No Separatem Samting wea God Joinim Tugeta

“Tufala hia no tufala body, bat wanfala body nomoa. Dastawe, no eni man mas separatem samting wea God joinim tugeta.”—MATTHEW 19:6.

1, 2. Why nao tufala wea marit bae kasem problem samfala taem olsem Bible hem talem?

TINGIM sapos iu redi for tekem trak for go farawe. Waswe, bae iu kasem eni problem taem iu followim road? Hem barava krangge samting for tingse no eni problem bae kamap! Olsem example, maet taem iu gogo weather hem kamap nogud tumas so iu mas careful and draev isisi long road. Gogo, maet trak hem kasem problem wea iu no savve fixim wea mekem iu mas stop for go lukaotem help. Waswe, taem iu kasem olketa problem olsem, bae iu tingse disfala gogo bilong iu hem wanfala mistek and iu shud lusim nao datfala trak long saed road? Nomoa. Taem iu go farawe, iu savve iu bae kasem olketa problem and iu mas iusim gudfala tingting for deal witim olketa.

² Marit hem olsem tu. Olketa problem mas kamap and hem krangge samting for tufala wea redi for marit for tingse tufala bae hapi evritaem. Long 1 Corinthians 7:28, Bible talem stret hao olketa hasband and waef bae kasem “trabol long body bilong olketa.” Why nao olsem? Hem bikos olketa hasband and waef no perfect, and iumi stap long olketa “nogud taem wea hard for deal witim.” (2 Timothy 3:1; Romans 3:23) Dastawe, nomata tufala wea fitim each other, and wea mature long spiritual wei bae olketa kasem problem samfala taem.

3. (a) Wanem tingting nao plande pipol long world garem abaotem marit? (b) Why nao olketa Christian waka hard for keepim marit bilong olketa?

³ Long world distaem, first samting wea samfala wea marit laek for duim taem olketa kasem problem, hem for finisim marit bilong olketa. Long plande kantri, namba bilong olketa wea divorce hem barava go ap. Bat olketa tru Christian deal witim olketa problem winim wei for kwiktaem divorce. Why nao olsem? Bikos olketa ting long marit olsem wanfala holy present from Jehovah. Jesus hem sei olsem abaotem olketa hasband and waef: “No eni man mas separatem samting wea God joinim tugeta.” (Matthew 19:6) Hem tru hao hem no isi evritaem for followim disfala principle wea Jesus hem talem. Olsem example, plande taem olketa relative and nara pipol wea givim advaes wea no luksavve long olketa Bible principle, bae encouragem olketa hasband and waef for separate or divorce long wei wea no fitim olketa Bible principle.a Bat olketa Christian savve hem moabeta for keepim marit winim wei for kwiktaem finisim marit. Tru nao, hem important hao start from taem iumi just marit nomoa, iumi mas disaed strong for followim samting wea Jehovah talem, and no followim tingting bilong nara pipol.—Proverbs 14:12.

Winim Olketa Problem

4, 5. (a) Wanem nao olketa problem wea olketa wea marit mas stretem? (b) Why nao olketa principle long Word bilong God savve barava helpem olketa wea marit, nomata taem olketa kasem problem?

⁴ Long evri marit, need hem stap samfala taem for stretem olketa problem. Plande taem, datwan hem for stretem olketa smol samting wea tufala no agree long hem. Bat, long samfala marit, maet olketa big problem nao kamap wea savve spoelem faondeson bilong datfala marit. Maet samfala taem iu need for go askem help long wanfala Christian elder wea marit for longtaem finis. Nomata olsem, diswan no minim marit bilong iu hem nogud. Olketa samting hia hem showimaot nomoa hao hem important for barava followim olketa principle long Bible for deal witim olketa problem wea kamap long marit.

⁵ Jehovah hem savve wanem iumi needim for garem gudfala marit winim eni nara man, from hem nao Creator bilong olketa man and hem nao startim marit arrangement. Waswe, bae iumi lisin and obeyim kaonsel wea stap long Word bilong hem? Sapos iumi duim olsem bae iumi barava kasem gud samting. Jehovah sei olsem long pipol bilong hem long bifor: “Bae hem gud tumas for iufala, sapos iufala barava obeyim olketa komandment bilong mi! Peace bilong iufala bae kamap olsem wanfala river, and raeteous fasin bilong iufala olsem olketa wave long sea.” (Isaiah 48:18) Wei for followim olketa instruction wea stap long Bible savve barava helpem olketa wea marit. Firstaem bae iumi lukluk long samfala kaonsel long Bible for olketa hasband.

“Gohed for Lovem Olketa Waef Bilong Iufala”

6. Wanem kaonsel nao hem stap long Bible for olketa hasband?

⁶ Leta wea aposol Paul raetem for olketa long Ephesus hem garem kliafala instruction for olketa hasband. Paul hem raet olsem: “Olketa hasband, gohed for lovem olketa waef bilong iufala, long sem wei wea Christ tu hem lovem kongregeson and givim laef bilong hem for datwan. Long disfala wei olketa hasband mas lovem waef bilong olketa olsem body bilong olketa seleva. Man wea lovem waef bilong hem lovem hemseleva, from no eni man heitim body bilong hemseleva; bat hem feedim and lukaftarem, olsem Christ hem duim long kongregeson. Each wan long iufala mas lovem waef bilong hem olsem hemseleva.”—Ephesians 5:25, 28, 29, 33.

7. (a) Wanem nao main faondeson bilong wanfala Christian marit? (b) Hao nao olketa hasband savve gohed lovem waef bilong olketa?

⁷ Paul hem no storyim evri problem wea maet kamap midolwan olketa hasband and waef. Bat hem storyim wanfala main important samting for stretem olketa problem, wea hem main faondeson long evri Christian marit, hem nao love. Tru nao, love kamap sixfala taem insaed long olketa verse antap. Lukim tu hao Paul talem olketa hasband: “Gohed for lovem olketa waef bilong iufala.” Tru tumas, Paul luksavve hao long firstaem hem isi for lovem narawan, bat hem no isi for gohed keepim datfala sem love. Datwan hem barava tru long “olketa last day” distaem from plande pipol “lovem olketa seleva” and “no savve agree.” (2 Timothy 3:1-3) Wei wea pipol showimaot olketa nogud fasin olsem hem spoelem plande marit distaem, bat hasband wea garem love for waef bilong hem bae no letem olketa selfish wei bilong world for affectim tingting bilong hem and samting wea hem duim.—Romans 12:2.

Hao Nao Iu Savve Lukaftarem Gud Waef Bilong Iu?

8, 9. Wanfala Christian hasband savve provaed for waef bilong hem long olketa wanem wei?

⁸ Sapos iu wanfala Christian hasband, hao nao iu savve againstim olketa selfish feeling and showimaot iu lovem waef bilong iu? Olsem iumi lukim finis long toktok bilong Paul for olketa long Ephesus, Paul showimaot tufala samting wea iu need for duim—for provaedem olketa samting wea waef hem needim, and lukaftarem hem olsem iu lukaftarem body bilong iuseleva. Long wanem wei nao iu savve provaed for waef bilong iu? Wanfala wei hem for provaedem olketa material samting wea waef bilong iu hem needim. Paul raet long Timothy olsem: “Tru nao, sapos eniwan no provaed for olketa relative bilong hem, and especially for olketa klos famili member, hem showimaot hem lusim biliv bilong hem and hem moa worse winim man wea no biliv long God.”—1 Timothy 5:8.

⁹ Bat wei for provaedem kaikai, kaleko, and haos hem no inaf. Why nao olsem? From nomata hasband savve provaedem staka material samting, maet hem fail for satisfaem spiritual need and feeling bilong waef bilong hem. Hem mas lukaftarem need bilong hem long olketa samting hia. Hem tru, plande Christian hasband olketa barava busy long olketa waka long kongregeson. Bat nomata hasband garem bigfala responsibility long kongregeson, datwan no minim hem shud ting smol long responsibility wea God givim hem olsem famili hed. (1 Timothy 3:5, 12) Wanfala Watchtower magasin hem story abaotem datwan samfala year go finis. Hem sei: “For fitim samting wea Bible hem talem, olketa savve ‘start long haos bilong olketa seleva for duim shepherding waka.’ Sapos wanfala elder ting smol long famili bilong hem, hem savve lusim privilege wea hem garem olsem elder.”b Hem klia tumas, iu mas provaedem olketa samting wea waef bilong iu needim saed long feeling, material samting, and barava important samting nao hem spiritual saed bilong hem.

Hao Nao Iu Savve Showimaot Iu Lovem Waef Bilong Iu?

10. Wanem nao wanfala hasband savve duim for showimaot hem lovem waef bilong hem?

¹⁰ Sapos iu lovem waef bilong iu bae iu barava lukaftarem hem gud. Staka wei hem stap wea iu savve duim diswan. Wanfala wei hem for iu spendem taem seleva witim waef bilong iu. Sapos iu no duim diswan, gogo maet hem no showimaot love for iu and no kaen long iu. Tingim tu hao tingting bilong iu abaotem haomas taem iu need for spendem witim waef bilong iu, maet hem no kasem wanem waef bilong iu hem laekem. So hem no inaf for talem hem nomoa iu lovem hem. Bat waef bilong iu mas feelim datfala love wea iu garem for hem. Paul hem sei: “Hem gud for evri man gohed for lukaotem, no gudfala samting for hemseleva, bat for narafala man.” (1 Corinthians 10:24) From iu lovem waef bilong iu, iu laek for mek sure iu minim gud really need bilong hem.—Philippians 2:4.

11. Hao nao wei wea wanfala hasband deal witim waef bilong hem savve affectim wei wea hem fren witim God and kongregeson?

¹¹ Narafala wei for showimaot iu lovem waef bilong iu hem for kaen long hem long toktok and samting wea iu duim. (Proverbs 12:18) Paul story olsem for olketa long Colossae: “Iufala olketa hasband, gohed for lovem waef bilong iufala and no kros tumas long olketa.” (Colossians 3:19) Wanfala buk hem sei maet narafala wei for transleitim last part bilong datfala toktok bilong Paul, hem olsem: “No ting long hem olsem haosgele” or “no mekem hem slave.” Hasband wea raf nomata long haos or front long nara pipol, hem barava showimaot hem no lovem waef bilong hem. Wei wea hem raf long waef bilong hem savve affectim wei wea hem fren witim God. Aposol Peter hem story long olketa hasband olsem: “Gohed for stap long sem wei witim [olketa waef bilong iufala] fitim savve. Honorim olketa from olketa woman and olketa no strong olsem man, bikos olketa tu bae kasem laef wea man no fit for kasem olsem iufala, mekem diswan no stopem prea bilong iufala.”c—1 Peter 3:7.

12. Wanem nao wanfala Christian hasband savve lanem from wei wea Jesus deal witim Christian kongregeson?

¹² No tingse waef bilong iu bae lovem iu nomata wanem samting iu duim. Gohed for talem hem iu lovem hem. Jesus showimaot example for olketa Christian hasband long wei wea hem deal witim Christian kongregeson. Hem showimaot kaenfala fasin and wei for forgive, nomata olketa aposol bilong hem gohed for showimaot olketa nogud fasin. Dastawe, Jesus savve sei long olketa narawan: “Kam long mi, . . . from mi garem kwaet fasin and mi hambol long heart, and iufala bae faendem samting for strongim soul bilong iufala.” (Matthew 11:28, 29) Wanfala Christian hasband wea followim example bilong Jesus, savve deal witim waef bilong hem long sem wei wea Jesus hem deal witim kongregeson. Wanfala man wea barava lovem waef bilong hem, and showimaot diswan long toktok and samting wea hem duim bae mekem waef bilong hem barava hapi.

Olketa Waef wea Followim Olketa Bible Principle

13. Wanem nao olketa principle wea stap long Bible wea savve helpem olketa waef?

¹³ Bible hem garem tu olketa principle wea savve helpem olketa waef. Ephesians 5:22-24, 33 hem sei: “Olketa waef mas stap anda long olketa hasband bilong olketa from diswan nao Lord hem laekem, bikos hasband hem hed bilong waef bilong hem olsem Christ tu hem hed bilong kongregeson, wea hem nao man wea sevem disfala body. Tru nao, olsem kongregeson hem stap anda long Christ, olketa waef tu mas stap anda long olketa hasband long evri samting. . . . Waef mas garem bigfala respect for hasband bilong hem.”

14. Why nao datfala principle long Bible for stap anda hem no daonem olketa woman?

¹⁴ Long hia, Paul hem mekhae long wei for stap anda and for showimaot respect. Waef hem kasem reminder for stap anda long hasband bilong hem. Diswan hem followim arrangement bilong God. Evriwan wea stap long heven and earth garem samwan wea olketa stap anda long hem. Nomata Jesus tu hem stap anda long Jehovah God. (1 Corinthians 11:3) Tru nao, bae hem moa isi for wanfala waef for stap anda long hasband bilong hem sapos hasband showimaot wei wea hem hed long balance wei.

15. Wanem nao samfala kaonsel insaed long Bible for olketa waef?

¹⁵ Paul hem talem tu hao waef “mas garem bigfala respect for hasband bilong hem.” Wanfala Christian waef shud showimaot “kwaet and hambol fasin,” and bae hem no laek raoa witim hasband or bighed for followim tingting bilong hemseleva. (1 Peter 3:4) Waef wea lovem God bae waka hard for lukaftarem famili bilong hem and honorim hasband bilong hem wea hed long famili. (Titus 2:4, 5) Hem bae no tok daonem hasband bilong hem, and hem no duim eni samting for mekem pipol no respectim hasband bilong hem. Hem bae waka hard tu for sapotim olketa samting wea hasband bilong hem disaedem.—Proverbs 14:1.

16. Wanem nao olketa Christian waef savve lanem from example bilong Sarah and Rebekah?

¹⁶ For wanfala Christian woman garem kwaet and hambol fasin, datwan no minim hem no savve talemaot tingting bilong hemseleva or tingting bilong hem no important. Olketa woman long bifor wea lovem God olsem Sarah and Rebekah, no hol bak for talemaot tingting bilong olketa, and Bible hem showimaot hao Jehovah hapi long samting wea olketa duim. (Genesis 21:8-12; 27:⁠46–28:4) Olketa Christian waef tu savve talemaot feeling bilong olketa. Bat olketa shud duim long wei wea showimaot wei for tingim feeling bilong hasband bilong olketa, no long wei for daonem olketa. Taem olketa duim olsem, olketa bae faendem hao olketa hasband bilong olketa bae willing for lisin long tingting bilong olketa.

Promis wea Tufala Mas Keepim

17, 18. Wanem nao samfala wei wea olketa hasband and waef savve againstim wei wea Satan trae for distroem marit bilong olketa?

¹⁷ Marit hem samting for olowe. Dastawe, hasband and waef shud barava laek for duim samting for keepim gud marit bilong tufala. Wei for no story gud tugeta savve mekem problem kamap moa worse and savve spoelem marit. Taem problem kamap, plande taem olketa hasband and waef no savve story gud, and datwan mekem wei for feel nogud long each other hem kamap. Samfala laek for finisim marit bilong olketa, maet long wei for laekem nara difren wan moa. Jesus talem disfala warning: “Eniwan wea gohed lukluk long wanfala woman for barava laekem hem, hem duim adultery finis witim hem insaed long heart bilong hem.”—Matthew 5:28.

¹⁸ Aposol Paul givim disfala kaonsel long evri Christian and olketa wea marit tu: “Iufala savve kros, bat no sin; no letem sun go daon taem iufala kros yet, and no givim eni chance long Devil.” (Ephesians 4:26, 27) Satan, datfala main enemy bilong iumi, hem trae for mekius long wei wea olketa Christian no agree long samfala samting. No letem hem winim iu! Taem olketa problem kamap, duim research insaed long olketa Bible pablikeson for lukim tingting bilong Jehovah wea stap long Bible abaotem datfala samting. Story tugeta long kwaet and honest wei. Duim samting for followim olketa standard bilong Jehovah wea iu savve finis long hem. (James 1:22-25) Disaed strong insaed long marit bilong iutufala for gohed wakabaot witim God, and no letem eniwan, or eni samting for separatem samting wea hem joinim tugeta!—Micah 6:8.

[Olketa Footnote]

Waswe, Iu Remember?

• Why nao olketa problem savve kamap nomata long olketa Christian marit?

• Long wanem wei nao hasband savve showimaot hem lovem and lukaftarem waef bilong hem?

• Wanem nao waef savve duim for showimaot hem garem bigfala respect for hasband bilong hem?

• Hasband and waef savve strongim marit promis bilong tufala long wanem wei?

[Piska on page 20]

Hasband shud lukaftarem waef saed long material samting and spiritual saed tu

[Piksa long page 21]

Man wea lovem waef bilong hem bae mekem waef bilong hem hapi

[Piksa long page 23]

Olketa Christian waef savve talem feeling bilong olketa long wei wea showimaot respect