Taem Iumi Askem Jehovah for Helpem Iumi, Hem Herem Iumi
“Jehovah hem lukluk long olketa gudfala pipol, and taem olketa askem hem for helpem olketa, hem herem olketa.”—PS. 34:15.
1, 2. (a) Wanem nao feeling bilong plande pipol distaem? (b) Why nao iumi no sapraes long diswan?
WASWE, iu insaed hard taem distaem? Sapos olsem, hem no iuseleva nomoa. Staka pipol faendem laef hem hard tumas bikos long olketa hevi long disfala nogud world. Long tingting bilong samfala, hem olsem olketa barava no wei nao. Olketa olsem David wea raetem disfala psalm: “Olketa feeling bilong mi dae and hem olsem mi pisis evribit; mi singaot big from mi feel nogud tumas. Distaem heart bilong mi hem pampam fogud and mi no strong nao, and mi no savve lukluk gud tu.”—Ps. 38:8, 10.
2 Iumi Christian no sapraes why laef hem hard tumas distaem. Iumi savve “olketa hard taem wea mekem pipol wari tumas” hem samting wea Jesus sei bae kamap long taem wea hem stap. (Mark 13:8; Matt. 24:3) Long Greek languis, disfala toktok “olketa hard taem wea mekem pipol wari tumas” hem minim barava bigfala pain wea woman kasem taem hem bornem pikinini. Bible talem barava tru samting. Distaem pipol safa tumas from iumi stap long “nogud taem” wea “hard tumas”!—2 Tim. 3:1.
Jehovah Luksavve Long Hard Taem wea Kasem Iumi
3. Wanem nao pipol bilong God barava luksavve long hem?
3 Pipol bilong Jehovah luksavve olketa bae kasem hard taem, and evri samting bae nogud go moa. Iumi no kasem nomoa samting wea evri nara man kasem, bat from iumi worshipim God, ‘enemy bilong iumi Devil’ hem barava laek for spoelem wei wea iumi fren witim God tu. (1 Pet. 5:8) Dastawe maet samfala taem iumi garem semkaen feeling olsem David wea sei: “Nogud toktok bilong olketa hem mekem heart bilong mi olsem hem pisis nao, and hem no savve gud bak moa. And mi weitim eniwan for sorre long mi, bat no eniwan kam; and mi weitim eniwan for kam strongim mi, bat nomoa tu”!—Ps. 69:20.
4. Taem iumi kasem hard taem, wanem nao bae strongim iumi?
4 Taem David hem tok olsem, waswe, hem tingse hem barava no wei nao? Nomoa. Tingim nara toktok bilong hem long datfala psalm: “Jehovah hem herem olketa wea poor, and bae hem no ting daonem olketa bilong hem wea stap olsem prisoner.” (Ps. 69:33) Maet samfala taem iumi feel olsem prisoner bikos olketa hard taem wea kasem iumi no savve aot from iumi. Luk olsem olketa narawan no minim samting wea kasem iumi, and maet datwan hem tru. Nomata olsem, taem iumi tingim hao Jehovah hem minim evribit olketa hard samting wea kasem iumi, datwan bae strongim iumi olsem hem strongim David.—Ps. 34:15.
5. King Solomon hem savve long wanem samting?
5 Son bilong David, Solomon, hem storyim diswan taem olketa dedicatem temple long Jerusalem. (Readim 2 Chronicles 6:29-31.) Hem askem Jehovah for herem prea bilong man wea story long Hem abaotem “trabol and hard taem wea kasem hem.” Wanem nao God bae duim taem olketa man olsem prea long hem? Solomon savve God bae herem prea bilong olketa and duim samting for helpem olketa tu. Why nao olsem? Bikos hem savve wanem nao insaed “heart bilong olketa man.”
6. Wanem nao iumi savve duim taem iumi wari, and why nao olsem?
6 Iumi tu savve prea long Jehovah abaotem “trabol and hard taem” wea kasem iumi. From iumi savve hem lovem iumi and hem savve long hard taem wea kasem iumi, datwan hem strongim iumi. Aposol Peter hem luksavve long diswan taem hem sei: “Torowem evri wari bilong iufala long hem, bikos hem tingim iufala.” (1 Pet. 5:7) Jehovah hem interest tumas long evri samting wea kasem iumi. Jesus story abaotem love wea Jehovah showim taem hem sei: “Pipol savve salem tufala smol bird for lelebet selen nomoa, iaman? Nomata olsem, Dadi bilong iufala bae savve sapos wanfala long olketa hem foldaon long graon. Iufala mas savve, hem kaontem finis evri hair long hed bilong iufala. So no fraet. Iufala nao barava important winim plande bird.”—Matt. 10:29-31.
Askem Jehovah for Helpem Iu
7. Taem iumi kasem hard taem, iumi savve Jehovah bae duim wanem?
7 Taem iumi kasem olketa hard taem, iumi savve Jehovah hem fit for helpem iumi and hem laek for duim datwan. “God hem sef ples bilong iumi and hem mekem iumi strong. Hem redi for helpem iumi long olketa taem bilong trabol.” (Ps. 34:15-18; 46:1) Wanem nao God duim for helpem iumi? Tingim samting wea 1 Corinthians 10:13 hem talem: “God hem duim wanem hem promisim, and bae hem no letem eni samting traem iufala wea iufala no fit for winim. Bat taem eni samting hem traem iufala, bae hem mekem wei for iufala gohed strong and no givap.” Maet Jehovah changem samfala samting for mekem hard taem wea kasem iumi hem finis, or maet hem helpem iumi for gohed strong long datwan. Nomata wanem, Jehovah bae helpem iumi.
8. Wanem nao iumi savve duim for kasem help from God?
8 Wanem nao iumi savve duim for kasem help from God? Tingim disfala advaes wea iumi storyim finis: “Torowem evri wari bilong iufala long hem.” Diswan hem olsem iumi givim go nao evri wari bilong iumi long Jehovah. Iumi trae for no tingim moa datwan bat iumi letem hem nao for lukaftarem iumi. (Matt. 6:25-32) For duim olsem iumi mas hambol and no depend long strong and tingting bilong iumiseleva. Taem iumi hambol and “putim iumiseleva long hand bilong God,” datwan showimaot iumi luksavve hao iumi man nomoa. (Readim 1 Peter 5:6.) And tu, diswan bae helpem iumi for feisim eni samting wea God letem for kasem iumi. Nomata iumi laekem hard samting wea kasem iumi for kwiktaem finis, iumi luksavve Jehovah bae helpem iumi long taem wea barava fitim and long wei wea fitim.—Ps. 54:7; Isa. 41:10.
9. Wanem hard samting nao kasem David wea hem needim help from Jehovah?
9 Tingim disfala toktok bilong David long Psalm 55:22: “Torowem hevi bilong iu long Jehovah, and hem nao bae strongim iu. Hem bae no letem gudfala man for seksek.” David raetem datwan taem hem kasem barava hard taem. (Ps. 55:4) Olketa sei David raetem disfala psalm taem son bilong hem Absalom plan for aotem David and for mekem hemseleva nao kamap king. Ahithophel hem man wea David barava trustim, bat hem tu join insaed long disfala nogud plan. David mas ranawe go long Jerusalem bikos olketa laek killim hem dae. (2 Sam. 15:12-14) Nomata David kasem olketa hard taem olsem, hem depend long God, and God hem helpem hem.
10. Wanem nao iumi mas duim taem iumi kasem olketa hard taem?
10 Hem barava important for prea long Jehovah abaotem eni hard samting wea kasem iumi, olsem David hem duim. Readim samting wea aposol Paul encouragem iumi for duim. (Readim Philippians 4:6, 7.) Hao nao wei for prea strong olsem savve helpem iumi? “Peace bilong God wea winim savve bilong [iumi] bae protectim heart and tingting bilong [iumi] thru long Christ Jesus.”
11. Long wanem wei nao “peace bilong God” savve protectim heart and tingting bilong iumi?
11 Waswe, bae God aotem datfala hevi bikos iu prea long hem? Maet hem bae duim datwan. Bat iumi mas luksavve hao Jehovah no evritaem ansarem prea bilong iumi followim wanem iumi tingim. Nomata olsem, sapos iumi prea datwan bae helpem iumi for garem gudfala tingting and for no letem olketa hard samting for spoelem iumi. “Peace bilong God” savve daonem wari bilong iumi. Hem bae protectim heart and tingting bilong iumi, olsem army hem protectim wanfala taon from olketa enemy. And tu, diswan bae mekem iumi garem gudfala tingting and no fraet, and hem savve stopem iumi for duim samting wea iumi no tingting gud raonem firstaem.—Ps. 145:18.
12. Wanem tokpiksa nao iumi savve tingim wea helpem iumi for no wari?
12 Taem iumi kasem olketa hard taem, wanem nao savve helpem iumi for no wari? Tingim wanfala tokpiksa wea fitim diswan. Wanfala wakman hem garem boss wea nating kaen. Wantaem wakman hia garem chance for talemaot tingting bilong hem long man wea ownim datfala company, wea hem kaenfala man and savve tingim narawan. Man hia talem datfala wakman hem luksavve long samting wea boss hia hem duim and klosap nao bae hem sakem datfala boss. Datwan bae mekem wakman hia feel hao? From hem savve klosap nao man wea ownim company bae sakem datfala boss, datwan helpem wakman hia for gohed nomoa nomata hem mas feisim samfala hard taem yet witim datfala boss. Sem samting tu, Jehovah hem savve long samting wea kasem iumi, and hem promisim hao klosap nao hem bae “aotem ruler bilong disfala world.” (John 12:31) Datwan barava strongim iumi for gohed!
13. Wanem nara samting nao iumi mas duim taem iumi kasem hard taem?
13 Bat waswe, samting wea iumi mas duim nomoa hem for prea long Jehovah? Nomoa. Iumi mas duim samting tu for fitim prea bilong iumi. Taem King Saul talem olketa man for go long haos bilong David for killim hem dae, David hem prea olsem: “Plis God bilong mi, sevem mi from olketa enemy bilong mi; protectim mi from olketa wea kam for faetem mi. Olketa nogud pipol hia savve killim man dae. Plis iu sevem mi from olketa.” (Ps. 59:1, 2) David hem no prea nomoa, bat hem lisin long waef bilong hem and hem ranawe from olketa enemy. (1 Sam. 19:11, 12) Iumi savve prea tu for God givim iumi gudfala tingting for feisim hard samting wea kasem iumi and for duim samting wea savve helpem iumi.—Jas. 1:5.
Samting wea Bae Helpem Iumi for Gohed and No Givap
14. Taem iumi kasem hard taem, wanem nao savve helpem iumi for gohed and no givap?
14 Maet God no aotem kwiktaem olketa hard samting wea kasem iumi. Maet olketa hia gohed for longtaem lelebet. Sapos olsem, wanem nao bae helpem iumi for gohed and no givap? Firstfala samting, taem iumi gohed faithful long Jehovah nomata iumi kasem olketa hard taem, datwan showimaot iumi lovem hem. (Acts 14:22) Tingim toktok wea Satan talem abaotem Job. Hem sei: “Sapos iu no givim eni gud samting long Job, hard tumas for hem worshipim iu! Evritaem nomoa iu protectim hem and famili bilong hem and evri samting wea hem garem. Iu blessim evri samting wea hem duim, and iu givim hem staka animal tumas. Bat sapos iu tekem evri samting wea hem garem, bae hem barava tok nogud long iu!” (Job 1:9-11) From Job hem faithful long God, hem showimaot datfala toktok bilong Satan hem barava no tru. Taem iumi gohed and no givap long olketa hard samting wea kasem iumi, iumi tu savve showimaot Satan hem man for laea. Taem iumi duim olsem, datwan hem strongim hope bilong iumi and wei wea iumi trustim God.—Jas. 1:4.
15. Olketa story bilong hu nao savve strongim iumi?
15 Mek-tu samting, tingim hao “semkaen wei for safa hem kasem full sekson bilong olketa brata bilong [iumi] long world.” (1 Pet. 5:9) Tru tumas, “evri samting wea traem [iumi] hem samting wea traem olketa narafala man tu.” (1 Cor. 10:13) Taem iumi ting raonem samting wea kasem olketa narawan and no tingim nomoa olketa hard samting wea kasem iumi, datwan savve strongim iumi and mekem iumi no fraet. (1 Thess. 1:5-7; Heb. 12:1) Tingim olketa wea iu savve long olketa and hao olketa gohed strong nomata olketa kasem hard taem. Waswe, iu lukluk long olketa buk bilong iumi and readim olketa laef story bilong olketa wea kasem semkaen samting wea iu kasem? Olketa story hia savve barava strongim iu for gohed.
16. Long wanem wei nao God strongim iumi taem iumi kasem olketa hard taem?
16 Mek-thri samting, tingim hao Jehovah hem “Dadi bilong iumi wea savve sorre long pipol and wea showimaot mercy, and hem God wea savve helpem evriwan. Hem savve helpem iumi long evri difren kaen hard taem. Taem nara pipol kasem eni hard taem, iumi tu savve helpem olketa long sem wei wea God hem helpem iumi.” (2 Cor. 1:3, 4) So hem olsem God standap saed long iumi for helpem and strongim iumi “long evri difren kaen hard taem” wea kasem iumi. From diswan, iumi fit for helpem nara pipol long “eni hard taem” wea kasem olketa. Paul seleva hem kasem olketa hard taem and God hem helpem hem.—2 Cor. 4:8, 9; 11:23-27.
17. Hao nao Bible savve helpem iumi taem iumi kasem olketa hard taem?
17 Mek-foa samting, iumi garem Bible wea “hem gud for teachim man, for givim kaonsel, for stretem evri samting, and for givim discipline long raeteous wei, mekem man bilong God hem fit evribit, barava redi for duim evri gudfala waka.” (2 Tim. 3:16, 17) Word bilong God hem no mekem iumi “fit” and “redi for duim evri gudfala waka” nomoa, bat hem mekem iumi “fit evribit” and “barava redi” for olketa hard taem wea kasem iumi. Long Greek languis, datfala toktok “fit evribit” hem minim “for garem evri samting.” Maet long bifor olketa iusim disfala toktok for storyim wanfala boat wea garem evri samting man hem needim for gogo long sea, or wankaen machine wea waka gud tumas. Semsem tu, Jehovah givim iumi Bible wea helpem iumi long evri samting wea kasem iumi. So hem gud for garem tingting olsem: “Sapos God letem eni hard samting for kasem mi, hem bae helpem mi for gohed and no givap.”
God Sevem Iumi From Evri Hard Taem wea Kasem Iumi
18. Wanem samting nao iumi savve tingim wea bae helpem iumi for gohed and no givap?
18 Mek-faev samting, iumi mas tingim evritaem hao klosap nao Jehovah bae aotem evri hevi wea kasem olketa man. (Ps. 34:19; 37:9-11; 2 Pet. 2:9) Taem datwan hem happen, God bae no aotem nomoa evri hard samting wea kasem iumi distaem, bat bae hem givim iumi chance for kasem laef olowe long paradaes earth or long heven witim Jesus.
19. Wanem nao bae helpem iu for gohed and no givap?
19 Bat long distaem iumi need for feisim yet olketa nogud samting wea kamap long world. Iumi laekem tumas for stap long world wea evri samting hia hem finis! (Ps. 55:6-8) No forgetim hao taem iumi gohed and no givap datwan hem showimaot Devil hem man for laea. Taem iumi prea long God and hipap witim olketa brata and sista long kongregeson, and tingim tu hao olketa hia kasem semkaen hard taem olsem iumi, datwan bae strongim iumi. Gohed for iusim Bible, from datwan bae helpem iu for fit evribit and barava redi. No letem eni samting spoelem wei wea iu fren witim ‘God bilong iumi wea savve helpem evriwan.’ No forgetim hao “Jehovah hem lukluk long olketa gudfala pipol, and taem olketa askem hem for helpem olketa, hem herem olketa.”—Ps. 34:15.
Waswe, Iu Savve Long Ansa?
• Wanem nao tingting bilong David abaotem olketa hard samting wea kasem hem?
• King Solomon hem savve long wanem samting?
• Wanem nao savve helpem iumi for feisim eni samting wea Jehovah letem for kasem iumi?
[Piksa long page 13]
Solomon hem savve Jehovah bae duim samting for helpem pipol bilong Hem wea kasem hard taem
[Piksa long page 15]
David prea long Jehovah abaotem hard taem wea kasem hem and hem duim samting tu fitim prea bilong hem