Letem Word Bilong God Leadim Iu
“Toktok bilong iu hem wanfala lamp for leg bilong mi, and wanfala laet for road bilong mi.”—PSALM 119:105.
1, 2. Why nao plande pipol no kasem trufala peace and hapi?
WASWE, enitaem iu askem wanfala man for showim iu stretfala road for followim? Maet iu klosap kasem ples wea iu go for hem, bat iu no barava sure wea nao ples. Or maet iu barava go rong nao. Taem samting olsem happen long iu, wise samting for duim hem for followim toktok bilong man wea savve gud long datfala ples. Hem savve helpem iu for kasem ples wea iu go for hem.
2 For plande thousand year nao olketa man gohed seleva, and no laekem help from God long laef bilong olketa. Bat taem olketa man wea no perfect duim olsem, olketa barava go rong nao. Olketa no savve faendem road wea lead go for kasem trufala peace and hapi. Why nao olketa man no savve kasem datwan? Profet Jeremiah talem disfala toktok winim 2,500 year go finis: “Man wea wakabaot no garem right for chusim seleva gogo bilong hem.” (Jeremiah 10:23) Eniwan wea trae for followim gogo bilong hemseleva and no laek for acceptim help, bae nating hapi nomoa long laef bilong hem. Tru nao, olketa man needim samwan for leadim olketa!
3. Why nao Jehovah God barava fit for leadim olketa man, and wanem nao hem promis for duim?
3 Jehovah God nao barava fit for leadim iumi. Why nao olsem? Bikos hem savve gud long fasin bilong olketa man winim eni narafala man. And hem savve gud long samting wea happen wea mekem olketa man lusim stretfala road and barava go rong. Hem savve tu wanem nao olketa needim for kam bak for followim stretfala road. And tu, from Jehovah nao hem Creator, evritaem hem savve long best samting for iumi. (Isaiah 48:17) Dastawe, iumi savve barava trustim disfala promis bilong hem long Psalm 32:8: “Mi bae mekem iu for garem fasin for luksavve and teachim iu wei wea iu mas followim. Mi bae givim advaes long iu and gohed for lukaftarem iu.” Iumi barava sure hao Jehovah nomoa savve leadim iumi long nambawan wei. Bat hao nao hem duim datwan?
4, 5. Toktok bilong God savve leadim iumi long wanem wei?
4 Wanfala man wea raetem psalm hem prea long Jehovah olsem: “Toktok bilong iu hem wanfala lamp for leg bilong mi, and wanfala laet for road bilong mi.” (Psalm 119:105) Olketa toktok and kaonsel bilong God hem stap long Bible and savve helpem iumi for deal witim olketa hard samting wea maet iumi feisim long laef. Tru nao, taem iumi readim Bible and letem datwan leadim iumi, iumi kasem samting wea Isaiah 30:21 story abaotem taem hem sei: “Ear bilong iufala herem wanfala voice bihaen long iufala wea sei: ‘Diswan nao wei. Wakabaot followim, iufala pipol.’”
5 Tingim tu, hao Psalm 119:105 hem showimaot tufala samting wea Word bilong God savve duim. First samting, hem olsem wanfala lamp for leg bilong iumi. Taem iumi feisim olketa problem long laef evriday, olketa principle long Bible shud leadim iumi for mekem olketa disison wea wise, and missim olketa trap bilong disfala world. Mek-tu samting, kaonsel bilong God hem laet for road bilong iumi, and hem helpem iumi for disaed long wei wea showimaot iumi garem hope for laef olowe long Paradaes wea God promisim. From datfala laet mekem road bilong iumi hem barava klia gud, iumi bae fit for luksavve long gud samting or nogud samting wea bae kamaot from samting iumi chusim. (Romans 14:21; 1 Timothy 6:9; Revelation 22:12) Bae iumi lukim moa samting abaotem hao toktok bilong God wea stap long Bible savve kamap lamp for leg bilong iumi and laet for road bilong iumi.
“Wanfala Lamp for Leg Bilong Mi”
6. Toktok bilong God savve kamap lamp for leg bilong iumi taem iumi feisim olketa wanem samting?
6 Iumi mekem olketa disison evriday. Samfala disison maet luk smol nomoa, bat samfala taem samting savve kamap wea savve testim iumi saed long sex, wei for honest, or wei for no teksaed. For winim olketa test olsem, iumi mas garem ‘fasin for luksavve, mekem iumi luksavve long samting wea stret and samting wea no stret.’ (Hebrews 5:14) Taem iumi kasem stretfala savve long Word bilong God and minim gud olketa principle wea stap insaed long hem, iumi trainim conscience bilong iumi for disaedem samting long wei wea bae mekem Jehovah hapi.—Proverbs 3:21.
7. Storyim wanfala samting wea savve kamap, wea maet mekem wanfala Christian laek kaban witim olketa wakfren bilong hem.
7 Tingim wanfala example. Waswe, iu man wea barava traem best bilong iu for mekem Jehovah hapi? (Proverbs 27:11) Sapos olsem, datwan hem barava gud tumas. Bat tingim sapos samfala wakfren bilong iu laek givim iu ticket for go witim olketa long wanfala plei. Olketa hapi for waka witim iu and olketa laek tekem iu for go hapitaem witim olketa. Maet iu barava tingse olketa gud pipol. Maet olketa showimaot tu samfala gud fasin. Wanem nao bae iu duim? Waswe, bae eni danger stap sapos iu acceptim datfala invitation? Long wanem wei nao Word bilong God savve helpem iu for mekem stretfala disison abaotem diswan?
8. Olketa wanem principle long Bible nao helpem iumi for ting raonem hu nao for iumi kaban witim?
8 Tingim samfala principle long Bible. First principle wea maet iumi tingim, hem 1 Corinthians 15:33 wea sei: “Wei for kaban witim nogud pipol hem spoelem gudfala fasin.” Waswe, wei for followim disfala principle hem minim iu mas barava stap klia from olketa wea no biliv? Bible hem sei nomoa. Aposol Paul hem man wea lovem “evrikaen pipol,” wea insaed diswan hem olketa wea no biliv. (1 Corinthians 9:22) Wanfala main fasin bilong olketa Christian hem for interest long pipol, wea insaed diswan hem olketa wea no biliv tu. (Romans 10:13-15) Tru nao, sapos iumi stap klia from pipol wea maet needim help bilong iumi, hao nao bae iumi followim disfala kaonsel wea sei: “Duim gud samting long evriwan”?—Galatians 6:10.
9. Wanem kaonsel long Bible nao savve helpem iumi for balance long wei for fren witim olketa wakfren bilong iumi?
9 Nomata hem stret for showimaot kaenfala fasin long wanfala wakfren, hem no minim hem stret for iumi kamap barava gud fren bilong hem. Narafala Bible principle stap tu for helpem iumi long diswan. Aposol Paul warnim olketa Christian olsem: “No join tugeta witim olketa wea no biliv.” (2 Corinthians 6:14) Wanem nao mining bilong disfala toktok, “no join tugeta witim”? Long samfala Bible transleison, olketa transleitim datfala toktok olsem “no join witim nara pipol,” “no trae for semsem,” and “no fren witim pipol wea no fitim.” Wanem samting nao mekem wei for fren witim wanfala wakfren hem ova tumas? Wanem nao mekem datfala wei for fren hem no fitim? Word bilong God, Bible, savve helpem iu for savve long diswan.
10. (a) Hao nao Jesus chusim olketa fren bilong hem? (b) Wanem nao olketa kwestin wea savve helpem man for mekem disison wea wise saed long hu nao for hem kaban witim?
10 Tingim example bilong Jesus, wea start long taem wea God creatim olketa man, hem lovem olketa. (Proverbs 8:31) Hem barava fren gud witim olketa follower bilong hem taem hem stap long earth. (John 13:1) Hem garem “feeling” tu for wanfala man wea religion leadim hem long rongfala wei. (Mark 10:17-22) Bat Jesus hem markem tu hu nao hem chus for barava fren gud witim. Hem no fren gud witim pipol wea no interest for duim will bilong Dadi bilong hem. Wantaem Jesus hem sei: “Iufala olketa fren bilong mi sapos iufala duim samting wea mi komandim iufala for duim.” (John 15:14) Maet iu savve waka gud witim samwan long wakples bilong iu. Bat askem iuseleva: ‘Waswe, disfala man or woman hem willing for followim olketa komand bilong Jesus? Waswe, hem laek for lane abaotem datwan wea Jesus talem iumi for worshipim, Jehovah? Waswe, hem followim sem Christian standard saed long fasin wea mi followim?’ (Matthew 4:10) Taem iu herem story bilong olketa wakfren bilong iu and iu evritaem strong for followim standard long Bible, ansa for olketa kwestin hia bae showaot klia.
11. Storyim olketa example bilong samfala samting wea iumi shud letem toktok bilong God for leadim iumi.
11 Plande nara samting kamap wea toktok bilong God savve olsem lamp for leg bilong iumi. Olsem example, wanfala Christian wea no garem waka for selen maet faendem wanfala waka wea hem barava needim. Bat, datfala waka hem tekem tumas taem, and sapos hem acceptim datfala waka hem bae missim samfala Christian meeting and bae hem no tekpart long olketa nara waka wea join witim trufala worship. (Psalm 37:25) Nara Christian maet kasem temptation for lukluk long olketa samting wea no klin wea barava againstim olketa Bible principle. (Ephesians 4:17-19) And maet hem wei bilong nara Christian for kwiktaem feel nogud long wik point bilong olketa nara Christian brata and sista. (Colossians 3:13) Long evri samting hia, iumi shud letem Word bilong God kamap lamp for leg bilong iumi. Tru nao, iumi savve deal witim eni hard samting long laef sapos iumi followim olketa Bible principle. Word bilong God hem “gud for teachim man, for givim kaonsel, for stretem evri samting, and for givim discipline long raeteous wei.”—2 Timothy 3:16.
“Wanfala Laet for Road Bilong Mi”
12. Toktok bilong God hem laet for road bilong iumi long wanem wei?
12 Psalm 119:105 talem tu hao toktok bilong God savve mekem road bilong iumi for barava klia gud. Iumi savve wanem bae happen long future, from Bible storyim mining bilong olketa barava nogud samting wea happen long world and samting wea bae happen bihaen. Tru nao, iumi luksavve iumi long “olketa last day” bilong disfala nogud world. (2 Timothy 3:1-5) Wei wea iumi savve long olketa samting wea klosap for happen shud barava affectim laef bilong iumi distaem. Aposol Peter hem sei olsem: “From evri samting hia bae finis, iufala mas kamap wanem kaen man long holy fasin and waka wea showimaot fasin for lovem God, taem iufala weitim and tingim evritaem day bilong Jehovah!”—2 Peter 3:11, 12.
13. Hao nao wei wea iumi savve world hem klosap for finis shud affectim tingting and laef bilong iumi?
13 Samting wea iumi tingim and laef bilong iumi shud showimaot iumi barava bilivim hao disfala “world and evri samting wea pipol long world laekem hem gogo for finis.” (1 John 2:17) Wei for followim instruction wea kam from Bible bae helpem iumi for mekem olketa disison wea wise for future bilong iumi. Olsem example, Jesus hem sei: “Gohed for aftarem kingdom and raeteous fasin bilong hem firstaem, and iufala bae kasem olketa narafala samting hia.” (Matthew 6:33) Hem barava gud tumas for lukim plande young wan showimaot faith long datfala toktok bilong Jesus long wei for join insaed full-taem ministry! Olketa narawan, wea insaed diswan hem samfala full famili, olketa willing for muv long olketa nara kantri wea needim olketa pablisa for talemaot Kingdom.
14. Hao nao wanfala Christian famili duim moa samting long ministry bilong olketa?
14 Tingim wanfala Christian famili long United States wea muv go long Dominican Republic for serve long wanfala kongregeson long wanfala taon wea garem 50,000 pipol. Datfala kongregeson hem garem samting olsem 130 Kingdom pablisa. Nomata olsem, samting olsem 1,300 nao attendim Memorial bilong dae bilong Christ long April 12, 2006! Datfala field hem barava “redi finis for harvest,” from bihaen faevfala month nomoa, disfala dadi, mami, and boy and gele bilong tufala, olketa conductim 30 Bible study. (John 4:35) Dadi hia hem story olsem abaotem datwan: “Thirti brata and sista nao muv kam for helpem disfala kongregeson. Samting olsem 20 kam from United States, and olketa narawan kam from Bahamas, Canada, Italy, New Zealand, and Spain. Olketa barava interest for duim ministry and datwan barava muvim olketa brata long kongregeson for duim sem samting.”
15. Wanem nao olketa blessing wea iu kasem from iu putim Kingdom firstaem long laef bilong iu?
15 Hem tru, plande no fit for muv long nara kantri wea garem bigfala need. Bat olketa wea fit or wea savve changem living bilong olketa for duim diswan bae kasem plande blessing. And nomata wanem ples iu serve long hem, iu savve kasem hapi taem iu servem Jehovah witim full strong bilong iu. Sapos iu putim Kingdom firstaem long laef bilong iu, Jehovah promis for ‘kapsaetem wanfala blessing long iu go kasem taem wea no eniwan wantem eni samting moa.’—Malachi 3:10.
Gud Samting Iumi Kasem Taem Jehovah Leadim Iumi
16. Wanem gud samting nao iumi kasem taem iumi letem toktok bilong God for leadim iumi?
16 Olsem iumi lukim finis, Word bilong God hem leadim iumi long tufala wei. Hem olsem lamp for leg bilong iumi. Hem helpem iumi for followim stretfala wei and leadim iumi taem iumi mekem olketa disison. And tu, hem laet for road bilong iumi, wea mekem iumi fit for lukim samting wea bae kamap long future. And datwan helpem iumi followim disfala kaonsel bilong Peter: “Redyim mind bilong iufala for waka, no lusim wei for tingting gud; putim hope bilong iufala long kaeness wea man no fit for kasem wea iufala bae kasem taem Jesus Christ hem showaot.”—1 Peter 1:13.
17. Hao nao wei for studyim Bible savve helpem iumi for followim wei wea God hem leadim iumi?
17 Iumi sure hao Jehovah hem leadim iumi. Kwestin nao hem olsem, Waswe, bae iu followim wei wea hem leadim iu? For minim wei wea Jehovah leadim iumi, disaed strong for readim lelebet part long Bible evriday. Ting raonem samting wea iu readim, trae for minim wanem nao will bilong Jehovah abaotem olketa samting, and tingim olketa difren wei wea iu savve iusim datfala information long laef bilong iu. (1 Timothy 4:15) Then, iusim “gudfala tingting” bilong iu taem iu mekem olketa disison long laef bilong iu.—Romans 12:1.
18. Taem iumi letem Word bilong God for leadim iumi, wanem nao olketa blessing wea iumi kasem?
18 Sapos iumi willing, olketa principle long Word bilong God bae teachim and leadim iumi taem iumi mekem olketa disison saed long wanem nao stretfala samting for duim. Iumi barava sure hao toktok bilong Jehovah wea stap long Bible savve mekem “man wea no garem savve hem kamap wise.” (Psalm 19:7) Taem iumi letem Bible for leadim iumi, iumi garem klinfala conscience and iumi satisfae from iumi mekem Jehovah hapi. (1 Timothy 1:18, 19) Sapos iumi letem toktok bilong God for leadim iumi evriday, reward wea Jehovah bae givim iumi hem nao laef olowe.—John 17:3.
Waswe, Iu Remember?
• Why nao hem important for letem Jehovah God leadim iumi?
• Long wanem wei nao toktok bilong God savve kamap lamp for leg bilong iumi?
• Long wanem wei nao toktok bilong God savve kamap laet for road bilong iumi?
• Hao nao wei for studyim Bible savve helpem iumi for followim wei wea God leadim iumi?
[Piksa long page 15]
Wanem samting nao mekem wei for kaban witim man wea no biliv hem no wise?
[Piksa long page 16]
Olketa wea duim will bilong Jehovah nao olketa barava gud fren bilong Jesus
[Olketa Piksa long page 17]
Waswe, laef bilong iumi showimaot iumi putim Kingdom firstaem?