Jehovah Hipimap Famili Bilong Hem
‘Mi encouragem iufala for keepim wei for wan mind wea holy spirit helpem iufala for garem.’—EPH. 4:1, 3.
WANEM NAO ANSA BILONG IU?
Wanem nao God duim for “organizem olketa samting” mekem plan bilong hem kam tru?
Hao nao iumi savve followim datfala kaonsel ‘for keepim wan mind wea holy spirit helpem iumi for garem’?
Wanem nao bae helpem iumi for kaen long narawan?
1, 2. Wanem nao plan bilong Jehovah for olketa man and disfala earth?
TAEM iu herem datfala word “famili,” wanem nao iu tingim? Waswe, iu tingim pipol wea iu lovem and wea iu hapi for stap witim? Waswe, iu tingim wei wea famili savve waka tugeta for kasem wanfala goal? Waswe, iu tingim famili olsem sef ples wea iu growap long hem, lanem samting, and wea iu feel free for story? Maet iu tingim olketa samting hia sapos iu kam from famili wea stap gud and hapi. Jehovah nao startim famili. (Eph. 3:14, 15) And plan bilong hem for evriwan long heven and long earth kamap wanfala famili wea feel sef, trustim each other, and garem wan mind.
2 Bihaen Adam and Eve sin, olketa man no part long famili bilong God nao. Bat plan bilong Jehovah hem no change. Plan bilong hem for earth kamap paradaes wea fulap witim olketa pikinini bilong Adam and Eve, bae hem kam tru. (Gen. 1:28; Isa. 45:18) Hem redyim evri samting for mekem plan bilong hem kam tru. Long buk bilong Ephesus, Paul storyim olketa samting hia wea Jehovah redyim, and datfala buk mekhae long wei for garem wan mind. Bae iumi storyim samfala scripture long datfala buk wea bae helpem iumi for sapotim plan bilong Jehovah for evriwan long heven and earth garem wan mind.
GOD ORGANIZEM OLKETA SAMTING
3. Wanem nao God duim wea Ephesus 1:10 hem story abaotem, and hu nao olketa wea hem hipimap firstaem?
3 Moses sei olsem long olketa Israelite: “God bilong iumi Jehovah, hem wanfala Jehovah.” (Deut. 6:4) Evri samting wea Jehovah duim join witim plan bilong hem. Long taem wea God markem, hem start for “organizem olketa samting” for redyim olketa long heven and long earth for kamap wanfala famili wea garem wan mind. (Readim Ephesus 1:8-10.) Jehovah duim tufala samting for organizem diswan. First samting wea God duim nao, hem start for hipimap olketa anointed Christian for laef long heven, wea olketa bae gohed for waka anda long Jesus Christ wea hem Hed bilong olketa. Diswan hem start long Pentecost 33 C.E., taem Jehovah anointim olketa Christian wea bae rul witim Christ long heven. (Acts 2:1-4) Long tingting bilong God, olketa anointed wan hia raeteous and fit for kasem laef bikos long ransom sakrifaes bilong Christ. Olketa luksavve olketa nao “olketa pikinini bilong God,” wea hem adoptim.—Rom. 3:23, 24; 5:1; 8:15-17.
4, 5. Wanem nao mek-tu samting wea God duim for organizem olketa samting?
4 Mek-tu samting wea God duim nao, hem hipimap olketa wea bae stap long Paradaes long earth anda long Kingdom bilong Messiah. Olketa first wan wea bae stap long Paradaes nao hem datfala “big crowd.” (Rev. 7:9, 13-17; 21:1-5) Then taem Christ hem rul for wan thousand year, plande billion pipol bae laef bak for stap long earth witim datfala big crowd. (Rev. 20:12, 13) Long datfala taem bae iumi garem staka chance for showimaot iumi wan mind witim olketa narawan! Long end bilong datfala wan thousand year, “evri samting long earth,” wea hem nao datfala big crowd witim olketa wea laef bak, bae kasem wanfala last test. Then evriwan wea winim datfala test bae kamap olketa “pikinini bilong God” long disfala earth.—Rom. 8:21; Rev. 20:7, 8.
5 Distaem Jehovah gohed for redyim olketa anointed Christian for laef long heven and olketa nara sheepsheep for stap long earth. Bat hao nao iumi wanwan savve showimaot iumi sapotim wanem God duim for organizem olketa samting hia?
‘KEEPIM WAN MIND WEA HOLY SPIRIT HELPEM IUMI FOR GAREM’
6. Wanem nao Bible talem wea showimaot olketa Christian mas hipap tugeta?
6 Bible hem sei olketa Christian mas hipap tugeta. (1 Cor. 14:23; Heb. 10:24, 25) Bat for iumi garem wan mind hem no minim for hipap long wanfala ples nomoa witim nara pipol, olsem pipol duim long market or taem olketa go lukluk sports. Iumi savve garem wan mind taem iumi followim wanem Jehovah teachim long iumi, and letem holy spirit bilong God for helpem iumi garem olketa gudfala wei.
7. Hao nao iumi savve followim datfala kaonsel ‘for keepim wan mind wea holy spirit helpem iumi for garem’?
7 From iumi garem faith long ransom sakrifaes bilong Christ, Jehovah ting long iumi olsem iumi raeteous. Hem ting long olketa anointed Christian olsem olketa son bilong hem, and olketa nara sheepsheep olsem olketa fren bilong hem. Bat from iumi stap yet long disfala world, samfala taem bae iumi garem problem witim olketa narawan. (Rom. 5:9; Jas. 2:23) Dastawe Bible sei for iumi mas patient witim narawan. So wanem nao iumi mas duim for wan mind witim olketa brata and sista bilong iumi? Iumi mas lane for “evritaem hambol, garem naesfala wei, [and] no raf.” Paul hem sei iumi mas waka hard for ‘stap gud tugeta, and keepim wan mind wea holy spirit helpem iumi for garem.’ (Readim Ephesus 4:1-3.) Iumi savve followim disfala kaonsel taem iumi letem spirit bilong God mekem iumi for garem olketa gudfala wei. Olketa gudfala wei hia bae helpem iumi for stretem eni problem wea iumi garem witim narawan, and datwan bae mekem iumi for garem wan mind. Bat taem man duim olketa nogud samting, datwan savve kosim wei for divaed.
8. Hao nao olketa nogud samting wea man laek for duim hem kosim wei for divaed?
8 Hao nao “olketa nogud samting wea man laek for duim” hem kosim wei for divaed? (Readim Galatia 5:19-21.) Wei for durong hem separatem man wea duim datwan from Jehovah and kongregeson. Adultery hem mekem famili barava safa and savve separatem olketa pikinini from dadi and mami, and savve separatem partner wea no guilty from hasband or waef bilong hem. Wei for no klin hem spoelem wei wea man savve wan mind witim olketa wea lovem hem, and wei wea hem wan mind witim God. Olsem example, sapos iu laek iusim glue for mekem tufala samting pas tugeta, tufala samting hia mas klin for hem pas gud tugeta. Man wea nating shame for duim rong samting hem no obeyim and nating respectim olketa law bilong God. Olketa nara nogud samting wea man laek for duim tu separatem pipol from God and from olketa narawan. Jehovah heitim olketa samting hia.
9. Olketa wanem kwestin nao helpem iumi for luksavve sapos iumi traem best for garem wan mind witim olketa brata and sista?
9 Hem gud for iumi wanwan tingim olketa kwestin hia: ‘Waswe, mi traem best for garem wan mind witim olketa brata and sista? Wanem nao mi savve duim taem mi garem problem witim narawan? Waswe, mi storyim datwan long staka narawan mekem olketa savve saedem mi long datfala problem? Waswe, mi expectim olketa elder nao for stretem datfala problem mekem mi no need for go story witim hem for stretem datwan? And sapos mi savve narawan hem feel nogud long mi, waswe, mi stap farawe from hem mekem mi no need for stretem datwan witim hem?’ Sapos iumi duim eniwan long olketa samting hia, waswe, iumi showimaot iumi sapotim plan bilong Jehovah for hipimap famili bilong hem for stap anda long Christ?
10, 11. (a) Why nao hem important tumas for iumi stap gud witim olketa brata and sista bilong iumi? (b) Wanem nao iumi savve duim for garem peace and kasem blessing from Jehovah?
10 Jesus hem sei: “Tingim sapos iu tekem sakrifaes bilong iu go long altar. Waswe sapos taem iu kasem long there iu tingim hao brata bilong iu hem feel nogud long iu? Firstaem, leavim sakrifaes bilong iu long there and go stretem datfala problem witim brata bilong iu. Bihaen, go bak moa long altar and givim datfala sakrifaes. Kwiktaem for stretem eni problem.” (Matt. 5:23-25) James hem sei: “Pipol wea stap gud witim narawan mekem peace hem stap, and from diswan olketa duim samting wea raeteous.” (Jas. 3:17, 18) So iumi no savve gohed duim samting wea raeteous sapos iumi no stap gud witim narawan.
11 Olsem example, long samfala kantri wea war hem gohed bifor, pipol no savve growim kaikai long staka area bikos olketa bomb stap yet long graon. Taem wanfala bomb hem bosta, pipol les for iusim datfala land and diswan minim staka pipol long vilij no garem waka, and olketa big taon savve short long kaikai tu. Long sem wei, sapos samfala wei bilong iumi mekem iumi no stap gud witim olketa brata and sista, iumi olsem olketa bomb wea stap yet long graon, and datwan savve stopem iumi for no grow long spiritual wei. Bat sapos iumi willing for forgivim olketa narawan and duim gudfala samting for olketa, iumi evriwan bae garem peace and Jehovah bae blessim iumi.
12. Hao nao olketa elder savve helpem iumi for garem wan mind?
12 Nara samting tu, ‘olketa man wea olsem present,’ wea minim olketa elder, savve helpem kongregeson for gohed garem “wan mind long faith.” (Eph. 4:8, 13) Taem olketa elder waka witim iumi long kongregeson and givim iumi kaonsel from Bible, olketa helpem iumi for lusim oldfala wei bilong iumi and garem niufala wei. (Eph. 4:22-24) Taem olketa elder givim kaonsel long iu, iu mas ting long datwan olsem Jehovah nao hem iusim olketa for redyim iu for stap long niu world. And taem iufala olketa elder givim kaonsel, iufala shud duim datwan long wei wea showimaot iufala laek for helpem narawan.—Gal. 6:1.
“IUFALA MAS KAEN LONG NARAWAN”
13. Man wea no followim kaonsel long Ephesus 4:25-32 hem duim wanem?
13 Ephesus 4:25-29 storyim samfala samting wea iumi shud no duim. Iumi mas no laea, kros, lesy, or talem eni nogud toktok. Bat iumi mas talem nomoa gudfala toktok wea encouragem narawan. Man wea no followim kaonsel hia hem mekem pipol divaed and datwan bae “mekem holy spirit bilong God feel sorre,” bikos holy spirit nao mekem pipol for garem wan mind. (Eph. 4:30) For iumi stap gud and wan mind witim narawan, iumi mas followim nara samting wea Paul talem tu. Hem sei: “Lusim kaen wei for feel nogud and laek pei bak. Lusim tu, wei for kros, singaot, tok nogud, and evri samting wea savve spoelem narawan. Bat iufala mas kaen long narawan and sorre long hem. Iufala mas willing for forgivim narawan olsem God tu hem willing for forgivim iufala bikos long Christ.”—Eph. 4:31, 32.
14. (a) Why nao Paul hem sei iumi “mas kaen long narawan”? (b) Wanem nao bae helpem iumi for kaen long olketa narawan?
14 Paul hem sei iumi “mas kaen long narawan.” Datfala toktok bilong Paul showimaot maet samfala taem iumi no kaen long narawan, so iumi mas lane for kaen long narawan evritaem. Iumi mas lane for tingim feeling bilong narawan and no tingim iumiseleva nomoa. (Phil. 2:4) Maet samfala taem iumi laek for talem samting wea bae mekem olketa narawan laf or mekem olketa tingse iumi kleva, bat sapos datwan hem no kaen, iumi shud no talem. Sapos iumi tingting firstaem bifor iumi talem eni samting, datwan bae helpem iumi for kaen long olketa narawan.
TEACHIM FAMILI FOR SHOWIMAOT LOVE AND RESPECT
15. Ephesus 5:28 showimaot olketa hasband mas olsem Christ long wanem wei?
15 Bible hem comparem Christ and kongregeson witim wanfala hasband and waef. Example bilong Christ helpem hasband for luksavve hem shud leadim, lovem, and lukaftarem waef bilong hem. Example bilong Christ helpem waef tu for luksavve hem shud stap anda long hasband bilong hem. (Eph. 5:22-33) Taem Paul sei: “Olketa hasband mas lovem waef bilong olketa long sem wei wea olketa lovem body bilong olketa seleva,” datwan showimaot olketa hasband mas duim wanem? (Eph. 5:28) Long verse 25 and 26, Paul sei ‘Christ lovem kongregeson and givim laef bilong hem for datwan’ and hem iusim “toktok bilong God” for mekem kongregeson klin. So hasband garem responsibility for helpem evriwan long famili for fren gud witim Jehovah. Taem hasband duim olsem hem sapotim plan bilong Jehovah for mekem evriwan long heven and earth garem wan mind anda long Christ.
16. Wanem gud samting nao bae kamaot sapos dadi and mami lukaftarem gud pikinini bilong olketa?
16 Dadi and mami mas no forget Jehovah nao givim responsibility long olketa for lukaftarem pikinini bilong olketa. Bat sorre samting nao, long world distaem staka pipol “no garem love insaed long famili.” (2 Tim. 3:1, 3) Staka dadi no willing for lukaftarem pikinini bilong olketa, and diswan savve spoelem olketa pikinini and mekem olketa feel sorre. Bat Paul hem sei: “Iufala olketa dadi mas no mekem olketa pikinini bilong iufala for kros, bat lukaftarem olketa gud long wei for stretem and trainim olketa followim samting wea Jehovah talem.” (Eph. 6:4) Insaed long famili nao olketa pikinini lane for showimaot love and respectim olketa wea garem paoa. Dadi and mami wea lanem pikinini for duim olsem, tufala sapotim plan bilong Jehovah for mekem evriwan garem wan mind. Dadi and mami shud showimaot tufala lovem pikinini bilong olketa. So tufala mas kontrolem kros bilong tufala, and no shout long pikinini or tok nogud long olketa. Long wei olsem, tufala teachim olketa pikinini for showimaot love and respectim olketa wea garem paoa. Datwan redyim olketa pikinini for stap long niu world bilong God.
17. Wanem nao iumi mas duim for againstim Devil?
17 Iumi mas luksavve Devil no laekem eniwan for worshipim God and bae hem traem best for stopem iumi for no duim samting wea God laekem. Staka pipol long world duim wanem Satan laekem taem olketa divorce, stap tugeta bat no marit, and sei hem olraet nomoa for man maritim man and woman maritim woman. Bat iumi no garem sem tingting or duim sem samting olsem pipol long world. Iumi followim example bilong Christ. (Eph. 4:17-21) Dastawe iumi need for “werem evri samting for faet wea God givim” mekem iumi savve againstim Devil and olketa demon bilong hem.—Readim Ephesus 6:10-13.
“MEKEM HEM WEI BILONG IUFALA FOR SHOWIMAOT LOVE”
18. Wanem nao main samting wea bae mekem iumi for garem wan mind?
18 Main samting wea bae mekem iumi for garem wan mind nao hem love. Iumi lovem “wanfala Lord” bilong iumi, Jesus Christ, “wanfala God” bilong iumi, Jehovah, and iumi lovem evri brata and sista tu from heart bilong iumi. Dastawe iumi traem best for stap gud tugeta and garem wan mind. (Eph. 4:3-6) Jesus hem prea abaotem diskaen love. Hem sei: “Mi prea for olketa hia, and mi prea tu for pipol wea showimaot faith long mi bikos long samting wea olketa hia talem. Dadi, mi prea for evriwan hia savve wan mind, olsem iumi tufala wan mind, mekem olketa tu savve wan mind witim iumi. . . . Mi talemaot nem bilong iu long olketa and bae mi gohed for duim olsem, mekem olketa savve showimaot love long nara pipol olsem iu tu showimaot love long mi and mekem mi savve wan mind witim olketa.”—John 17:20, 21, 26.
19. Wanem nao bae iu traem best for duim?
19 Maet iumi stragol for changem wanfala nogud wei bilong iumi wea mekem iumi no stap gud witim olketa narawan. Sapos olsem, love shud mekem iumi prea olsem man wea raetem psalm, wea sei: “Helpem mi for fraet long nem bilong iu long full heart bilong mi.” (Ps. 86:11) Iumi mas againstim Devil taem hem trae for separatem iumi from Dadi bilong iumi long heven and olketa brata and sista bilong iumi. And from ‘iumi olketa pikinini bilong God wea hem lovem,’ iumi mas traem best for ‘followim wei bilong hem, and mekem hem wei bilong iumi for showimaot love’ long famili, long ministry, and long kongregeson.—Eph. 5:1, 2.
[Piksa long page 29]
Hem leavim sakrifaes bilong hem long altar, and hem go stretem problem witim brata bilong hem
[Piksa long page 31]
Dadi and mami, teachim pikinini bilong iu for showimaot respect