“Werem Full Kaleko for Faet wea Kam From God”

“Werem full kaleko for faet wea kam from God mekem iufala stand strong againstim evri trik bilong Devil.”—EPHESIANS 6:11.

1, 2. Long toktok bilong iuseleva, storyim spiritual kaleko for faet wea olketa Christian need for werem.

Rome hem barava rul strong long first century C.E. From army bilong Rome strong fogud, diswan mekem datfala taon for kontrolem staka part long world long datfala taem. Wanfala man wea raetem history sei disfala army “hem winim eni nara army long history.” Insaed army bilong Rome hem olketa soldia wea savve tumas for faet and wea duim hardfala training, bat wei wea olketa win olsem wanfala army hem depend tu long kaleko bilong olketa for faet. Aposol Paul iusim kaleko for faet bilong wanfala soldia bilong Rome for explainim spiritual kaleko for faet wea olketa Christian needim for win long faet bilong olketa againstim Devil.

² Long Ephesians 6:14-17 hem story abaotem disfala spiritual kaleko for faet. Paul raet olsem: “Stand strong, werem belt bilong truth raonem bele bilong iufala, and werem chest kava bilong raeteous fasin, and leg bilong iufala mas werem shoe bilong gud nius bilong peace. Winim evri samting, garem bigfala shield bilong faith, wea iufala savve stopem olketa spia bilong fire bilong wicked wan. And tu, acceptim helmet bilong salvation, and sword bilong spirit, hem nao, word bilong God.” Taem iumi tingim olketa really soldia, disfala kaleko for faet wea Paul storyim hem barava protectim soldia bilong Rome. And tu, soldia hia iusim sword, wea hem nao main samting for faetem nara man.

3. Why nao iumi shud obeyim olketa instruction bilong Jesus Christ and followim example bilong hem?

³ For join witim samting for faet and training wea olketa kasem, sapos olketa soldia obeyim komanda bilong olketa bae army bilong Rome hem win. Olsem tu, olketa Christian mas obeyim Jesus Christ, wea Bible storyim olsem wanfala “komanda long olketa nation.” (Isaiah 55:4) Hem “hed bilong kongregeson” tu. (Ephesians 5:23) Jesus talem instruction for spiritual faet wea iumi insaed and hem showim perfect example long hao for werem spiritual kaleko for faet. (1 Peter 2:21) From fasin bilong Christ hem klosap semsem olsem spiritual kaleko bilong iumi for faet, Bible givim advaes long iumi for iusim sem wei for tingting olsem Christ for “protectim” iumiseleva. (1 Peter 4:1) Taem iumi story raonem each pis long spiritual kaleko for faet bilong iumi, bae iumi iusim example bilong Jesus for showimaot wei wea datwan hem important and protectim iumi.

Protectim Bele, Chest, and Leg

4. Hao nao belt hem helpem wanfala soldia, and wanem nao hem piksarem?

⁴ Werem belt bilong truth raonem bele. Long taem bilong Bible, olketa soldia werem wanfala waed leather belt, wea maet waed bilong hem from 5 centimeter go kasem 15 centimeter. Samfala transleita sei verse hia shud sei, “werem truth olsem wanfala belt wea taet raonem bele bilong iu.” Belt bilong soldia hem help for protectim bele, and hem savve hangem sword bilong hem from belt hia tu. Taem soldia werem belt, datwan minim hem redy for go faet. Paul iusim belt bilong soldia for showim wei wea truth insaed Bible shud barava affectim laef bilong iumi. Long tokpiksa wei, hem shud stap taet raonem iumi, mekem iumi savve garem living wea followim truth and savve defendim truth taem need hem kamap for duim datwan. (Psalm 43:3; 1 Peter 3:15) For kasem datwan, iumi need for studyim gud Bible and ting raonem. Law bilong God hem “stap insaed long” Jesus. (Psalm 40:8) Dastawe taem olketa wea againstim hem askem kwestin long hem, hem savve ansa and baeheartim toktok from Bible.—Matthew 19:3-6; 22:23-32.

5. Explainim hao advaes from Bible savve helpem iumi taem iumi kasem test or temptation.

⁵ Taem iumi letem truth bilong Bible for leadim iumi, diswan savve protectim iumi for no garem rong tingting long samting and hem mekem iumi fit for disaedem samting long wise wei tu. Taem iumi kasem temptation and test, direction long Bible bae strongim wei wea iumi disaed strong for duim stret samting. Hem olsem iumi lukim Nambawan Teacher bilong iumi, Jehovah, and herem wanfala toktok wea sei olsem long iumi: “Diswan nao wei. Wakabaot followim.”—Isaiah 30:20, 21.

6. Why nao tokpiksa heart bilong iumi needim protection, and hao nao raeteous fasin savve barava protectim datwan?

⁶ Chest kava bilong raeteous fasin. Chest kava bilong wanfala soldia hem protectim wanfala important part long body, hem nao heart. Tokpiksa heart bilong iumi—really fasin bilong iumi—needim spesol wei for protectim bikos hem garem feeling for saedem nogud samting. (Genesis 8:21) So, iumi mas lanem and lovem olketa raeteous mark bilong Jehovah. (Psalm 119:97, 105) Wei wea iumi lovem raeteous fasin bae mekem iumi rejectim tingting bilong world wea no tingim or wea no strong long olketa klia direction bilong Jehovah. Nara samting moa, taem iumi lovem samting wea stret and heitim samting wea rong, iumi stap klia long wei for aftarem samting wea savve spoelem laef bilong iumi. (Psalm 119:99-101; Amos 5:15) Jesus hem showim nambawan example long diswan, bikos Bible hem sei olsem abaotem hem: “Iu lovem raeteous fasin, and iu heitim fasin for brekem law.”—Hebrews 1:9.a

7. Why nao soldia bilong Rome hem needim gudfala shoe, and wanem nao diswan piksarem?

⁷ Leg werem shoe bilong gud nius bilong peace. Olketa soldia bilong Rome needim strong shoe or sandol, bikos taem war go ahed, staka taem nao olketa march for samting olsem 30 kilometer each day and hevi bilong olketa samting for faet wea hem karem hem samting olsem 27 kilogram. Dastawe Paul iusim shoe for piksarem wei wea iumi redy for preachim message bilong Kingdom long evriwan wea lisin. Diswan hem important bikos hao nao pipol bae savve long Jehovah sapos iumi no stanbae and willing for preach?—Romans 10:13-15.

8. Hao nao iumi savve followim example bilong Jesus olsem man wea preach abaotem gud nius?

⁸ Wanem nao main waka long laef bilong Jesus? Hem sei olsem long Govenor Pontius Pilate bilong Rome: ‘Mi kam long world for mi witness abaotem truth.’ Jesus hem preach long eniwan wea willing for lisin, and hem enjoyim tumas ministry bilong hem dastawe hem ting long diswan olsem moa important long hem winim wanem hem needim long physical saed. (John 4:5-34; 18:37) Sapos iumi willing for talemaot gud nius olsem Jesus, bae iumi kasem staka chance for talemaot long nara pipol. And tu, wei wea iumi busy evribit long ministry bilong iumi bae helpem iumi for stap strong long spiritual saed.—Acts 18:5.

Shield, Helmet, and Sword

9. Hao nao wanfala big shield savve protectim wanfala soldia bilong Rome?

⁹ Bigfala shield bilong faith. Greek word wea olketa transleitim “bigfala shield” hem minim wanfala shield wea fit for protectim klosap full body. Hem bae protectim man from “olketa arrow bilong fire” wea Ephesians 6:16 hem storyim. Long taem bilong Bible, olketa soldia iusim olketa arrow wea olketa wakem from olketa thin stik olsem bambu wea garem smol iron container insaed wea olketa fulimap witim petrol wea olketa laetem. Wanfala savveman storyim olketa arrow hia olsem “wanfala barava danger samting for faet wea olketa iusim long war bifor.” Sapos wanfala soldia no garem bigfala shield for protectim hemseleva from olketa samting for faet olsem, hem savve garekil big or maet dae tu.

10, 11. (a) Wanem “arrow bilong fire” bilong Satan nao savve mekem faith bilong iumi kamap wik? (b) Hao nao example bilong Jesus showimaot wei wea hem important tumas for garem faith taem iumi kasem test?

¹⁰ Wanem “arrow bilong fire” nao Satan iusim for distroem faith bilong iumi? Hem savve startim persecution or wei for olketa long famili, ples iumi waka, or skul for againstim iumi. Maet feeling for laekem staka moa material samting and dirty fasin hem spoelem samfala long spiritual wei. For protectim iumiseleva from olketa danger samting hia, iumi mas “garem bigfala shield bilong faith.” Iumi bae garem faith taem iumi lane abaotem Jehovah, story evritaem witim hem long prea, and luksavve wei wea hem protectim and blessim iumi.—Joshua 23:14; Luke 17:5; Romans 10:17.

¹¹ Taem Jesus stap long earth, hem showimaot wei wea hem important for garem strongfala faith long olketa hardfala taem. Hem trustim evribit wanem Dadi bilong hem disaedem and hem hapi for duim will bilong God. (Matthew 26:42, 53, 54; John 6:38) Nomata taem hem wari tumas long garden bilong Gethsemane, Jesus sei long Dadi bilong hem: “No followim will bilong mi, bat followim will bilong iu.” (Matthew 26:39) Jesus nating forgetim wei wea hem important tumas for loyal and mekem Dadi bilong hem hapi. (Proverbs 27:11) Sapos iumi garem semkaen wei for trust long Jehovah, bae iumi no letem wei wea eniwan tok spoelem or againstim iumi for mekem faith bilong iumi wikdaon. Bat, faith bilong iumi bae kamap strong sapos iumi depend long God, showim love for hem, and obeyim olketa komandment bilong hem. (Psalm 19:7-11; 1 John 5:3) No eni material samting or wei for kasem for lelebet taem samting wea body wantem hem semsem olsem olketa blessing wea Jehovah bae givim for olketa wea lovem hem.—Proverbs 10:22.

12. Wanem important part bilong iumi nao tokpiksa helmet hem protectim, and why nao hem important tumas for kasem protection olsem?

¹² Helmet bilong salvation. Helmet protectim hed and brain bilong soldia—ples wea savve bilong man hem stap. Christian hope wea iumi garem hem olsem wanfala helmet bikos hem protectim mind bilong iumi. (1 Thessalonians 5:8) Nomata iumi changem tingting bilong iumi finis followim stretfala savve insaed Word bilong God, iumi still man wea wik and no perfect. Hem isi tumas for tingting bilong iumi kamap nogud. Olketa samting wea disfala system laekem savve pullim tingting bilong iumi or maet changem tu hope wea God givim long iumi. (Romans 7:18; 12:2) Devil hem barava trae for mekem Jesus tan difren taem hem offerim long hem “evri kingdom bilong world and glory bilong olketa.” (Matthew 4:8) Bat Jesus strong for rejectim offer hia, and Paul sei olsem abaotem hem: “From datfala hapi wea stap front long hem, hem stand strong long torture stake, no wari long shame, and hem sidaon long raet saed long throne bilong God.”—Hebrews 12:2.

13. Hao nao iumi savve keepim wei wea iumi trustim hope wea stap front long iumi?

¹³ Wei for garem trust olsem Jesus hem no samting wea man seke nomoa hem kasem. Sapos iumi fulimap tingting bilong iumi witim olketa hope and goal bilong disfala system and no tingting strong long hope for future, faith bilong iumi long olketa promis bilong God bae kamap moa wik. Gogo, maet iumi no garem datfala hope nao. Long narasaed, sapos iumi evritaem ting raonem olketa promis bilong God, bae iumi go ahed for hapi long olketa promis bilong God, bae iumi go ahed for hapi long hope wea stap front long iumi.—Romans 12:12.

14, 15. (a) Wanem nao tokpiksa sword bilong iumi, and hao nao iumi savve iusim datwan? (b) Storyim hao sword bilong spirit savve helpem iumi for againstim temptation.

¹⁴ Sword bilong spirit. Toktok bilong God, wea hem datfala message wea stap insaed Bible hem olsem wanfala sword wea sharp tu-saed wea savve aotem giaman teaching bilong religion and helpem pipol wea garem stretfala heart for kamap free long spiritual wei. (John 8:32; Hebrews 4:12) Disfala spiritual sword savve defendim iumi tu taem olketa temptation or apostate trae for spoelem faith bilong iumi. (2 Corinthians 10:4, 5) Iumi thankiu tumas bikos ‘full Bible kam from God and mekem iumi redy for duim evri gudfala waka’!—2 Timothy 3:16, 17.

¹⁵ Taem Satan testim Jesus long wilderness, Jesus iusim gud sword bilong spirit for blokem olketa false idea and olketa kleva test. Hem ansarem each test bilong Satan olsem: “Olketa raetem finis.” (Matthew 4:1-11) David, wanfala Jehovah’s Witness long Spain tu hem lukim hao Bible helpem hem for winim temptation. Taem hem 19 year, wanfala naesbola woman wea waka long sem company for duim klining sei tufala shud “enjoy tugeta.” David rejectim olketa samting wea woman hia duim for frenim hem and askem boss bilong hem for waka long difren area mekem datwan no happen moa. David sei: “Mi tingim example bilong Joseph wea hem rejectim dirty fasin and stret awe hem go aot. Mi duim sem samting tu.”—Genesis 39:10-12.

16. Explainim why iumi needim training mekem iumi ‘iusim word bilong truth long stretfala wei.’

¹⁶ Jesus iusim tu sword bilong spirit for helpem olketa narawan ranawe from wei wea Satan kontrolem olketa. Jesus sei: “Wanem mi teachim hem no bilong mi, bat bilong hem wea sendem mi kam.” (John 7:16) For garem sem gudfala wei for teach olsem Jesus, iumi needim training. Jew man wea raetem history, Josephus, hem sei olsem abaotem olketa soldia bilong Rome: “Evriday, each soldia mas waka hard for exercise, long sem wei wea olketa duim taem olketa faet long war, dastawe taem olketa faet, olketa no taed kwiktaem.” Long spiritual faet bilong iumi, iumi need for iusim Bible. And tu, iumi mas ‘duim best bilong iumi for mekem God appruvim iumi, wanfala wakman wea no shame long eni samting, wea iusim word bilong truth long stretfala wei.’ (2 Timothy 2:15) Iumi barava feel satisfae taem iumi iusim Bible for ansarem olketa kwestin bilong man wea really interest!

Prea Evritaem

17, 18. (a) Wanem nao prea duim saed long wei for againstim Satan? (b) Storyim wanfala example wea showimaot gud samting wea kamaot from prea.

¹⁷ Bihaen hem story abaotem full spiritual kaleko for faet, Paul hem givim nara important advaes. Taem olketa Christian againstim Satan, olketa shud iusim “evrikaen wei for prea witim strongfala prea from heart.” Haomas taem nao olketa shud duim olsem? Paul hem raet olsem: “Go ahed for prea evritaem long spirit.” (Ephesians 6:18) Taem iumi feisim olketa temptation, test, or feeling for wikdaon, prea savve barava strongim iumi. (Matthew 26:41) Jesus “barava prea strong from heart and askem samting long Datwan wea savve sevem hem from dae, witim strongfala singaot and krae, and God lisin long hem from hem fraet long God.”—Hebrews 5:7.

¹⁸ Milagros, wea lukaftarem hasband bilong hem wea sik big for winim 15 year hem sei: “Taem mi feel wikdaon, mi prea long Jehovah. Hem nao wan wea savve helpem mi. Hem tru, samfala taem mi feel olsem mi no savve go ahed moa. Bat evritaem bihaen mi prea long Jehovah, mi feel strong moa and feel hapi.”

19, 20. Wanem nao iumi needim mekem iumi win long faet bilong iumi againstim Satan?

¹⁹ Devil hem savve taem bilong hem short, and hem strong go moa for trae winim iumi. (Revelation 12:12, 17) Iumi mas againstim disfala strongfala enemy and “faetem nambawan faet bilong faith.” (1 Timothy 6:12) For duim diswan, iumi needim strong wea winim bilong iumiseleva. (2 Corinthians 4:7) Iumi needim tu help bilong holy spirit bilong God and mas prea for datwan. Jesus sei: “Sapos iufala, nomata iufala wicked, savve hao for givim gudfala present long olketa pikinini bilong iufala, Dadi bilong iufala long heven bae barava givim holy spirit long olketa wea askem hem!”—Luke 11:13.

²⁰ Tru nao, hem important tumas for iumi werem full kaleko for faet wea Jehovah givim. For werem disfala spiritual kaleko for faet, iumi mas mekem grow olketa fasin wea mekem God hapi olsem faith and raeteous fasin. For duim diswan, iumi need for lovem truth olsem hem samting wea iumi werem, iumi mas stanbae evritaem for talemaot gud nius, and tingim evritaem hope wea iumi garem. Iumi mas lane for iusim sword bilong spirit long gud wei. Taem iumi werem full kaleko for faet wea kam from God, iumi savve win long faet bilong iumi witim olketa wicked spirit and savve givim glory long holy nem bilong Jehovah.—Romans 8:37-39.

[Footnote]

Hao Nao Bae Iu Ansa?

• Hu nao givim best example bilong wei for werem spiritual kaleko for faet, and why nao iumi mas lukluk gud long example bilong hem?

• Hao nao iumi savve protectim mind and tokpiksa heart bilong iumi?

• Hao nao iumi savve kamap moabeta long wei for iusim sword bilong spirit?

• Why nao iumi mas go ahed prea evritaem?

[Olketa Piksa long page 17]

Wei for waka hard for studyim Bible savve muvim iumi for talemaot gud nius long evritaem

[Olketa Piksa long page 18]

Hope bilong iumi bae helpem iumi for feisim olketa test

[Olketa Piksa long page 19]

Waswe, iu iusim “sword bilong spirit” long ministry?