Protectim Mind Bilong Iu
1. Wanem nao theme bilong circuit assembly for 2013, and why nao olketa redyim datfala program?
1 Jesus talem olketa disaepol bilong hem for lovem Jehovah long full heart, soul, and mind bilong olketa. (Matt. 22:37, 38) Olketa redyim convention for disfala year, and circuit assembly and spesol assembly day bilong next year for helpem iumi for strongim heart, konsens, and mind bilong iumi. Theme bilong distrik convention hem “Protectim Heart Bilong Iu!” Theme bilong spesol assembly day bilong 2013 service year hem “Protectim Konsens Bilong Iu.” And theme bilong olketa circuit assembly wea bae start long next month hem “Protectim Mind Bilong Iu” wea join witim Matthew 22:37. Datfala program hem for helpem iumi for mek sure long olketa samting wea iumi seleva tingim hem mekem Jehovah hapi.
2. Olketa wanem kwestin nao bae iumi herem ansa bilong olketa long datfala program?
2 Wanem Bae Iumi Herem: Taem iumi lisin long datfala assembly, iumi shud lisin for olketa ansa for olketa kwestin hia mekem iumi savve kasem main point bilong each tok:
• Wanem nao iumi savve duim for no followim “tingting bilong olketa man”?
• Wanem nao iumi savve duim for aotem olketa samting wea blindim mind bilong olketa wea no biliv?
• Olketa wanem kaen tingting nao iumi laek for garem?
• Hao nao wei for ting raonem olketa gud samting savve helpem iumi?
• Wanem nao iumi savve duim for letem Jehovah sheipim tingting bilong iumi?
• Wanem nao olketa hasband, waef, dadi and mami, and pikinini savve duim for mekem famili savve hapi?
• Wanem nao iumi savve duim mekem iumi redi for day bilong Jehovah?
• Wanem nao iumi need for duim for redyim tingting bilong iumi for bigfala waka?
• Taem iumi followim wanem iumi lanem, wanem gud samting nao iumi savve kasem?
3. Why nao hem important for kam long full program, lisin gud, and followim wanem iumi herem?
3 Satan hem barava trae hard for spoelem mind bilong iumi. (2 Cor. 11:3) So iumi mas waka hard for protectim mind bilong iumi and for mek sure Jehovah hapi long olketa samting wea iumi tingim. Iumi need for gohed garem tingting bilong Christ and faet againstim olketa nogud samting bilong disfala world wea savve spoelem iumi. (1 Cor. 2:16) So hem gud for plan distaem for attendim datfala full program. Lisin gud long taem bilong program. Taem iumi followim wanem iumi herem long program, datwan bae helpem iumi for redyim mind bilong iumi for strong for duim Kingdom waka.—1 Pet. 1:13.