Olketa Christian Needim Each Other
“Iumi evriwan member bilong each other.”—EPHESIANS 4:25.
1. Wanem nao wanfala encyclopedia talem abaotem body bilong man?
BODY bilong man hem nambawan samting bilong creation! The World Book Encyclopedia hem sei: “Samtaem pipol kolem body bilong man wanfala machine—wea spesol winim eni nara machine. Tru, body bilong man hem no wanfala machine. Bat, long planti wei iumi savve markem witim wanfala machine. Olsem wanfala machine, body hem garem planti difren part. Each part bilong body, olsem each part bilong wanfala machine, hem duim olketa spesol waka. Bat evri part hia waka tugeta and mekem body or datfala machine for ran smooth.”
2. Long wanem wei nao body bilong man and Christian kongregeson tufala semsem?
2 Tru nao, body bilong man garem planti part, or member, and each wan givim wanem body hem needim. No eni vein, or masol, or eni nara part bilong body hem no garem waka. Long sem wei, each member bilong Christian kongregeson savve share long wei for keepim kongregeson healthy long spiritual wei and luk naes. (1 Corinthians 12:14-26) Nomata wanfala member bilong kongregeson shud no ting hem moa hae winim narawan, no eniwan tu shud ting long hemseleva olsem hem no important.—Romans 12:3.
3. Hao nao Ephesians 4:25 showimaot olketa Christian needim each other?
3 Olsem olketa part bilong body bilong man needim each other, olketa Christian tu needim each other. Aposol Paul talem olsem long olketa narawan wea spirit anointim: “From iufala lusim laea fasin, iufala each wan mas talem trufala toktok long neiba bilong hem, bikos iumi evriwan member bilong each other.” (Ephesians 4:25) From olketa “bilong each other,” olketa member bilong spiritual Israel—datfala “body bilong Christ,” talem tru samting long each other and waka tugeta evribit. Tru nao, each wan long olketa hem bilong evri narawan. (Ephesians 4:11-13) Olketa Christian wea waka gud tugeta and garem hope for stap long earth, wan mind witim olketa hia.
4. Wanem nao olketa wei wea iumi savve helpem olketa niu wan?
4 Evri year, planti thousand wea hope for laef insaed wanfala paradaes earth olketa baptaes. Olketa nara member bilong kongregeson hapi for helpem olketa “muv ahed for kamap mature.” (Hebrews 6:1-3) Help wea olketa givim maet hem for ansarem olketa Bible kwestin or givim gudfala help insaed long ministry. Iumi savve helpem olketa niu wan taem iumi showim gudfala example for tekpart evritaem insaed long olketa Christian meeting. Long taem bilong trabol, iumi savve encouragem and comfortim olketa tu. (1 Thessalonians 5:14, 15) Iumi shud luk aotem olketa wei for helpem nara pipol for “go ahed for wakabaot long truth.” (3 John 4) Nomata iumi young or olo, just start for wakabaot long truth or wakabaot long hem for planti year finis, iumi savve saportim spiritual saed bilong olketa brata bilong iumi—and olketa barava needim iumi.
Givim Help wea Olketa Needim
5. Hao nao Aquila and Priscilla helpem Paul?
5 Olketa Christian hasband and waef savve kasem wei for satisfae taem tufala helpem olketa narawan. Olsem example, Aquila and waef bilong hem, Priscilla (Prisca), helpem Paul. Tufala welkamim hem long haos bilong tufala, waka witim hem for wakem tent, and helpem hem for buildimap niu kongregeson long Corinth. (Acts 18:1-4) Iumi no savve hao bat tufala putim laef bilong tufala long danger tu for saed bilong Paul. Tufala stap long Rome taem Paul talem olketa Christian long there: “Talem hello bilong mi long Prisca and Aquila wea waka witim mi for Christ Jesus, wea tufala putim laef bilong tufala long danger for sevem soul bilong mi, wea mi and olketa kongregeson bilong olketa nation sei thankiu long tufala.” (Romans 16:3, 4) Olsem Aquila and Priscilla, samfala Christian distaem buildimap olketa kongregeson and helpem olketa brata long olketa difren wei, samtaem putim laef bilong olketa seleva long danger tu mekem olketa nara servant bilong God no kasem strongfala persecution or dae long hand bilong pipol wea persecutim olketa.
6. Wanem help nao Apollos kasem?
6 Aquila and Priscilla helpem tu Apollos, Christian man wea savve tumas for story, wea teachim pipol bilong Ephesus abaotem Jesus Christ. Long datfala taem, Apollos savve nomoa long baptism wea John hem duim wea showimaot wei for repent from sin wea olketa duim againstim Law. From tufala luksavve Apollos needim help, Aquila and Priscilla “minim gud go moa wei bilong God long hem.” Maet tufala explainim hao Christian baptism hem minim tu for go andanit evribit long wata and kasem anointing bilong holy spirit. Apollos followim samting wea hem lanem. Bihaen, long Achaia “hem barava helpem olketa wea biliv thru long kaeness bilong God wea man no fit for kasem; from witim strong hem pruvim evribit long pablik hao olketa Jew rong, taem hem showimaot thru long olketa Scripture hao Jesus nao datfala Christ.” (Acts 18:24-28) Toktok bilong olketa nara worshiper savve planti taem helpem wei wea iumi minim Word bilong God. Long disfala wei tu, iumi needim each other.
Kasem Help Long Material Saed
7. Wanem nao olketa long Philippi duim taem olketa nara Christian needim help saed long material need bilong olketa?
7 Olketa member bilong Christian kongregeson long Philippi lovem Paul tumas and sendem hem olketa material need taem hem stap long Thessalonica. (Philippians 4:15, 16) Taem olketa brata long Jerusalem needim help long material saed, olketa long Philippi showimaot wei wea olketa willing for givim donation wea winim wanem olketa garem. Paul hem barava tinghae long nambawan spirit bilong olketa brata and sista bilong hem long Philippi dastawe hem sei olketa hia showimaot nambawan example for olketa narawan wea biliv.—2 Corinthians 8:1-6.
8. Wanem spirit nao Epaphroditus showimaot?
8 Taem Paul stap long prison, olketa bilong Philippi sendem hem olketa material present and tu man wea stand for olketa, Epaphroditus. Paul hem sei: “Bikos long saed bilong waka bilong Lord [Epaphroditus] hem klosap dae, putim soul bilong hem long danger, mekem hem savve stand for iufala from iufala no stap long hia for servem mi.” (Philippians 2:25-30; 4:18) Bible no talem iumi sapos Epaphroditus hem wanfala elder or ministerial servant. Nomata olsem, hem wanfala Christian wea sakrifaesim seleva and givim help, and Paul barava needim hem. Waswe, samwan wea olsem Epaphroditus hem stap insaed kongregeson bilong iu?
Olketa Givim ‘Strong’
9. Wanem example nao Aristarchus showimaot?
9 Iumi tinghae tumas long olketa loving brata and sista, wea olsem Aquila, Priscilla, and Epaphroditus, insaed long kongregeson. Samfala brata and sista bilong iumi maet olsem Aristarchus, wanfala Christian long first century. Hem and olketa narawan “help for strongim,” maet givim comfort or help long olketa gudfala wei. (Colossians 4:10, 11) Taem hem helpem Paul, Aristarchus kamap wanfala really fren long olketa taem bilong need. Hem nao kaen man wea Proverbs 17:17 hem storyim: “Wanfala trufala fren hem showimaot love evritaem, and hem wanfala brata wea born for taem bilong trabol.” Waswe, fitim iumi evriwan for kamap “help for strongim” olketa nara Christian? Main wan wea iumi shud helpem nao olketa wea kasem hardfala taem.
10. Peter givim wanem example for olketa Christian elder?
10 Olketa Christian elder mas barava help for strongim olketa spiritual brata and sista bilong olketa. Christ sei olsem long aposol Peter: “Strongim olketa brata bilong iu.” (Luke 22:32) Peter savve duim datwan bikos hem showimaot fasin wea strong, especially bihaen long resurrection bilong Jesus. Olketa elder, traem best for duim sem samting long willing and kaenfala wei, bikos olketa brata bilong iu needim iu.—Acts 20:28-30; 1 Peter 5:2, 3.
11. Hao nao iumi savve kasem gudfala samting taem iumi tingting long spirit bilong Timothy?
11 Timothy, wea gogo witim Paul hem wanfala elder wea tingim tumas olketa nara Christian. Nomata hem garem samfala problem saed long health, Timothy showimaot strongfala faith and hem ‘waka hard witim Paul for mekem gud nius muv ahed.’ Dastawe datfala aposol fit for sei olsem long olketa long Philippi: “Mi no garem eni narawan wea garem fasin olsem hem, wea bae barava lukaftarem olketa samting saed long iufala.” (Philippians 2:20, 22; 1 Timothy 5:23; 2 Timothy 1:5) Iumi savve kamap blessing for olketa narawan wea worshipim Jehovah taem iumi showimaot spirit olsem Timothy. Hem tru, iumi mas stand strong long olketa wik point bilong iumiseleva and long olketa difren test, bat iumi savve and shud showimaot strongfala faith and loving kea tu for olketa spiritual brata and sista bilong iumi. Iumi shud evritaem remember hao olketa needim iumi.
Olketa Woman wea Kea for Nara Pipol
12. Wanem nao iumi savve lanem from example bilong Dorcas?
12 Wanfala long olketa woman wea kea for nara pipol hem Dorcas. Taem hem dae, olketa disaepol kolem kam Peter and leadim hem go long wanfala rum insaed long ruf bilong haos. Long there “olketa widow woman kam long hem and krae and showim hem planti difren kaen kaleko wea Dorcas mekem taem hem stap witim olketa.” Peter resurrectim Dorcas and hem go ahed for ‘duim planti gudfala samting and showimaot mercy.’ Long Christian kongregeson distaem, olketa woman olsem Dorcas stap wea mekem kaleko or duim nara loving samting for olketa wea garem need. Bat, olketa main waka wea olketa duim nao hem for saportim samting bilong Kingdom and share long waka for mek disaepol.—Acts 9:36-42; Matthew 6:33; 28:19, 20.
13. Hao nao Lydia showimaot hem kea for olketa nara Christian?
13 Lydia, wanfala woman wea fraet long God hem kea for nara pipol. Hem from Thyatira, and hem stap long Philippi taem Paul preach long there long samting olsem 50 C.E. Maet Lydia hem wanfala niu follower bilong Jew religion, bat maet tu-thri Jew nomoa stap long Philippi, and maet no eni synagogue stap tu. Hem and olketa narafala woman hipap for worship saed long wanfala river taem datfala aposol talemaot gud nius long olketa. Story hem sei: “Jehovah openem heart bilong hem [Lydia] waed mekem hem lisin long olketa samting wea Paul talem. Taem hem and famili bilong hem baptaes, hem sei olsem: ‘Sapos iufala judgem mi for faithful long Jehovah, kam insaed long haos bilong mi and stap.’ And hem wantem tumas for mifala kam.” (Acts 16:12-15) From Lydia want for duim gud samting for nara pipol, hem ask strong for Paul and olketa wea gogo witim hem for stap witim hem. Iumi tinghae tumas taem olketa kaen and loving Christian showimaot semkaen fasin for welkam distaem!—Romans 12:13; 1 Peter 4:9.
Mifala Needim Iufala Olketa Young Wan Tu
14. Hao nao Jesus Christ deal witim young pipol?
14 Son bilong God, Jesus Christ, wea kaen and showimaot love nao startim Christian kongregeson. Pipol feel gud raonem hem bikos hem lovem and kea long pipol. Taem samfala start for tekem kam olketa young pikinini long Jesus, olketa disaepol bilong hem trae for sendem awe olketa pikinini hia. Bat Jesus hem sei: “Letem olketa smol pikinini kam long mi; no trae for stopem olketa, from kingdom bilong God hem bilong olketa olsem. Tru nao, mi talem iufala, Eniwan wea no acceptim kingdom bilong God olsem wanfala smol pikinini bae kanduit go insaed.” (Mark 10:13-15) For kasem olketa blessing bilong Kingdom, iumi mas hambol and willing for lane olsem olketa smol pikinini. Jesus showimaot love for olketa smol wan hia taem hem holem and blessim olketa. (Mark 10:16) Waswe iufala olketa young wan distaem? Iufala mas savve mifala lovem and needim iufala insaed long kongregeson.
15. Wanem information abaotem laef bilong Jesus nao stap long Luke 2:40-52, and wanem example nao hem showim for olketa young wan?
15 Taem Jesus hem young yet, hem showim love for God and olketa Scripture. Taem hem 12 year, hem and dadi and mami bilong hem, Joseph and Mary, travel from homtaon bilong olketa long Nazareth go long Jerusalem for celebratem Passover. Taem olketa gogo bak, dadi and mami bilong Jesus faendaot Jesus no stap insaed grup wea olketa gogo tugeta. Gogo olketa faendem hem sidaon insaed wanfala hall bilong temple wea hem lisin and askem kwestin long olketa Jew teacher. From Jesus sapraes hao Joseph and Mary no savve wea for faendem hem, hem ask olsem: “Waswe, iufala no savve mi mas stap long haos bilong Dadi bilong mi?” Hem go bak hom witim dadi and mami bilong hem, stap anda long tufala, and go ahed for grow long wisdom and body. (Luke 2:40-52) Jesus showim gudfala example for olketa young wan bilong iumi! Olketa shud obeyim dadi and mami bilong olketa and interest for lanem olketa spiritual samting.—Deuteronomy 5:16; Ephesians 6:1-3.
16. (a) Samfala boy singaot hao taem Jesus go ahed for witness long temple? (b) Wanem privilege nao olketa young Christian garem distaem?
16 Olsem wanfala young wan, maet iu witness abaotem Jehovah long skul and from haos tu haos witim dadi and mami bilong iu. (Isaiah 43:10-12; Acts 20:20, 21) Taem Jesus givim witness and healim pipol long temple bifor hem dae, samfala boy singaot olsem: “Sevem, mifala prea, Son bilong David!” From olketa kros long diswan, olketa chief priest and scribe sei: “Waswe, iu herem samting wea olketa hia talem?” Jesus ansarem olketa: “Yes. Waswe, iufala no readim diswan, ‘Long mouth bilong olketa baby and smol pikinini iu mekem praise kamap’?” (Matthew 21:15-17) Olsem olketa pikinini hia, iufala young wan insaed kongregeson garem nambawan chance for praisem God and Son bilong hem. Mifala wantem and needim iufala for waka witim mifala olsem pipol for talemaot Kingdom.
Taem Trabol Happen
17, 18. (a) Why nao Paul organizem wanfala kolekson for olketa Christian long Judea? (b) Hao nao olketa donation for olketa wea biliv long Judea hem affectim olketa Jew and Gentile Christian?
17 Nomata wanem living iumi garem, love muvim iumi for helpem olketa nara Christian wea garem need. (John 13:34, 35; James 2:14-17) Love for olketa brata and sista bilong hem long Judea nao muvim Paul for organizem wanfala kolekson midolwan olketa kongregeson long Archaia, Galatia, Macedonia, and distrik bilong Asia. Persecution, trabol midolwan olketa pipol, and bigfala hangre wea kasem olketa disaepol long Jerusalem maet kosim wanem Paul kolem “safa,” “test,” and “pipol stealim evri samting iufala ownim.” (Hebrews 10:32-34; Acts 11:27–12:1) So hem organizem wanfala kolekson for olketa poor Christian long Judea.—1 Corinthians 16:1-3; 2 Corinthians 8:1-4, 13-15; 9:1, 2, 7.
18 Olketa donation for olketa holy wan long Judea pruvim hao wei for fren stap midolwan olketa Jew and Gentile worshiper bilong Jehovah. Taem olketa Jew givim olketa donation hia, olketa Gentile garem chance for showimaot thankiu long olketa Jew worshiper for spiritual riches wea olketa kasem from olketa. So, olketa share long material and spiritual wei. (Romans 15:26, 27) Olketa contribution for olketa wea biliv distaem hem samting wea man volunteer for givim and love nao muvim iumi for duim. (Mark 12:28-31) Iumi needim each other long diswan tu mekem “man wea garem lelebet samting no barava short.”—2 Corinthians 8:15.
19, 20. Givim wanfala example for showim hao pipol bilong Jehovah givim help taem trabol hem happen.
19 From iumi luksavve olketa Christian needim each other, iumi kwiktaem helpem olketa spiritual brata and sista bilong iumi. Olsem example, tingim samting wea happen taem olketa nogud earthquake and landslide kasem El Salvador long start bilong 2001. Wanfala report sei: “Olketa brata long evri part bilong El Salvador provaedem olketa difren kaen help. Olketa grup bilong olketa brata from Guatemala, United States, and Canada kam for helpem mifala. . . . Kwiktaem nomoa olketa buildim winim 500 haos and 3-fala naesfala Kingdom Hall. Hard waka and wei for wan mind wea olketa brata hia showim taem olketa sakrifaesim seleva hem givim bigfala witness.”
20 Wanfala report from South Africa sei: “Olketa nogud flood wea spoelem planti part bilong Mozambique hem affectim tu planti Christian brata bilong iumi. Branch long Mozambique arrange for lukaftarem planti need bilong olketa. Bat olketa askem mifala for sendem gudfala second-hand kaleko long olketa brata wea needim. Mifala kolektem inaf kaleko for sendem wanfala 12-meter container wea fulap witim kaleko for olketa brata bilong iumi long Mozambique.” Tru nao, long olketa wei hia tu, iumi needim each other.
21. Wanem nao next article bae storyim?
21 Olsem iumi storyim firstaem, evri part long body bilong man hem important. Sem samting hem barava tru saed long Christian kongregeson. Evri member insaed kongregeson needim each other. Olketa need tu for go ahed for serve witim wan mind. Next article bae showim hao olketa fit for duim olsem.
Hao Nao Bae Iu Ansa?
• Long olketa wanem wei nao body bilong man hem semsem witim Christian kongregeson?
• Wanem nao olketa first Christian duim taem olketa nara Christian needim help?
• Wanem nao samfala Bible example wea showim hao olketa Christian needim and helpem each other?
[Piksa long page 10]
Aquila and Priscilla kea for nara pipol
[Olketa Piksa long page 12]
Pipol bilong Jehovah helpem each other and nara pipol taem trabol happen