Iumi Stap Olsem “Stranger” Long Disfala Nogud World
“Evriwan hia gohed faithful . . . and talemaot olketa stranger nomoa and stap for lelebet taem nomoa long ples wea olketa stap.”—HEB. 11:13.
1. Wanem nao Jesus talem abaotem olketa tru Christian and disfala world?
JESUS sei olsem abaotem olketa disaepol bilong hem: “Olketa hia bae gohed stap long world.” Bat hem sei tu: “Olketa no olsem pipol long world, olsem mi tu no olsem pipol long world.” (John 17:11, 14) Samting wea Jesus talem showimaot tingting wea olketa tru Christian shud garem abaotem world. Satan nao god bilong “disfala world.” (2 Cor. 4:4) Nomata olketa Christian stap long world, olketa no olsem pipol long world. Dastawe Bible sei olketa Christian stap olsem “pipol bilong difren kantri and olketa stranger.”—1 Pet. 2:11.
Olketa Stap Olsem “Stranger”
2, 3. Why nao iumi savve sei Enoch, Noah, Abraham, and Sarah stap olsem “stranger”?
2 Olketa wea worshipim Jehovah difren from pipol long world. Tingim Enoch and Noah. Bible sei tufala “followim tru God.” (Gen. 5:22-24; 6:9) Tufala no fraet for talem pipol Jehovah bae panisim olketa wea no obeyim hem. (Readim 2 Peter 2:5; Jude 14, 15.) Tufala duim stret samting nomata pipol long datfala taem duim olketa nogud samting. Dastawe Bible sei Enoch duim samting wea mekem God “hapi” and Noah “no garem blame midolwan long pipol long datfala taem.”—Heb. 11:5; Gen. 6:9.
3 Tingim tu Abraham and Sarah. Taem Jehovah askem tufala for lusim gudfala living wea olketa garem long Ur, tufala obeyim God. Olketa willing for go stap long difren kantri. (Gen. 11:27, 28; 12:1) Aposol Paul sei: “From Abraham garem faith, hem go long ples wea God promis for givim long hem. God talem hem for go long there and hem obey nomata hem no savve long wea nao hem go. From hem garem faith hem stap long datfala ples wea God promis for givim long hem nomata datwan hem no kantri bilong hem. Hem stap long olketa tent witim Isaac and Jacob wea God talem sem promis long olketa.” (Heb. 11:8, 9) Paul sei tu: “Evriwan hia gohed faithful go kasem taem olketa dae. Olketa no kasem samting wea God promisim long olketa, bat olketa lukim olketa promis hia olsem olketa farawe yet. Nomata olsem, olketa hapi long olketa promis hia, and talemaot olketa stranger nomoa and stap for lelebet taem nomoa long ples wea olketa stap.”—Heb. 11:13.
Warning for Olketa Israelite
4. Bifor Jehovah givim land long olketa Israelite, wanem warning nao hem talem?
4 Olketa Israelite wea born kam from laen bilong Abraham staka tumas. Gogo God mekem olketa for kamap wanfala nation and hem givim land and Law for olketa. (Gen. 48:4; Deut. 6:1) Olketa Israelite mas no forgetim evri land hem bilong Jehovah and no bilong olketa. (Lev. 25:23) Nomata olketa stap long datfala land, olketa mas obeyim wanem Jehovah talem. Olketa Israelite mas tingim tu “samting wea mekem man laef nao, hem no kaikai nomoa.” Jehovah nao givim evri gud samting wea olketa kasem. (Deut. 8:1-3) Dastawe bifor Jehovah givim land long olketa Israelite, hem talem Moses for warnim olketa olsem: “Jehovah, God bilong iufala hem promisim long olketa grani bilong iumi Abraham, Isaac and Jacob for givim disfala land long iufala. Disfala land garem olketa gudfala taon wea iufala no wakem. And land hia garem olketa haos wea fulap long plande gudfala samting wea iufala no putim insaed. Hem garem olketa well wea iufala no digim and olketa grape planteison and olketa olive planteison wea iufala no plantim. Iufala bae garem staka kaikai. So iufala mas lukaot, nogud iufala forgetim Jehovah.”—Deut. 6:10-12.
5. (a) Why nao Jehovah les long olketa Israelite? (b) Wanem niu nation nao hem chusim?
5 Bat olketa Israelite no duim wanem Jehovah talem. Taem olketa go insaed Promis Land, olketa forgetim Jehovah nomata olketa stap insaed olketa naesfala haos, garem staka kaikai, and wine. Long taem bilong Nehemiah, olketa Levite feel nogud long wanem hem happen. (Readim Nehemiah 9:25-27.) Olketa sei olketa Israelite “kaikaim staka kaikai gogo olketa fat.” Olketa no obeyim God and killim dae olketa profet wea hem sendem for warnim olketa. So Jehovah letem olketa enemy for rulim olketa. (Hos. 13:6-9) Bihaen, taem Rome rulim Israel, olketa Israelite killim dae Messiah wea God promisim! So Jehovah les long olketa and hem chusim wanfala niu nation wea hem nao “Israel bilong God.”—Matt. 21:43; Acts 7:51, 52; Gal. 6:16.
Olketa Christian “No Olsem Pipol Long World”
6, 7. (a) Wanem nao Jesus talem abaotem olketa tru Christian and disfala world? (b) Why nao olketa tru Christian mas no olsem pipol long world?
6 Jesus Christ hem hed bilong Christian kongregeson. Olsem iumi storyim finis, hem talem olketa disaepol hao olketa mas no olsem pipol long world. Bifor Jesus dae, hem sei: “Sapos iufala olsem pipol long world, olketa bae laekem iufala. Bat mi chusim iufala and iufala no olsem pipol long world. Dastawe pipol long world heitim iufala.”—John 15:19.
7 Gogo olketa Christian stap long olketa difren ples wea Rome rulim. Nomata long wanem ples olketa stap, olketa mas no olsem pipol long world and no followim wei bilong olketa. Samting olsem 30 year bihaen Jesus dae, aposol Peter sei long olketa Christian: “Olketa brata wea mi lovem, iufala olsem pipol bilong difren kantri and olketa stranger. Mi encouragem iufala for stap klia long olketa nogud samting wea body laekem wea faet againstim iufala. Iufala mas evritaem showimaot gudfala wei mekem pipol long world savve lukim datwan.”—1 Pet. 1:1; 2:11, 12.
8. Wanem nao wanfala man talem wea showimaot olketa Christian bifor no olsem pipol long world?
8 Olketa Christian bifor stap olsem “pipol bilong difren kantri and olketa stranger.” Wanfala man wea raet abaotem history sei pipol barava spoelem olketa Christian. Olketa accusim olketa Christian and sei olketa no biliv long God bikos olketa no joinim olketa bigfala hipap bilong olketa false religion. From olketa Christian no joinim olketa hapitaem and festival wea join witim false worship and wei for durong, pipol sei olketa Christian “heitim narawan.”
No Barava Mekius Long Disfala World
9. Wanem nao showimaot iumi no “heitim narawan”?
9 Iumi tu olsem olketa Christian bifor. Iumi no olsem pipol long “disfala nogud world.” (Gal. 1:4) From datwan, plande pipol no minim wei wea iumi followim olketa Bible principle. Samfala heitim iumi tu. Bat iumi no “heitim narawan” olsem samfala pipol tingim. Taem iumi preach long haos tu haos and talemaot gud nius abaotem Kingdom, datwan showimaot iumi lovem pipol. (Matt. 22:39; 24:14) Iumi preach abaotem Kingdom bikos iumi bilivim klosap nao Jesus Christ wea King bilong datfala Kingdom bae finisim olketa gavman bilong man. Bihaen datwan, olketa gud pipol nomoa bae stap long niu world.—Dan. 2:44; 2 Pet. 3:13.
10, 11. (a) Hao nao iumi mekius long disfala world? (b) Long wanem wei nao iumi no barava mekius long world?
10 From world bilong Satan klosap for finis, iumi luksavve hem no taem for busy for kasem olketa material samting. Aposol Paul sei: “Lelebet taem nomoa hem stap. Start long distaem, olketa wea . . . baem samting mas olsem olketa wea no garem samting. Olketa wea mekius long world mas no barava mekius long disfala world, bikos world distaem hem gohed for change.” (1 Cor. 7:29-31) Hao nao iumi mekius long disfala world? Iumi iusim olketa niu samting saed long technology for helpem pipol long staka kantri for savve long Bible. Iumi waka for selen tu mekem iumi baem samting wea iumi needim. Nomata olsem, iumi no barava mekius long disfala world. Diswan minim selen, olketa material samting, and waka for selen hem no main samting long laef bilong iumi.—Readim 1 Timothy 6:9, 10.
11 Tingting bilong iumi abaotem education tu showimaot iumi no barava mekius long world. Staka pipol long world tingse hem important for man go long university, garem gudfala waka, and tekem big pei. Bat iumi no ting olsem bikos iumi luksavve iumi stap olsem stranger long disfala world. Iumi no ‘lukaotem olketa bigfala samting for iumiseleva.’ (Rom. 12:16; Jer. 45:5) Iumi obeyim disfala warning wea Jesus talem: “Iufala mas lukaot and keakea nogud iufala greedy. Diswan hem bikos nomata man garem staka samting, evri samting hia no mekem hem laef.” (Luke 12:15) So olketa young wan shud tingim wei for worshipim Jehovah nao hem barava important samting. Olketa shud luksavve education hem samting wea bae helpem olketa for kasem wanem olketa needim mekem olketa savve worshipim Jehovah long full heart, full soul, full strong, and full mind. (Luke 10:27) Sapos olketa duim olsem, datwan showimaot olketa “tingim God.”—Luke 12:21; readim Matthew 6:19-21.
No Warim Tumas Olketa Material Samting
12, 13. Olsem Matthew 6:31-33 talem, hao nao iumi showimaot iumi difren from pipol long world?
12 Tingting bilong iumi abaotem olketa material samting hem difren from tingting bilong pipol long world. Jesus sei: “No wari and sei, ‘Wanem nao bae mifala kaikaim?’ or, ‘Wanem nao bae mifala drinkim?’ or, ‘Wanem nao bae mifala werem?’ Pipol long world nao barava tingim and busy for kasem olketa samting olsem. Dadi bilong iufala long heven savve iufala needim olketa samting hia. So evritaem Kingdom and olketa samting wea God sei hem stret mas first samting long laef bilong iufala. Sapos olsem, God bae givim iufala olketa samting hia wea iufala needim.” (Matt. 6:31-33) Staka brata and sista luksavve wanem Jesus talem hem barava tru. Jehovah evritaem givim wanem iumi needim.
13 Hem gud for satisfae nomoa long wanem iumi garem. (1 Tim. 6:6) Pipol long world garem difren tingting. Olsem example, taem staka young wan marit olketa laek for garem evri samting wantaem. Olketa laek for garem haos, olketa naes samting for haos, trak, and olketa niu samting. Bat olketa tru Christian luksavve olketa stap olsem stranger long disfala world. So olketa no letem feeling for laek garem staka samting for mekem olketa kaonem big selen wea bae hard for olketa peim bak. Hem naes for lukim staka brata and sista no busy for peim evri samting hia. Olketa iusim taem and strong bilong olketa for worshipim Jehovah. Samfala brata and sista pioneer, waka long Bethel, duim traveling waka, or duim missionary waka. Iumi tinghae long wanem olketa duim for worshipim Jehovah long full heart bilong olketa!
14. Wanem nao iumi lanem from tokpiksa wea Jesus talem?
14 Long tokpiksa wea Jesus talem, hem sei “olketa samting long laef wea man savve wari abaotem, and riches wea savve switim man” savve mekem iumi no gohed strong for worshipim Jehovah. (Matt. 13:22) Datwan bae no happen sapos iumi satisfae long wanem iumi garem and luksavve iumi stap olsem stranger long disfala world. Iumi bae garem simpol laef and mekem Kingdom nao first samting long laef bilong iumi.—Matt. 6:22.
“World Bae Finis”
15. Wanem nao John talem abaotem disfala world?
15 Nara reason why olketa tru Christian stap olsem “pipol bilong difren kantri and olketa stranger” hem bikos olketa luksavve world bilong Satan klosap for finis. (1 Pet. 2:11; 2 Pet. 3:7) Samting wea iumi disaedem, laekem, and goal bilong iumi nao showimaot datwan. Aposol John talem olketa Christian for no lovem world and olketa samting long world bikos “world bae finis and evri samting wea pipol long world laekem bae finis tu.” Bat “man wea duim wanem God hem laekem bae stap for olowe.”—1 John 2:15-17.
16. Wanem nao iumi savve duim for showimaot iumi pipol bilong God?
16 Jehovah talem olketa Israelite sapos olketa obeyim hem bae olketa kamap ‘spesol pipol bilong hem.’ (Ex. 19:5) Taem olketa Israelite obeyim God, wei wea olketa worshipim hem and living bilong olketa hem difren from olketa nara nation. Pipol bilong Jehovah distaem tu difren from pipol long world. Bible sei: “Wei wea [God] kaen tumas teachim iumi for heitim evri samting wea God no laekem, and for heitim wanem pipol long disfala world laekem. Hem teachim iumi tu for garem gudfala tingting, for duim samting wea stret, and for faithful long God taem iumi stap long disfala world. Iumi mas duim olsem taem iumi weitim datfala nambawan samting wea iumi hope for kasem, and weitim tu glory bilong nambawan God and bilong man wea sevem iumi, Christ Jesus, for showaot. Christ givim laef bilong hem for sevem iumi mekem iumi no duim enikaen nogud samting and for hem mekem iumi klin for iumi savve kamap spesol pipol bilong hem wea strong for duim olketa gud samting.” (Titus 2:11-14) “Pipol” bilong Jehovah nao hem olketa anointed Christian and staka million “nara sheepsheep” wea helpem olketa.—John 10:16.
17. Why nao olketa Christian bae hapi from olketa stap olsem stranger long nogud world bilong Satan?
17 “Nambawan samting” wea olketa anointed Christian hope for kasem hem for rul witim Christ long heven. (Rev. 5:10) Olketa nara sheepsheep garem hope for stap olowe long earth. Taem datwan kamap tru, olketa nara sheepsheep bae no stap olsem stranger moa long world. Bae olketa garem naesfala haos and staka gud samting for kaikaim and drinkim. (Ps. 37:10, 11; Isa. 25:6; 65:21, 22) Olketa bae no olsem olketa Israelite wea forgetim Jehovah. Evritaem bae olketa tingim samting wea olketa kasem hem from Jehovah, “God bilong full earth.” (Isa. 54:5) Long future, olketa anointed Christian and olketa nara sheepsheep bae hapi narawe bikos olketa stap olsem stranger long nogud world bilong Satan distaem.
Wanem Nao Ansa Bilong Iu?
• Wanem nao olketa faithful man bifor duim wea showimaot olketa stap olsem stranger?
• Wanem nao olketa Christian bifor duim wea showimaot olketa difren from pipol long world?
• Long wanem wei nao olketa tru Christian no barava mekius long world?
• Why nao bae iumi hapi from iumi stap olsem stranger long nogud world bilong Satan?
[Piksa long page 18]
Olketa Christian bifor no joinim olketa hapitaem wea pipol raf and durong