“Iufala Mas Wanem Kaen Man!”
“From evri samting hia bae melt, iufala mas wanem kaen man! Iufala mas stap holy and gohed duim samting from iufala barava lovem God!” —2 PET. 3:11.
1. Why nao mek-tu leta bilong Peter encouragem olketa Christian long barava taem?
TAEM aposol Peter raetem mek-tu leta, Christian kongregeson gohed strong and kamap big nomata staka againstim olketa. So Satan iusim nara trik wea spoelem staka pipol finis. Peter sei, Satan laek spoelem iumi and hem iusim olketa laea teacher wea “tingting olowe for duim adultery” and wea “garem heart wea savve kavet tumas.” (2 Pet. 2:1-3, 14; Jude 4) Dastawe long mek-tu leta bilong Peter, hem barava encouragem olketa Christian for gohed faithful long God.
2. Wanem nao 2 Peter chapter 3 storyim? Iumi bae ting raonem olketa wanem kwestin?
2 Peter sei: “Mi tingim hem stret, taem mi laef yet for encouragem iufala and talem moa long iufala, from mi savve klosap bae mi dae . . . So mi mas barava trae hard evritaem mekem taem mi dae, iufala savve storyim moa olketa samting hia.” (2 Pet. 1:13-15) Peter savve bae hem klosap dae, and hem laekem pipol for no forgetim wanem hem talem dastawe iumi savve readim olketa toktok hia long Bible. Chapter 3 long mek-tu leta bilong Peter storyim “olketa last day” bilong world taem tokpiksa skae and earth bae finis. (2 Pet. 3:3, 7, 10) Wanem kaonsel nao Peter talem for iumi? Hao nao wei for followim datfala kaonsel bae helpem iumi for fren gud witim Jehovah?
3, 4. (a) Wanem nao Peter encouragem olketa Christian for duim? Wanem warning nao hem talem? (b) Wanem thrifala samting nao iumi bae storyim?
3 Peter storyim end bilong world bilong Satan then hem sei: “Iufala mas wanem kaen man! Iufala mas stap holy and gohed duim samting from iufala barava lovem God!” (2 Pet. 3:11, 12) Hem story olsem for barava encouragem iumi. Peter savve pipol wea duim wanem Jehovah laekem and followim wei bilong Hem bae no dae long “day wea God bilong iumi bae changem bak nogud samting.” (Isa. 61:2) Dastawe Peter sei: “Iufala wea mi lovem, iufala savve finis long olketa samting hia, so iufala mas keakea nogud laea toktok bilong olketa [laea teacher] wea no followim law bae pullim iufala, mekem iufala no followim nao wanem iufala strong for duim bifor.”—2 Pet. 3:17.
4 Peter “savve finis long olketa samting hia” dastawe hem sei olketa Christian mas keakea sapos olketa laek gohed faithful long God. Gogo aposol John talem why nao olsem. Long vision wea John lukim, Jesus aotem Satan from heven and Satan “kros tumas” long pipol “wea obeyim olketa komandment bilong God and wea duim waka for witness abaotem Jesus.” (Rev. 12:9, 12, 17) Olketa faithful anointed Christian witim “olketa nara sheepsheep” bae winim Satan. (John 10:16) Bat waswe long iumi wanwan? Waswe, bae iumi gohed faithful long God? Thrifala samting nao savve helpem iumi. First samting, iumi mas waka hard for followim olketa wei bilong God. Mek-tu, iumi mas garem gudfala wei and gohed klin long physical and spiritual wei. Mek-thri, iumi mas garem stretfala tingting abaotem olketa test wea iumi kasem. Bae iumi storyim thrifala samting hia.
Waka Hard for Followim Olketa Wei Bilong God
5, 6. Olketa wanem wei nao iumi mas trae for followim? Why nao iumi mas “barava trae hard” for duim olsem?
5 Peter sei: “Iufala mas barava trae hard for no garem faith nomoa bat duim stret samting, and garem savve, and kontrolem iufala seleva, and gohed strong, and lovem God, and olketa brata, and barava showimaot love. Sapos iufala barava duim olsem, iufala bae duim olketa gud samting and no wikdaon long waka wea iufala duim bikos iufala garem stretfala savve abaotem Lord bilong iumi, Jesus Christ.”—2 Pet. 1:5-8.
6 Iumi mas “barava trae hard” for followim olketa wei bilong God. Hem no isi for evritaem go long olketa meeting, readim Bible evriday, and for study seleva. Maet iumi need for planim gud Famili Worship evritaem mekem evriwan enjoyim and kasem gud samting. Hem bae no hard tumas sapos iumi duim evritaem.
7, 8. (a) Wanem nao samfala talem abaotem Famili Worship? (b) Wanem gudfala samting nao iufala kasem from Famili Worship?
7 Wanfala sista storyim Famili Worship olsem: “Mifala lanem staka difren samting.” Nara sista sei: “Firstaem, mi no laekem buk study for finis. Mi barava enjoyim datwan. Bat distaem from mifala duim Famili Worship, mi luksavve Jehovah savve wanem mifala needim and taem mifala needim.” Wanfala famili hed sei: “Famili Worship barava helpem mifala. From mi and waef savve studyim wanem fitim mitufala, datwan barava gud! Hem helpem mitufala for followim olketa wei bilong holy spirit, and barava hapi go moa long ministry.” Nara famili hed sei: “Olketa pikinini hapi tumas for duim research seleva and lanem staka samting. Famili Worship mekem mifala trustim Jehovah bikos hem savve long wanem mifala wari abaotem and hem ansarem olketa prea bilong mifala.” Waswe, iu garem semkaen tingting olsem abaotem Famili Worship?
8 No letem olketa samting wea no important for spoelem Famili Worship. Wanfala hasband and waef sei: “Evri Thursday for fofala week finis, samfala samting klosap stopem Famili Worship bilong mifala. Bat mifala gohed nomoa.” Maet samfala taem iumi need for changem schedule bilong iumi. Bat no missim wei for duim Famili Worship, nomata for wanfala taem!
9. Hao nao Jehovah strongim Jeremiah, and wanem nao iumi savve lanem from Jeremiah?
9 Profet Jeremiah showimaot gudfala example. Jehovah givim spiritual kaikai for strongim hem and hem barava tinghae long datwan. Datwan helpem hem for gohed strong for preach nomata staka no lisin. Hem sei: “Toktok bilong Jehovah . . . hem olsem fire wea bone insaed long mi.” (Jer. 20:8, 9) Datwan helpem hem for gohed strong long hard taem wea kamap taem Jerusalem finis. Distaem iumi garem full Bible. Taem iumi studyim gud Bible and followim tingting bilong God, iumi bae gohed strong and hapi for duim ministry, gohed faithful nomata iumi kasem test, and gohed stap klin long physical and spiritual wei olsem Jeremiah.—Jas. 5:10.
“Garem Gudfala Wei and Gohed Klin”
10, 11. Why nao iumi mas waka hard for “garem gudfala wei and gohed klin”? Wanem nao bae helpem iumi for duim datwan?
10 Iumi savve iumi stap long olketa last day. Dastawe iumi no sapraes taem pipol long world laekem tumas olketa samting wea Jehovah barava heitim olsem wei for greedy, durong, and raf. Maet Satan ting olsem: ‘Sapos mi no savve mekem pipol bilong God fraet, maet mi savve spoelem olketa.’ (Rev. 2:13, 14) Dastawe iumi mas followim wanem Peter talem. Hem sei: “Iufala mas waka hard for garem gudfala wei and gohed klin, and garem peace mekem God lukim datwan long bigfala day bilong hem.”—2 Pet. 3:14.
11 Disfala toktok “waka hard” hem klosap semsem witim toktok “barava trae hard” long 2 Peter 1:5. Jehovah savve iumi mas trae hard for “garem gudfala wei and gohed klin,” mekem rabis world bilong Satan no spoelem iumi. Iumi mas trae hard tu for protectim gud heart bilong iumi and no duim nogud samting. (Readim Proverbs 4:23; James 1:14, 15.) Iumi mas strong for againstim pipol wea konfius taem olketa lukim Christian wei bilong iumi and “gohed for tok nogud abaotem” iumi.—1 Pet. 4:4.
12. Wanem nao Luke 11:13 talem?
12 From iumi born sin, hem no isi for duim stret samting. (Rom. 7:21-25) Iumi savve duim stret samting nomoa sapos iumi prea long Jehovah, bikos hem barava givim holy spirit long olketa wea askem hem. (Luke 11:13) Holy spirit bae helpem iumi garem olketa wei wea God hapi long hem. Olketa wei hia helpem iumi taem iumi kasem test and olketa hard taem, bikos staka test bae kamap taem day bilong Jehovah kakam klosap.
Olketa Hard Taem Savve Strongim Iu
13. Taem iumi kasem hard taem, wanem nao bae helpem iumi for no givap?
13 From iumi stap yet long nogud world, enikaen hard taem bae kasem iumi. Nomata olsem, iumi no sorre tumas, bat hem gud for ting long olketa hard taem olsem taem for showimaot iu barava lovem God, strongim faith bilong iu, and trustim wanem Bible talem. James sei: “Olketa brata bilong mi, taem iufala kasem olketa difren kaen hard taem, ting long datwan olsem samting for hapi long hem, from iufala savve hao faith wea kasem test hem mekem man for no givap.” (Jas. 1:2-4) No forgetim, “Jehovah savve hao for sevem pipol wea lovem hem from hard taem.”—2 Pet. 2:9.
14. Wanem gud samting nao iu lanem from Joseph?
14 Tingim samting wea happen long Joseph, son bilong Jacob. Olketa brata bilong hem salem hem for kamap slave. (Gen. 37:23-28; 42:21) Waswe, faith bilong hem wikdaon from hem kasem barava nogud samting? Waswe, hem kros long God from datwan? Bible sei hem no kros! Joseph kasem staka nara problem tu. Gogo waef bilong Potiphar laea for sei Joseph laek for rapem hem and olketa putim hem long prison. Nomata olsem, Joseph gohed strong for lovem God. (Gen. 39:9-21) Olketa hard taem wea Joseph kasem strongim hem, and Jehovah barava blessim hem.
15. Wanem nao iumi savve lanem from Naomi?
15 Taem iumi kasem hard taem, iumi savve sorre tumas. Maet Joseph tu feel olsem. Samfala wea faithful long God bifor olketa sorre tu. Wanfala nao Naomi. Hasband witim tufala son bilong hem dae. Hem sei: “Distaem nem bilong mi Mara [wea minim “Barava Sorre”], and no Naomi, bikos Olmaeti mekem hem hard tumas for mi.” (Ruth 1:20, 21) Iumi minim why nao Naomi feel olsem. Nomata olsem, Naomi no wikdaon bat hem gohed for faithful olsem Joseph. Jehovah barava blessim Naomi. (Ruth 4:13-17, 22) Taem earth kamap paradaes, Jehovah bae finisim evri nogud samting wea Satan and rabis world bilong hem duim. ‘Iumi bae no tingim moa olketa samting bilong bifor, and hem bae no stap long heart tu.’—Isa. 65:17.
16. Iumi shud ting hao long wei for prea, and why nao olsem?
16 Nomata wanem kaen hard taem nao kasem iumi, God lovem iumi and savve strongim iumi. (Readim Romans 8:35-39.) Satan bae gohed trae hard for mekem iumi wikdaon, bat hem no savve duim datwan sapos iumi “garem gudfala tingting and gohed for prea evritaem.” (1 Pet. 4:7) Jesus sei: “Iufala mas gohed for redi and barava prea strong evritaem mekem iufala savve ranawe from olketa samting hia wea bae happen and mekem iufala savve standap front long Son bilong man.” (Luke 21:36) Taem Jesus sei for iumi “barava prea strong,” hem minim distaem nao taem for strongim wei wea iumi fren witim hem and Dadi bilong hem. Olketa wea fren gud witim Jehovah nomoa bae no dae long day bilong hem.
Gohed Busy for Duim Waka Bilong Jehovah
17. Sapos hem no isi for preach long ples bilong iu, wanem nao iu savve lanem from olketa profet?
17 Taem iumi duim olketa samting for Jehovah, datwan savve strongim iumi. Peter sei: “Iufala mas tingting gud abaotem laef bilong iufala. Iufala mas stap holy and gohed duim samting from iufala barava lovem God.” (2 Pet. 3:11) Wanfala important samting wea iumi savve duim nao hem for talemaot gud nius. (Matt. 24:14) Maet hem no isi for iumi preach long samfala ples bikos pipol les for herem iumi or pipol againstim iumi or pipol busy for duim wanem olketa seleva laekem. Semkaen samting kasem pipol bilong Jehovah bifor tu. Nomata olsem, olketa nating givap bat olketa go bak “evritaem” long pipol for talemaot message from God. (Readim 2 Chronicles 36:15, 16; Jer. 7:24-26) Wanem nao helpem olketa for no givap? Olketa savve long tingting bilong Jehovah abaotem waka wea hem givim, and no followim tingting bilong world. Olketa luksavve tu olketa garem spesol privilege for talemaot nem bilong God.—Jer. 15:16.
18. Hao nao preaching waka bae mekhae long nem bilong God?
18 Iumi tu garem privilege for talemaot nem bilong Jehovah and plan bilong hem. From iumi duim preaching waka, hem hard for olketa enemy bilong God sei no eniwan talem olketa abaotem bigfala day bilong hem. Olketa bae luksavve olsem Pharaoh tu luksavve Jehovah nao faetem olketa. (Ex. 8:1, 20; 14:25) Long datfala taem tu, evriwan bae luksavve iumi nao pipol bilong Jehovah.—Readim Ezekiel 2:5; 33:33.
19. Wanem nao iumi savve duim for showimaot iumi laek iusim gud taem wea Jehovah patient yet?
19 Peter sei: “Tingim hao Lord bilong iumi hem patient from hem laek sevem pipol.” (2 Pet. 3:15) Iumi mas gohed for iusim gud taem wea Jehovah patient yet. Wanem nao iumi savve duim? Iumi mas waka hard for “garem gudfala wei and gohed klin” mekem Jehovah hapi long iumi. Iumi mas gohed busy for duim waka bilong Kingdom and garem stretfala tingting abaotem olketa test wea kasem iumi. Sapos olsem, iumi bae kasem olketa blessing taem “niu skae and niu earth” kamap.—2 Pet. 3:13.
Waswe, Iu Tingim Yet?
• Wanem nao savve helpem iumi for followim olketa wei bilong God?
• Wanem nao bae helpem iumi for “garem gudfala wei and gohed klin”?
• Wanem nao iumi savve lanem from Joseph and Naomi?
• Why nao preaching waka hem nambawan privilege?
[Piksa long page 9]
Wanem nao bae helpem hasband for followim wei bilong God and helpem famili tu for duim datwan?
[Piksa long page 10]
Wanem nao iumi savve lanem from Joseph taem hem kasem hard taem?