Jehovah Provaedem Wanem Iumi Needim and Protectim Iumi

1, 2. Wanem nao samfala samting wea iumi evriwan no semsem long hem?

JEHOVAH nao startim famili. (Eph. 3:14, 15) Bat nomata iumi kam from sem famili, iumi garem olketa difren wei and laef bilong iumi hem no semsem. Maet samfala stap witim dadi and mami for full laef bilong olketa. Maet olketa narawan dadi and mami dae from olketa sik, kasem accident, or from nara nogud samting. And samfala narawan no savve hu nao dadi or mami bilong olketa.

² Iumi evriwan insaed spiritual famili bilong Jehovah and wei wea iumi lanem truth hem no semsem tu. Maet iu born long truth, and dadi and mami teachim iu for followim olketa Bible principle. (Deut. 6:6, 7) Or maet iu wanfala long staka thousand wea lanem truth taem wanfala brata or sista hem study witim iu.—Rome 10:13-15; 1 Tim. 2:3, 4.

3. Wanem nao iumi evriwan semsem long hem?

³ Nomata iumi evriwan difren, bat iumi semsem long samfala samting. Iumi evriwan born sin, iumi no perfect, and iumi savve dae bikos Adam no obeyim God. (Rome 5:12) From iumi worshipim Jehovah, hem fitim for iumi sei Jehovah hem “Dadi bilong iumi.” Pipol bilong God long bifor talem disfala toktok wea stap long Isaiah 64:8: “Jehovah, iu nao Dadi bilong mifala.” And tu, long prea wea Jesus teachim long olketa disaepol, hem sei: “Dadi bilong mifala long heven, mifala laekem nem bilong iu for holy.”—Matt. 6:9.

4, 5. Wanem nao bae iumi storyim wea bae strongim love bilong iumi for Jehovah?

⁴ Dadi bilong iumi long heven lukaftarem and protectim pipol wea worship hem. Long Psalm 91:14 Jehovah sei: “Mi bae sevem hem [man wea worshipim Jehovah] bikos hem lovem mi. Mi bae protectim hem bikos hem savve long nem bilong mi.” From Jehovah lovem pipol bilong hem, hem sevem olketa from olketa enemy and hem protectim olketa mekem olketa no finis.

⁵ For strongim love bilong iumi for Dadi bilong iumi long heven, bae iumi storyim wei wea Jehovah (1) hem provaedem evri samting wea iumi needim, (2) hem protectim iumi, and (3) hem best fren bilong iumi. Taem iumi storyim thrifala point hia, hem gud for ting raonem wei wea iumiseleva fren witim God, and wanem iumi savve duim for mekhae long Dadi bilong iumi. And tu, hem gud for tingim olketa blessing wea Jehovah promis for givim long olketa wea fren gud witim hem.—Jas. 4:8.

JEHOVAH PROVAEDEM EVRI SAMTING WEA IUMI NEEDIM

6. Wanem nao showimaot Jehovah givim “evri gud and perfect present”?

⁶ Disaepol James sei: “Evri gud and perfect present hem from antap. Hem kam from Dadi bilong olketa laet long skae.” (Jas. 1:17) Laef bilong iumi hem nambawan present from Jehovah. (Ps. 36:9) Sapos iumi duim wanem God laekem, bae iumi kasem staka blessing distaem and laef olowe long niu world. (Prov. 10:22; 2 Pet. 3:13) Bat from iumi born sin, iumi no perfect and iumi savve dae, hao nao bae iumi kasem olketa blessing hia?

7. Wanem nao God duim mekem iumi savve fren gud witim hem?

⁷ Jehovah provaedem staka samting for iumi. From hem kaen tumas, datwan mekem hem laek for sevem iumi. Olsem iumi lanem, iumi evriwan born sin and kasem wei for no perfect from Adam. (Rome 3:23) Nomata olsem, from Jehovah lovem iumi, hem duim samting mekem iumi savve fren gud witim hem. Aposol John sei: “Love wea God garem for iumi hem showaot taem hem sendem kam spesol Son bilong hem long world mekem iumi savve kasem laef bikos long hem. God sendem kam Son bilong hem olsem wanfala sakrifaes for olketa sin bilong iumi mekem iumi savve fren bak witim hem. Hem duim diswan bikos hem lovem iumi no bikos iumi lovem hem.”—1 John 4:9, 10.

8, 9. Long taem bilong Abraham and Isaac, hao nao Jehovah showimaot hem provaedem evri samting wea pipol bilong hem needim? (Lukim piksa long start bilong study.)

⁸ Samting olsem 1,900 year bifor Jesus hem born, wanfala samting wea happen long laef bilong Abraham showimaot samting wea Jehovah bae duim mekem evri man wea obey savve kasem laef olowe. Long Hebrew 11:17-19 hem sei: “From Abraham garem faith, hem olsem hem sakrifaesim Isaac taem God testim hem. Man hia wea hapi for kasem olketa promis hem redi for sakrifaesim son bilong hem, wea hem nomoa pikinini bilong hem. Hem redi for duim datwan nomata God talem hem finis: ‘Olketa pikinini bilong iu bae born kam long laen bilong Isaac.’ Long tingting bilong hem God savve mekem son bilong hem for laef bak, and hem kasem bak son bilong hem nao, wea datwan hem piksarem samting wea bae happen long future.” Long sem wei wea Abraham willing for sakrifaesim son bilong hem Isaac, Jehovah willing for sakrifaesim Son bilong hem, Jesus Christ, for sevem olketa man.—Readim John 3:16, 36.

⁹ Masbi Isaac barava hapi tumas taem hem savve bae hem no dae! Masbi hem tinghae long wei wea Jehovah provaedem wanfala man sheepsheep for Abraham sakrifaesim. (Gen. 22:10-13) Dastawe Abraham kolem datfala ples “Jehovah-jireh,” wea minim “Jehovah bae provaedem samting.”—Gen. 22:14; footnote.

HELPEM IUMI FOR FREN BAK WITIM GOD

10, 11. Hu nao lead long ‘waka for helpem pipol fren bak witim God,’ and hao nao olketa duim datwan?

¹⁰ Taem iumi ting raonem evri samting wea Jehovah provaedem for iumi, iumi luksavve hard for iumi fren witim God sapos Jesus no dae for iumi. Paul sei: “Iumi savve wanfala man hem dae for evriwan. Hem mas duim olsem bikos evri man dae finis. Hem dae for evriwan and hem laef bak, mekem olketa wea laef no duim nomoa wanem olketa seleva laekem, bat for olketa mas duim wanem hem laekem.”—2 Cor. 5:14, 15.

¹¹ From olketa Christian long first century lovem God and barava tinghae long privilege for worshipim hem, olketa hapi for duim “waka . . . for helpem pipol fren bak witim hem.” Waka hia nao hem for preach and mekem pipol kamap disaepol, wea diswan helpem olketa for fren witim God, and kamap olketa son bilong hem. Distaem, olketa anointed Christian duim sem waka. Olketa waka for God and Christ. Preaching waka wea olketa duim hem helpem pipol wea hambol and wea laekem tru samting for kam long Jehovah and worshipim hem.—Readim 2 Corinth 5:18-20; John 6:44; Acts 13:48.

12, 13. Wanem nao iumi savve duim for showimaot iumi tinghae long evri samting wea Jehovah givim long iumi?

¹² Olketa nara sheepsheep tinghae long Jehovah from hem provaedem evri samting wea olketa needim, so olketa waka witim olketa anointed Christian for preachim gud nius. Taem iumi duim preaching waka, iumi iusim Bible, wea hem nambawan present from God tu. (2 Tim. 3:16, 17) Taem iumi iusim Bible for teachim pipol long ministry, iumi helpem olketa for kasem laef olowe. Jehovah givim holy spirit long iumi tu. Iumi evriwan depend long holy spirit for helpem iumi long ministry. (Zech. 4:6; Luke 11:13) Yearbook of Jehovah’s Witnesses wea kamaot evri year showimaot staka gudfala samting wea kamaot from preaching waka wea iumi duim. Iumi garem bigfala privilege for duim disfala waka wea mekem Dadi bilong iumi kasem praise!

¹³ From God provaedem staka samting for iumi, hem gud for ting raonem olketa kwestin hia: ‘Waswe, mi duim best bilong mi long ministry for showimaot mi tinghae long evri samting wea Jehovah givim long mi? Wanem nao mi savve duim for kamap gud long preaching waka?’ Sapos iumi tinghae long evri samting wea God givim long iumi, Kingdom nao bae hem first samting long laef bilong iumi. Taem iumi duim datwan, Jehovah bae evritaem provaedem samting wea iumi needim. (Matt. 6:25-33) From Jehovah lovem iumi, iumi laek duim best bilong iumi for mekem hem hapi.—Prov. 27:11.

14. Taem pipol bilong God kasem hard taem, wanem nao hem duim?

¹⁴ David wea raetem psalm hem sei: “Mi poor and needim samwan for helpem mi. Jehovah, plis iu tingim mi. Iu nao helpem mi and sevem mi.” (Ps. 40:17) Staka taem nao Jehovah sevem pipol bilong hem olsem wanfala grup, especially taem olketa enemy persecutim and trae for spoelem olketa. Iumi barava tinghae long Jehovah bikos hem evritaem givim iumi wanem iumi needim for gohed faithful taem iumi kasem olketa hard taem olsem.

JEHOVAH PROTECTIM PIPOL BILONG HEM

15. Storyim example wea showimaot hao wanfala dadi hem protectim pikinini bilong hem.

¹⁵ Dadi wea lovem olketa pikinini bilong hem bae givim wanem olketa needim and protectim olketa tu. Hem bae kwiktaem trae for sevem olketa sapos laef bilong olketa stap long danger. Wanfala brata tingim yet hao dadi bilong hem protectim hem taem hem smol. Bihaen hem and dadi bilong hem kam bak from preaching waka, tufala mas katkros long wanfala stream. Big rain wea foldaon long datfala morning hem mekem stream hia for ran big. Tufala mas jamp antap samfala ston for akrosim datfala stream. Boy hia nao go firstaem long dadi bilong hem, bat from hem no step gud hem foldaon and go andanit wata tufala taem. Dadi bilong hem kwiktaem pullim hem aot from wata for sevem hem. Boy hia hem hapi tumas. Olsem tu, Dadi bilong iumi long heven protectim iumi from olketa nogud samting bilong disfala world, and from Satan wea rulim world. Jehovah nao best wan for protectim iumi.—Matt. 6:13; 1 John 5:19.

16, 17. Wanem nao Jehovah duim for helpem and protectim olketa Israelite taem olketa faetem olketa Amalekite?

¹⁶ Long year 1513 B.C.E., Jehovah protectim pipol bilong hem. Hem sevem olketa finis from wei for slave long Egypt, and duim mirakol mekem olketa savve akrosim Red Sea. Then olketa wakabaot long wilderness and kasem Rephidim, wea klosap long Maunt Sinai.

¹⁷ From profesi long Genesis 3:15 hem no kamap tru yet, masbi Satan lukaotem eni chance for attakim olketa Israelite, and long datfala taem hem luk olsem hem isi nomoa for hem duim datwan. Wanfala samting hem duim nao, hem iusim olketa Amalekite wea enemy bilong olketa Israelite. (Num. 24:20) Wanem nao Jehovah duim for protectim pipol bilong hem? Hem iusim Joshua, Moses, Aaron, and Hur. Taem Joshua and army bilong hem faetem olketa Amalekite, Moses, Aaron, and Hur standap long wanfala hill klosap long there. Long full taem wea Moses apim tufala hand bilong hem, Jehovah hem helpem olketa Israelite for win. Taem hand bilong Moses hem taed, Aaron and Hur nao holemap tufala hand bilong hem. Jehovah helpem and protectim olketa Israelite and gogo “Joshua winim Amalek and pipol bilong hem.” (Ex. 17:8-13) Bihaen datwan Moses wakem wanfala altar long there and nemim datwan “Jehovah-nissi,” wea minim “Jehovah hem sef ples bilong mi.”—Readim Exodus 17:14, 15; footnote.

PROTECTIM IUMI FROM SATAN

18, 19. Hao nao God protectim pipol bilong hem long taem bilong iumi?

¹⁸ Jehovah protectim and lovem olketa wea obeyim hem. Iumi depend long God for protectim iumi from olketa enemy, olsem olketa Israelite duim long Rephidim. Staka taem finis Jehovah protectim pipol bilong hem olsem wanfala grup from olketa attak bilong Satan. Olsem example, staka taem God protectim olketa brata bilong iumi wea kasem persecution from olketa no teksaed. Diswan happen long Germany and long olketa nara kantri taem olketa Nazi rul long olketa year long 1930 go kasem 1945. Taem iumi readim olketa laef story and olketa experience insaed olketa Yearbook wea showimaot Jehovah protectim pipol bilong hem wea kasem persecution, datwan strongim wei wea iumi trustim Jehovah.—Ps. 91:2.

¹⁹ And tu, Jehovah iusim organization and olketa pablikeson for givim iumi olketa reminder wea protectim iumi. Tingim hao olketa reminder hia barava helpem iumi. Pipol long world laekem tumas sex, alcohol, and olketa rabis piksa. Bat Jehovah givim iumi olketa important reminder and helpem iumi for stap klia long eni samting wea savve spoelem wei wea iumi fren witim hem. Olsem example, no longtaem go nomoa iumi kasem reminder from Dadi bilong iumi long heven for no associate witim nogud pipol long olketa social networking Web site.a—1 Cor. 15:33.

20. Long wanem wei nao iumi kasem protection and instruction long kongregeson?

²⁰ Taem iumi followim kaonsel wea Jehovah givim long iumi, datwan showimaot ‘Jehovah hem lanem iumi.’ (Isa. 54:13) Olketa kongregeson hem olsem sef ples wea iumi savve kasem protection and instruction. Iumi savve kasem help and kaonsel long Bible from olketa elder. (Gal. 6:1) Jehovah iusim olketa man hia wea “olsem present” for lukaftarem iumi gud. (Eph. 4:7, 8) So wanem nao iumi shud duim sapos olketa elder kaonselem iumi? Iumi shud followim wanem olketa talem. Sapos iumi duim datwan, bae Jehovah blessim iumi.—Heb. 13:17.

21. (a) Wanem nao iumi laek for duim? (b) Wanem nao bae iumi storyim long next study?

²¹ Iumi laek for depend long holy spirit and followim olketa instruction wea kam from Dadi bilong iumi long heven. And tu, iumi mas ting raonem nambawan example bilong Jesus and traem best for followim hem. From Jesus “obeyim God . . . gogo hem dae” hem kasem bigfala reward. (Phil. 2:5-11) Iumi tu bae kasem blessing sapos iumi barava trustim Jehovah. (Prov. 3:5, 6) Iumi laek for depend evritaem long Jehovah wea provaedem evri samting wea iumi needim and protectim iumi gud winim eni narawan. Hem bigfala privilege for worshipim hem and datwan mekem iumi barava hapi! Long wanem wei nao Jehovah hem best fren bilong iumi? Bae iumi ansarem datfala kwestin long next study, wea datwan bae mekem love bilong iumi for Jehovah kamap moa strong.