Followim Example Bilong Jesus for Gohed Lukaot
“Gohed for lukaot and prea.”—MATT. 26:41.
WANEM NAO ANSA BILONG IU?
Long wanem wei nao prea bilong iumi showimaot iumi gohed for lukaot?
Wanem nao showimaot iumi gohed for lukaot taem iumi duim preaching waka?
Why nao hem important for iumi gohed lukaot taem iumi kasem hard taem, and hao nao iumi savve duim datwan?
1, 2. (a) Olketa wanem kwestin nao maet iu tingim? (b) Waswe, olketa man wea sin savve followim perfect example bilong Jesus? Storyim example.
MAET iu ting olsem: ‘Waswe, mi savve followim example bilong Jesus for gohed lukaot?’ Maet iu tingse hem hard for duim datwan bikos Jesus hem perfect. And tu, Jesus savve long samting wea bae happen staka thousand year long future. So waswe, Jesus need for gohed lukaot? (Matt. 24:37-39; Heb. 4:15) Bae iumi storyim ansa bilong tufala kwestin hia for helpem iumi luksavve why iumi mas gohed for lukaot.
2 Waswe, man wea sin savve lane from example bilong man wea perfect? Ia, hem savve lane olsem student wea lane from gudfala teacher. Tingim man wea lane for sutsut long bow and arrow. Maet firstaem arrow wea hem sutim no kasem target, bat hem no givap and gohed for lane from teacher. From datfala teacher savve tumas hao for iusim bow and arrow, man hia mas trae for followim wanem teacher talem and duim. Datfala man mas lukluk gud long hao teacher hem standap, and hao hem holem bow and arrow. Hem isisi lane hao for pullim rope long bow, and for luksavve hao wind savve blowim arrow taem hem sut. Sapos hem traem best for followim example bilong teacher, gogo bae hem savve gud hao for sutim arrow mekem hem kasem target. Long sem wei, iumi traem best for followim example bilong Jesus mekem iumi kamap gudfala Christian.
3. (a) Wanem nao Jesus talem wea showimaot hem need for gohed lukaot? (b) Wanem nao bae iumi storyim?
3 So waswe, Jesus need for gohed lukaot? Ia. Long naet bifor Jesus dae, hem talem olketa aposol: “Gohed for lukaot witim mi.” Hem sei tu: “Iufala mas gohed for lukaot and prea, mekem iufala no foldaon long eni samting wea traem iufala.” (Matt. 26:38, 41) Jesus lukaot evritaem. Bat long datfala naet hem luksavve hem important for gohed lukaot and barava depend long Jehovah for helpem hem. Hem luksavve olketa wea followim hem tu mas gohed for lukaot. Bae iumi storyim why Jesus laekem iumi for gohed lukaot. Then iumi bae lanem thrifala wei wea iumi savve followim example bilong Jesus.
WHY JESUS LAEKEM IUMI FOR GOHED LUKAOT
4. Why nao iumi mas gohed for lukaot?
4 Wanfala reason why Jesus laekem iumi for gohed lukaot hem bikos iumi no savve long barava taem wea end bae kam. Taem Jesus stap long earth hem no savve long evri samting abaotem future. Hem sei: “No eniwan savve long wanem day and taem nao datwan bae happen. Nomata olketa angel long heven and Son tu bat no savve. Dadi bilong mi long heven nomoa savve.” (Matt. 24:36) Long datfala taem, Jesus wea hem nao “Son,” no savve long barava taem wea disfala rabis world bae finis. Waswe, iumi savve long evri samting abaotem future? Nomoa. Olsem example, iumi no savve long barava taem wea Jehovah bae sendem Son bilong hem for finisim disfala rabis world. Sapos iumi savve long datwan bae iumi no need for gohed lukaot. Olsem Jesus talem, end bae kam long taem wea iumi no expectim, so iumi mas gohed for lukaot.—Readim Matthew 24:43.
5, 6. (a) From iumi savve abaotem Kingdom, datwan shud mekem iumi for duim wanem? (b) From iumi savve long wanem Satan savve duim, why nao iumi mas gohed for lukaot?
5 Nara reason why iumi need for gohed lukaot hem bikos iumi savve long plan bilong God for future. Jesus savve long plande nambawan samting abaotem future wea staka pipol no savve. Iumi no savve long staka samting olsem Jesus, bat hem teachim iumi plande samting abaotem Kingdom bilong God and wanem Kingdom klosap for duim. Plande pipol distaem no savve long olketa tru samting. Dastawe iumi need for gohed lukaot olsem Jesus, and lukaotem eni chance for helpem pipol savve abaotem Kingdom bilong God. Iumi mas mekius long evri chance hia, bikos laef bilong pipol stap long danger!—1 Tim. 4:16.
6 Jesus luksavve long nara reason why hem need for gohed lukaot. Satan laek for trikim hem, persecutim hem, and mekem hem no faithful. Satan evritaem “weitim eni chance” for traem Jesus. (Luke 4:13) Jesus evritaem gohed for lukaot mekem hem redi for winim eni samting wea traem hem, or taem pipol againstim or persecutim hem. Satan laek for spoelem iumi tu. Iumi savve Satan hem “olsem wanfala lion wea singaot big and hem laekem tumas for kaikaim eniwan.” Dastawe, Bible talem evri Christian: “Gohed for garem gudfala tingting and gohed for lukaot.” (1 Pet. 5:8) Long wanem wei nao iumi savve duim datwan?
PREA HELPEM IUMI FOR GOHED LUKAOT
7, 8. (a) Wanem kaonsel nao Jesus talem abaotem prea? (b) Wanem example nao hem showimaot long wei for prea?
7 Bible sei prea savve helpem iumi for gohed lukaot and fren gud witim Jehovah. (Col. 4:2; 1 Pet. 4:7) No longtaem bihaen Jesus talem olketa aposol for gohed lukaot witim hem, hem sei moa: “Iufala mas gohed for lukaot and prea, mekem iufala no foldaon long eni samting wea traem iufala.” (Matt. 26:41) Waswe, datfala kaonsel hem fitim nomoa samting wea kasem Jesus and olketa aposol long datfala naet? Nomoa, hem fitim iumi tu.
8 Jesus showimaot nambawan example long wei for prea. Wanfala taem hem prea full naet long Dadi bilong hem. (Readim Luke 6:12, 13.) Tingim samting wea happen: Long wanfala evening Jesus go long wanfala maunten klosap long Capernaum. Hem savve lukim tu Sea long Galilee from datfala maunten. Taem hem start for dark, maet Jesus savve lukim olketa laet wea shaen long Capernaum and samfala vilij wea stap klosap, bat taem Jesus prea hem tingim nomoa wanem hem talem long Jehovah. Hem prea for longfala taem. Luk olsem main samting wea Jesus prea abaotem hem disison wea hem mas mekem for chusim twelvfala aposol bilong hem. Maet hem storyim tingting bilong hem abaotem each disaepol and askem Jehovah for givim hem wisdom.
9. Wanem nao iumi lanem from wei wea Jesus prea full naet?
9 Waswe, example bilong Jesus showimaot iumi mas talem longfala prea? Nomoa, bikos Jesus sei olsem abaotem olketa disaepol: “Nomata man savve laekem tumas for duim samting, maet body bilong hem no strong for duim wanem hem laekem.” (Matt. 26:41) Nomata olsem, iumi savve followim example bilong Jesus. Waswe, iumi prea long Jehovah firstaem bifor iumi disaedem eni samting wea maet affectim worship bilong iumi, famili or olketa Christian brata and sista? Waswe, iumi prea for olketa nara Christian brata and sista? Waswe, iumi prea from heart and no talem nomoa sem toktok evritaem? Iumi lanem tu hao Jesus tinghae long wei for story witim Jehovah. From iumi busy tumas, hem isi for forgetim olketa important samting. Sapos iumi prea from heart long Jehovah and story gud witim hem evritaem, datwan savve helpem iumi for gohed lukaot. (Matt. 6:6, 7) Bae iumi laek gohed fren gud witim Jehovah and bae iumi no laek duim eni samting wea bae spoelem wei wea iumi fren witim hem.—Ps. 25:14.
GOHED FOR LUKAOT TAEM IU DUIM PREACHING WAKA
10. Wanem example nao showimaot Jesus mekius long evri chance for givim witness?
10 Maet samfala waka hem isi nomoa and man no need for tingim tumas samting wea hem duim. Bat long samfala waka man need for tingting strong long wanem hem duim, and preaching waka hem olsem tu. Jesus gohed for lukaot taem hem duim waka wea Jehovah laekem hem for duim. Hem evritaem mekius long chance wea hem garem for talemaot gud nius. Olsem example, wanfala taem Jesus and olketa disaepol wakabaot full morning and olketa kasem wanfala taon wea nem bilong hem Sychar. Taem olketa kasem datfala taon olketa disaepol go baem kaikai. Jesus rest saed long well bilong datfala taon. Nomata olsem, hem gohed for lukaot and taem wanfala woman bilong Samaria kam for tekem wata, Jesus mekius long chance for witness. Nomata hem taed hem no laek for sleep or faendem excuse for no story. Bat hem preach long woman hia and datwan mekem staka pipol long datfala taon for biliv. (John 4:4-26, 39-42) Iumi savve followim example bilong Jesus for gohed lukaot and traem best for mekius long eni chance for talemaot gud nius.
11, 12. (a) Wanem nao Jesus talem long olketa wea laekem hem for duim difren samting and no preach? (b) Long wanem wei nao Jesus showimaot hem balance?
11 Samfala pipol laekem Jesus for duim olketa nara samting wea maet mekem hem for no duim preaching waka. Tingim pipol long Capernaum. Olketa tinghae tumas long wei wea Jesus healim pipol so olketa laekem hem for stap witim olketa. Bat main waka bilong Jesus hem for preach long evri ‘pipol bilong Israel wea olsem sheepsheep wea lus,’ and no long wanfala taon nomoa. (Matt. 15:24) So hem talem olketa: “Mi mas talemaot gud nius abaotem Kingdom bilong God long olketa nara taon tu, bikos hem nao why God sendem mi kam.” (Luke 4:40-44) Tru tumas, main waka wea Jesus tingim hem for preach, and hem no letem eni samting stopem hem for duim datwan.
12 Waswe, Jesus busy tumas long waka wea hem duim and hem no garem taem nao for enjoyim olketa nara samting? Waswe, hem busy tumas for preach and datwan mekem hem for no tingim pipol? Nomoa, Jesus showimaot nambawan example long wei for balance. Hem enjoyim laef and hem duim hapitaem witim olketa fren bilong hem. Jesus tingim olketa famili and hem savve long problem wea olketa kasem and wanem olketa needim. Hem kaen long olketa pikinini tu.—Readim Mark 10:13-16.
13. Long wanem wei nao iumi savve followim example bilong Jesus for balance long ministry?
13 Long wanem wei nao iumi savve followim example bilong Jesus for balance long ministry? Iumi mas no letem olketa samting long world for mekem iumi no duim preaching waka. Maet olketa fren or relative talem iumi for no duim staka samting long preaching waka and for garem sem living olsem olketa. Bat sapos iumi followim example bilong Jesus, wei for duim preaching waka nao bae important long iumi olsem kaikai. (John 4:34) Taem iumi duim preaching waka, datwan strongim wei wea iumi fren witim Jehovah and mekem iumi hapi. Bat iumi laek for balance and enjoyim olketa nara samting tu, and iumi shud no holy tumas. Olsem Jesus, iumi laek for showimaot iumi hapi for worshipim “datfala hapi God.”—1 Tim. 1:11.
GOHED FOR LUKAOT TAEM IU KASEM HARD TAEM
14. Wanem tru samting nao iumi shud no forgetim taem iumi kasem hard taem, and why nao olsem?
14 Taem Jesus kasem hard taem, hem talem strongfala kaonsel long olketa disaepol for mas gohed lukaot. (Readim Mark 14:37.) Taem iumi kasem hard taem hem important for tingim example bilong Jesus. Tufala taem Proverbs storyim wanfala tru samting wea pipol savve forgetim taem olketa kasem hard taem. Hem sei: “Man savve go long wei wea luk stret long hem bat diswan lead go long dae bihaen.” (Proverbs 14:12; 16:25) Bae laef bilong iumi and olketa wea iumi lovem stap long danger sapos iumi followim nomoa tingting bilong iumiseleva taem iumi kasem hard taem.
15. Wanem nao maet wanfala famili hed tingse hem stret for duim?
15 Olsem example, maet wanfala famili hed kasem hard taem for provaedem need bilong “olketa wea hem lukaftarem.” (1 Tim. 5:8) Maet hem tingse hem gud nomoa for acceptim wanfala waka nomata datwan bae mekem hem for no kam long olketa meeting, and no garem taem for duim famili worship and preaching waka. Sapos hem followim tingting bilong hemseleva, maet hem tingse hem stret nomoa for acceptim datfala waka. Bat datwan savve spoelem wei wea hem fren witim Jehovah. Dastawe hem important for followim kaonsel long Proverbs 3:5, 6. Solomon sei: “Trustim Jehovah long full heart bilong iu and no depend long savve bilong iuseleva. Tingim hem long evri samting wea iu duim, and hem nao bae showim iu stretfala wei for iu followim.”
16. (a) Wanem nao iumi savve lanem from wei wea Jesus evritaem depend long Jehovah? (b) Long wanem wei nao staka famili hed followim example bilong Jesus?
16 Taem Jesus kasem hard taem hem no laek followim tingting bilong hemseleva. Nomata hem wise winim eni nara man hem disaed for no depend long savve bilong hemseleva! Olsem example, taem Satan testim Jesus, evritaem Jesus ansa olsem: “Olketa Holy Raeting talem finis.” (Matt. 4:4, 7, 10) Jesus depend long wisdom bilong Dadi bilong hem for againstim Satan. Datwan showimaot Jesus hem hambol, and hem no olsem Satan wea praod. Waswe, iu tu depend long wisdom bilong Jehovah? Famili hed wea followim example bilong Jesus for gohed lukaot bae followim wanem Bible talem taem hem kasem eni hard taem. Staka famili hed distaem gohed for duim datwan. First samting long laef bilong olketa nao hem Kingdom bilong God and for worshipim Jehovah. Datwan showimaot olketa lukaftarem gud famili, and Jehovah blessim wei wea olketa traem best for provaedem wanem famili needim.—Matt. 6:33.
17. Why nao iu laek for followim example bilong Jesus for gohed lukaot?
17 Jesus showimaot nambawan example long wei for gohed lukaot. Iumi savve kasem gud samting sapos iumi followim example bilong hem. Satan laekem iumi for sleep long spiritual wei. Hem laek mekem iumi wikdaon, no strong for worshipim Jehovah, and no faithful. (1 Thess. 5:6) Iumi mas no letem Satan for winim iumi! Iumi mas gohed for lukaot olsem Jesus duim. Iumi mas prea evritaem, gohed for lukaot long preaching waka, and trustim Jehovah taem iumi kasem hard taem. Wei for duim olsem bae mekem iumi satisfae and hapi nomata disfala rabis world hem klosap for finis. Sapos iu gohed for lukaot, Jesus bae luksavve iu faithful taem hem finisim disfala rabis world, and iu bae kasem reward wea Jehovah promisim!—Rev. 16:15.
[Piksa long page 6]
Waswe, iu mekius long evri chance for preach, olsem Jesus duim?
[Piksa long page 7]
Wei wea iu helpem famili for fren gud witim Jehovah showimaot iu gohed for lukaot