Waswe, Iu garem Trufala Patient Fasin?
WASWE, iu enitaem feel kros tumas bikos fasin bilong narawan no stret? Waswe, iu kwiktaem duim samting taem iu luksavve nogud paoa barava affectim olketa klos fren bilong iu?
Samfala taem man need for strong and duim samting kwiktaem for stopem bigfala sin. Olsem example, taem bigfala rong mekem olketa Israelite stap long danger for kamap dirty long mek-16 century B.C.E., granson bilong Aaron, Phinehas, strong for duim samting for finisim datfala nogud samting. Jehovah God appruvim samting wea hem duim, taem hem sei: “Phinehas . . . tanem bak kros bilong mi from olketa son bilong Israel from hem no letem worship bilong mi go long eni nara god midolwan long olketa.”—Numbers 25:1-11.
Phinehas duim samting wea fitim for stopem datfala dirty samting. Bat waswe long wei for ova tumas for kros long olketa wik point bilong nara man? Sapos iumi no garem gudfala reason, or iumi kwiktaem for duim samting, iumi bae no kamap man wea strong for raeteous fasin, bat man wea no patient—samwan wea no willing for minim olketa wik point bilong nara pipol. Wanem nao savve helpem iumi for no foldaon long trap olsem?
‘Jehovah Hem Forgivim Evri Rong Bilong Iu’
Jehovah hem “wanfala God wea jealous (strong); wanfala God wea no letem worship go long eni nara God.” (Exodus 20:5, footnote) From hem nao Creator, hem garem raet for askem iumi for worshipim hem nomoa. (Revelation 4:11) Nomata olsem, Jehovah hem patient saed long olketa wik point bilong man. Man for raetem psalm David hem sing olsem abaotem hem: “Jehovah hem garem mercy and hem kaen, hem no savve kros kwiktaem and hem fulap long loving-kaeness. Hem bae no go ahed for lukaotem rong evritaem . . . Hem no panisim iumi for fitim sin bilong iumi; and hem no mekem iumi kasem samting wea fitim olketa rong bilong iumi.” Yes, sapos iumi repent, God ‘forgivim evri rong bilong iumi.’—Psalm 103:3, 8-10.
From hem minim wei wea olketa man sin, Jehovah no “go ahed for lukaotem rong” long olketa wea duim rong samting bat repent. (Psalm 51:5; Romans 5:12) Tru nao, hem purpose bilong hem for finisim evribit sin and wei for no perfect. Go kasem taem datwan fulfill evribit, winim wei for duim long iumi “samting wea iumi fit for kasem,” long kaenfala wei God forgivim iumi long faondeson bilong ransom sakrifaes bilong Jesus Christ. Sapos Jehovah no showimaot mercy taem hem fitim, bae no eniwan long iumi fit for stap laef. (Psalm 130:3) Iumi savve thankiu tumas from Dadi bilong iumi long heven, wea garem raet for askem iumi for worshipim hem nomoa, hem wanfala God wea showimaot mercy!
Needim Balance
From Sovereign Lord bilong universe showimaot patient fasin taem hem deal witim olketa man wea no perfect, waswe, iumi shud no duim sem samting? Mining bilong patient fasin hem for patient witim tingting and samting wea nara pipol duim. Waswe, iumi wanwan garem kaen fasin olsem—fasin for patient and bossim seleva taem nara pipol talem or duim samting wea hem no bigfala sin, bat maet toktok or akson wea no mas stret?
Hem tru, iumi need for stap klia long wei for ova tumas long patient fasin. Olsem example, barava nogud samting kamaot taem olketa bigman long religion patient witim olketa priest wea evritaem spoelem olketa pikinini saed long sex. Wanfala niusman long Ireland hem sei, “From olketa ting long samting wea wanfala priest duim long olketa pikinini olsem wanfala sin wea happen nomoa, olketa bigman long church just muvim datfala priest go [long nara ples].”
Waswe, wei for just muvim kaen man olsem long nara ples hem example bilong stretfala patient fasin? Barava nomoa nao! Tingim sapos wanfala medical grup letem wanfala nogud doctor for go ahed duim olketa operation, muvim hem long olketa difren hospital, nomata hem spoelem or killim dae olketa patient bilong hem. Kaen “patient fasin” olsem maet kamap from wei wea olketa doctor mistek for laek for keepim wei wea olketa fren gud tugeta. Bat waswe long pipol wea dae or laef bilong olketa nogud nao from nogud or slak wei bilong olketa doctor?
Danger stap tu long wei for no garem inaf patient fasin. Taem Jesus stap long earth, samfala Jew wea olketa kolem olketa Zealot iusim example bilong Phinehas long rong wei for trae mekem excuse for samting olketa duim. Wanfala samting wea samfala Zealot duim hem “for wakabaot midolwan long crowd long Jerusalem long taem bilong olketa festival and samfala nara taem olsem and long wei wea haed, busarem olketa enemy witim sharp naef.”
Olsem olketa Christian, iumi bae nating olsem olketa Zealot long wei for attakim long physical wei eniwan wea iumi no hapi long hem. Bat waswe, lelebet wei for no patient savve muvim iumi for attakim long olketa nara wei olketa wea iumi no appruvim —maet long wei for tokspoelem olketa? Sapos iumi garem trufala patient fasin, iumi bae no iusim kaen toktok olsem wea savve spoelem man.
Nara sekson wea no patient hem olketa Pharisee long first-century. Olketa evritaem tok strong againstim nara pipol and no willing for minim olketa wik point bilong olketa man. Olketa Pharisee lukdaonem man nating, tokspoelem olketa olsem ‘olketa wea garem curse.’ (John 7:49) Dastawe Jesus accusim olketa wea tingse olketa seleva raeteous, taem hem sei: “Trabol bae kasem iufala, olketa scribe and Pharisee, iufala hypocrite! from iufala givim mek-ten part bilong mint and dill and cumin, bat iufala nating tingim olketa moa important samting bilong Law, olsem, justice and mercy and faithful fasin. Olketa samting hia iufala mas duim, bat no forgetim tu olketa narafala samting.”—Matthew 23:23.
Long wei for talem diswan, Jesus no ting smol long wei wea hem important for keepim Law Bilong Moses. Bat hem showim hao olketa “moa important” part bilong Law needim man for followim law witim balance fasin and mercy. Jesus and olketa disaepol bilong hem barava difren evribit from olketa Pharisee and Zealot wea nating patient!
Jehovah God and Jesus Christ no ting nating long nogud fasin. Klosap nao, ‘pei bak bae kam long olketa wea no savve long God and olketa wea no obeyim gud nius.’ (2 Thessalonians 1:6-10) Bat, nomata hem strong for raeteous fasin, olsem Father bilong hem long heven, Jesus nating fail for showimaot patient fasin, mercy, and loving kea, for evriwan wea laek duim stret samting. (Isaiah 42:1-3; Matthew 11:28-30; 12:18-21) Jesus hem nambawan example for iumi!
Patient Witim Narawan
Nomata iumi maet garem bigfala strong for samting wea stret, iumi mas followim kaonsel bilong aposol Paul: “Go ahed for patient witim narawan and willing for forgivim narawan sapos eniwan garem reason for komplen againstim narawan. Olsem Jehovah hem willing for forgivim iufala, iufala mas duim olsem tu.” (Colossians 3:13; Matthew 6:14, 15) Patient fasin hem minim for patient witim wik point and mistek bilong each other long disfala world wea no perfect. Iumi mas balance tu long wanem iumi expectim from narawan.—Philippians 4:5.
For garem patient fasin no enitaem minim iumi appruvim rong fasin or iumi no savve lukim olketa mistek. Maet wanfala tingting or samting wea nara Christian duim hem lelebet missim mark bilong Jehovah. Nomata disfala wei for go difren hem no kamap serious tumas yet mekem God rejectim hem, maet hem warning saen wea showaot hem need for change long samfala wei. (Genesis 4:6, 7) Hem loving samting taem olketa wea garem mark long spiritual wei trae for stretem witim kwaet fasin man wea mekem mistek! (Galatians 6:1) Bat, for win long diswan, man wea stretem narawan mas duim diswan witim fasin for kea, no long wei for tokdaonem hem.
“Witim Kwaet Fasin and Bigfala Respect”
Waswe for showimaot patient fasin long pipol wea garem difren religion? Wanfala “Main Leson” long evri Gavman Skul long Ireland long 1831 hem talem olsem: “Jesus Christ no ting for eniwan forcem religion bilong hem long olketa man long raf wei. . . . For raoa witim olketa neiba and tokspoelem olketa hem no wei for mekem olketa biliv iumi raet and olketa nao rong. Wei olsem maet mekem olketa biliv iumi no garem Christian spirit.”
Fasin and teaching bilong Jesus pullim pipol kam long Word bilong God, and iumi mas olsem tu. (Mark 6:34; Luke 4:22, 32; 1 Peter 2:21) Olsem wanfala perfect man witim spesol savve from God, hem luksavve long heart bilong man. So, taem need kamap, Jesus fit for talemaot strongfala toktok long olketa enemy bilong Jehovah. (Matthew 23:13-33) Wei wea hem duim diswan no minim hem no patient.
Iumi no olsem Jesus wea savve luk insaed heart bilong man. Dastawe, iumi shud followim kaonsel bilong Peter: “Mekem Christ kamap holy olsem Lord long heart bilong iufala, evritaem redy for givim ansa long eniwan wea askem reason for hope wea iufala garem, bat duim datwan witim kwaet fasin and bigfala respect.” (1 Peter 3:15) From iumi olketa servant bilong Jehovah, iumi shud defendim biliv bilong iumi bikos hem garem strong faondeson long Word bilong God. Bat iumi need for duim diswan long wei wea showimaot respect for nara pipol and for biliv bilong olketa. Paul hem raet: “Letem toktok bilong iufala for evritaem hem kaenfala, garem salt, mekem iufala savve hao for givim ansa long each wan.”—Colossians 4:6.
Long Sermon long Maunten, Jesus hem sei: “Evri samting wea iufala wantem olketa man for duim long iufala, iufala tu mas duim olsem long olketa.” (Matthew 7:12) So, iumi mas patient witim each other and showimaot respect for pipol wea iumi preachim gud nius long olketa. Taem iumi balancem strong for raeteous fasin witim patient fasin bilong Bible, iumi bae mekem Jehovah hapi and bae iumi garem trufala patient fasin.
[Piksa long page 23]
Stap klia long fasin bilong olketa Pharisee for no patient
[Piksa long page 23]
Jesus showimaot patient spirit bilong Dadi bilong hem. Waswe iu?