Niu Circuit Assembly Program

Satan trae for mekem iumi tingse evri samting long world distaem bae gohed for olowe. Bat, Bible no talem datwan. (1 John 2:​15-​17) Bible helpem iumi for luksavve wei for ‘hipimap riches long earth’ hem iusles samting nomoa. Circuit assembly program for service year bilong 2007 bae strongim pipol bilong God bikos theme bilong program hem nao, “Hipimap Olketa Riches Long Heven.”​—Matt. 6:​19, 20.

Ephesians 2:2 hem story abaotem “paoa bilong air, wea hem nao datfala tingting wea waka distaem insaed olketa son wea no obey.” Samfala samting insaed disfala air hem nao wei for tingim tumas olketa material samting. Really air hem stap raonem iumi and taem iumi brith hem go insaed iumi. “Tingting bilong world” hem olsem tu, from hem stap evriwea raonem iumi distaem. (1 Cor. 2:​12) Disfala tingting hem strong tumas, dastawe Bible kolem diswan wanfala “paoa.” Niu circuit assembly program bae helpem iumi for no garem semkaen tingting bilong world abaotem olketa material samting and hem helpem iumi for tingim nomoa olketa samting wea barava important. (Matt. 6:​33) And tu, disfala program bae helpem iumi for depend long Jehovah taem iumi duim ministry nomata iumi kasem olketa hevi and test.

Hem important for iu stap long tufala day evriwan and “lisin gud winim enitaem bifor.” (Heb. 2:1) Raetem olketa point wea iuseleva laek for followim and olketa point for iusim long ministry. Disfala program hem for strongim iu long spiritual wei and sapos iu stap taem diswan hem start go kasem taem hem finis bae hem encouragem iu and mekem iu strong for gohed “hipimap olketa riches long heven”!