Tingim Evritaem Prize wea Iu Bae Kasem
“Mi trae hard for kasem disfala mark mekem mi savve tekem prize.”—PHIL. 3:14.
1. Wanem prize nao aposol Paul savve hem bae kasem?
APOSOL Paul, wea nara nem bilong hem Saul, hem kam from famili wea garem bignem. Paul hem lanem religion bilong olketa laen dadi bilong hem from Gamaliel, wanfala man wea teachim Law wea staka pipol savve long hem. (Acts 22:3) Nomata hem luk olsem Paul bae kasem nambawan waka, hem lusim religion bilong hem and kamap wanfala Christian. Start long datfala taem, hem tingim nao prize wea hem bae kasem, wea hem nao for stap olowe long heven and kamap king and priest long Kingdom bilong God. Datfala Kingdom bae rulim earth wea kamap paradaes.—Matt. 6:10; Rev. 7:4; 20:6.
2, 3. Paul ting hao long prize for go long heven?
2 Paul tinghae tumas long datfala prize, dastawe hem sei olsem: “Olketa samting wea mi duim bifor hem big samting long mi, bat mi willing for lusim olketa mekem mi followim Christ. Tru tumas, mi willing for lusim evri samting bikos mi lanem olketa nambawan samting abaotem Lord bilong mi, Christ Jesus. From mi followim hem, mi willing for lusim evri samting and tingim evri samting hia olsem rabis nomoa.” (Phil. 3:7, 8) Olketa samting wea pipol long world tingse hem important nao hem for garem bignem, staka selen, and bigfala waka. Bat Paul tingim evri samting hia hem rabis nomoa taem hem lanem truth abaotem plan bilong Jehovah for olketa man.
3 Samting wea Paul lanem abaotem Jehovah and Jesus nao hem barava important long hem. Jesus storyim diswan taem hem prea olsem: “For kasem laef olowe, olketa mas savve long iu, wea iu nomoa trufala God, and olketa mas savve tu long mi, Jesus Christ, wea iu sendem kam.” (John 17:3) Samting wea Paul talem long Philippians 3:14 showimaot hem barava laek kasem laef olowe. Hem sei: “Mi trae hard for kasem disfala mark mekem mi savve tekem prize for go long heven wea God givim thru long Christ Jesus.” Tru tumas, hem tingim evritaem prize wea hem bae kasem for stap olowe long heven and rul insaed gavman bilong God.
Stap Olowe Long Earth
4, 5. Bigfala sekson wea worshipim God distaem bae kasem wanem prize?
4 Bigfala sekson wea worshipim God distaem garem hope for stap olowe long earth, and hem nao prize wea olketa waka hard for kasem. (Ps. 37:11, 29) Jesus talem hao disfala hope bae kamap tru. Hem sei: “Olketa wea hambol bae hapi, bikos God bae givim earth long olketa.” (Matt. 5:5) Olsem Psalm 2:8 talem, Jesus nao main wan wea God bae givim earth long hem, bikos hem nao bae rulim earth. And 144,000 anointed Christian wea stap long heven bae rul witim hem. (Dan. 7:13, 14, 22, 27) Olketa nara sheepsheep wea bae stap long earth, olketa nao bae ‘kasem’ earth wea datfala Kingdom hem rulim. (Matt. 25:34, 46) Iumi savve olketa samting hia wea God promisim bae kamap tru bikos hem “nating savve laea.” (Titus 1:2) Iumi barava trustim samting wea God talem olsem Joshua tu trustim. Hem sei long olketa Israelite: “Iufala barava savve evri samting wea God bilong iufala Jehovah promisim long iufala hem kamap tru. No eni samting wea hem promisim hem no kamap tru. Evri promis bilong hem kamap tru.”—Josh. 23:14.
5 Laef bilong iumi long niu world bae barava difren from laef bilong iumi distaem. Long niu world, no eniwan bae faetem narawan, no eniwan bae duim rabis samting, no eniwan bae poor, no eniwan bae spoelem narawan, no eniwan bae sik, and no eniwan bae dae. Pipol bae barava healthy and stap long earth wea kamap paradaes. Tru tumas, olketa bae barava hapi narawe. Datwan nao hem nambawan prize wea olketa bae kasem!
6, 7. (a) Wanem nao Jesus duim bifor wea bae kamap long niu world? (b) Hao nao olketa wea dae finis bae startim niu laef moa?
6 Taem Jesus stap long earth, God givim holy spirit long hem mekem hem savve duim olketa nambawan mirakol. Samting wea hem duim showimaot wanem nao bae happen long niu world. Wanfala nao, Jesus talem wanfala man wea paralaes for 38 year for hem wakabaot. Bible sei datfala man hem wakabaot nao. (Readim John 5:5-9.) Narataem moa, Jesus meetim “wanfala man wea hem blind yet from taem hem born” and hem healim hem. Taem olketa Pharisee askem datfala man hu nao healim hem, hem talem olketa: “Start kam bifor, iumi no herem story abaotem eniwan wea savve openem eye bilong man wea blind kam taem hem born. Sapos God hem no sendem disfala man hia, hard for hem duim eni samting olsem.” (John 9:1, 6, 7, 32, 33) Jesus savve duim evri samting hia bikos God givim holy spirit long hem. Long evri ples wea Jesus go long hem, hem “healim olketa wea sik.”—Luke 9:11.
7 Hem tru, Jesus healim olketa wea sik and kripol, bat hem mekem olketa wea dae for laef bak tu. Taem wanfala smol gele wea 12 year finis hem dae, dadi and mami bilong hem sorre tumas. So Jesus go lukim gele hia and hem sei: “Smol gele, iu getap!” And gele hia getap nao! Tingim hao dadi and mami and olketa narawan barava hapi narawe nao! (Readim Mark 5:38-42.) Taem iumi stap long niu world, bae iumi “hapi narawe” taem staka billion pipol laef bak. Bible nao talem hao “olketa wea duim gud samting and olketa wea duim nogud samting bae laef bak.” (Acts 24:15; John 5:28, 29) Olketa bae startim niu laef bilong olketa and garem hope for laef olowe.
8, 9. (a) Taem Christ rul for wan thousand year, nogud samting wea iumi kasem from Adam bae hao? (b) God bae judgem pipol wea laef bak followim wanem samting?
8 Pipol wea laef bak bae garem hope for stap olowe nao. God bae no judgem olketa hia for sin wea olketa duim bifor olketa dae. (Rom. 6:7) Taem Christ hem rul for wan thousand year, olketa wea saedem Kingdom bilong God bae kasem olketa gud samting from dae bilong Jesus. Olketa bae isisi kamap perfect, and olketa bae no kasem nao olketa nogud samting from sin bilong Adam. (Rom. 8:21) Jehovah “bae finisim dae for olowe, and Jehovah wea hem Lord bilong evri samting bae aotem tias from eye bilong evriwan.” (Isa. 25:8) Bible talem tu hao long datfala taem, bae olketa kasem “olketa buk” wea storyim olketa samting wea olketa mas followim. (Rev. 20:12) Taem earth hem isisi kamap paradaes, “olketa wea stap long earth bae lane for duim olketa stret samting.”—Isa. 26:9.
9 God bae no judgem pipol wea laef bak for sin wea olketa duim bifor, bat hem bae judgem olketa followim wanem olketa duim long niu world. Revelation 20:12 hem sei: “God bae judgem pipol wea dae finis followim samting wea olketa buk talem for fitim samting wea olketa duim,” wea minim God bae judgem olketa followim samting wea olketa duim bihaen olketa laef bak. Datwan showimaot Jehovah hem man wea duim stret samting, hem kaen, and hem lovem pipol! Nara samting tu, pipol wea laef bak “bae no tingim moa” nogud samting wea kasem olketa bifor. (Isa. 65:17) From olketa lanem niu samting wea olketa buk talem and laef bilong olketa gud tumas, samting wea kasem olketa bifor bae no spoelem tingting bilong olketa nao. Olketa bae no tingim moa olketa nogud samting hia. (Rev. 21:4) Hem bae olsem tu for datfala “big crowd” wea no dae long Armageddon.—Rev. 7:9, 10, 14.
10. (a) Laef long niu world bae hao? (b) Wanem nao iu savve duim mekem iu tingim evritaem datfala prize?
10 Long niu world, pipol bae no sik and no dae. “No eniwan bae sei: ‘Mi sik.’” (Isa. 33:24) Gogo olketa bae garem perfect health. Olketa bae wekap evri morning and luk forward long niufala day. Olketa bae hapi for duim waka and for kaban witim pipol wea tingim olketa. Datwan hem nambawan prize stret! Hem gud tumas sapos iu readim and ting raonem profesi long Isaiah 33:24 and 35:5-7. Taem iu duim datwan, trae tingim sapos iuseleva stap long there. Datwan bae helpem iu for tingim evritaem datfala prize wea iu bae kasem.
Samfala Bifor wea No Tingim Prize
11. Solomon hem hao taem hem kamap king?
11 From iumi savve long prize wea Jehovah laek givim long pipol, iumi mas waka hard for tingim datwan evritaem. Sapos nomoa, maet iumi no tingim nao datfala prize. Tingim Solomon. Taem hem kamap king long Israel bifor, hem prea long God for helpem hem garem savve and gudfala tingting, mekem hem savve judgem pipol bilong God long stretfala wei. (Readim 1 Kings 3:6-12.) From hem askem God olsem, Bible talem hao “God givim Solomon bigfala savve and gudfala tingting.” Tru tumas, “Solomon hem wise winim evriwan long East and evriwan long Egypt.”—1 Ki. 4:29-32.
12. Wanem nao Jehovah talem finis for eniwan wea kamap king long Israel?
12 Nomata Solomon duim olketa gud samting taem hem kamap king, Jehovah talem finis hao eniwan wea kamap king “mas no tekem staka horse for hemseleva” and “mas no garem staka waef for hemseleva, bikos sapos hem tekem staka woman, bae olketa tanem tingting bilong hem.” (Deut. 17:14-17) Sapos wanfala king tekem staka horse, datwan showimaot hem no trustim Jehovah bat hem trustim army bilong hem nao for protectim nation bilong hem. And sapos king hem garem staka waef, datwan savve spoelem hem, bikos maet samfala kam from olketa ples wea pipol worshipim olketa giaman god, and maet olketa waef hia mekem king for no worshipim Jehovah nao.
13. Wanem nao Solomon duim wea showimaot hem no followim toktok bilong God?
13 Bat Solomon no obeyim Jehovah. Hem tekem staka thousand horse and staka thousand man for raedem horse. (1 Ki. 4:26) Hem garem 700 waef tu witim 300 woman. Staka woman hia kam from olketa ples wea pipol worshipim olketa giaman god. Olketa “switim hem for worshipim olketa nara god, and hem no tingim Jehovah nao.” Solomon followim olketa waef bilong hem and hem duim olketa rabis samting for worshipim olketa giaman god. From hem duim olsem, Jehovah sei hem bae “aotem datfala kingdom” from hem.—1 Ki. 11:1-6, 11.
14. From Solomon and olketa Israelite no obey, wanem nao happen?
14 Solomon no tingim nao nambawan privilege wea God givim for hem rul olsem king. Hem barava worshipim olketa giaman god. Gogo full nation worshipim olketa giaman god tu, and from datwan, olketa long Babylon finisim Jerusalem long 607 B.C.E. Nomata gogo olketa Jew go bak long Jerusalem for startim trufala worship moa, staka handred year bihaen, Jesus hem sei: “God bae tekem kingdom bilong hem from iufala and bae givim long pipol wea duim olketa samting wea hem laekem.” Datfala samting hem happen nao. Jesus hem sei: “Iufala garem temple bilong iufala, bat iu savve, God lusim hem finis.” (Matt. 21:43; 23:37, 38) From pipol hia no faithful long God, God lusim olketa and olketa no pipol bilong hem nao. Long 70 C.E., army bilong Rome finisim Jerusalem and temple long there, and olketa tekem staka Jew for kamap wakaman bilong olketa.
15. Hu nao samfala wea Bible storyim wea no tingim nao wanem hem barava important?
15 Judas Iscariot hem wanfala long 12-fala aposol bilong Jesus. Judas herem evri nambawan samting wea Jesus teachim and hem lukim olketa mirakol wea Jesus duim taem holy spirit bilong God helpem hem. Nomata olsem, samting wea Judas duim showimaot hem no tingim nao wanem hem important. Judas nao man for keepim selen bilong Jesus and olketa nara aposol. Bat “hem man for steal. Hem nao keepim smol box selen bilong olketa and hem savve tekem samfala selen hia for hemseleva.” (John 12:6) From Judas greedy tumas, hem go long olketa priest wea garem hae position and olketa givim 30 silver coin long Judas mekem hem tekem olketa go long Jesus. (Matt. 26:14-16) Demas tu hem duim samting wea showimaot hem no tingim nao wanem hem important. Hem waka witim aposol Paul bat gogo nomoa nao, olsem Paul talem: “Demas hem lusim mi nao bikos hem lovem tumas wei bilong disfala world.”—2 Tim. 4:10; readim Proverbs 4:23.
Iumi Wanwan Savve Lanem Samting
16, 17. (a) Wanem kaen paoa nao Satan garem? (b) Wanem nao savve helpem iumi for no foldaon long eni samting wea Satan laek traem iumi long hem?
16 Evriwan wea worshipim God mas tingim olketa pipol wea Bible storyim, bikos Bible sei: “Olketa samting hia wea happen long pipol bifor, hem olsem olketa example wea olketa raetem daon for warnim iumi, bikos iumi stap long taem wea hem klosap long end bilong disfala world.” (1 Cor. 10:11) Iumi nao stap long olketa last day bilong disfala world wea nogud tumas.—2 Tim. 3:1, 13.
17 Satan wea hem “god bilong disfala world,” hem savve finis hao “lelebet taem nomoa hem stap for hem.” (2 Cor. 4:4; Rev. 12:12) Hem bae duim eni samting for switim olketa wea worshipim Jehovah for no faithful. Satan kontrolem disfala world, and hem nao bihaenem olketa laea story wea iumi herem long radio, television, and niuspepa. Nomata olsem, pipol bilong Jehovah kasem “strong wea winim wanem [olketa seleva] garem.” (2 Cor. 4:7) Disfala holy spirit wea God givim long iumi hem helpem iumi for no foldaon long eni samting wea Satan laek traem iumi long hem. Dastawe iumi mas prea evritaem long Jehovah and trustim hao hem bae “givim holy spirit long olketa wea askem hem.”—Luke 11:13.
18. Iumi shud ting hao long disfala world?
18 From iumi savve world bilong Satan klosap finis, datwan hem strongim iumi bikos iumi savve olketa tru Christian bae stap laef. “World and evri samting wea pipol long world laekem hem gogo for finis, bat man wea duim wanem God laekem bae stap for olowe.” (1 John 2:17) From iumi savve diswan bae happen, hem krangge samting nomoa sapos man wea worshipim God tingse disfala world savve givim gud samting wea winim wei wea hem fren witim Jehovah! Disfala world wea Satan kontrolem hem olsem wanfala ship wea gogo for sink. Bat Jehovah givim kongregeson olsem wanfala laefboat for sevem pipol wea faithful long hem. Taem olketa gogo for kasem niu world, olketa savve hao disfala promis bae kamap tru: “Olketa wea duim nogud samting bae finis, bat Jehovah bae givim earth long olketa wea trustim hem.” (Ps. 37:9) Dastawe iumi mas tingim evritaem nambawan prize wea iumi bae kasem!
Waswe, Iu Tingim Yet?
• Paul ting hao long prize for go long heven?
• God bae judgem olketa wea bae stap long earth followim wanem samting?
• Wanem nao hem gud for iu duim distaem?
[Piksa long page 13]
Taem iu readim Bible, waswe, iu tingim taem wea iu bae kasem datfala prize?