Fren Gud Witim God
‘Followim Olketa Wei Bilong God’
WEI for kaen. Wei for kea. Wei for forgive. Love. Sorre nao, distaem iumi no lukim staka pipol wea showimaot olketa wei hia. Waswe long iu? Iu enitaem trae hard for showimaot olketa gudfala wei bat tingse iu no fit for duim? Maet iu tingse from iu kasem samfala problem olsem olketa nogud wei bilong iu bifor nao mekem hard for iu showimaot olketa gudfala wei bilong God. Bat Bible lanem iumi hao God luksavve iumi fit for garem olketa gudfala wei.
Bible talem olketa trufala Christian olsem: “From iufala olketa pikinini wea God lovem, iufala followim olketa wei bilong hem.” (Ephesians 5:1) Nambawan toktok hia showim hao God barava trustim olketa wea worshipim hem. Long wanem wei? Jehovah God wakem man for olsem Hem, for garem olketa wei bilong Hem. (Genesis 1:26, 27) Diswan minim God wakem iumi for garem olketa wei wea semsem olsem Hem.a Dastawe, taem Bible talem olketa Christian for ‘followim olketa wei bilong God,’ hem olsem Jehovah seleva nao sei long olketa: ‘Mi trustim iufala. Mi savve nomata iufala garem samfala problem, iufala savve kamap olsem mi long wei wea fitim.’
Wanem nao samfala wei bilong God wea iumi savve followim? Olketa verse wea stap klosap nao talem. Taem Paul talem iumi for followim God, hem iusim disfala toktok “from.” Toktok hia hem for join witim verse wea kam firstaem, wea storyim wei for kaen, kea, and for forgive. (Ephesians 4:32; 5:1) Then, long verse bihaen verse wea Paul sei for followim olketa wei bilong God, hem talem olketa Christian for aftarem wei for garem trufala love. (Ephesians 5:2) For tok stret, taem iumi laek for showimaot wei for kaen, barava kea, forgivim narawan, and showimaot love, iumi followim nambawan man, Jehovah God.
Why nao iumi laek for olsem God? Lukim toktok bilong Paul for strongim iumi, wea sei olsem: “From iufala olketa pikinini wea God lovem, iufala followim olketa wei bilong hem.” Tru nao, toktok hia barava spesol. Jehovah tingim olketa wea worshipim hem olsem pikinini wea hem barava lovem. Olsem wanfala smol boy wea laek tumas for followim dadi bilong hem, olketa trufala Christian tu trae hard for olsem Dadi bilong olketa long heven.
Jehovah no forcem pipol for followim hem. Nomoa nao, hem letem iumiseleva nao for disaed. Iu nao disaed sapos iu bae kamap man for followim God or nomoa. (Deuteronomy 30:19, 20) Bat no forgetim diswan, iu fit for showimaot olketa wei bilong God. Bat for iu followim olketa wei bilong God, iu mas firstaem savve long olketa wei bilong hem. Bible savve helpem iu for savve long olketa wei bilong God wea mekem staka million pipol for laek savve long hem and followim olketa wei bilong hem.
[Footnote]
a Colossians 3:9, 10 helpem iumi luksavve hao, for olsem God hem minim for iumi garem olketa wei olsem hem. Olketa wea laek for mekem God hapi mas werem olsem kaleko ‘datfala niu wei,’ wea ‘kamap niu fitim wei bilong Datwan [God] wea wakem.’