Jehovah “Sevem” Iumi Distaem Tu
“Jehovah bae helpem olketa and sevem olketa.”—PS. 37:40.
1, 2. Wanem nao Bible talem abaotem Jehovah wea savve strongim iumi?
SAPOS iu lukluk long shadow bilong eni samting long morning, bae long aftanun datfala shadow hem muv nao. Bat Jehovah hem no olsem shadow wea savve muv. Hem nating savve change. (Mal. 3:6) Bible hem sei: “Hem no savve change olsem shadow wea muv.” (Jas. 1:17) Disfala toktok abaotem Jehovah hem barava strongim iumi taem iumi kasem hard taem. Hao nao olsem?
2 Olsem iumi storyim long study bifor diswan, Jehovah hem “sevem” pipol bilong hem long bifor. (Ps. 70:5) Hem evritaem duim wanem hem talem. Dastawe pipol bilong God distaem fit for trustim hem. Olketa savve hem bae “helpem olketa and sevem olketa.” (Ps. 37:40) Long wanem wei nao Jehovah sevem pipol bilong hem distaem? Waswe long iumi wanwan, hem savve sevem iumi tu?
God Sevem Iumi Taem Pipol Againstim Iumi
3. Why nao olketa man no savve stopem pipol bilong Jehovah for preach?
3 Nomata wanem Satan hem duim for againstim iumi, hard tumas for hem stopem Olketa Jehovah’s Witness for worshipim Jehovah. Bible talem iumi finis: “Olketa samting wea olketa iusim for faetem iu bae iusles nomoa, and eni man wea tok againstim iu bae iu judgem hem olsem rabis man.” (Isa. 54:17) Olketa man trae for stopem pipol bilong God for no preach, bat diswan nating stopem olketa nomoa. Tingim tufala samting wea happen.
4, 5. Long 1918, wanem nao kasem pipol bilong Jehovah? Wanem nao happen bihaen?
4 Long 1918, olketa bigman bilong religion barava againstim pipol bilong Jehovah from olketa laek stopem preaching waka. Long May 7, gavman long America talem police for kasholem Joseph F. Rutherford, wea hem nao brata wea lukaftarem preaching waka long datfala taem. Olketa kasholem samfala nara brata tu wea waka witim hem. No longtaem bihaen, olketa putim Brata Rutherford witim olketa brata hia long prison, nomata olketa no guilty. Waswe, datwan stopem preaching waka nao? Nating nomoa!
5 Tingim moa datfala toktok bilong Jehovah: “Olketa samting wea olketa iusim for faetem iu bae iusles nomoa.” Long March 26, 1919, seknomoa Brata Rutherford and olketa nara brata hia aot from prison. Long May 5, 1920, kot hem talem hao olketa nating guilty nomoa. Olketa brata hia gohed moa for duim waka bilong olketa for Kingdom. Wanem nao happen bihaen? Distaem staka pipol nao worshipim Jehovah! Evri samting hia showimaot Jehovah nao fit for kasem praise from hem nao “sevem” pipol bilong hem.—1 Cor. 3:7.
6, 7. (a) Wanem nao kasem olketa Witness long Germany taem Hitler hem rul? Wanem nao happen bihaen? (b) Samting wea kasem pipol bilong Jehovah start kam long 1918 hem showimaot wanem?
6 Tingim nara samting wea happen. Long 1934, Hitler wea rulim Germany hem talem bae hem finisim evri Jehovah’s Witness long datfala kantri. Hem no tok nating nomoa. Olketa kasholem nao staka brata and sista and putim olketa long prison. Olketa duim olketa nogud samting long staka thousand Witness. Olketa killim dae tu staka handred brata and sista taem olketa stap long olketa raf prison. Waswe, Hitler hem finisim evri Witness? Waswe, hem stopem preaching waka long Germany? Barava nomoa nao! Taem olketa brata hia kasem hard taem olsem, olketa gohed nomoa for preach haed. Bihaen gavman bilong Hitler hem lus, olketa brata free for gohed preach moa. Distaem winim 165,000 brata and sista nao stap long Germany. Tru tumas, Jehovah “sevem” pipol bilong hem. Hem duim wanem hem talem finis: “Olketa samting wea olketa iusim for faetem iu bae iusles nomoa.”
7 Olketa samting wea kasem pipol bilong Jehovah start kam long 1918 barava showimaot hao Jehovah bae no letem eni samting finisim evri pipol bilong hem. (Ps. 116:15) Bat waswe long iumi wanwan? Long wanem wei nao Jehovah savve sevem iumi?
Waswe, Jehovah Savve Sevem Iumi Wanwan?
8, 9. (a) Why nao iumi savve Jehovah no promis for sevem laef bilong iumi wanwan? (b) Wanem nao iumi mas luksavve long hem?
8 Iumi savve Jehovah no promis for sevem laef bilong iumi wanwan evritaem. Bat iumi garem sem tingting olsem thrifala Hebrew boy wea les for baodaon long datfala gold idol bilong King Nebuchadnezzar. Olketa no ting for Jehovah mas sevem laef bilong olketa. (Readim Daniel 3:17, 18.) Bat hem nao wanem hem happen. Jehovah sevem thrifala boy hia taem olketa man bilong Nebuchadnezzar torowem olketa insaed long fire. (Dan. 3:21-27) Nomata olsem, Jehovah no sevem laef bilong staka man long bifor. Olketa rabis man killim dae staka man wea worshipim Jehovah.—Heb. 11:35-37.
9 Taem nogud samting kasem olketa man wanwan distaem, Jehovah garem paoa for “sevem” laef bilong olketa. Bat taem wanfala nogud samting kasem iumi and then no longtaem bihaen hem finis, waswe, iumi barava savve datwan hem finis bikos Jehovah nao sevem iumi? Nomoa, iumi no barava savve. Nomata olsem, sapos kaen samting olsem kasem iumi, maet iumi tingse Jehovah nao sevem laef bilong iumi. Hem no fitim eni man for daotem tingting bilong iumi. Bat iumi mas luksavve tu hao staka brata and sista olketa dae taem pipol againstim olketa, olsem hem happen long taem bilong Hitler. Olketa narawan dae taem seknomoa wanfala samting kasem olketa. (Eccl. 9:11) Maet iumi tingting olsem, ‘Waswe, olketa hia dae bikos Jehovah no “sevem” laef bilong olketa?’ Nomoa.
10, 11. Why nao man no garem paoa for stopem dae? Wanem nao Jehovah fit for duim?
10 Tingim diswan: Man no garem paoa for stopem dae. Bible hem sei no eni man savve “sevem laef bilong hemseleva from Sheol,” or Hades, wea hem nao grev. (Ps. 89:48) Bat waswe, Jehovah garem paoa for stopem dae? Wanfala sista wea stap long taem wea Hitler hem rul, hem tingim samting wea mami bilong hem talem taem samfala brata and sista dae long olketa raf prison. Hem sei: “Sapos man wea dae no savve laef bak moa, dae hem strong winim God nao, iaman?” Iumi savve God nao garem paoa for stopem dae! (Ps. 36:9) Jehovah no forgetim olketa wea stap long Sheol, or Hades. Hem bae sevem evriwan long olketa.—Luke 20:37, 38; Rev. 20:11-14.
11 Bat long distaem, Jehovah savve helpem iumi long laef bilong iumi. Iumi bae storyim thrifala wei wea Jehovah duim diswan.
God No Letem Eni Samting for Spoelem Wei wea Iumi Fren Witim Hem
12, 13. Why nao wei for fren gud witim God hem important winim eni nara samting? Wanem nao Jehovah givim kam for helpem iumi?
12 Wei wea iumi fren gud witim Jehovah hem important winim eni nara samting, dastawe Jehovah bae no letem eni samting for spoelem datwan. (Ps. 25:14; 63:3) Sapos iumi no fren witim Jehovah, laef bilong iumi distaem bae iusles nomoa and bae iumi no garem eni hope long future.
13 Iumi hapi tumas from Jehovah givim plande samting long iumi mekem iumi savve fren gud witim hem. Hem givim kam Bible, holy spirit, and olketa brata and sista for helpem iumi. Sapos iumi laek kasem gud samting from olketa samting hia, iumi mas studyim Bible evritaem. Datwan bae strongim faith bilong iumi and hope bilong iumi. (Rom. 15:4) Iumi savve askem God for givim holy spirit bilong hem long iumi. Datfala paoa wea God givim long iumi bae helpem iumi for no duim eni samting wea bae mekem iumi no fren gud witim hem. (Luke 11:13) Sapos iumi followim wanem faithful and wise slave talem long olketa buk bilong iumi and long olketa meeting, assembly, and convention, iumi bae kasem spiritual “kaikai long barava taem.” (Matt. 24:45) Evri samting hia bae helpem iumi for fren gud witim God.—Jas. 4:8.
14. Wanem story nao showimaot Jehovah bae no letem eni samting spoelem wei wea iumi fren witim hem?
14 Tingim moa datfala dadi and mami wea iumi storyim finis long study bifor diswan. Tu-thri day bihaen olketa herem dota bilong tufala Theresa hem lus, olketa herem hao samwan nao killim hem dae.a Dadi hem ting go bak olsem: “Mi prea long Jehovah for hem protectim dota bilong mi. Bat taem mi herem samwan killim hem dae, firstaem mi tingse Jehovah no herem prea bilong mi. Bat mi savve Jehovah no promis for sevem laef bilong pipol wanwan. Mi gohed for askem Jehovah for helpem mi minim diswan. Taem mi tingim hao Jehovah bae no letem eni samting for spoelem wei wea iumi fren gud witim hem, datwan hem strongim mi. Wei for fren gud witim Jehovah nao hem barava important samting bikos datwan nomoa savve mekem iumi kasem laef olowe. So mi luksavve Jehovah protectim Theresa. Hem faithful long Jehovah go kasem taem hem dae. Mi hapi taem mi tingim hao Jehovah bae no forgetim dota bilong mi.”
God Helpem Iumi Taem Iumi Sik
15. Taem iumi sik big, Jehovah savve helpem iumi long wanem wei?
15 Jehovah savve helpem iumi tu ‘taem iumi sik’ olsem hem helpem David. (Ps. 41:3) Iumi savve Jehovah bae no duim mirakol for finisim sik bilong iumi, bat hem savve helpem iumi. Long wanem wei? Olketa toktok long Bible savve helpem iumi for tingting gud bifor iumi disaedem wanem kaen treatment nao iumi laekem and olketa nara samting tu. (Prov. 2:6) Olketa Wastaoa and Awake! magasin savve storyim olketa difren kaen sik wea pipol savve kasem and wanem nao savve helpem olketa. Jehovah savve givim iumi “strong wea winim wanem iumi garem” for helpem iumi long nogud samting wea kasem iumi. Datfala paoa savve helpem iumi for faithful long hem tu nomata wanem nao savve happen long iumi. (2 Cor. 4:7) Olketa samting hia savve helpem iumi for tingim Jehovah firstaem and no warim tumas sik bilong iumi.
16. Wanem nao helpem wanfala brata taem big sik kasem hem?
16 Tingim datfala young brata wea iumi storyim long study bifor diswan. Long 1998, hem herem hao big sik wea kasem hem bae gogo mekem body bilong hem no savve muv. Distaem hem no savve muvim body bilong hem nao.b Wanem nao helpem hem feisim sik bilong hem? Hem sei: “Samfala taem mi feel nogud tumas and mi tingse sapos mi dae, bae mi no safa nao. Taem mi feel nogud olsem, mi prea long Jehovah for hem helpem mi long thrifala wei, olsem for no wari, no givap kwiktaem, and for gohed strong. Mi savve Jehovah herem olketa prea hia. Taem mi tingim laef wea mi bae kasem long niu world wea mi bae wakabaot moa, teistim naesfala kaikai, and story moa witim famili bilong mi, datwan mekem mi for no wari. Nomata disfala sik mekem laef bilong mi no isi, Jehovah helpem mi for no givap kwiktaem. Jehovah helpem mi for gohed strong, mekem mi faithful long hem and no letem olketa nara samting spoelem wei wea mi fren witim hem. Jehovah hem lukaftarem mi taem mi sik, olsem hem duim for David.”—Isa. 35:5, 6.
God Givim Iumi Wanem Iumi Needim
17. Wanem nao Jehovah promis for duim for iumi? Wanem nao diswan minim?
17 Jehovah promis for givim iumi wanem iumi needim. (Readim Matthew 6:33, 34 and Hebrews 13:5, 6.) Datwan no minim Jehovah bae duim mirakol for givim datwan or iumi no need for waka nao. (2 Thess. 3:10) Bat Jehovah promis olsem: Sapos Kingdom bilong God hem important long iumi winim eni nara samting and iumi waka hard for kasem selen, Jehovah bae helpem iumi for kasem wanem iumi needim. (1 Thess. 4:11, 12; 1 Tim. 5:8) Hem savve duim datwan long wei wea iumi no tingim. Maet wanfala brata or sista nao givim samting wea iumi needim or maet hem givim iumi waka for selen.
18. Wanem story nao showimaot iumi savve kasem wanem iumi needim?
18 Tingim datfala mami wea iumi storyim long study bifor diswan. Taem hem witim gele bilong hem muv go long nara ples, hem lukaotem waka bat hem no kasem. Hem sei: “Mi go preaching long morning, and long aftanun mi lukaotem waka. Mi tingim hao wantaem mi go long stoa for baem milk. Mi lukluk long olketa vegetable, bat mi no garem selen for baem. Mi barava feel wikdaon. Bat taem mi kasem haos, mi lukim samwan putim staka vegetable nao long verandah. Hem staka kaikai tumas. Mi krae and mi thankiu long Jehovah.” Sista hia herem wanfala brata long kongregeson nao givim kam olketa vegetable from garden bilong hem. Hem raet go long disfala brata and hem sei: “Nomata mi barava thankiu tumas long iu from iu givim kam datfala kaikai, mi thankiu long Jehovah tu from hem iusim iu for showimaot hem lovem mi.”—Prov. 19:17.
19. Taem bigfala trabol hem kam, iumi savve Jehovah bae duim wanem? Wanem nao iumi mas duim distaem?
19 Taem iumi tingim samting wea Jehovah duim long bifor and distaem tu, datwan mekem iumi trustim hem go moa. Klosap nao bigfala trabol bae kasem world bilong Satan, and long datfala taem nao bae iumi barava needim Jehovah for helpem iumi. Iumi savve trustim hao Jehovah bae helpem pipol bilong hem. Olketa bae hapi and liftimap hed bilong olketa from olketa savve klosap nao God bae sevem olketa. (Luke 21:28) So nomata wanem hard taem kasem iumi distaem, iumi mas trustim Jehovah from hem nao God wea no savve change and hem nao bae “sevem” iumi.
[Olketa Footnote]
a Datfala story “Coping With an Unspeakable Tragedy,” hem stap long Awake! bilong July 22, 2001, page 19-23.
b Lukim datfala story “Sustained by My Faith—Living With ALS,” long Awake! bilong January 2006, page 25-29.
Waswe, Iu Savve Long Ansa?
• Long wanem wei nao Jehovah sevem olketa wea seknomoa dae?
• Why nao wei for fren gud witim God hem important winim eni nara samting?
• Promis wea Jehovah talem for givim iumi wanem iumi needim hem minim wanem?
[Piksa long page 8]
Brata Rutherford and olketa brata hia aot from prison, and bihaen datwan kot talem hao olketa no guilty
[Piksa long page 10]
Jehovah savve helpem iumi ‘taem iumi sik’