Kwestin From Reader

Why nao iumi fit for sei disfala toktok, “datwan wea hem nomoa garem wei for kanduit dae,” and “wea no eni man lukim or savve lukim,” hem abaotem Jesus and no Jehovah God?

Aposol Paul raet olsem: “Disfala wei wea datfala hapi and only Ruler hem showaot bae kamap long taem wea olketa markem, hem nao King bilong olketa wea rul olsem king and Lord bilong olketa wea rul olsem lord, datwan wea hem nomoa garem wei for kanduit dae, wea stap long barava braet laet, wea no eni man lukim or savve lukim.”—1 Timothy 6:15, 16.

Olketa Bible savveman garem tingting olsem: ‘Olketa kaen toktok olsem “datwan wea hem nomoa garem wei for kanduit dae,” datfala “only Ruler” and datwan “wea no eni man lukim or savve lukim,” hem abaotem Olmaeti nomoa and hard for datwan abaotem eni narawan.’ Hem tru, iumi savve iusim kaen toktok olsem for story abaotem Jehovah. Bat, full story bilong Paul long 1 Timothy 6:15, 16 showimaot hem story abaotem Jesus.

Long end bilong verse 14, Paul storyim “taem wea Lord bilong iumi Jesus Christ hem showaot.” (1 Timothy 6:14) Dastawe, long verse 15, taem Paul hem sei “disfala wei wea datfala hapi and only Ruler hem showaot bae kamap long taem wea olketa markem,” hem story abaotem wei wea Jesus bae showaot, no Jehovah God. So, hu nao datfala “only Ruler”? Masbi Jesus nao datfala only Ruler wea Paul story abaotem. Why nao olsem? Full story bilong Paul showimaot hem markem Jesus witim olketa man wea rul long disfala earth. Tru tumas, Jesus nao datfala “King bilong olketa [man] wea rul olsem king and Lord bilong olketa [man] wea rul olsem lord” olsem Paul hem talem.a Tru nao, sapos iumi markem olketa man witim Jesus, Jesus nao hem datfala “only Ruler.” Jesus nao kasem “wei for rul and honor and kingdom, mekem evri pipol, nation and languis mas servem hem.” (Daniel 7:14) No eni man wea rul long disfala earth savve sei hem garem paoa olsem!

Waswe long disfala toktok, “Datwan wea hem nomoa garem wei for kanduit dae”? Long hia tu, Paul hem markem Jesus witim olketa man wea rul olsem king long disfala earth. No eni man wea rul long disfala earth savve sei hem kasem wei for kanduit dae, Jesus nomoa fit for talem datwan. Paul raet olsem: “Iumi savve hao Christ, from hem laef bak, bae no dae moa and dae no masta ovarem hem.” (Romans 6:9) Dastawe, Jesus nao faswan wea Bible sei hem kasem present for kanduit for dae moa. Tru tumas, taem Paul raetem datfala scripture, Jesus nomoa man wea kasem laef wea no savve finis.

Hem gud for tingim tu hao bae hem rong for Paul sei Jehovah nomoa kanduit dae bikos taem hem raetem olketa toktok hia, Jesus tu kanduit dae. Bat, taem Paul markem Jesus witim olketa man wea rul long disfala earth, hem savve sei Jesus nomoa kanduit dae.

Nara samting moa, bihaen Jesus resurrect and go bak long heven, hem fitim for story abaotem hem olsem man, “wea no eni man lukim or savve lukim.” Hem tru, olketa anointed disaepol bilong hem bae lukim hem bihaen olketa dae and resurrect go long heven olsem spirit. (John 17:24) Bat no eni man long earth savve lukim Jesus bihaen hem kasem glory bilong hem. Dastawe, hem fitim for iumi sei “no eni man” lukim Jesus bihaen hem resurrect and go bak long heven.

Maet fastaem wea iumi readim 1 Timothy 6:15, 16 hem luk olsem samting wea Paul talem hem abaotem God. Bat full story bilong hem and olketa nara scripture showimaot hao Paul hem really story abaotem Jesus.

[Footnote]