Bible storyim wanem Jehovah duim for mekem plan bilong hem for olketa man, earth, and universe kamap tru. Buk bilong Genesis storyim samting wea Satan duim and hao olketa nogud samting hem start. Olketa lastfala chapter long buk bilong Revelation showimaot wanem God bae duim for finisim olketa nogud samting, hao Satan bae finis, and hao God bae duim samting wea hem laek for duim long earth olsem hem duim long heven. Tru tumas, Bible storyim wanem nao mekem sin and dae for kamap and hao olketa samting hia bae finis. Hem storyim hao olketa wea faithful bae laef olowe and hapi.
15. For kasem gud samting taem datfala drama hem finis, wanem nao iumi mas duim?
15 Klosap nao world bae barava change. Datfala drama abaotem hu nao fit for rul bae finis. Satan bae no rul and gogo hem bae finis, and God bae duim samting wea hem laek for duim long earth. Bat for kasem gud samting from datwan and staka nara blessing wea Bible profesi abaotem, iumi mas sapotim rul bilong Jehovah distaem. Iumi mas no garem tufala tingting bat disaed hu nao bae iumi sapotim. Sapos iumi sei: “Jehovah stap witim mi,” iumi mas gohed for sapotim rul bilong hem.—Ps. 118:6, 7.
Iumi Savve Gohed Faithful!
16. Why nao iumi savve olketa man fit for gohed faithful long God?
16 Iumi savve sapotim rul bilong Jehovah and gohed faithful bikos aposol Paul sei: “Eni samting wea switim iufala for duim samting wea no stret hem kasem olketa nara man tu. Bat God hem keepim olketa promis bilong hem and hem bae no letem samting for switim iufala wea iufala no fit for winim. Bae hem helpem iufala for winim datwan mekem iufala no givap.” (1 Cor. 10:13) Wanem nao Paul storyim wea savve switim iumi for duim samting wea no stret, and hao nao God helpem iumi for winim datwan?
17-19. (a) Wanem nao switim olketa Israelite long wilderness? (b) Why nao iumi fit for gohed faithful long Jehovah?
17 Olsem samting wea kasem olketa Israelite long wilderness, samting wea kamap long laef savve “switim” iumi for no followim law bilong God. (Readim 1 Corinthians 10:6-10.) Olketa Israelite fit for winim olketa samting wea switim olketa, bat olketa laekem “olketa nogud samting.” Diswan happen taem Jehovah duim mirakol for provaedem quail (wea olsem grass bird) for olketa for wanfala month. Nomata olketa no kaikaim meat for lelebet longtaem, God givim manna fitim evriwan for kaikaim. Bat taem olketa lukim quail wea God givim, olketa greedy tumas taem olketa kolektem.—Num. 11:19, 20, 31-35.
18 Taem God givim Law long Moses long Maunt Sinai, olketa Israelite wakem wanfala gold buluka for worshipim and gohed for duim wanem body laekem. From Moses no stap, olketa Israelite start for duim nogud samting. (Ex. 32:1, 6) Bifor olketa Israelite go insaed long Promis Land, olketa woman long Moab switim staka Israelite and olketa Israelite hia durong witim olketa. Long datfala taem, staka thousand Israelite dae from sin wea olketa duim. (Num. 25:1, 9) Samfala taem olketa Israelite barava komplen. Wantaem olketa tok againstim Moses and God tu! (Num. 21:5) Olketa Israelite komplen tu taem Jehovah killim dae Korah, Dathan, Abiram, and olketa wea saedem olketa bikos olketa tingse datwan hem no stret. From datwan God mekem 14,700 Israelite dae from wanfala sik.—Num. 16:41, 49.
19 Olketa samting hia wea switim olketa Israelite hem no hard nomoa for olketa winim. Olketa Israelite letem samting hia for switim olketa bikos olketa no garem faith, no tingim Jehovah, no tingim olketa wei bilong hem stret, and hao hem lovem olketa. Olketa samting wea savve switim iumi distaem tu hem olketa sem samting wea kasem olketa Israelite. Sapos iumi waka hard for winim olketa samting hia and depend long God for helpem iumi, iumi savve gohed faithful. Iumi savve duim diswan bikos “God hem keepim olketa promis bilong hem and hem bae no letem samting for switim [iumi] wea [iumi] no fit for winim.” Jehovah bae no lusim iumi and no letem iumi kasem olketa hard taem wea hard for iumi winim.—Ps. 94:14.
20, 21. Taem iumi kasem hard taem, wanem nao God duim for ‘helpem iumi’?
20 Jehovah bae ‘helpem iumi for winim’ olketa samting wea kasem iumi. Olsem example, maet pipol killim iumi from olketa laek mekem iumi no faithful long Jehovah. Maet iumi laek for givap bikos iumi no laekem olketa for gohed whipim iumi, killim iumi, or for killim iumi dae. Bat olsem Paul talem long 1 Corinthians 10:13, iumi luksavve samting wea traem iumi hem for lelebet taem nomoa. Jehovah bae no letem datwan for mekem iumi no faithful long hem. God savve strongim faith bilong iumi and givim wanem iumi needim for helpem iumi gohed faithful long hem.
21 Jehovah givim holy spirit for strongim iumi. Holy spirit savve mekem iumi for tingim moa olketa scripture wea savve helpem iumi for winim olketa hard taem. (John 14:26) And no eniwan savve trikim iumi for duim nogud samting. Iumi savve why Jehovah fit for rul and why hem important for iumi mas faithful. From staka savve long tufala samting hia and from God helpem olketa, olketa gohed faithful long God go kasem taem olketa dae. Hem no wei for dae nao finisim hard taem wea man kasem, bat Jehovah nao helpem olketa for no givap go kasem taem olketa dae. Hem savve helpem iumi tu. Hem iusim tu olketa faithful angel for “helpem pipol wea hem bae sevem.” (Heb. 1:14) Olsem study bihaen diswan storyim, olketa wea faithful nomoa savve garem hope for laef olowe and stap anda long rul bilong God. Iumi tu savve kasem datwan sapos iumi gohed faithful long Jehovah, wea hem nao Lord bilong evri samting.
Wanem Nao Ansa Bilong Iu?
• Why nao iumi shud luksavve Jehovah nao Lord bilong evri samting?
• Wanem nao hem minim for gohed faithful long God?
• Why nao iumi savve klosap nao Jehovah bae showimaot hem fit for rul?
• Olsem 1 Corinthians 10:13 talem, why nao iumi fit for gohed faithful?
[Piksa long page 24]
Satan mekem Adam and Eve for no faithful long Jehovah
[Piksa long page 26]
Gohed strong for sapotim rul bilong Jehovah