Bible Buk Namba 53—2 Thessalonians
Man wea Raetem: Paul
Ples Hem Raetem: Corinth
Taem Hem Finis Raetem: c. 51 C.E.
MEK-TU leta bilong aposol Paul for olketa long Thessalonica go bihaenem first wan. Iumi savve hem raetem no longtaem bihaenem first leta, and tu, hem raetem from sem taon bilong Corinth for olketa sem brata. Silvanus and Timothy joinim moa Paul long greeting for kongregeson long Thessalonica. Evriwan hia kamap olketa traveling servant for Christian kongregeson bifor, bat no eni record stap for sei thrifala meet moa bihaen olketa meet long Corinth. (2 Thess. 1:1; Acts 18:5, 18) Samting wea Paul storyim showimaot hem luksavve long important need for kwiktaem stretem datfala kongregeson from rong wea kongregeson duim.
2 Plande pruv stap for showimaot disfala leta hem tru evribit olsem pruv wea showimaot hao Wan Thessalonians hem tru evribit. Irenaeus (mek-tu century C.E.) and samfala narafala man for raet talem samfala toktok from Tu Thessalonians, wea insaed diswan tu hem Justin Martyr (bilong mek-tu century), wea hem talem toktok from Tu Thessalonians 2:3 taem hem raet abaotem “man for brekem law [sin].” Diswan kamap long firstfala raeting bilong Wan Thessalonians. Nomata hem no stap distaem long Chester Beatty Papyrus No. 2 (P46), luk olsem hem stap insaed long mek-wan or tu page bilong sevenfala page wea lus bihaen long Wan Thessalonians.
3 Wanem nao goal bilong disfala leta? From kaonsel wea Paul givim long olketa bilong Thessalonica, iumi lanem hao samfala insaed kongregeson raoa and talem taem wea Lord bae kam and stap moa hem klosap for kam, olketa hia gohed strong for preach abaotem disfala tingting bilong olketa, and olketa mekem wei for divaed kamap insaed kongregeson. Luk olsem samfala garem disfala tingting olsem excuse for no duim waka for olketa seleva. (2 Thess. 3:11) Long first leta bilong hem, Paul tok abaotem taem wea Lord bae kam and stap moa, and taem olketa hia herem disfala leta, olketa kwiktaem twistim toktok bilong Paul and putim olketa mining wea no stret. Maet wanfala leta wea olketa tingse hem kam from Paul bat olketa rong hem sei “day bilong Jehovah hem kam nao.”—2:1, 2.
4 Luk olsem Paul herem finis samting hia, maet from man wea tekem go first leta bilong hem for disfala kongregeson, and so bae hem barava laek for stretem tingting bilong olketa brata wea hem lovem tumas. So long year 51 C.E., Paul, witim tufala fren bilong hem, sendem wanfala leta from Corinth for kongregeson long Thessalonica. Witim wei for stretem tingting bilong olketa abaotem taem wea Lord kam and stap moa, Paul encouragem olketa for stand strong insaed long truth.
WEI WEA HEM HELPEM IUMI
10 Disfala shortfala leta from God for olketa long Thessalonica lukluk long plande difren point abaotem Christian truth, wea evriwan savve helpem iumi. Tingim samfala main teaching and principle wea insaed: Jehovah nao God bilong salvation, and hem mekem man kamap holy thru long spirit and faith long truth (2:13); Christian mas stand strong long wei for safa mekem hem kamap fit for Kingdom bilong God (1:4, 5); olketa Christian bae go witim Lord Jesus Christ long taem wea hem kam and stap moa (2:1); Jehovah bae bringim raeteous judgment long olketa wea no obeyim gud nius (1:5-8); olketa wea God kolem bae kasem glory wea garem wan mind witim Christ Jesus, wea followim kaenfala fasin bilong God wea iumi no fit for kasem (1:12); God kolem olketa thru long preaching bilong gud nius (2:14); faith hem barava important (1:3, 4, 10, 11; 2:13; 3:2); hem stret for man waka for provaedem samting wea hem needim long ministry; sapos man no waka, maet bae hem kamap lesy and start for poke-nose long samting wea no bilong hem (3:8-12); love bilong God hem join witim wei for stand strong (3:5). Barava nambawan information hem stap insaed disfala shortfala leta wea kam from God!
11 Long disfala leta Paul showimaot hao hem wari long spiritual saed bilong olketa brata long Thessalonica, and for wan mind and blessing bilong kongregeson. Hem stretem tingting bilong olketa abaotem taem bilong day bilong Jehovah, and showim hao “man for brekem law” mas firstaem sidaon insaed “temple bilong Disfala God, and showimaot long pablik hao hem olsem wanfala god.” Bat, olketa wea “kamap fit for kingdom bilong God” bae barava sure hao long taem wea fitim, Lord Jesus bae showaot from heven “long taem wea hem kam for kasem glory witim olketa holy wan bilong hem and for olketa wea putim faith long hem for barava tinghae long hem, bikos witness wea mifala givim hem kamap faith bilong iufala.”—2:3, 4; 1:5, 10.