Waswe, Iu Remember?

Waswe, iu enjoyim olketa Wastaoa wea iu readim insaed olketa month wea go pas finis? Sapos olsem, trae for ansarem olketa kwestin long daon:

• Wanem nao maet wanfala Christian savve duim taem hem taed saed long feeling and long spiritual saed?

Iumi need for luksavve long samting wea mekem iumi feel taed. Bae hem barava gudfala samting sapos iumi lukluk long olketa samting wea iumi duim and garem, and aotem evri hevi wea no important. Iumi savve markem olketa goal wea fitim living bilong iumiseleva. Wei for lukaftarem health bilong iumi long spiritual saed hem important and witim diswan iumi shud prea long God evriday and ting raonem samting.—8/15, page 23-6.

• Why nao Olketa Jehovah’s Witness sei datfala namba 144,000 hem wanfala really namba?

Bihaen aposol John herem datfala namba 144,000, hem lukim “wanfala big crowd, wea no eni man savve kaontem.” (Revelation 7:4, 9) Sapos datfala namba 144,000 hem tokpiksa nomoa, then samting wea John talem antap bae no garem mining nao. Jesus storyim olketa wea bae rul witim hem olsem wanfala “smolfala sekson.” (Luke 12:32)—9/1, page 30.

• Why nao wanfala Israelite savve salem long wanfala man from difren kantri wanfala animal wea dae finis wea olketa no aotem blood bilong hem?

Wanfala man from difren kantri or from difren ples wea no kamap wanfala niu follower, hem no stap anda long Law. So hem olraet for wanfala Israelite for givim or salem olketa animal olsem long hem. (Deuteronomy 14:21) Bat, wanfala niu follower hem stap anda long Law and hem bae no kaikaim meat bilong animal wea olketa no aotem blood bilong hem. (Leviticus 17:10)—9/15, page 26.

• Wanem nao biomimetics, and why nao maet olketa Christian interest long hem?

Hem wei wea science trae for wakem samting wea copyim olketa design bilong creation. Olsem example, tufala brata, Wilbur and Orville Wright, designim wanfala aeroplane bihaen tufala studyim olketa bigfala bird taem olketa flae. So, biomimetics savve muvim wanfala Christian for givim glory long Creator.—10/1, page 9.

• Hu nao 2 Corinthians 12:2-4 story abaotem, wea go long paradaes?

Olketa verse hia kamap bihaen Paul pruvim hem fit for kamap aposol. From Bible no storyim eni nara man wea go long mek-thri heven, and from Paul nao talem disfala story, luk olsem hem nao man wea lukim datfala vision.—10/15, page 8.

• Olketa wanem fasin nao Jesus garem, wea mekem hem fit evribit for kamap Leader wea God chusim?

Jesus garem fasin for faithful evribit, honest and duim samting long stretfala wei. Hem dedicate evribit long God. Jesus barava tingim pipol and hem willing for waka.—11/1, page 6-7.

• Wea nao bae olketa demon stap long taem bilong datfala wan thousand year rul?

Iumi fit for sei long datfala thousand year wea Christ hem rul, olketa demon bae stap witim Satan long datfala deep hol. (Revelation 20:1-3) Genesis 3:15 profesi abaotem wei for killim snek long hed, wea part long diswan, hem wei wea bae hem stap long datfala deep hol for wan thousand year. Wanfala part long seed bilong hem nao olketa wicked angel, olketa demon. Wei wea olketa demon fraetem datfala deep hol showimaot olketa luksavve bae olketa insaed datwan. (Luke 8:31)—11/15, page 30-1.

• Why nao man shud careful long wei for drinkim alcohol, nomata hem no drink for kamap drunk?

For samfala pipol, hem hard for savve sapos olketa drunk or nomoa nomata taem olketa drinkim staka alcohol. Nomata olsem, gogo maet hem start for depend long alcohol and for “drinkim tumas wine.” (Titus 2:3) Jesus givim warning abaotem “hevi from iufala ova tumas for kaikai and drink.” (Luke 21:34, 35) Tru tumas, man no need for drunk bifor hem feel lesy and laek for sleep saed long body and tu, long spiritual saed.—12/1, page 19-21.