Study Seleva wea Redyim Iumi for Kamap Gudfala Teacher
“Ting raonem evri samting hia; tingting strong long olketa, mekem wei wea iu muv ahed savve showaot klia long evriwan. Lukluk gud evritaem long iuseleva and teaching bilong iu.”—1 TIMOTHY 4:15, 16.
1. Wanem nao tru saed long taem and wei for study seleva?
BIBLE talem long Ecclesiastes 3:1: “Evriting garem wanfala taem wea set finis.” Datwan hem barava tru saed long wei for study seleva. Planti faendem hem hard for ting raonem olketa spiritual samting sapos taem or ples hem no fitim. Olsem example, bihaen iu waka hard full day and kaikai gud long evening, waswe, bae iu laek for study, especially sapos iu no garem braet laet and iu taed? Maet nomoa nao. So wanem nao ansa for diswan? Tru nao, iumi mas chusim wanem taem and wea for study witim goal for kasem best samting from hard waka bilong iumi.
2. Planti taem wanem nao hem best taem for study seleva?
2 Planti faendem hao best taem bilong olketa for study hem early long morning taem olketa feel fresh. Olketa narawan iusim lelebet spell midol long day for shortfala study. Lukim wei wea olketa example hia talem wanfala taem for duim important spiritual samting. King David bilong Israel bifor raet olsem: “Long morning mekem mi herem loving-kaeness bilong iu, from mi putim trust bilong mi long iu. Showim long mi wei wea mi mas wakabaot, from mi liftimap soul bilong mi long iu.” (Psalm 143:8) Profet Isaiah showim semkaen wei for tinghae taem hem sei: “Sovereign Lord Jehovah seleva givim mi tongue bilong olketa wea lane finis, mekem mi savve hao for ansarem man wea taed. Hem wekapem long evri morning; hem wekapem ear bilong mi for herem samting olsem man wea lane finis.” Point nao, iumi need for study and story witim Jehovah taem mind bilong iumi wekap gud, nomata wanem taem long day nao datwan.—Isaiah 50:4, 5; Psalm 5:3; 88:13.
3. For kasem gudfala samting from wei for study, wanem nao man needim?
3 Narafala samting saed long wei for duim gudfala study hem nao for iumi shud no chus for sidaon insaed chair wea soft and naes. Bae hem hard tumas for mind stap wekap. Taem iumi study, mind bilong iumi mas wekap, and sapos iumi sidaon long soft chair, bae datwan barava hard. And tu, for study gud and ting raonem samting man needim kwaet ples and no eni samting pullim tingting bilong hem. Sapos iu trae for study taem radio or television on or olketa pikinini go ahed for plei, bae iu no kasem gud samting. Taem Jesus want for ting raonem samting, hem go long wanfala kwaet ples. Hem story tu abaotem wei wea hem gud tumas for faendem wanfala private ples for prea.—Matthew 6:6; 14:13; Mark 6:30-32.
Study Seleva wea Helpem Iumi for Givim Ansa
4, 5. Wanem nao olketa wei wea Kasem brochure hem givim gudfala help?
4 Iumi savve satisfae long wei for study seleva taem iumi iusim olketa Bible pablikeson for dig moa deep long wanfala subject, especially taem iumi mas ansarem kwestin bilong samwan wea barava laek for savve. (1 Timothy 1:4; 2 Timothy 2:23) Long firstaem, planti niu wan study insaed long brochure Wanem Nao God Mas Kasem From Iumi?,a wea stap distaem long 261 languis. Hem wanfala brochure wea simpol and stret, wea information kam from Bible. Hem helpem olketa wea readim for kwiktaem minim wanem nao God mas kasem saed long tru worship. Bat olketa no raetem long wei wea givim planti information for each subject. Sapos Bible student bilong iu askem olketa kwestin abaotem Bible subject wea iufala storyim, wanem nao iu savve duim for faendem moa Bible information wea bae helpem hem for ansarem olketa kwestin hia?
5 For olketa wea garem Watchtower Library on CD-ROM long wanfala computer long languis bilong olketa, hem isi for lukim planti difren information. Bat waswe olketa wea no garem diswan? Iumi bae lukluk long tufala subject wea Kasem brochure storyim for lukim hao iumi fit for mekem savve bilong iumi grow and iusim moa information for givim ansa—especially sapos samwan askem olketa kwestin olsem, Hu Nao God? and Jesus hem wanem kaen man?—Exodus 5:2; Luke 9:18-20; 1 Peter 3:15.
Hu Nao God?
6, 7. (a) Wanem kwestin nao kamap abaotem God? (b) Wanem serious samting nao bigman bilong religion no talem taem hem givim wanfala tok?
6 Leson 2 insaed Kasem brochure ansarem datfala barava important kwestin, Hu Nao God? Diswan hem wanfala important point bikos man kanduit worshipim God sapos hem no savve gud long Hem or maet daot sapos Hem really stap. (Romans 1:19, 20; Hebrews 11:6) Nomata olsem, pipol evriwea long world garem planti difren idea abaotem hu nao God. (1 Corinthians 8:4-6) Evri religion garem difren idea abaotem hu nao God. Long Christendom planti religion ting long God olsem wanfala Trinity. Wanfala bigman bilong church long United States givim wanfala tok wea garem title “Waswe, Iu Savve Long God?” bat no enitaem long datfala full tok hem talem nem bilong God, nomata hem talem toktok from Hebrew Scripture samfala taem. Wanfala reason hem from hem readim wanfala Bible transleison wea no iusim Jehovah or Yahweh bat “Lord” wea no wanfala nem and wea savve konfiusim man.
7 Datfala bigman bilong religion no talem barava important point taem hem talem toktok from Jeremiah 31:33, 34: “‘Olketa bae no teachim moa neiba bilong hem and each wan brata bilong hem, and sei, “Savve Long Lord” [Hebrew, “Savve Long Jehovah”], bikos evriwan long olketa bae savve long Mi, from smol wan bilong olketa go kasem barava bigman bilong olketa,” hem nao toktok bilong Lord [Hebrew, Jehovah].” Datfala transleison wea hem iusim barava aotem Jehovah, nem bilong God.—Psalm 103:1, 2.
8. Wanem nao showimaot hao wei for iusim nem bilong God hem important?
8 Psalm 8:9 showim why nao hem important tumas for iusim nem bilong Jehovah: “O Lord bilong mifala Jehovah, nem bilong iu hem nambawan long full earth!” Markem datwan witim: “O LORD, Lord bilong mifala, nem bilong iu hem gud tumas long full earth!” (King James Version; lukim tu The New American Bible, The Holy Bible—New International Version, Tanakh—The Holy Scriptures) Bat, olsem first study article hem talem, iumi savve kasem “barava savve bilong God” sapos iumi letem Word bilong hem for givim iumi datfala savve. Bat wanem Bible study pablikeson nao savve ansarem olketa kwestin bilong iumi abaotem wei wea nem bilong God hem important?—Proverbs 2:1-6.
9. (a) Wanem pablikeson nao savve helpem iumi for explainim hao wei for iusim nem bilong God hem important? (b) Hao nao planti transleita fail for showimaot respect for nem bilong God?
9 Iumi savve lukim brochure The Divine Name That Will Endure Forever, wea olketa transleitim insaed long 69 languis.b Sekson wea garem title “God’s Name—Its Meaning and Pronunciation” (page 6-11) showim long klia wei datfala Hebrew Tetragrammaton (from Greek languis, wea minim “fofala leta”) hem stap klosap 7,000 taem long olketa Hebrew raeting bilong bifor. Nomata olsem, olketa bigman and transleita bilong Jew Religion and Christendom olketa min for aotem datwan from planti Bible transleison bilong olketa.c Hao nao olketa fit for sei olketa savve long God and fren gud witim hem sapos olketa les for iusim nem bilong hem? Really nem bilong hem openem wei for minim wanem nao olketa purpose bilong hem and hu nao hem. And tu, sapos man no iusim nem bilong God, datfala part long example prea bilong Jesus wea sei “Dadi bilong mifala wea stap long heven, letem nem bilong iu kamap holy,” hem no garem eni mining nao!—Matthew 6:9; John 5:43; 17:6.
Hu Nao Jesus Christ?
10. Wanem nao olketa wei wea iumi savve kasem full story abaotem laef and ministry bilong Jesus?
10 Leson 3 insaed Kasem brochure hem garem title “Hu Nao Jesus Christ?” Insaed sixfala paragraf nomoa, hem givim shortfala stret story abaotem Jesus, start bilong hem, and reason why hem kam long earth. Bat, sapos iu wantem full story abaotem laef bilong hem, best samting nao hem for readim olketa Gospel, bat barava gudfala buk wea storyim datfala information hem Nambawan Man wea Winim Evri Otherfela Man, wea stap distaem long 111 languis.d Disfala buk hem garem full story abaotem laef and olketa teaching bilong Christ, wea kam from fofala Gospel and wea followim order wea evri samting happen. Insaed long 133 chapter, hem storyim olketa samting wea happen long laef and ministry bilong Jesus. Iu savve lukim Insight, Volume 2, anda long heding “Jesus Christ” for olketa main point bilong diswan.
11. (a) Wanem nao mekem Olketa Jehovah’s Witness difren long biliv bilong olketa abaotem Jesus? (b) Wanem nao samfala Bible scripture wea pruvim Trinity teaching hem rong, and wanem pablikeson nao savve help long diswan?
11 Raoa abaotem Jesus wea kamap insaed Christendom, hem sapos Jesus nao “Son bilong God” and long semtaem “God datfala Son”—wea hem nao raoa abaotem samting wea Catechism of the Catholic Church kolem “main secret bilong Christian faith,” datfala Trinity. Olketa Jehovah’s Witness, wea difren from olketa religion bilong Christendom, biliv hao Jesus hem no God, bat God nao creatim hem. Nambawan story abaotem disfala subject hem stap insaed brochure Should You Believe in the Trinity?, wea olketa transleitim long 95 languis.e Samfala long planti scripture wea hem iusim for pruvim Trinity teaching hem rong hem Mark 13:32 and 1 Corinthians 15:24, 28.
12. Wanem nara kwestin nao iumi fit for lukluk long hem?
12 Information hia abaotem God and Jesus Christ showimaot olketa wei wea iumi savve study seleva witim goal for helpem olketa wea no savve long truth bilong Bible for kasem stretfala savve. (John 17:3) Bat, waswe olketa wea kaban witim Christian kongregeson for planti year finis? From olketa garem bigfala savve long Bible, waswe, olketa still need for lukluk gud long wei wea olketa seleva studyim Word bilong Jehovah?
Why “Lukluk Gud Evritaem”?
13. Wanem rong tingting nao samfala maet garem abaotem wei for study seleva?
13 Samfala wea member bilong kongregeson for planti year maet start for garem fasin for depend nomoa long savve bilong Bible wea olketa kasem insaed first tu-thri year wea olketa kamap Jehovah’s Witness. Hem isi for man sei: “Mi no need for study tumas olsem olketa niu wan. Mi readim Bible and olketa Bible pablikeson staka taem finis insaed olketa year wea go pas.” Diswan hem semsem olsem wei for sei: “Mi no really need for ting tumas long hao mi kaikai distaem, from mi kaikaim staka kaikai finis insaed olketa year wea go pas.” Iumi savve body hem needim gudfala kaikai wea iumi preparem gud evritaem for mekem body healthy and strong. Datwan hem barava moa tru saed long wei for keepim gud spiritual health and strong bilong iumi!—Hebrews 5:12-14.
14. Why nao iumi need for lukluk gud long iumiseleva?
14 So iumi evriwan, nomata iumi Bible student for longtaem finis or nomoa, need for followim disfala kaonsel wea Paul givim long Timothy, wea long datfala taem hem wanfala mature overseer: “Lukluk gud evritaem long iuseleva and teaching bilong iu. Followim olketa samting hia, from iu bae sevem iuseleva and olketa wea lisin long iu from wei wea iu duim olsem.” (1 Timothy 4:15, 16) Why nao iumi shud ting strong long advaes bilong Paul? Remember, Paul showimaot tu hao iumi garem faet againstim “evri trik [“kleva trik,” footnote] bilong Devil” and “againstim olketa wicked spirit long olketa ples bilong heven.” And aposol Peter givim warning hao Devil hem “luk aotem samwan for kaikaim,” and datfala “samwan” maet eniwan long iumi nao. Maet wei wea iumi slakdaon long diswan givim chance wea hem luk aotem.—Ephesians 6:11, 12; 1 Peter 5:8.
15. Wanem spiritual samting nao iumi garem for defendim iumiseleva, and hao nao iumi savve keepim gud datwan?
15 So, wanem nao iumi garem for defendim iumiseleva? Aposol Paul talem diswan moa long iumi: “Werem full kaleko for faet wea kam from God, mekem iufala savve strong long datfala wicked day and, bihaen iufala barava duim evribit evri samting hia, stand strong.” (Ephesians 6:13) Wei wea datfala spiritual kaleko for faet hem barava protectim man hem no depend nomoa long hao gud nao hem long firstaem bat hem depend tu long wei for evritaem keepim gud. So, insaed long datfala full kaleko from God hem niufala savve abaotem Word bilong God. Diswan strongim wei wea hem important tumas for ap-tu-date witim savve bilong iumi long truth wea Jehovah showimaot thru long Word bilong hem and thru long datfala faithful and wise slave class. Wei for studyim seleva Bible and olketa Bible pablikeson hem barava important for keepim gud, spiritual kaleko bilong iumi.—Matthew 24:45-47; Ephesians 6:14, 15.
16. Wanem nao iumi savve duim for mek sure “bigfala shield bilong faith” bilong iumi hem waka gud?
16 Paul mekhae long wanfala important part bilong kaleko bilong iumi for faet, hem nao “bigfala shield bilong faith,” wea iumi savve iusim for blokem and stopem eni giaman toktok and apostate teaching wea hem nao olketa spia bilong fire bilong Satan. (Ephesians 6:16) So hem important for iumi chekim hao strong nao shield bilong faith bilong iumi and wanem iumi duim for keepim gud and strongim diswan. Olsem example, maet iu ask: ‘Hao nao mi prepare for Bible study wea kamap evri week insaed long Wastaoa? Waswe, mi studyim gud, mekem mi fit for “tingim and muvim narawan for showimaot love and gudfala waka” long wei for givim olketa gudfala ansa long taem bilong meeting? Waswe, mi openem Bible and chekim olketa scripture? Waswe, mi encouragem olketa narawan long wei for strong for tekpart long olketa meeting?’ Spiritual kaikai bilong iumi hem strong kaikai, and for iumi kasem gud samting evribit from datwan, iumi mas studyim and ting raonem gud.—Hebrews 5:14; 10:24.
17. (a) Wanem poison nao Satan iusim for trae for mekem spiritual fasin bilong iumi kamap wik? (b) Wanem nao medicine for aotem poison bilong Satan?
17 Satan savve long olketa wik point bilong olketa man wea no perfect, and olketa trik bilong hem barava no showaot klia. Wanfala wei wea hem spreadim nogud samting bilong hem nao wei for mekem dirty samting saed long sex hem isi tumas for lukim long television, Internet, video, and olketa buk or magasin. Samfala Christian letem disfala poison for go thru long spiritual kaleko bilong olketa wea wik finis, and hem lead go for olketa lusim privilege insaed kongregeson or samting wea moa serious. (Ephesians 4:17-19) Wanem nao medicine for aotem spiritual poison bilong Satan? Iumi mas no lusim wei for evritaem studyim Bible seleva, go long olketa Christian meeting, and mas luk aftarem datfala full kaleko for faet from God. Evri samting hia helpem iumi for luksavve long stret samting and rong samting and for heitim wanem God heitim.—Psalm 97:10; Romans 12:9.
18. Hao nao “sword bilong spirit” savve helpem iumi long spiritual faet bilong iumi?
18 Sapos iumi keepim wei for studyim Bible evritaem, bae iumi garem strongfala wei for defendim iumiseleva wea kam from stretfala savve long Word bilong God. And tu bae iumi garem gudfala wei for againstim hem thru long “sword bilong spirit, hem nao, word bilong God.” Word bilong God hem “sharp winim eni tu-saed sword and hem savve kat go for divaedem soul and spirit, and olketa join and bon, and hem fit for luksavve long tingting and samting wea heart want for duim.” (Ephesians 6:17; Hebrews 4:12) Sapos iumi kasem savve long hao for iusim datfala “sword,” then taem iumi feisim olketa temptation, bae iumi fit for barava luksavve samting wea maet luk olraet nomoa, or maet luk gud tu, and savve hao hem wanfala trap bilong wicked wan wea savve killim man dae. Savve wea iumi garem long Bible bae helpem iumi for rejectim samting wea wicked and duim gud samting. So iumi evriwan need for askem iumiseleva: ‘Waswe, sword bilong mi hem sharp, or hem rasta? Waswe, mi savve faendem hard for rememberim olketa Bible scripture wea mi savve iusim for protectim mi?’ Iumi want for keepim gudfala wei for studyim Bible seleva wea mekem iumi fit for againstim Devil.—Ephesians 4:22-24.
19. Wanem gudfala samting nao iumi savve kasem sapos iumi duim study seleva?
19 Paul hem raet olsem: “Evri Scripture hem kam from God and hem gud for teach, for givim kaonsel, for stretem evri samting, for givim discipline long raeteous fasin, mekem man bilong God hem fit evribit, barava redy for duim evri gudfala waka.” Sapos iumi ting strong long toktok bilong Paul for Timothy, iumi savve strongim spiritual fasin bilong iumiseleva and mekem ministry bilong iumi kamap moabeta. Olketa spiritual elder and ministerial servant savve helpem kongregeson long wei wea moabeta, and iumi evriwan savve stap strong long faith.—2 Timothy 3:16, 17; Matthew 7:24-27.
[Olketa Footnote]
a Samting wea happen evritaem nao, man wea interest wea studyim Kasem brochure bae muv go long buk Savvy wea Lead Go Long Laef Olawe, wea olketa Jehovah’s Witness pablisim tufala evriwan. Olketa idea long hia bae help for kliarem samting wea savve stopem man for muv ahed long spiritual wei.
b Olketa Jehovah’s Witness nao pablisim. Olketa wea garem Insight on the Scriptures long languis bilong olketa savve lukim Volume 2, anda long heding “Jehovah.”
c Samfala Spanish and Catalonian transleison difren, long wei wea olketa transleitim Hebrew Tetragrammaton, olsem “Yavé,” “Yahveh,” “Jahvè,” and “Jehová.”
d Olketa Jehovah’s Witness nao pablisim.
e Olketa Jehovah’s Witness nao pablisim.
Waswe, Iu Remember?
• Wanem nao olketa samting wea savve help for duim gudfala study seleva?
• Wanem mistek nao planti Bible transleison mekem saed long nem bilong God?
• Wanem Bible scripture nao bae iu iusim for pruvim Trinity teaching hem rong?
• Wanem nao iumi mas duim for protectim iumiseleva from olketa trik bilong Satan, nomata sapos iumi olketa tru Christian for planti year finis?
[Olketa Piksa long page 19]
For duim gudfala study seleva, iu needim ples wea kwaet and no staka samting for pullim mind
[Olketa Piksa long page 23]
Waswe, “sword” bilong iu hem sharp or hem rasta?