Wanem Nao Day Bilong Jehovah Bae Showimaot?
“Day bilong Jehovah bae kam olsem man for steal, . . . and earth witim olketa samting wea man duim bae showaot klia.”—2 PET. 3:10.
1, 2. (a) Hao nao disfala nogud world bae finis? (b) Iumi bae ting raonem olketa wanem kwestin?
LONG disfala nogud world, pipol biliv strong long wanfala laea story. Olketa man tingse olketa savve rulim disfala earth seleva and no needim Jehovah. (Ps. 2:2, 3) Waswe, laea story olsem savve stap for olowe? Barava nomoa nao! God bae finisim world bilong Satan long taem wea hem markem and followim tingting bilong hem. Samting wea God bae duim long disfala nogud world hem barava followim wei bilong hem for duim stretfala samting and wea showimaot love bilong hem.—Ps. 92:7; Prov. 2:21, 22.
2 Aposol Peter sei: “Day bilong Jehovah bae kam olsem man for steal, and skae bae mekem bigfala noise taem hem finis, bat evri samting long skae and earth bae melt from olketa hot tumas, and earth witim olketa samting wea man duim bae showaot klia.” (2 Pet. 3:10) Wanem nao “skae” and “earth” minim? Wanem nao “evri samting long skae and earth” wea bae melt? And wanem nao Peter minim taem hem sei, “earth witim olketa samting wea man duim bae showaot klia”? Taem iumi savve long ansa long olketa kwestin hia, iumi bae redi for olketa samting wea klosap for happen.
Skae and Earth Bae Finis
3. Wanem nao “skae” wea 2 Peter 3:10 storyim, and hao nao bae hem finis?
3 Taem Bible iusim word “skae” long tokpiksa wei, plande taem hem minim olketa gavman wea rulim olketa man. (Isa. 14:13, 14; Rev. 21:1, 2) “Skae wea bae finis” piksarem olketa gavman bilong man wea kontrolem world. Olketa bae mekem “bigfala noise” taem olketa finis or nara Bible transleison sei datwan bae “barava fast tumas.” So luk olsem olketa gavman hia bae finis kwiktaem.
4. “Earth” piksarem wanem, and hao nao bae hem finis?
4 “Earth” piksarem olketa man long world wea no fren witim God. World olsem stap long taem bilong Noah, wea God finisim long Flood. “God talem tu, skae and earth wea stap distaem redi for finis long fire and weitim day wea God bae judgem evriwan and olketa wea no followim God bae finis.” (2 Pet. 3:7) Long datfala Flood, olketa man wea no followim God finis long semtaem. Bat disfala “earth” wea bae finis long “bigfala trabol” bae no finis semtaem. (Rev. 7:14) Taem bigfala trabol hia start, God bae mekem olketa bigman bilong gavman for finisim “Bigfala Babylon,” wea hem nao olketa religion wea olsem jury woman, bikos God heitim olketa. (Rev. 17:5, 16; 18:8) Then, long Armageddon, wea hem nao lastfala part long bigfala trabol hia, Jehovah bae finisim evri nara samting long world bilong Satan.—Rev. 16:14, 16; 19:19-21.
“Evri Samting Long Skae and Earth Bae Melt”
5. Wanem nao “evri samting long skae and earth” piksarem?
5 Wanem nao “evri samting long skae and earth [wea] bae melt”? “Evri samting long skae and earth” wea Peter storyim minim tingting, wei, and olketa goal bilong pipol long disfala rabis world. Hem minim tu “tingting bilong pipol long disfala world” “wea kontrolem olketa son wea no obey.” (1 Cor. 2:12; readim Ephesians 2:1-3.) Datkaen tingting hem olsem “air” wea pipol long world bilong Satan brithim. Hem nao tingting wea mekem pipol planim, storyim, and duim samting wea followim tingting bilong Satan wea hem bighed and “rulim disfala air wea kontrolem pipol.”
6. Wanem nao wei bilong pipol wea followim tingting bilong world?
6 Pipol wea followim tingting long world bilong Satan spoelem heart bilong olketa seleva. Dastawe olketa duim wanem olketa seleva nomoa laekem, and no tingim wanem nao God laekem. Samting wea olketa duim followim bighed tingting bilong olketa. Olketa againstim olketa wea garem paoa and olketa hapi for duim “samting wea body laekem and samting wea eye laekem.”—Readim 1 John 2:15-17.
7. Why nao iumi mas “protectim gud heart” bilong iumi?
7 Iumi mas “protectim gud heart” bilong iumi. Iumi savve duim olsem taem iumi disaedem samting long wisefala wei, olsem hu nao iumi fren witim, wanem iumi readim, hapitaem wea iumi duim, and olketa Web site iumi lukim long Internet! (Prov. 4:23) Aposol Paul sei: “Iufala mas lukaot gud, nogud samwan trikim iufala for followim tingting bilong man and olketa laea story wea followim olketa kastom from bifor kam. Olketa toktok olsem hem no kam from Christ bat hem followim tingting bilong disfala world.” (Col. 2:8) Taem day bilong Jehovah kakam klosap, iumi mas no letem eniwan trikim iumi, bikos day bilong Jehovah bae “hot tumas” and bae meltim “evri samting” long world bilong Satan. Diswan mekem iumi tingim Malachi 4:1 wea sei: “Day bae kam wea bone olsem bigfala fire, and evri praod pipol and evriwan wea duim nogud samting mas kamap olsem drae grass. And datfala day wea bae kam bae barava finisim olketa.”
“Earth Witim Olketa Samting wea Man Duim Bae Showaot Klia”
8. Hao nao earth witim olketa samting wea man duim bae “showaot klia”?
8 Wanem nao Peter minim taem hem sei “earth witim olketa samting wea man duim bae showaot klia”? Peter minim long taem bilong bigfala trabol, Jehovah bae showimaot klia world bilong Satan barava fit for finis bikos olketa againstim Jehovah and Kingdom bilong Hem. Profet Isaiah story abaotem datfala taem. Isaiah 26:21 sei: “Jehovah kakam from ples bilong hem for mekem pipol long land ansa for olketa sin wea olketa duim againstim hem, and disfala land bae no haedem moa olketa wea olketa killim dae, bat blood bilong olketa bae showaot klia.”
9. (a) Wanem kaen hapitaem nao iumi mas no duim, and why nao olsem? (b) Wanem wei nao iumi mas garem, and why nao olsem?
9 Taem day bilong Jehovah kam, wei bilong pipol wea followim tingting bilong disfala nogud world bae showaot klia. Olketa bae killim dae narawan tu. Maet olketa raf hapitaem and movie wea olketa laekem tumas distaem spoelem tingting bilong olketa, wea datwan mekem olketa redi for taem wea Bible sei ‘olketa bae faetem fren bilong olketa.’ (Zech. 14:13) Dastawe iumi mas no lukluk long movie and pleim video game or readim buk or eni nara samting wea maet mekem iumi garem olketa wei wea God no laekem, olsem for praod and raf! (2 Sam. 22:28; Ps. 11:5) Bat iumi mas gohed for garem wei bilong holy spirit, bikos datwan bae protectim iumi long bigfala day bilong Jehovah.—Gal. 5:22, 23.
“Niu Skae and Niu Earth”
10, 11. Wanem nao “niu skae” and “niu earth”?
10 Readim 2 Peter 3:13. “Niu skae” hem Kingdom bilong God long heven wea start for rul long 1914, taem ‘God markem olketa nara kantri for finis for rul.’ (Luke 21:24) Christ Jesus bae rul long disfala gavman witim 144,000. Klosap evriwan long olketa hia go long heven finis. Buk bilong Revelation sei “datfala holy taon, Niu Jerusalem, hem kam daon from heven from God and hem redi olsem wanfala bride wea barava luk naes for hasband bilong hem.” Datwan piksarem 144,000 wea God chusim. (Rev. 21:1, 2, 22-24) Long Israel bifor, gavman hem rul kam from Jerusalem. So long sem wei tu, Niu Jerusalem and man wea bae maritim hem, olketa nao gavman wea bae rulim niu world. Disfala taon bae “kam daon from heven,” wea minim hem bae rulim earth.
11 “Niu earth” minim pipol wea bae stap long earth wea willing for stap anda long Kingdom bilong God. Spiritual paradaes wea pipol bilong God garem distaem bae stap long naesfala “earth wea bae kamap.” (Heb. 2:5) Wanem nao iumi savve duim mekem iumi stap long niu world?
Redi for Bigfala Day Bilong Jehovah
12. Why nao pipol long world bae seke tumas taem day bilong Jehovah kam?
12 Paul and Peter sei day bilong Jehovah bae kam olsem “man for steal,” so datwan minim hem bae kam long taem wea man no tingim. (Readim 1 Thessalonians 5:1, 2.) Olketa trufala Christian wea gohed for lukaot for datfala day bae seke tu from hem bae kam kwiktaem. (Matt. 24:44) Bat pipol long world bae barava seke tumas. Paul sei: “Long taem wea olketa [wea againstim Jehovah] sei: ‘Iumi garem peace and stap gud!’ bae seknomoa bigfala trabol hem kam and finisim olketa kwiktaem mekem olketa no savve ranawe. Bae hem olsem woman wea babule wea seke long bigfala pain taem hem redi for bornem pikinini.”—1 Thess. 5:3.
13. Wanem nao iumi mas duim taem pipol sei “Iumi garem peace and stap gud”?
13 Satan nao bae mekem pipol sei “Iumi garem peace and stap gud!” bat hem nating tru nomoa. Pipol bilong Jehovah bae luksavve long datwan. Paul sei: “Iufala no stap long darkness mekem datfala day kam olsem man for steal, from iufala evriwan nao olketa son bilong laet and son bilong day.” (1 Thess. 5:4, 5) So iumi mas gohed for luksavve long olketa samting hia, and no olsem pipol long world bilong Satan. Peter sei: “Iufala wea mi lovem, iufala savve finis long olketa samting hia, so iufala mas keakea nogud laea toktok bilong olketa [laea teacher insaed Christian kongregeson] wea no followim law bae pullim iufala, mekem iufala no followim nao wanem iufala strong for duim bifor.”—2 Pet. 3:17.
14, 15. (a) Hao nao Jehovah showimaot hem tinghae long iumi? (b) Wanem toktok long Bible nao iumi mas barava tinghae long hem?
14 Hem tru, Jehovah talem iumi for “keakea” bat hem tinghae long iumi tu dastawe hem mekem iumi “savve finis long olketa samting” wea bae happen long future.
15 Staka taem iumi herem iumi mas gohed wekap, bat sorre samting nao, samfala isisi nomoa or no tinghae long datwan. Samfala maet sei, ‘Iumi herem semkaen toktok for staka year finis.’ Bat olketa hia mas luksavve datkaen toktok hem no just againstim datfala wakaman wea faithful and wise bat olketa tok againstim Jehovah and Son bilong hem tu. Jehovah sei, “Gohed for weitim and tingim” day bilong hem. (Hab. 2:3) Jesus sei tu: “Gohed for lukaot, bikos iufala no savve long wanem taem nao Lord bilong iufala bae kam.” (Matt. 24:42) And Peter sei: “Iufala mas tingting gud abaotem laef bilong iufala. Iufala mas stap holy and gohed duim samting from iufala barava lovem God taem iufala weitim and tingim evritaem day bilong Jehovah wea bae kam!” (2 Pet. 3:11, 12) Wakaman wea faithful and Governing Body bilong hem barava tinghae long olketa toktok hia!
16. Wanem wei nao iumi mas no garem, and why nao olsem?
16 Bat ‘wakaman wea nogud’ hem sei Boss bilong hem bae no kam yet. (Matt. 24:48) Peter storyim datfala nogud wakaman long 2 Peter 3:3, 4. Hem sei: “Long olketa last day, pipol wea laek for tok spoelem samting bae . . . followim samting wea olketa seleva laekem” and bae tok daonem olketa wea obeyim Jehovah and tingim day bilong hem evritaem. Pipol hia no garem taem for duim waka bilong Kingdom bat tingim wanem olketa seleva laekem. Iumi mas nating laek for garem wei for no obey and garem datkaen rabis tingting! Bat iumi mas “tingim Lord bilong iumi hem patient from hem laek sevem pipol,” dastawe iumi shud busy for preach abaotem Kingdom and helpem pipol kamap disaepol. Bat no wari tumas abaotem wanem taem day bilong Jehovah bae kam.—2 Pet. 3:15; readim Acts 1:6, 7.
Trustim God wea Sevem Pipol
17. Wanem nao olketa faithful Christian duim for followim warning wea Jesus talem, and why nao olsem?
17 Bihaen army bilong Rome attakim Judea long 66 C.E., olketa faithful Christian followim wanem Jesus talem for kwiktaem ranawe from Jerusalem taem olketa garem chance for duim datwan. (Luke 21:20-23) Why nao olketa disaed strong for duim datwan kwiktaem? Olketa nating forgetim warning wea Jesus talem. Olketa savve olketa bae kasem hard taem olsem Christ talem finis. Bat olketa savve tu Jehovah bae nating lusim olketa wea showimaot faith and lovem hem.—Ps. 55:22.
18. Hao nao tingting bilong iu abaotem bigfala trabol wea Jesus storyim long Luke 21:25-28?
18 Iumi tu mas barava trustim Jehovah from hem nomoa savve sevem iumi taem world kasem bigfala trabol winim eni trabol wea happen bifor. Bihaen bigfala trabol hem start bat taem Jehovah no finisim yet disfala world, pipol “bae fraet fogud and wari long olketa samting wea bae happen long earth.” Olketa enemy bilong God bae fraet tumas, bat olketa wea showimaot faith and lovem Jehovah bae nating fraet. Pipol bilong Jehovah bae hapi tumas bikos taem for hem sevem olketa hem klosap.—Readim Luke 21:25-28.
19. Wanem nao bae iumi storyim long study bihaen?
19 Pipol wea no followim “evri samting” long world bae kasem nambawan future! Long study bihaen, iumi bae storyim wanem iumi mas duim sapos iumi laek for kasem laef olowe. Iumi mas waka hard for mekem Jehovah hapi long iumi and duim wanem hem laekem.—2 Pet. 3:11.
Waswe, Iu Savve Minim Kam?
• “Skae and earth” distaem piksarem wanem?
• Wanem nao “evri samting long skae and earth” wea bae melt?
• “Niu skae and niu earth” piksarem wanem?
• Why nao iumi barava trustim God?
[Piksa long page 5]
Wanem nao iu savve duim for “protectim gud heart” bilong iu and no followim world?
[Piksa long page 6]
Wanem nao showimaot iumi “tingim Lord bilong iumi hem patient from hem laek sevem pipol”?