Olketa Problem Bilong Man Klosap for Finis!
“WEI for duim samting for helpem nara pipol bae no really help sapos hem no garem saport bilong politik and hem no part long wanfala bigfala plan wea bae deal witim olketa main samting wea kosim olketa raoa. Samting wea kamap evritaem showimaot hao wei for givim help nomoa kanduit finisim olketa problem wea really kamap from politik.”—The State of the World’s Refugees 2000.
Nomata planti givim bigfala help, olketa problem bilong olketa man go ahed for grow moa big. Waswe, politik savve finisim for olowe olketa problem olsem? For tok stret, nomoa. Sapos olsem, wea moa bae iumi savve faendem ansa? Long wanfala important part long start bilong leta bilong hem for olketa Christian long Ephesus, aposol Paul explainim hao God bae finisim evri problem bilong olketa man. Hem showimaot tu organization wea God bae iusim for duim diswan—wanfala organization wea bae deal witim olketa samting wea kosim olketa problem wea spoelem iumi distaem. Hem gud for iumi ting raonem toktok bilong Paul. Datfala toktok hem stap long Ephesians 1:3-10.
“For Hipimap Moa Evri Samting Tugeta Insaed Long Christ”
Aposol hia hem sei purpose bilong God hem for garem samting wea hem kolem “wanfala administration [or wei for lukaftarem olketa samting] long barava taem wea hem markem finis.” Wanem nao diswan minim? Hem minim God markem finis wanfala taem for duim samting for “hipimap moa evri samting tugeta insaed long Christ, olketa samting long heven and olketa samting long earth.” (Ephesians 1:10) Tru nao, God start finis for iusim wanfala arrangement wea bae mekem evri samting long heven and long earth for wan mind anda long rul bilong hem. Interesting samting hem samting wea Bible savveman J. H. Thayer hem sei abaotem disfala toktok, ‘for hipimap moa.’ Hem sei: “For hipimap tugeta moa for hemseleva . . . evri samting and man (wea sin mekem olketa no wan mind) for kam tugeta olsem olketa wea fren tugeta long Christ.”
Taem iumi tingim hao wei for wan mind hem lus long firstaem, iumi luksavve hao God need for duim diswan. Long start bilong history bilong olketa man, firstfala parents bilong iumi, Adam and Eve, followim Devil Satan for againstim God. Olketa laek garem independence long wei for disaedem seleva samting wea hem gud and samting wea hem nogud. (Genesis 3:1-5) For fitim justice bilong God, hem aotem olketa from famili bilong hem and olketa lusim tu wei for fren witim hem. Olketa mekem evri man for no perfect and from datwan iumi kasem olketa barava nogud samting distaem.—Romans 5:12.
Letem Wicked Fasin Stap for Lelebet Taem
Samfala maet ask olsem: ‘Why nao God letem olketa for duim datwan? Why nao hem no iusim nambawan paoa bilong hem and forcem olketa for duim will bilong hem, then bae hem stopem evri pain and wei for safa wea kasem iumi distaem?’ Iumi maet laek for ting olsem. Bat wanem nao diskaen wei for iusim bigfala maeti paoa bae really pruvim? Waswe, iu tinghae or appruvim eniwan wea kwiktaem nomoa stopem eniwan wea againstim hem just bikos hem garem paoa for duim datwan? Nomoa nao.
Olketa wea bighed hia no really challengem olmaeti paoa bilong God. Olketa challengem raet bilong hem for rul and sapos wei wea hem rul hem stret or nomoa. So for stretem olketa important kwestin hia for olowe, Jehovah letem olketa wea hem wakem for rulim olketa seleva for lelebet taem. (Ecclesiastes 3:1; Luke 21:24) Kasem end bilong datfala taem, hem bae duim samting for tekem bak moa wei for rul evribit ovarem earth. Kasem datfala taem bae hem barava klia hao wei bilong hem for rul nomoa bae givim peace, hapi and gud living for olowe long olketa wea stap long earth. Long datfala taem evriwan long world wea kosim olketa problem bae finis for olowe.—Psalm 72:12-14; Daniel 2:44.
“Bifor World Hem Start”
Jehovah plan finis for duim evri samting hia long taem bifor kam. Paul sei “bifor world hem start.” (Ephesians 1:4) Datwan no minim bifor creation bilong earth or Adam and Eve. World long datfala taem hem “gud tumas,” and bighed fasin hem no start yet. (Genesis 1:31) Wanem “world” nao aposol Paul hem minim? World bilong olketa pikinini bilong Adam and Eve—wanfala world bilong olketa man wea sin and no perfect and wea garem chance for samwan baem olketa bak. Bifor eni pikinini born, Jehovah savve finis hao nao hem bae duim samting for provaedem help for olketa pikinini bilong Adam wea hem savve baem bak.—Romans 8:20.
Bat, diswan no minim Sovereign bilong universe mas deal witim samting long sem wei olsem olketa man duim. From olketa man luksavve hao maet eni emergency kamap, olketa mekem enikaen difren plan for deal witim datwan. Olmaeti God hem no olsem, hem markem nomoa purpose bilong hem and then hem fulfillim. Nomata olsem, Paul explainim hao Jehovah disaed for duim olketa samting wea bae helpem olketa man for olowe. Wanem nao olketa samting hia?
Hu Nao Bae Givim Help?
Paul explainim hao olketa disaepol bilong Christ wea spirit anointim garem wanfala spesol waka for help for stretem olketa problem wea kamap from sin bilong Adam. Paul sei Jehovah “chusim iumi wea garem wan mind witim [Christ],” for rul witim Jesus long Kingdom bilong hem long heven. Paul go ahed for explainim diswan moa, taem hem sei hao Jehovah “appointim iumi firstaem for adoptim iumi thru long Jesus Christ olsem olketa son bilong hemseleva.” (Ephesians 1:4, 5) Tru, Jehovah no chusim or appointim firstaem olketa man wanwan. Bat, hem appointim wanfala sekson bilong olketa faithful pipol wea lovem hem for share witim Christ for stretem evri nogud samting wea olketa man kasem from samting wea Devil Satan witim Adam and Eve duim.—Luke 12:32; Hebrews 2:14-18.
Hem wanfala nambawan samting! Taem hem challengem olmaeti rul bilong God long firstaem, Satan givim idea hao olketa man wea God creatim garem wik point—sapos olketa kasem bigfala hevi or temptation, bae olketa againstim rul bilong God. (Job 1:7-12; 2:2-5) Long wanfala nambawan wei wea hem showimaot “nambawan kaeness bilong hem wea man no fit for kasem,” Jehovah God gogo showim hao hem trustim pipol long earth wea hem creatim taem hem adoptim samfala from famili bilong Adam wea sin for kamap spiritual pikinini bilong hem. Hem bae tekem olketa wea insaed disfala smolfala sekson for go serve long heven. For wanem?—Ephesians 1:3-6; John 14:2, 3; 1 Thessalonians 4:15-17; 1 Peter 1:3, 4.
Aposol Paul sei olketa hia wea God adoptim olsem olketa son, garem “raet wea semsem witim Christ” insaed Kingdom bilong hem long heven. (Romans 8:14-17) Olsem olketa king and priest, olketa bae share for mekem olketa man kamap free from wei for pain and safa wea iumi kasem distaem. (Revelation 5:10) Tru nao, “evri creation go ahed for krae tugeta and feel pain tugeta kam kasem distaem.” Bat, klosap nao olketa son bilong God wea hem chusim bae joinim Jesus Christ and duim samting, and evri man wea obey “bae kamap free from slave bilong wei for rotten and kasem nambawan freedom olsem olketa pikinini bilong God” moa.—Romans 8:18-22.
“Kamap Free Thru Long Ransom”
Hem mekem iumi fit for kasem evri samting hia taem hem duim datfala bigfala and nambawan samting—datfala ransom sakrifaes bilong Jesus Christ, wea showimaot kaeness bilong God wea man no fit for kasem for disfala world wea hem savve baem bak. Paul raet olsem: “Thru long [Jesus Christ], iumi kamap free thru long ransom from blood bilong datwan, yes, wei for forgivim olketa sin bilong iumi, fitim nambawan kaeness bilong hem wea man no fit for kasem.”—Ephesians 1:7.
Jesus Christ nao main man for duim waka insaed olketa purpose bilong God. (Hebrews 2:10) Ransom sakrifaes bilong hem provaedem faondeson saed long law wea mekem Jehovah fit for adoptim samfala pikinini bilong Adam for go insaed famili bilong hem long heven and for helpem olketa man for kamap free from sin bilong Adam, and long semtaem no eniwan bae lusim trust long olketa law and principle bilong Hem. (Matthew 20:28; 1 Timothy 2:6) Jehovah duim olketa samting long wei wea saportim raeteous fasin bilong hem and wea fitim wei bilong perfect justice.—Romans 3:22-26.
“Holy Secret” Bilong God
For planti thousand year, God no barava showimaot hao hem bae fulfillim purpose bilong hem for disfala earth. Long first century C.E., “hem talemaot long [olketa Christian] disfala holy secret bilong will bilong hem.” (Ephesians 1:9) Paul and olketa nara anointed Christian minim klia nambawan waka wea Jesus Christ kasem insaed purpose bilong God. Olketa start for luksavve tu long spesol waka bilong olketa olsem olketa wea garem raet wea semsem witim Christ long Kingdom bilong hem long heven. (Ephesians 3:5, 6, 8-11) Tru nao, datfala Kingdom gavman wea stap long hand bilong Jesus Christ and olketa wea rul witim hem, hem nao samting wea God bae iusim for mekem peace kamap for olowe no just long heven bat long earth tu. (Matthew 6:9, 10) Thru long diswan, Jehovah bae mekem earth for kamap fitim purpose bilong hem long firstaem.—Isaiah 45:18; 65:21-23; Acts 3:21.
Appointed taem bilong hem for tek akson for finisim from disfala earth evrikaen wei for daonem man and wei wea no followim justice hem klosap for kam. Bat Jehovah really startim datfala wei for gud bak moa long Pentecost 33 C.E. Hao nao hem duim? Taem hem start for hipimap “olketa samting long heven,” hem nao olketa wea bae rul witim Christ long heven. Insaed diswan hem olketa Christian long Ephesus. (Ephesians 2:4-7) Long taem bilong iumi distaem, Jehovah go ahed for hipimap “olketa samting long earth.” (Ephesians 1:10) Thru long preaching waka evriwea long world, hem go ahed for mekem evri nation savve long gud nius bilong Kingdom gavman bilong hem wea Jesus Christ nao lukaftarem. Hem go ahed for hipimap olketa wea willing for lisin long ples wea olketa savve kasem spiritual protection and healing. (John 10:16) Klosap nao, long wanfala klin paradaes earth, bae olketa free evribit from evrikaen wei for no followim justice and wei for safa.—2 Peter 3:13; Revelation 11:18.
Olketa wea trae for givim help duim “planti samting for muv ahed wea mekem man sapraes” long wei for helpem olketa man wea kasem hevi. (The State of the World’s Children 2000) Nomata olsem, samting wea bae mekem man sapraes fogud hem samting wea Jesus Christ and olketa wea bae rul witim hem long Kingdom gavman long heven klosap for duim. Olketa bae deal evribit witim olketa main samting wea kosim olketa raoa and evri nara nogud samting wea iumi kasem. Bae olketa finisim evri problem bilong olketa man.—Revelation 21:1-4.
[Olketa Piksa long page 4]
Wei wea olketa man trae for givim help no finisim olketa problem bilong olketa man
[Piksa long page 6]
Ransom sakrifaes bilong Christ mekem olketa man kamap free from sin bilong Adam
[Piksa long page 7]
Man savve faendem spiritual protection and healing distaem
[Olketa Piksa long page 7]
Klosap nao, thru long Messiah Kingdom, bae man free evribit from olketa problem