Aftarem Goal wea Mekem Iu Satisfae Long Laef
“Evri samting wea brith mas praisem Jah.”—PSALM 150:6.
1. Storyim hao wanfala young man trae for kasem laef wea mekem hem satisfae.
SEUNG JIN wea growap long Korea hem sei: “Mi skul for kamap doctor bikos mi laek iusim laef bilong mi for helpem pipol.a Mi tingim tu hao disfala waka bae mekem mi hapi from mi bae kasem hae position and garem staka selen. Bat mi feel nogud taem mi luksavve hao olketa doctor no savve duim staka samting for helpem pipol. So mi start for studyim art, bat olketa samting wea mi wakem hem no really helpem olketa narawan and mi feel olsem mi duim samting wea mekem miseleva nomoa hapi. Gogo, mi kamap wanfala teacher, bat no longtaem bihaen mi luksavve hao mi savve givim information nomoa long pipol and no givim help wea mekem man barava hapi.” Seung Jin hem duim samting wea staka pipol duim. Hem aftarem samting for mekem hem satisfae long laef.
2. (a) Wanem nao hem minim for aftarem goal wea mekem iumi satisfae long laef? (b) Hao nao iumi savve Creator garem gudfala reason for putim iumi long earth?
2 For iumi satisfae long laef hem minim iumi mas barava laek for laef and garem goal wea iumi waka hard for kasem. Waswe, olketa man savve garem laef olsem? Ia! From God givim iumi savve, conscience, and wei for ting raonem samting, masbi Creator hem garem gudfala reason for putim iumi long earth. Dastawe hem stret for sei iumi savve fulfillim plan bilong God for iumi only sapos iumi followim will bilong Creator long laef bilong iumi.
3. For olketa man followim plan bilong God, olketa mas duim wanem samting?
3 Bible showimaot staka samting hem insaed plan bilong God for iumi. Olsem example, nambawan wei wea God wakem body bilong iumi hem barava showimaot love bilong hem wea no selfish. (Psalm 40:5; 139:14) So for iumi followim will bilong God long laef bilong iumi hem minim iumi mas lovem pipol long sem wei olsem God. (1 John 4:7-11) Hem minim tu for obeyim olketa instruction wea God givim wea savve helpem iumi for duim samting long laef bilong iumi wea fitim will bilong hem.—Ecclesiastes 12:13; 1 John 5:3.
4. (a) Wanem nao savve mekem iumi satisfae long laef? (b) Wanem nao barava best samting eniwan savve duim?
4 Hem plan bilong God tu for olketa man hapi and stap gud witim narawan and evri nara creation. (Genesis 1:26; 2:15) Bat wanem nao iumi need for duim for hapi, feel sef, and no wari tumas? Olsem wanfala pikinini hem hapi and feel sef taem hem stap witim dadi and mami bilong hem, iumi mas fren gud witim Dadi bilong iumi long heven mekem iumi satisfae long laef. (Hebrews 12:9) Wei wea iumi savve story long God long prea and hem lisin long iumi helpem iumi for fren gud witim hem. (James 4:8; 1 John 5:14, 15) Sapos iumi garem faith and ‘wakabaot witim God’ and fren witim hem, datwan savve mekem Jehovah hapi and givim praise long hem. (Genesis 6:9; Proverbs 23:15, 16; James 2:23) Datwan nao barava best samting eniwan savve duim. Man wea raetem psalm hem sei: “Evri samting wea brith mas praisem Jah.”—Psalm 150:6.
Wanem Nao Goal Bilong Iu Long Laef?
5. Why nao hem no wise for aftarem olketa material samting olsem main goal bilong iumi?
5 Wanfala samting long plan bilong God for iumi hem for iumi lukaftarem iumiseleva and famili bilong iumi. Diswan hem minim long physical and spiritual wei. Bat iumi mas balance long diswan and no letem waka for selen and olketa material samting kamap barava important winim olketa spiritual samting. (Matthew 4:4; 6:33) Sorre nao, main goal wea staka pipol aftarem hem wei for hipimap olketa material samting. Bat hem no wise for tingim hao olketa material samting bae satisfaem evri need bilong iumi. No longtaem go nomoa, wanfala research showimaot hao plande pipol long Asia wea barava rich “no feel sef and wari, nomata olketa garem bignem and iusim riches bilong olketa for duim samfala gud samting.”—Ecclesiastes 5:11.
6. Wanem kaonsel nao Jesus givim long pipol wea aftarem olketa material samting?
6 Jesus story abaotem “paoa bilong olketa riches for giamanim man.” (Mark 4:19) Long wanem wei nao olketa riches savve giamanim man? Maet pipol tingse olketa material samting nao mekem olketa hapi, bat datwan hem no tru. Wise King Solomon hem sei: “Man wea lovem selen bae gohed for laek kasem staka selen.” (Ecclesiastes 5:10, The New English Bible) Bat waswe, iumi savve aftarem olketa material samting and long semtaem duim best bilong iumi for worshipim God? Barava nomoa nao. Jesus hem sei: “No eniwan savve kamap slave for tufala masta; from hem bae heitim wanfala and lovem narawan, or hem bae loyal long wanfala and ting nating long narawan. Iufala kanduit kamap slave for God and for Riches.” Jesus encouragem olketa follower bilong hem for no hipimap olketa material samting long earth, bat for hipimap “olketa riches long heven,” wea minim for garem gud nem witim God wea ‘savve finis long evri samting wea olketa needim bifor olketa askem hem.’—Matthew 6:8, 19-25.
7. Hao nao iumi savve “hol strong long datfala really laef”?
7 Aposol Paul givim samfala strong kaonsel abaotem diswan taem hem raet long Timothy. Hem sei: “Talem olketa wea rich . . . for putim hope bilong olketa, no long riches wea bae finis, bat long God wea givim iumi evri samting for mekem iumi hapi . . . , for no hol bak, redi for share, and for mekem for olketa seleva gudfala faondeson for future wea sef, mekem olketa savve hol strong long datfala really laef.”—1 Timothy 6:17-19.
Wanem Nao “Datfala Really Laef”?
8. (a) Why nao staka pipol aftarem olketa riches and bignem? (b) Olketa hia no luksavve long wanem samting?
8 Long tingting bilong staka pipol, pipol wea garem gudfala laef hem olketa wea garem staka material samting and enjoyim hapitaem evritaem. Wanfala nius magasin long Asia hem sei: “Olketa wea lukluk long movie or long television laekem tumas for kasem olketa samting wea olketa lukim.” Main samting long laef bilong plande pipol hem for kasem olketa riches and bignem. From plande pipol aftarem olketa samting hia, datwan spoelem health, famili, and spiritual saed bilong olketa, and tu, olketa no enjoyim laef taem olketa young bikos olketa busy for aftarem datwan. Staka no luksavve hao samting olketa lukim long television, movie, or long niuspepa hem showimaot “spirit bilong world,” wea hem nao main tingting wea affectim staka pipol long world and wea muvim olketa for duim samting wea againstim will bilong God. (1 Corinthians 2:12; Ephesians 2:2) Dastawe plande pipol no hapi distaem!—Proverbs 18:11; 23:4, 5.
9. Hem hard tumas for olketa man duim wanem samting, and why nao olsem?
9 Waswe long olketa wea willing for waka hard for helpem olketa narawan, long wei wea olketa trae for finisim sik, hangre, and olketa samting wea no stret? Plande taem waka wea olketa duim hem helpem staka pipol. Bat nomata olketa trae hard for changem olketa samting hia, bae hem hard tumas for olketa changem world for kamap gud and stretem evri samting. Why nao olsem? Hem bikos “full world hem stap anda long paoa bilong wicked wan” Satan, and hem no laekem datwan for change.—1 John 5:19.
10. Long wanem taem nao olketa wea faithful bae kasem “datfala really laef”?
10 Hem sorre samting sapos man no garem eni hope for future! Paul hem sei: “Sapos long disfala laef nomoa iumi hope long Christ, then pipol mas sorre long iumi winim eni nara man.” Pipol wea no garem hope for future garem tingting olsem: “Iumi kaikai and drink, from tumoro bae iumi dae.” (1 Corinthians 15:19, 32) Bat iumi garem hope for future. “Iumi weitim wanfala niu skae and wanfala niu earth wea [God] promisim wea evriwan bae garem raeteous fasin.” (2 Peter 3:13) Long datfala taem olketa Christian savve enjoyim “datfala really laef,” wea minim olketa bae kamap perfect and kasem “laef olowe” long heven or long earth anda long rul bilong Kingdom bilong God.—1 Timothy 6:12.
11. Why nao wei for waka hard for sapotim Kingdom bilong God hem best samting for duim?
11 Kingdom bilong God nomoa bae stretem evribit olketa problem wea olketa man kasem. Best samting eniwan savve duim distaem hem for waka hard for sapotim Kingdom bilong God long wei for duim will bilong Hem. (John 4:34) Taem iumi duim datfala waka, Dadi bilong iumi long heven hem hapi long iumi. Iumi hapi tu for worshipim Jehovah witim staka million brata and sista long world wea olketa tu garem sem goal olsem iumi.
Mekem Olketa Sakrifaes wea God Hapi Long Hem
12. Long wanem wei nao laef distaem hem barava difren from “datfala really laef”?
12 Bible hem sei hao world distaem and “evri samting wea pipol long world laekem hem gogo for finis.” Evri samting long world bilong Satan, wea minim tu riches and bignem wea pipol garem, bae finis, “bat man wea duim will bilong God bae stap for olowe.” (1 John 2:15-17) Olketa riches, glory, and hapitaem long world distaem hem for lelebet taem nomoa, bat “datfala really laef” wea minim laef olowe anda long Kingdom bilong God bae gohed for olowe, and sapos iumi laek kasem datwan hem barava fitim for iumi mekem olketa sakrifaes wea God hapi long hem.
13. Wanem nao olketa sakrifaes wea wanfala hasband and waef mekem wea God hapi long hem?
13 Tingim samting wea Henry and Suzanne duim. Tufala barava trustim promis bilong God hao evriwan wea aftarem Kingdom firstaem bae kasem help from God. (Matthew 6:33) So winim wei for tufala evriwan waka for peim haos wea kostim staka selen, tufala chus for garem simpol haos mekem olketa garem moa taem for duim olketa spiritual samting witim tufala dota bilong olketa. (Hebrews 13:15, 16) Wanfala gud fren bilong olketa no minim why nao tufala disaed for duim olsem. Hem sei long Suzanne: “Sapos iu laekem haos wea naes winim diswan, iu mas willing for waka hard.” Bat Henry and Suzanne savve finis hao wei for putim Jehovah firstaem bae mekem olketa garem ‘gudfala laef distaem and laef olowe long future.’ (1 Timothy 4:8; Titus 2:12) Taem tufala dota bilong olketa big, tufala strong for duim preaching waka full taem. Evriwan insaed long famili no tingim olketa missim eni gud samting; bat olketa kasem staka gud samting long wei for mekem “datfala really laef” olsem main goal bilong olketa.—Philippians 3:8; 1 Timothy 6:6-8.
No ‘Iusim World Evribit’
14. Wanem nogud samting nao savve kasem iumi sapos iumi forgetim goal bilong iumi?
14 Bat hem danger samting sapos iumi forgetim goal bilong iumi and no hol strong long “datfala really laef.” Maet datwan mekem ‘wari and richfala samting and olketa samting long laef wea pipol laekem tumas for pullim iumi.’ (Luke 8:14) Wei for barava laek kasem olketa material samting and “for wari tumas abaotem living” savve mekem iumi busy for duim samting long disfala world. (Luke 21:34, footnote) Sorre nao, from samfala busy tumas for aftarem riches diswan mekem olketa “lusim faith and mekem olketa seleva for kasem staka trabol,” and tu, hem spoelem wei wea olketa fren gud witim Jehovah. Staka nogud samting kamaot taem man hem no ‘hol strong long hope for laef olowe’!—1 Timothy 6:9, 10, 12; Proverbs 28:20.
15. Wanem gud samting nao wanfala famili kasem taem olketa ‘no iusim world evribit’?
15 Paul talem hao “olketa wea iusim olketa samting long world shud no iusim evribit.” (1 Corinthians 7:31) Keith and Bonnie followim datfala advaes. Keith hem sei: “Mi kamap wanfala Jehovah’s Witness bifor mi finisim skul for kamap dentist. Bat mi mas disaed sapos mi bae duim staka waka and kasem staka selen or chus for no waka evriday. Mi savve hao wei for duim staka waka bae affectim worship bilong mifala for God, so mi disaed for waka samfala day nomoa mekem mi garem moa taem for helpem waef bilong mi and faevfala dota bilong mifala long spiritual wei and mekem mifala fren gud tugeta. Nomata plande taem mifala no garem extra selen for nara samting, mifala lane for iusim selen long wisefala wei, and mifala evritaem kasem need bilong mifala. Evriwan long famili fren gud tugeta and barava hapi. Gogo, mifala evriwan join insaed long full-taem ministry. Distaem, evri dota bilong mitufala marit, and thrifala garem olketa pikinini. Famili bilong olketa tu hapi from olketa gohed for duim will bilong Jehovah olsem main samting long laef bilong olketa.”
Putim Will Bilong God Firstaem Long Laef Bilong Iu
16, 17. Hu nao olketa insaed Bible wea garem savve, bat wanem nao olketa duim wea mekem iumi rememberim olketa?
16 Bible storyim example bilong olketa wea putim will bilong God firstaem long laef bilong olketa and olketa wea no duim datwan. Olketa wea young, olo, wea garem difren kastom, and from difren living savve lane from olketa example hia. (Romans 15:4; 1 Corinthians 10:6, 11) Nimrod buildim olketa bigfala taon, bat Jehovah no laekem datwan. (Genesis 10:8, 9) Nomata olsem, staka narawan showimaot gudfala example. Tingim Moses. Bignem wea hem garem long Egypt hem no important long hem. Bat hem tinghae long olketa spiritual privilege wea hem kasem “olsem samting wea garem hae price winim olketa richfala samting bilong Egypt.” (Hebrews 11:26) Masbi Luke hem helpem Paul and olketa narawan wea garem sik bikos hem wanfala doctor. Bat barava best samting wea Luke hem duim for helpem olketa narawan hem nao for preach and wei wea hem raetem tufala buk insaed long Bible. Pipol no ting long Paul olsem man wea savve tumas abaotem Law, bat olsem wanfala missionary and “wanfala aposol for olketa nation.”—Romans 11:13.
17 Iumi no ting long David olsem wanfala komanda bilong army or man wea savve pleim music instrument and raetem olketa song, bat olsem “man wea [God] lovem from heart bilong hem.” (1 Samuel 13:14) Nomata Daniel hem waka for gavman long Babylon, iumi ting long hem olsem wanfala profet wea loyal long Jehovah. Esther hem wanfala queen long Persia, bat iumi rememberim hem olsem woman wea showimaot faith and fasin for no fraet. Peter, Andrew, James, and John waka olsem olketa gudfala fisherman, bat iumi ting long olketa olsem olketa aposol bilong Jesus. And best example hem Jesus. Iumi no ting long hem olsem “datfala carpenter,” bat “datfala Christ.” (Mark 6:3; Matthew 16:16) Nomata evriwan hia garem savve, olketa material samting, or hae position, olketa luksavve hao main samting olketa mas duim long laef bilong olketa hem for servem God winim wei for aftarem samting long world. Olketa savve hao best samting olketa savve duim wea bae mekem olketa satisfae hem for worshipim God and fraet long hem.
18. Wanem nao wanfala young Christian disaed for duim long laef bilong hem, and gogo, wanem nao hem luksavve long hem?
18 Gogo, Seung Jin wea iumi storyim finis hem luksavve long datwan tu. Hem sei: “Mi disaed for duim samting long laef wea showimaot mi dedicate long God, winim wei for waka olsem doctor, teacher, or for duim art. Distaem mi serve long ples wea needim olketa Bible teacher and mi helpem pipol for duim samting wea bae mekem olketa kasem laef olowe. Bifor mi tingse wei for duim ministry full taem bae no mekem mi satisfae. Bat distaem laef hem barava interesting winim enitaem bifor taem mi waka hard for showimaot olketa gudfala fasin and teachim pipol wea garem olketa difren kastom. Mi luksavve hao best samting wea bae mekem iumi satisfae hem for duim will bilong Jehovah.”
19. Wanem nao iumi need for duim for barava satisfae long laef?
19 Jehovah blessim iumi olketa Christian long wei for givim iumi savve wea sevem laef bilong pipol and hope for kasem salvation. (John 17:3) So iumi mas no “acceptim kaenfala fasin bilong God wea iumi no fit for kasem and long semtaem no tingim why nao iumi kasem datwan.” (2 Corinthians 6:1) Bat iumi shud iusim laef bilong iumi each day for praisem Jehovah. Iumi mas gohed for teachim pipol disfala savve wea mekem olketa barava hapi distaem and wea lead go long laef olowe. Taem iumi duim olsem, bae iumi luksavve hao toktok bilong Jesus hem tru, wea sei: “Moa hapi kamaot from wei for givim samting winim wei for kasem samting.” (Acts 20:35) And tu, bae iumi barava satisfae long laef.
[Footnote]
a Mifala changem samfala nem.
Waswe, Iu Savve Explainim?
• Wanem nao best samting iumi savve duim long laef?
• Why nao hem no wise for aftarem olketa material samting?
• Wanem nao “datfala really laef” wea God promisim?
• Hao nao iumi savve iusim laef bilong iumi for duim will bilong God?
[Piksa long page 20]
Olketa Christian mas mekem olketa sakrifaes wea God hapi long hem