Muv Ahed—Kamap Moabeta

TAEM iu firstaem lane hao for followim olketa Bible principle, tingting, toktok and fasin wea iu garem for longtaem finis start for change. Iu mekem planti long olketa change hia bifor iu joinim Theocratic Ministry Skul. Maet distaem iu dedicatem finis laef bilong iu long Jehovah. Waswe, hem minim iu no need for muv ahed moa? Nomoa nao. Baptism bilong iu hem start nomoa.

Disaepol Timothy hem serve olsem elder finis taem Paul talem hem for “ting raonem” kaonsel wea hem kasem, and olketa privilege bilong service wea hem kasem—for “tingting strong” long olketa samting hia—mekem ‘wei wea hem muv ahed savve showaot klia long evriwan.’ (1 Tim. 4:12-15) Nomata iu just start for followim wei bilong truth, or iu followim Christian wei for longtaem finis, iu shud interest for muv ahed.

Savve and Wei for Change

Long Ephesians 3:14-19, iumi readim hao aposol Paul prea for olketa brata bilong hem bae “barava fit for minim . . . wanem nao waed and long and hae and deep” bilong truth. For help long diswan, Jesus givim olketa present olsem man for teach, stretem, and buildimap kongregeson. Wei for ting raonem word bilong God evritaem, witim help from olketa teacher wea garem savve, savve helpem iumi for “growap” long spiritual wei.—Eph. 4:11-15.

Insaed long disfala wei for grow hem for ‘kamap niu from paoa wea muvim mind bilong iu.’ Insaed diswan hem for mekem wanfala strongfala wei for tingting wea wan mind witim tingting bilong God and Christ. Hem needim iumi for evritaem herem tingting bilong tufala, mekem iumi savve “werem niufala fasin.” (Eph. 4:23, 24) Taem iu studyim olketa Gospel, waswe, iu ting long olketa samting wea happen insaed laef bilong Christ olsem wanfala example for iu followim? Waswe, iu trae for luksavve long samfala fasin bilong Jesus and then barava trae hard for followim?—1 Pet. 2:21.

Olketa samting wea iu storyim long narawan savve showimaot sapos iu muv ahed gud or nomoa. Olketa wea werem finis datfala niufala fasin no talem samting wea no honest, spoelem man, dirty, or wea nogud. Bat, toktok bilong olketa hem “gud for buildimap . . . mekem hem savve talem gudfala samting long olketa wea herem.” (Eph. 4:25, 26, 29, 31; 5:3, 4; Jude 16) Toktok bilong olketa long olketa kongregeson meeting and olketa narataem showimaot hao truth hem go ahed for changem laef bilong olketa.

Sapos distaem iu no “seksek olabaot olsem wave pushim iumi from evri kaen teaching wea olsem wind,” diswan tu showimaot wei wea iu muv ahed. (Eph. 4:14) Olsem example, hao nao wei wea world pushim kam staka niu idea and hapitaem affectim iu? Waswe, diswan mekem iu laek for iusim taem wea iu needim for olketa spiritual responsibility for aftarem kaen samting olsem? For duim olsem savve stopem iu for muv ahed long spiritual wei. Hem barava moa wise for baem taem for olketa spiritual samting!—Eph. 5:15, 16.

Wei wea iu deal witim nara pipol savve showimaot tu sapos iu muv ahed long spiritual wei. Waswe, iu lane finis for “garem fasin for kea, willing for forgivim” olketa brata and sista bilong iu?—Eph. 4:32.

Wei wea iu muv ahed for duim samting followim wei bilong Jehovah shud showaot insaed long kongregeson and long famili bilong iu tu. Hem shud showaot tu long skul, long pablik, and long ples wea iu waka. (Eph. 5:21–6:9) Sapos long olketa difren samting hia iu showimaot long wei wea moa big fasin wea followim God, hem minim wei wea iu muv ahed hem showaot klia.

Iusim Present Bilong Iu

Jehovah givim each wan long iumi olketa difren kaen savve. Hem expectim iumi for iusim olketa hia for helpem narawan long wei wea thru long iumi, bae hem savve showimaot kaenfala fasin wea man no fit for kasem. Abaotem diswan aposol Peter hem raet: “Long wei wea man wanwan kasem present, iusim diswan for servem narawan olsem gudfala servant iusim kaeness bilong God wea man no fit for kasem.” (1 Pet. 4:10) Waswe, iu iusim present bilong iu long gudfala wei?

Peter talem moa: “Sapos eniwan hem toktok, letem hem talem olketa holy toktok bilong God.” (1 Pet. 4:11) Disfala verse strongim responsibility bilong iumi hao samting iumi talem mas barava wan mind witim Word bilong God, mekem God nao datwan wea kasem glory. Wei wea iumi talem samting shud givim glory long Jehovah tu. Training wea iu kasem long Theocratic Ministry Skul savve helpem iu for iusim present bilong iu long wei olsem—mekem God kasem glory from wei wea iu helpem olketa narawan. From diswan nao goal bilong iu, hao nao bae iu luksavve sapos iu muv ahed gud long disfala Skul?

Winim wei for tingim haomas point iu waka long hem finis insaed tok kaonsel pepa or kaen assignment wea iu kasem, ting raonem haomas nao disfala training hem mekem sakrifaes bilong praise wea iu givim long God kamap moabeta. Skul hem preparem iumi for kamap moabeta long field ministry. So askem iuseleva: ‘Waswe, mi preparem wanem mi bae story abaotem long field service? Waswe, mi lane hao for interest long olketa wea mi witness long olketa? Waswe, mi putim wanfala faondeson for olketa return visit long wei for talem wanfala kwestin wea mi bae ansarem next taem? Sapos mi studyim Bible witim samwan, waswe, mi trae for kamap moabeta olsem wanfala teacher wea savve kasem heart?’

No markem wei wea iu muv ahed witim olketa privilege bilong service wea iu kasem. Wei wea iu muv ahed hem showaot no long wei wea iu kasem wanfala assignment, bat long wanem iu duim witim datwan. Sapos iu kasem wanfala assignment for duim teaching, askem iuseleva: ‘Waswe, mi really iusim gudfala wei for teach? Waswe, mi iusim datfala information long wei wea bae barava affectim laef bilong olketa wea lisin?’

Disfala encouragement for iusim present bilong iu minim iu nao mas startim samting. Waswe, iu nao wan wea invaetem narawan for waka witim iu long field ministry? Waswe, iu lukaotem eni wei wea iu savve helpem olketa long kongregeson wea niu, young, or sik? Waswe, iu volunteer for klinim Kingdom Hall or for help long olketa difren wei long olketa convention and assembly? Waswe, iu savve auxiliary pioneer samfala taem? Waswe, iu fit for serve olsem wanfala regular pioneer or help long wanfala kongregeson wea garem bigfala need? Sapos iu wanfala brata, waswe, iu trae hard for kasem olketa spiritual mark for olketa ministerial servant and elder? Wei wea iu willing for help and acceptim responsibility hem showimaot hao iu muv ahed. —Ps. 110:3.

Part wea Savve Bilong Iu Hem Duim

Sapos iu feel iu no savve duim tumas samting from savve bilong iu abaotem Christian living hem smol, no wari. Word bilong God savve mekem “man wea no garem savve for kamap wise.” (Ps. 19:7; 119:130; Prov. 1:1-4) Wei for followim kaonsel from Bible helpem iumi for kasem gud samting from wisdom bilong Jehovah wea perfect, wea hem barava moabeta winim eni savve wea iumi bae kasem from samting iumi experiencem. Nomata olsem, taem iumi muv ahed long wei wea iumi servem Jehovah, iumi kasem barava gudfala savve. Hao nao iumi savve iusim disfala savve long gudfala wei?

From hem deal finis witim olketa difren samting wea savve kasem iumi long laef, wanfala man maet sei: ‘Mi feisim diskaen samting finis. Mi savve wanem for duim.’ Waswe, diswan hem wisefala wei for deal witim samting? Proverbs 3:7 givim disfala warning: “No kamap wise long eye bilong iuseleva.” From iumi experiencem finis staka samting, diswan shud helpem iumi for tingim moa samting taem iumi deal witim samting wea happen long laef. Bat sapos iumi muv ahed long spiritual wei, olketa experience bilong iumi shud mekem mind and heart bilong iumi luksavve hao iumi needim blessing bilong Jehovah sapos iumi laek for win. So, wei wea iumi muv ahed, hem showaot no long wei for trustim iumiseleva bat long wei wea iumi kwiktaem tan long Jehovah for hem directim iumi long living. Hem showaot long trust bilong iumi hao no eni samting savve happen sapos hem no letem and from iumi keepim gud wei wea iumi fren witim and trustim Dadi bilong iumi long heven.

Go Ahed for Barava Trae Hard

Nomata aposol Paul hem wanfala anointed Christian wea mature long spiritual wei, hem luksavve hao hem need for go ahed for “barava trae hard” for kasem goal bilong laef. (Phil. 3:13-16) Waswe, iu garem semkaen tingting?

Wei wea iumi muv ahed hem kasem wea nao? Measurem wei wea iu muv ahed long haomas long datfala niufala fasin nao iu werem, haomas nao iu stap anda long olmaeti rul bilong Jehovah, and haomas nao iu strong for iusim savve bilong iu for honorim Jehovah. Taem iu go ahed for kasem gud samting from Theocratic Ministry Skul education, olketa fasin wea Word bilong God mekhae long hem shud showaot long wei wea moa big long toktok and teaching bilong iu. Go ahed for tingim evritaem olketa wei for muv ahed olsem. Tru nao, from iu hapi long olketa, wei wea iu muv ahed bae showaot klia.